اخاف احلم

[سارة محمد 200]

القصيدة دى واحدة من اعز صدقئى كتباها
وانا قررت انشره هنا بتمنى تعجبكم

ما باكتِبش القصايد فيكي بالسّاهِل
برغم انّ القصايد فيكي تستاهل
وانا عُمْري..

ما كنت فى شعرى عاجز ولا جاهل
لكن ساعة ما اقول إني هاقول فيكي..
ألاقي الحرف جوايا ما بين مقتول.. وبين قاتل
وعارفه.. كل دا مِن إيه؟
باحِسّ انّ الكلام عنِّك.. سحابه عالية فُوق فُوقي
وانا واقف على قلبي وْعلى حُبّي وْعلى شُوقي..
وبرضه لسه مش طايل!
ولما يقولوا: "غَنِّلْها..
وقُول الشعر ف عينيها عشان يِرضى عليك نِيلها
وتِعدِلْ بَخْتَك المايل"..
أَرُدّ بْكُلّ إحساسي: مَنِيش قايل..
يا مَصر الشِّعر ف عينيكي ما هوش سطرين بيتقالوا
ولا شوية كلام شعارات بيتحطّوا.. ويتشالوا
يا مَصرالشعر ف عينيكي جبال عالية
وحِمْل تقيل..
***
*يا شايلَة كْتير على اكْتافِك
ومش هَمِّك.. وبتشيلي
وساقيَه الكُلّ من دَمِّك
وبتقولي: "فِدا نِيلي"
يا غالبَه وانتِ مغلوبَهْ..
يا نِسمَه ف عِزّ صيف باردَهْ
وحُضن ف عِزّ ليل طُوبَهْ
باحبِّك.. وانتِ مش غيرِك

* * *
يا أُمّي... حِسّي بوْجودي
دا انا الكِلْمة اللي فوق سَطْرِك
طب اعمل إيه عشان خاطرِك؟
عشان خاطرِك..
أكون مَدْفَعْ..
واحارب في صفوف الجيش
واكون أجدَعْ..
واحارب في طابورالعيش
ولو ينفع..
أعيش زيّ الملايكة هاعيش..
ولا آكُل.. ولا أشرب.. ولاأحزن.. ولا أغضب
ولو كان اللي جاي أصعب.. ولا يهمِّك
ما انا اتعودت يا (غالية).. على (الغَلَيان)
وإنّ الفاضي دلوقتي.. صَبَح بيصُبّ ف الملْيَان
أنا اتعودت ع الدنيا اللي بالمقلوب
وع اللي بيتُه مَبنِي إزاز لكنْ وَاصِل
فيِحْدِف حِلْمِنا بالطوب!
يصحّيني بُكا الأشعار
فأغسل وشّي بالأخبار
واحضّر من همومي فْطار..
يكفّي قلبي طول الشهر
وابلّع لُقمتي.. بالقَهر
ولما اشبع من الأحزان..
أبوس على إيدي وش وضَهر
واقول.. نِعمَه
هتفرق إيه.. نشوف الدنيا أو.. نِعمَى؟
يا مصر القلب مش قادر يشوف غيرِك
ولا قادر ينول... خيرِك
أنا اتعوّدت يا غالية.. فمدُّقّيش
ما انا هافضل كده عايش على أمل اني بُكرة هاعيش!
واقضّي عُمري مش فارقة..
ألاقي اللقمة.. أو ما الاقيش
وانام برضُه جعان.. لكنْ...
أخاف احلَم...
او اتكلم متسمعونيش

[رووكه]

وصفت حال كل مصرى

خايف يحلم بيوم الفرح وهو شايف

أن كل يوم حداد

ربنا يصلح حال مصر ويهدئ الجميع

جميل طرحها تسلم ايديها

وتسلمى أنك شرفتى بيها المنتدى

كل الشكر والتقدير لكِ

دعواتى وتقيمى

[همسه دموع]

ربنا يهدى المصرين
ونرجع تانى مصرين
مصر شافت كتير ولسه تانى هتشوف
وهتفضل اقوى من اى وقت
سلمت يداها وسلمتى لنا لطرحها بيننا
تحياتى

[الطائر المغرد]

وصف راقى للحال بمصرنا
تحيه للمبدع
صاحب الكلمات
كلنا يعلم
مصر شالت فوق طاقتها
تحياتى

[ساحر الأحزان]

ربنا يصلح احوال الجميع

ونشوف بلدنا فى احسن حال

كلمات جميلة منك

دمتى بخير