مــصـــــر 2014 (تابع المسابقة السياسية )

[Mo7aMaD 3aLa2]

الموضوع تابع لـ


المسابقه السياسيه التحليليه



ودى


فكره المسابقه
========


- كل عضو سيقوم بعرض نظرته التحليليه الشامله لمصر الفتره القادمه

ماذا يجب ان تكون ؟ و كيف ستكون ؟ و ما هو الاسلوب الامثل و الطريقه

الاجدر لعملها لتحقيق استقرار مصر و تحقيق طموح المصريين فى العيش

بحياه كريمه و حريه و عداله و أسترجاع وحدة المصريين كما كانت .


ودة الموضوع بتاعى : =))

بداية كدة ,,

انا شايف ان الموضوع بسيط يا جماعة ,, يعنى شوية ارادة على اصرار على طموح والدنيا هتبقا حلوة :P

مش عارف معقدين الموضوع لية =)))))))))) ,,



نتكلم جد بقا,,





فـ الحقيقة الموضوع عشان اى حد يتكلم فية محتاج ترتيب شديد الدقة والعناية فـ الافكار

خصوصا اذا كنت هتتكلم عن مستقبل وحلول وتوقعات ومشاكل سياسية ,,

ويمكن دة يتسبب فـ ان الموضوع يبقى طويل شوية ,, فـ انا آسف مقدما للآطآلة ,,



هبدأ بـ الانسان ,,


والانسان اللى يخصنا هو المواطن المصرى ,,

وأول حاجة أحب اتكلم فيها هى مسببات الفساد الفكرى لدى الفرد فـ المجتمع المصرى ,,

اول نقطة طبعاً معروفة وهى النظرة التشاؤمية لدى المواطن المصرى ,, كلنا سمعنا الجملة دى ( دة مصر قدامها ولا 100 سنة عشان تتقدم =)) )

وبعدها (التعدد),, يعنى ( تلاقى اتنين قاعدين ع القهوة عمالين يغنوا ويردوا ع بعض ,, دة الكهربا بتقطع ,, دة ازمة بنزين ,, دة عجز ف الميزانية ,, دة مفيش مرتبات الشهر الجاى ,, دة البلد باااااااااااااظت (بيعددوا) =)) )

وتالت نقطة هى الانكار ,, حتى لو فى اى حاجة كويسة بتحصل ولو صغيرة ولو تافهة الناس بتنكرها او بتهمشها او بتقحمها فـ موضوع سياسى وتنسبها لغرض معين يخص جهة او تيار لغاية لما تضيع حتى المردود النفسى الايجابى اللى كنت هتكتسبة لما تعرف بـ الحاجة دى =))

بعد دة كلة هقول :

مين دلوقتى مش متشائم ؟ !! =)) ,,

ومين دلوقتى مش بيعدد وكتر التشاؤم يخلية ينكر الايجابيات ,,

الواقع اللى احنا بنعيشة والاحداث اللى بتحصل تخلى اكثر المتفائلين يتشائم

وانا اعترف ان حالة التشاؤم شئ بديهى ومنطقى ودى حقيقة وامر واقع كلنا بنعيشة

وتركيبتنا كبشر بتتأثر وبيقل الحماس وبيضيع الطموح ولكن ,,

اذا كنت تبحث عن حل او تقدم او نجاح ,, دة بيتطلب منك كفاح ,, وهنا احساس التشاؤم دة ,, بيتطلب منك كفاح نفسى

انك تقاومة وتتغلب علية ,, ودة مش اختراع او اعجاز علفكرة ,,

اليابان بعد الحرب العالمية التانية ,, كانت ارض ارض =)) ,,40% من البنية التحتية متدمر ,,

معظم المصانع والمنشئات الحيوية متدمرة + مستعمرين =)) ,, انا عايز نتخيل ازاى قدرت الشخصية اليابانية تتجاوز كل دة وتحقق تقدم اقتصادى !!

طبعا المقارنة ظالمة للجانب اليابانى لاننا مش بحجم الدمار اللى كانوا فية ومع ذلك يصعب علينا الوصول للوصفة اليابانية

انا بسميها وصفة كدة زى وصفة العطار او توليفة ,,لانها بجد تركيبة غريبة ومتطلبات نفسية مرهقة بتحتاجها علشان توصل للمرحلة دى من الارادة والطموح

,, يمكن اللى اتكلمت فية دة هو احد جوانب التنمية البشرية

التنمية البشرية اللى هى مدخل التقدم والنجاح لأى شخص وفـ اى مجال ( اقتصادى- اجتماعى- سياسى)

دائماً البداية منكـ كـشخص ,, ودى حقيقة بيصعب تصديقها

فـ اذا كنا هنتكلم عن تقدم اقتصادى وحلول سياسية واستقرار مجتمعى تأكد ان الجانب التنموى لدى الفرد هو البداية الصحيحة

او زى ما بنقول هو اول طوبة فى صرح كبير ,,

وربما ان هذا الصرح فى شدة الاحتياج للحلول السياسية وهى الجانب الاصعب فى مرحلة البناء

لان السياسة تعتمد على فكر شخصى بيختلف من شخص لآخر لكن فـ النهاية بيبقى فى حاجة اسمها اغلبية ,, بتتفق على فكر معين أو بمعنى
أصح بيقربوا تفكيرهم لفكر معين ,, والفكر دة هو اللى بيطبق ودى حاجة سموها ديموقراطية

العالم اللى احنا بنعيش فية يتبع سياسة معينة ,, هى سياسة قائمة على الملصحة بغض النظر عن القيم والمبادئ الانسانية وحقوق الانسان
وخلينا نعترف بـ الحقيقة دى عشان نقدر نبنى فكر صحيح

الموضوع عامل زى واحد ابتكر لعبة (computer game) ,, الشخص اللى ابتكر اللعبة هو اللى بيضع قواعد اللعبة لان هو الـ (master) ,, علشان تلعب اللعبة لازم تمشى على قواعد الـ (master) ,, ويوم ما انت تجيلك الفرصة تكون الـ (master) ,, تبقى تضع القوانين اللى بتؤمن بيها وساعتها الآخرين هيضطروا يمشوا عليها ,,

computer game = لعبة السياسة
master = الدول العظمى
قوانين اللعبة = اما سياسة المصلحة او سياسة القيم والمبادئ وحقوق الانسان


فـ خلينا نحدد نوع سياستنا من البداية عشان نرتاح ,, يعنى اية سياسة مصلحة بتشبيهات واقعية ؟

يعنى انا دلوقتى مصلحتى مع العسكر اللى كنت بطالب ب اسقاط حكمهم بعد 25 يناير عشان هو الوحيد اللى قادر انة يقصى الاخوان
وانت كـ اخوان مصلحتك ف التخلص من المجلس العسكرى ب اى شكل رغم انك كنت متحالف معاة وهو بيقتل ف الناس وكرمتة بوسام النيل وخليتة مستشار للرئيس عشان انت كنت ساعتها متحكم ف البرلمان !!

&

فـ هى دى سياستنا يا جماعة عشان منضحكش على بعض ,, وانا بقول الكلام دة عشان لما اجى اتكلم على حلول سياسية محدش يستغرب



,, الحل السياسى من وجهة نظرى فى الوقت الحالى يبدأ بــــ تجاهل الاخوان ,, أو تجاهل مؤيدى فكر الاخوان ,, وخلينا نفرق بين واحد بيتظاهر عشان دة انقلاب وبين واحد بيتظاهر علشان معترض على قانون التظاهر وخلافة ,, وخلينا نقول ان جزء من التظاهرات ينشأ بناء على مخاوف من سيطرة المجلس العسكرى على الدولة وعودة الدولة العسكرية مرة أخرة وان التظاهرات دى بيكمن هدفها فـ الضغط على المجلس العسكرى ليس أكثر ,, زى التظاهرات اللى اعقبت ثورة 25 يناير ضد المجلس العسكرى ع الرغم بحالة التأييد لما الجيش استلم السلطة لكن لكل وقت آذان ,,

الخطوة التانية هى محاولة التسريع فـ الحصول على رئيس جديد منتخب ,, ودة بيسبب استقرار ضمنى للوضع السياسى ,, والرئيس الجديد بفكرة قادر على استكمال الاستقرار السياسى بشكل كبير ,, اذا كان مؤهل لذلكـ ,, وانا بعتبر دى أولوية فى الوصول لحالة الاستقرار وحتى اذا اجبرنى دة على انى اقول (نعم للدستور) ,,
مواد الخلاف والاعتراض كانت ع قانون التظاهر ,, وميزانية الجيش الغير معلنة ومحاكمة المدنيين عسكريا ,, وان كان ان محاكمة المدنيين عسكرا حددوها فـ اطارات معينة وهى الهجوم على وحدات عسكرية
,, الدستور مش قرآن ,, ومجلس الشعب قادر على تغيير مواد الاعتراض فيما بعد ,,

الخطوة التالتة هى اختيار الرئيس الجديد ,, مش هيكون رئيس عسكرى ,, وانا اعتقد ان الفريق اول عبد الفتاح السيسى فى غنى عن انة يقحم نفسة فى دائرة الصراعات السياسية وانة يتحمل مسؤلية رئيس الجمهورية ,, المكان اللى لن يسلم من المعارضة والنقد ,,وشايف انة منصبة كوزير للدفاع افضل بكتير من منصبة كرئيس ,,

منصب رئيس الجمهورية وخاصة ف الوقت الحالى هيبقى فى غاية الصعوبة وقمة المسؤلية ,,

المهم انا بتمنى انة الرئيس القادم يكون بيتميز بفكر سياسى راقى + كارزما

+ شوية اساسيات طبعا زى : امتلاك الرؤية -طهارة اليد -معرفة عناصر نجاح تجارب الدول الأخرى -وضع أوليات -الثقافة العامة وتذوق الفنون والمعرفة بالتاريخ

واتمنى من الرئيس الجديد انة بمجرد وصولة للحكم يدعو ممثلى كل القوى السياسية الى اجتماع بما فيهم الاخوان واللى اكيد هيرفضوا بس هو يعمل اللى علية قدام الناس ,, اجتماع يمتص فية اى غضب من اى حد ويدعو لبداية جديدة تكون على قدر على من الشفافية واشراك الجميع فـ العملية السياسية

فكر الرئيس السياسى وقدرتة على الحوار ولغتة الموجهة للشعب + الكاريزما ,, اعتقد دى الحاجات اللى كانت بتنقص محمد مرسى وأدت الى فشلة واعتقد ان دى هتبقى بداية استقرار الوضع السياسى فـ مصر ان شاء الله اذا كان بيتميز بيها الرئيس القادم

,, اختيار الوزراء والمحافظين نفسة لازم يبقى لية جانب سياسى مع جانب الخبرة والكفاءة ,, ودى بداية اشراك الجميع فى الحياة السياسية ,,
بمعنى انة المعارضة لما تتحمل جزء من المسؤلية مش هتعارض نفسها ,, وهتبقى فرصة لكل الاحزاب انها تثبت نفسها ,, وفـ نفس الوقت,,,, من يثبت فشلة يتم استبدالة بآخر ذات كفاءة وساعتها هيكون الرئيس بردو عمل اللى علية فى عملية اشراك الجميع

شرط اساسى للرئيس فـ الفترة دى بـ الذات انة يبقى صاحب كارزما وعندة قدرة على الاقناع لان الحالة العامة للمصرين فـ الوقت دة هتكون محتاجة احتواء ,, محتاجة إعادة بث الامل والطموح المفقود ,, ودى هتبقى مسؤلية مشتركة علية وعلى الفرد نفسة

من المفترض ان يعلم الرئيس القادم انة تولى المسؤلية فى وقت شديد الحساسية ومحتاج التروى والتريس قبل اى قرار ومشاورة اصحاب العقول الحكيمة (مش عيب)

اعتقد ان اولويات الرئيس بعد الجانب السياسى هتكون الجانب الاقتصادى والامنى وان كنت اعتقد ان الجانب الاقتصادى هيحتاج تركيز أكتر
لان الفئة العريضة من الشعب كانت من البداية مع التغيير والثورة على المستوى المادى المتدنى فـ المقام الاول بـ الاضافة الى الحرية والكرامة

على المستوى الخارجى مطلوب من الرئيس استعادة كآفة العلاقات مع كافة الدول الخارجية بلا استثناء ان امكن ,, فـ من المصلحة انة يكسب اكبر عدد من الدول منذ بداية ولايتة قبل اتخاذى اى مواقف ,,علشان بعد كدة لما ييجى ياخد موقف تجاة دولة يكون فى علاقة وارتباطات يقدر يزايد ويلعب عليها ,, دة بـ النسبة للرئيس

البرلمان ,, من المنتظر ان يكون قد ارتقى المواطن المصرى بفكرة مع كل الاحداث الجارية بشكل يؤهلة لاختيار ممثل ينجح فـ التعبير عنة وعن مشاكلة وعن متطلباتة واحتياجاتة وتطلعاتة وآمالة ,, وعلى البرلمان ان يمثل ضغط مباشر على الرئيس والحكومة مع الالتزام بـ المنطق ,, وعلى البرلمان ايضان ان يعرف مدى قيمتة واهميتة واستقلاليتة فى المثلث السياسى ,,

الاحزاب السياسية ,, بعد الانتهاء من استفتاء الدستور سيكون الوقت قد حان للظهور واستقطاب الانظار وعرض برامج واهداف الاحزاب لاجتذاب تأييد المواطن تمهيداً لـلبرلمان

بـ النسبة لفئة معينة من الشعب المصرى ,, مطلوب منها ان تكف عن تقديس الرئيس وصناعة الديكتاتور

فـ الرئيس هو مجرد مواطن يتحمل مسؤلية اختيارية قد قرر بنفسة ان يتحملها ولدية اهداف معينة من المفترض تحقيقها فى مدة معينة أيضاً

,, اعتقد من وجهة نظرى ان دى هتكون بداية صحيحة ع الجانب السياسى وهو الجانب الاهم فـ المرحلة الحالية

وزى ما قولت فـ الاول الرأى السياسى غالبا مش بيتقبلة الجميع ,, خصوصا فـ وقت فية استقطاب فكرى زى اللى بنعيشة .

وفـ النهاية حابب اتكلم عن نقطة تخص الجانب الاجتماعى

احنا كمجتمع ,, هدفنا بصورة بديهية هو تقدم وتطور مجتمعنا

كيفية التطور هى الحاجز ,,

انا شايف ان البداية من الجمعيات والمنظمات التنموية واللى انتشرت بصورة كبيرة فـ الوقت الحالى

فـ من الواجب ان يعى الفرد دورة تجاة المجتمع اللى بيعيش فية ويعى انة هناك التزام للاسهام فى تطوير مجتمعة

بـ الاضافة طبعا الى العامل التربوى من قبل الاسرة والجهات التعليمية واللى ليها دور كبير فى تنمية الفكر واطلاق الافق للتفكير والابتكار .

..

يتبقى جملة أخيرة حابب أقولها

(( مادمنا نتنفس أذن هناك امل ))

ومينفعش كلنا نفقد الامل ومينفعش كلنا نحس بـ الملل ,, حتى لو تطورت الاوضاع لقدر الله لوضع اسوأ

لازم يكون فينا حد يقاوم نفسة ويقاوم الواقع الصعب ويبعث ضوء الامل لدى الاخرين

لانة فـ النهاية احنا اللى هنعيش ع الارض مش هنسيبها او نسترد اشخاص آخرين

وعلشان الجيل القادم ميحملناش مسؤلية فشل وسلبية زى ما احنا حملناها للجيل السابق لنا

كدة أنا انتهيت

وآسف ع الاطالة

..

[حَرفُُ هجآءّ]

السلام عليكم
احب اولا اسجل اعتراضى على بعض ما قولته

اولا
لا يمكن اقصاء الاخوان من المجتمع المصرى لانه فصيل من ضمن المجتمع
يعنى مثلا مينفعش نقصى اصحاب الديانه المسيحييه او بعض من انصارها
ولو هنمشى بدستور 2013
و طبقاً للمادة 53 من دستور 2013 وهى
المواطنون لدى القانون سواء متساويين فى الحقوق والحريات والواجبات
لا تمييز بينهم سواء فى الدين او العقيدة او الجنس او الاصل او العرق او اللون او اللغه او الاعاقة
او المستوى الاجتماعى او الانتماء السياسى او الجغرافى

من رأيى فى بعض المتظاهرين او المعترضين وانا منهم مش عشان مرسى ولا مين يحكم البلد
سواء اخوان او غيره لكن الطريقه والاليات نفسها اللى تمت بها عزل مرسى غير صحيحه وديكتاتورية جدا
وعشان كنا نحافظ على المسار الديمقراطى المفروض ( من جاء بصندوق اقتراع يذهب بنفس الطريقة )
حتى لا يحتدم الموقف بالشكل ده وعشان زى ما بتقول نحقق الاستقرار السياسى فى الدوله بطريقة ديمقراطية شفافه

اذا لا يجوز نهائى اقصاء الاخوان من المشهد وايجاد طرق لحل الازمة سواء بالتصالح او المفاوضه بعد محاسبه كل جانى قام بقتل او تعذيب اى فرد مصرى سواء من الجيش او الشرطه او المدنيين كلهم سواااااء
لاننا كشعب مصرى وصلنا لحالة سيئة جدا من الانقسام فى الانتماء السياسى والوجدانى

ثانيا
الدستور ومواد الخلاف علية
واضحه جدا المواد المختلف عليها
تحصين منصب وزير الدفاع
محاكمة المدنيين عسكرياً
قانون التظاهر
همسك كل نقطة لوحدها

تحصين منصب وزير الدفاع
مادة تكرس دور وزير الدفاع على حساب الاسس الديمقراطية
سواء فى النظام الرئاسى او البرلمانى
وبتمنح وزير الدفاع وضع اقوى من رئيس الوزراء نفسه وده مش موجود فى اى دستور فى العالم كله

محاكمة المدنيين عسكرياً
اذا كنا دولة بدستور جديد يحترم حقوق الانسان لا يجوز ابدا محاكمة المدنيين عسكرياً
الا فى حالات التعدى المباشر على المؤسسات العسكرية
ولان المادة دى مفتوحة اتاحت محاكمة المدنيين عسكرياً حتى فى حالة خلاف او نزاع بين مدنى وعسكرى
الواجب والمفروض ان سواء مدنى او عسكرى هو مواطن مصرى وكلهم فى الحالة دى سواء امام القانون
واذا امتثلوا امام القضاء يكون قضاء مدنى ( وقالها واضحه احد قادة القوات المسلحة الجندى فى البنزينه زيه زى اللى على الدبابه ) لكن الفرق واضح جدا لان النزاع بين جندى الدبابه ومدنى سيتعلق بجريمة داخل نطاق العمل العسكرى وطبعا على النقيض من اللى شغال فى بنزينه

قانون التظاهر

خطأ مليون % سواء فى الفترة الحالية او فى المستقبل
فى الفترة الحالية جاء القانون فى ظل مظاهرات شعبية سواء من الاخوان او المعارضون للحكومه الحالية
والهدف منه الان هو تحجيم المظاهرات ليس اكثر
وعلى المدى البعيد هو قتل لاى رأى معارض للحكومة
ولا يختلف القانون فى عهد مرسى وحالياً الا قليل

اذا فالعمل بهذا الدستور وما يشمله من المواد السابق ذكرها عمل ديكتاتورى واضح جدا والتصويت علية بنعم
يعنى عهد جديد من الظلم والاستبداد ومش عشان استقرار البلد حالياً اخربها لسنوات قادمة


طبعا اللى فات لان يعود وخلينا على يقين بالامر ده
اذا كنا عايزين ديمقراطية لازم يكون على اساس دستور ديمقراطى سليم يمنح الحرية لكل مواطنيه
كلهم سواء فى الحقوق والواجبات والحريات
ولا فرق بين مدنى وعسكرى
ولا اقصاء لاحد كلنا مصريين

ثالثا

بالنسبة للرئيس القادم والوزراء والمحافظين

اكيد يكون رئيس مدنى حر ( لا يخضع لاوامر اى قائد عسكرى ولا يكون مجرد برفان للمجلس العسكرى )
لان ما يحدث من المجلس العسكرى ينبأ بالرجوع الى الدولة القمعية الديكتاتورية لان اذا ساء الحال سيصعب التخلص منه

يكون على قدر كبير من الخبرة فى ادارة شئون البلد
ويكفل للاعلام الحرية المطلقة ولا يكون بوق للنظام كما هو الان
الى جانب كل ما ذكرته انت
والوزراء على قدر كبير من المهنية عشان تنمية المجتمع بشكل صحيح وسريع
المحافظين اهم شىء يكونوا مدنيين مش عسكريا ومهنيين

القضاء يكون حر وعادل ولا يكون يد النظام الباطشه والمواطنون امامه سواء


فى النهاية
اولا بعتذر على طول الرد
ثانيا بشكرك على طرحك الراقى
بالتوفيق ان شاء الله

[big bốss]

اولآ انا متفق معاك اننا نتجاهل دلوقتى اى خلافات سياسيه و نتهد شويه

من العك الى داير فى مصر علشان نمشي صح الفتره الى جايه

- معاك ان لو فيه خلاف على قانون التظاهر او الدستور من السهل مجلش الشعب يغيره

يعنى مبرر اننا نولع البلد فى حاجه زى كدا نستنا علشان المصلحه العامه .


- معاك ان الرئيس لازم تتوفر فيه مواصفات معينه العقليه السياسيه و الكارزما

و الثقافه العاليه و البصيره النافذه و دا كله كان بيفتقده مرسى

- و فعلآ انتخابات الرئاسيه اولى خطوات الاستقرار الوضع السياسي لمصر

بس مجبتيش ازاى هنحل مشكلة سد النهضه

رؤيه جميله يا محمد

اعجبتنى كثيرآ

موفق فى المسابقه


ودى و تقديرى ،،،،

[ملك جبال الاحزان]

السلام عليكم اول حااجه حابب الصراحة اعلق على الرد الاوول للموضوع (لحرف هجاء)
من وسط كلامك بتقولى
( من جاء بصندوق اقتراع يذهب بنفس الطريقة )

معلش هسأل سؤال هو مبارك مجاش بالصندوق !!
ليه مستنناش الكام شهر اللى فضلين ليه !!

وكمان بتقولى

لكن الطريقه والاليات نفسها اللى تمت بها عزل مرسى غير صحيحه وديكتاتورية جدا

السؤال هنا بقا اللى دايما بسأله للمعارضين ومفيش اى حد جاوبنى
الناس نزلت الاول الشارع ولا السيسى عزل مرسى وبعدين الناس نزلت الشارع !!!!!!!!!

مين نزل قبل مين احنا نزلنا قبل الخطابات ولا السيسى عزل مرسى وبعدين احنا نزلنا ياريت تردى على سؤالى

وبتأسف مرة تانى لصاحب الموضوع على تدخلى

[Mo7aMaD 3aLa2]

حَرفُُ هجآءّ

بصراحة انا مش ناوى انة حد يسحبنى لـ نقاش

دى وجهة نظرى بخصوص حاجة مستقبلية

لو ليكى وجهة نظر تانية ممكن تشاركى بيها

اما نتكلم على اللى فات دة نقدر نسمية جدل مش نقاش

وانا مش ناوى ادخل فـ جدل

فـ النهاية لا انتى هتقتنعى ولا انا هقتنع ,,

وايدينا هتتعب من كتر الكتابة ع الكيبورد وخلاص =)))

[ساحر الأحزان]

الكفاح النفسى

فى ان عندك قدرة على التغيير

وأن انت تقدر تعبر مرحلة السقوط بتحدى فى التغيير للأفضل

وعدم نكران مجهود الغير

لان دى اسباب عندك ليها دور وعامل مهم

موضوع جميل محمد

بالتوفيق

[حَرفُُ هجآءّ]

اقتباس المشاركة الأصلية كتبت بواسطة ملك جبال الاحزان السلام عليكم اول حااجه حابب الصراحة اعلق على الرد الاوول للموضوع (لحرف هجاء) من وسط كلامك بتقولى ( من جاء بصندوق اقتراع يذهب بنفس الطريقة ) معلش هسأل سؤال هو مبارك مجاش بالصندوق !! ليه مستنناش الكام شهر اللى فضلين ليه !! وكمان بتقولى لكن الطريقه والاليات نفسها اللى تمت بها عزل مرسى غير صحيحه وديكتاتورية جدا السؤال هنا بقا اللى دايما بسأله للمعارضين ومفيش اى حد جاوبنى الناس نزلت الاول الشارع ولا السيسى عزل مرسى وبعدين الناس نزلت الشارع !!!!!!!!! مين نزل قبل مين احنا نزلنا قبل الخطابات ولا السيسى عزل مرسى وبعدين احنا نزلنا ياريت تردى على سؤالى وبتأسف مرة تانى لصاحب الموضوع على تدخلى

مبارك كان بينجح
بصندوق تزوير وبينجح فيه بنسبه 99%

مكنش ينفع نستنى الكام شهر لان كلنا عارفين انه الحكم
كان بشكل او آخر هيورث لجمال وحتى لو استنينا كان جمال هيدخل انتخابات ويكسب باكتساح

الناس نزلت بناءاً على حملة تمرد
الشعب اللى نزل الاول معاك حق طبعا
لكن كان يقدر السيسى بأى وسيلة يتفاوض او يجبر مرسى على التنحى
وهرد عليك رد قولته قبل كده

طول فتره حكم مبارك الجيش تحت طوع مبارك

ومغطى على فساد 30 سنه

وفى ثورة يناير ومع كمية العنف اللى حصل والاعتقالات والقتل
الجيش لا يحركه ساكناً

الا بعد أمر مبارك للجيش بتفويضة لادارة البلاد

يعنى ادارة الجيش كانت تحت ادارة الدولة

بالتالى نقول تحت اى دستور او بند فى قانون من حق الجيش يخرج
للفصل بين تيارات متنازعه ؟

وهنا الجيش انقلب على الحكومة لتنفيذ ارادة
الشعب

(معاك ان ارادة الشعب تحترم)

يعنى الجيش هنا ادى لنفسه صلاحيه السلطه الحاكمة للدوله اللى
مكنتش معاه ايام مبارك

وبكده حكم المجلس العسكرى فوق حكم الدولة

اللى كان تحت الدولة ايام مبارك

وطبعا مع الدستور الجديد اصبح وزير الدفاع فوق الدولة
والحكومة

[حَرفُُ هجآءّ]

اقتباس المشاركة الأصلية كتبت بواسطة mo7amad 3ala2 حَرفُُ هجآءّ بصراحة انا مش ناوى انة حد يسحبنى لـ نقاش دى وجهة نظرى بخصوص حاجة مستقبلية لو ليكى وجهة نظر تانية ممكن تشاركى بيها اما نتكلم على اللى فات دة نقدر نسمية جدل مش نقاش وانا مش ناوى ادخل فـ جدل فـ النهاية لا انتى هتقتنعى ولا انا هقتنع ,, وايدينا هتتعب من كتر الكتابة ع الكيبورد وخلاص =)))

اولا انا بعتذر جدا
ثانيا حضرتك طرحت حلول
وعلى اساسها رديت عليك
مثال

اقتباس الحل السياسى من وجهة نظرى فى الوقت الحالى يبدأ بــــ تجاهل الاخوان

رديت على النقطه دى ووضحت السبب

مثال تانى

اقتباس الخطوة التانية هى محاولة التسريع فـ الحصول على رئيس جديد منتخب ,, ودة بيسبب استقرار ضمنى للوضع السياسى ,, والرئيس الجديد بفكرة قادر على استكمال الاستقرار السياسى بشكل كبير ,, اذا كان مؤهل لذلكـ ,, وانا بعتبر دى أولوية فى الوصول لحالة الاستقرار وحتى اذا اجبرنى دة على انى اقول (نعم للدستور)

بردوا رديت عليك فى صلب الموضوع وشرحت اسباب اعتراضى على ان الشعب يجبر على التصويت بنعم عشان الوضع الحالى
ومش بتكلم فى حاجه فاتت ده دستور لسه هيستفتى عليه الشهر الجاى


اما عن اخر نقطه وتقريبا متفقه معاك فيها وهى الرئيس الجديد

ولو عشان انى قولت عزل مرسى
اللى اقصده اننا اذا كنا بندور على ديمقراطيه وحقوق شعب كانت تبدء من هنا

وبعتذر مره تانيه

[ملك جبال الاحزان]

اقتباس المشاركة الأصلية كتبت بواسطة حَرفُُ هجآءّ مبارك كان بينجح بصندوق تزوير وبينجح فيه بنسبه 99% مكنش ينفع نستنى الكام شهر لان كلنا عارفين انه الحكم كان بشكل او آخر هيورث لجمال وحتى لو استنينا كان جمال هيدخل انتخابات ويكسب باكتساح الناس نزلت بناءاً على حملة تمرد الشعب اللى نزل الاول معاك حق طبعا لكن كان يقدر السيسى بأى وسيلة يتفاوض او يجبر مرسى على التنحى وهرد عليك رد قولته قبل كده طول فتره حكم مبارك الجيش تحت طوع مبارك ومغطى على فساد 30 سنه وفى ثورة يناير ومع كمية العنف اللى حصل والاعتقالات والقتل الجيش لا يحركه ساكناً الا بعد أمر مبارك للجيش بتفويضة لادارة البلاد يعنى ادارة الجيش كانت تحت ادارة الدولة بالتالى نقول تحت اى دستور او بند فى قانون من حق الجيش يخرج للفصل بين تيارات متنازعه ؟ وهنا الجيش انقلب على الحكومة لتنفيذ ارادة الشعب (معاك ان ارادة الشعب تحترم) يعنى الجيش هنا ادى لنفسه صلاحيه السلطه الحاكمة للدوله اللى مكنتش معاه ايام مبارك وبكده حكم المجلس العسكرى فوق حكم الدولة اللى كان تحت الدولة ايام مبارك وطبعا مع الدستور الجديد اصبح وزير الدفاع فوق الدولة والحكومة

مبارك كان تزوير وكلنا عارفين
بس حضرتك مشوفتيش المليون كارت انتخاب اللى متزورين بأسم مرسى فى المطابع
الاميرية قبل توزيعها على الحبايب
وربنا يعلم اتزور د ايه فى الانتخابات

بس حضرتك بتقولى لو كنا سبنا مبارك كان هيورثها لجمال
طيب ما احنا بردوا لو كنا سبنا مرسى مكانش هيسيبها ابدا
ودليل على كدة خطابه الاخير وجميع خطابات الاخوان
نفس الموضوع بس حضرتك مصممة تحلليه للاخوان معرفش ليه
مع ان اللى كانوا ضد مبارك ميجوش ميجوش ربع اللى نزلوا ضد مرسى
واتمنى حضرتك متنكريش كدة زى بقيت اللى اتناقشت معاهم فى السياسه قبل كدة

وبخصوص المجلس العسكرى
فى عقيدة عندنا فى مصر مصممين عليها ان الحاجه عمرها ما تتغير
المجلس العسكرى ايام مبارك غير المجلس العسكرى حاليا
مختلف بكل المقايس
ولو هو زيه مكنش اتحرك مع الشعب وفضل ساكت
زى ايام مرسى

المفروض ده يثبتلك ان خطر الاخوان كان اكبر بكتير من خطر مبارك

[Lost Pearl]

تعجبني و انت عاقل

الموضوع حلوة نظرتك فيه و كذا حاجة لفتت نظري ،، بس عامة نفس النظرية و نفس التفكير ده بينطبق ع الفئتين العاقلين الموجودين فـ الشعب المؤيد و المعارض >> ماليش دخل باللي بيعبدو الحاكم دول هههههههه

انت قلت مش عايز نقاش و انا مش هجرجرك

بس موضوع جميل و بالتوفيق فـ المسابقة