الموسم الجديد من برنامج عيشها صح الحلقه الثانيه مع dr.sma

[۩۩ elMagic ۩۩]

السلام عليكم ورحمة الله وبركاته الحلقه السابقه كانت منورانا مشرفتنا الجميله Ro♥ony الموسم الجديد من برنامج عيشها صح الحلقه الاولي مع Ro♥ony أما حلقة النهارده معانا مشرفه أخري لـ قلم الأعضاء صاحبة قلم راقي جدا واخلاق عاليه معانا ومعكم دكـ /سما "الحلقه الثانيه من الموسم الجديد مع مشرفة قلم الاعضاء" DR.SMA مشرفة قسم بقلم الأعضاء * الفقره الاولي : عيشها صح * * فى البدايه عرفنـا على نفسكـ ؟ وقولنا ملامح شخصيتكـ ؟ بص هي صعبه عرفينا على نفسك دي مش سهل الانسان يقول مميزات وعيوب نفسه لكن على كلام ورأي الي حواليا فهم بيقولو عني كلام حلو هههههههه لا بجد انا يمكن الحمد لله طيبه وبريح دماغي مش بشغل بالي بحد لكن مشكلتي اني لما بقفل من حد بياخد مني كرت احمر فعلا .. يعني صعب اوي ارجع حد لقايمه إهتماماتي تاني .. يمكن مستحيل مش بس صعب .. بس ده لاني بسامح كتير اوي لدرجه ان مش بيكون في مكان تاني للتسامح عندي ،، * قولنا بقى انت شايف انكـ عايشها صح ؟ لأ بصراحه في نسبه صح اكيد بس مش حياتي كلها في تقصير في جوانب في تهاون في جوانب تانيه يعني كده .. خصوصاً ان نسبة الصح والخطأ بتختلف من نظرة شخص لآخر .. * الى اى حد انت طموح ؟ وياترى ايه هى طموحاتكـ ؟ الحمد لله عندي طموح لدرجه كويسه عندي حلم في البيت وحلم في مجال الشغل بحلم اعمل بيتي زي البيت اللي اتربيت فيه يكون في موده ورحمه وامان ودفى وهدوء وعلم واخلاق ودين قبل كل دول وبحلم اني اكمل دراستي واقدر اشتغل بس بصراحه الاولويه عندي للبيت .. * ممكن تقولنا ايه الصعوبات اللى واجهتكـ فى حياتكـ ؟ وياترى قدرت تواجهها وتتخطاها ولا استسلمت لها ؟ بص هو في حجات بتحصل في حياه الانسان بتأثر عليه ويمكن كمان بتغير مسار حياته يمكن زي وفاة بابا وخسرت ناس غاليه اوي عندي المشكلتين دول مش قادره اتخطاهم لحد دلوقتي كمان بسبب استسلامي للظروف دي توقفت فتره عن الكليه بس الحمد لله رجعتلها طبعا الحجات دي بتأثر كتير على الانسان .. وهي بنسبه واجهتها بس نسبه بسيطه لكن الحمد لله الامور في تقدم مستمر لكن استسلمت فتره كبيره للأسف .. كلنا بنمر بظروف قد تكون اصعب من قدراتنا احنا على تحملها ولكن ربنا أنعم علينا بنعمه الصبر والنسيان علشان نقدر نتعامل مع الظروف الصعبه اللى زي دي الحمد لله على كل حال اتمنالك دوام الصحه والعافيه وتحققي امانيكي البقاء لله ,, * لما الدنيا بتخبط معاكـ وتديكـ ظهرها بتعمل ايه ؟ بفضل اكون لوحدي بتكلم مع ربنا كتير بقفل على نفسي خارجياً وداخلياً ولما بتحسن شويه بكلم سمسمه ربنا يخليكوا لبعض * فى رأيكـ ايه الاسباب الي بتخلى الواحد يستسلم بسهوله لأى عقبه تقابله ؟ شعوره ان الموقف اكبر منه مع ان في الحقيقه مفيش حاجه اكبر من الانسان ابدا هو الي بيحط لكل حاجه حجمها بس طبعا احنا بشر ولكل منا طاقه مهما حاول انه يتخطاها الانسان بيستسلم لما يحس انه ضعيف .. * لما يواجه المرء مشكله معينه فى رأيكـ الافضل ان يواجهها بمفرده ولا يجب ان يستعين بمن هو أكثر خبرة منه ؟ هو المفروض لو في فـ حياته شخص يقدر يستوعبه اوي يعتمد عليه يكون افضل طبعا لكن مش دايما بنعمل كده الاغلب بيقفل على نفسه .. * لو افترضنا ان الشخص دا رفض الاستعانه بأحد أتسمى ذلكـ غرور ؟ ولو لاء .. امتى يكون غرور فى رأيكـ ؟ لا مش شرط غرور ممكن يكون طبعه انسان منغلق على ذاته ،، غرور لما يكون عدم استعانته بغيره نابع من انه شايف ان كل الناس اقل من انه يستعين بيهم وده طبعا مستحيل اكيد في حد ممكن يتشاور معاه او يستعين بيه مش عايز حاجه وشايف ان محدش ينفع دي حاجه تانيه .. * فى رأيك الثقه بالنفس ليها دور فى الموضوع دا ؟ لأ مش بالضروره .. ممكن يكون الانسان ثقته بنفسه مهزوزه ولكنه بيفضل انه يكون لوحده وممكن يكون واثق من نفسه جدا لكنه بيحب يستعين بغيره .. * وانت شايف انكـ على درجه عاليه من الثقه بنفسكـ ؟ اه الحمد لله طب يارب دايماً * تقدرى تقولنـا بقآ الاثار المترتبه على الثقه بالنفس الزياده عن حدهـا لدى الفرد ؟ الفشل .. هي كلمه واحده لكن فيها كل الي ممكن يتقال .. * قولينا بقى انت بتعمل ايه لما تواجهكـ مشكله بتستعين بحد ولا بتواجهها لوحدكـ ؟ بحاول اواجها لوحدي على قد ما اقدر لكن لو لزم الأمر ممكن استعين ب سمسمه .. * ايهم من له الاولويه فى عملية إتخاذ القرار قلبكـ أم عقلكـ ؟ غالباً كان قلبي لكن حاليا مش قادره اقولك حاجه معينه فيهم * يا ترى شايفه مستقبلكـ ماشـى ازاى ؟ مستقبلي ماشي كويس ماشيه في دراستي الحمد لله وفي البيت بردو الامور مستقره .. * متى شعرت بالفشل ؟ وماذا فعلت حينها ؟ الفشل جربته وعشت فيه حوالي سنتين استسلمت ليه فتره وتخطيته بصعوبه جدا لكن ان شاء الله عمري ما هجربه تاني .. * اتفكـر فى الكلام قبل ان تقوله ؟ اه دلوقتي بفكر مليون مره في الكلام قبل ما اقوله تجارب الحياه بقى هههه مفيش حاجه بتيجي بالساهل * هل لكلام الناس تأثير على شخصيتكـ ؟ لأ مظنش مش بشغل بالي اوي بكلام الناس الا لو كان حد يهمني اوي بس .. * اذا خانكـ أعز صديق لكـ أتتقبل عزره واسفهـ ؟ لو اه .. امتـى لا تتقبله ؟ لشخص معين وفي موقف معين بس عمر ما الامور بترجع زي الاول كايد بيفضل جوا الشخص حاجه كده عمري ما اقبله لو اتكرر الخطأ او حتى مبدأ الخطأ نفسه يعني مش شرط نفس الغلطه لكن لو تكرر مبدأ ان الي قدامي يخوني او يغلط فيا عن قصد عمري ما هسامح .. * ايه رأيكـ فى موضة الملابس ؟ أتتبعها ام تتجاهلها ؟ لا مش بتابعها خالص اللي يناسبني بلبسه وخلاص سواء كان موضه او لأ .. * "وقتكـ كالسيف إن لم تقطعه قطعكـ" بمناسبة المقوله دى بقـى قوليلى انت من الشخصيات التى تفضل تخطيط وتنظيم الوقت ولا سايباها على الله زى ما تيجى ؟؟ بأعتبار ان كلنا سايبنها على الله طبعا فى كل الاحوال لا بصراحه مجتش في يوم وعملت تخطيط ومشيت عليه ههههههههه .. بحدد بس ايه الي هعمله خلال الكام ساعه الي جايين او اليوم او كده ههههه تومام تومام * "المال يصنع السعادة" ايه رأيك فى المقوله ديه اتتفق معها ام لا ...مع ذكر وجهت نظركـ فيها ؟ إطلاقاً المال عمره ما صنع سعاده أبداً يمكن يكون في بعض الأحيان وسيله لزياده فرص اسباب السعاده لكن يكون سبب لا خالص او على الاقل بالنسبه ليا مش بعتبره سبب للسعاده ولا شيء مهم بالنسبه ليا .. * بيقولوا ان الحب بيصنع المعجزات ياترى ممكن فى يوم تتنازلى عن مبادئكـ فى سبيل إرضاء من تحب ؟؟ لو الحب وصل لدرجه معينه الانسان وقتها بيتنازل عن حاجات كتير بدون ما يدرك انه كده بيتنازل اصلا بيكون ساعتها الاعتبارات مختلفه وكل حاجه مش زي ما الناس شايفينها لكن للأسف الحب الي من النوع ده بيكون خيالي شويه وغير منطقي فبيقابل معارضه من كل المحيطين بيه فبيكون عمره الواقعي قصير وخلي بالك من الواقعي دي * هل للكرامه والاعتزاز بالنفس وجود فى الحب ؟؟ بص نقولها بشكل تاني للإحترام المبتادل وجود في الحب اه .. ولو في احترام متبادل فهيكون في احترام للكرامه وغيرها .. (Y) * ايه رأيك فى المقولات ديه *الواد دا وشه فقرى *البنت دى نحس *انا حظى وحش فى الدنيا دى *ابعد عنى انت عينكـ وحشه ؟؟ بنقولها هزار كتير لكن مفيش منهم حاجه بقولها عن يقين بفكره .. كلها اقدار .. * ما مفهوم كلاً من : "من وجهة نظركـ " الحياه طريق لابد منه النجاح رزق يحتاج الى سعي لنناله الفشل تجربه ان تخطاها المرء نال النجاح اليأس استسلام للفشل الامل ابتسامه الموت نتيجه الامتحان إما نجاح وإما فشل * قولينا بقآ كام نصيحه كده للجمهورعلشان يقدر يعيشهـا صح ؟ ههههه احم احم بسم الله الرحمن الرحيم سيداتي انساتي سادتي انا جايه النهارده عشان اقولكم ...... النصيحه دي ليا انا قبل ما تكون لحد مش فزلكه يعني بس بجد هي حاجه جوايا وحساها وعرفاها اوي وبتمناها بجد .. لو الانسان حافظ على قربه من ربنا عمره ما هيلاقي حاجه وحشه لكن المشكله ان كلنا بنقرب من ربنا ونرجع نبعد وبنسأل نفسنا كتير بيحصلنا كذا ليه واحد ماشي في طريق غلط والنور قاطع مستني ايه غير انه يدوس في شوك !! * الفقره الثانيه : الآدبيه * أسماء : إني أكتب أسئلة لـ سما فدا مش سهل لأن لما بنكتب أسئلة بيكون عشان نفهم اللي قدامنا أكتر سواء بشكل شخصي أو أدبي وخاصة الأسئلة الأدبية بتكون ان فيه حاجات بنقرأها للآخر بتُثير جوانا تساؤلات ونحب نناقش الكاتب فيها لكن سما أنا أعرفها كتييير ولو عايزه أسألها عن حاجة فبسألها بشكل مباشر .. - لماذا ابتعدَتْ سما عن قلمها ؟؟ أم أنها حالة من ثرثرة ذاتية لايكفيها قلم ؟؟ حاله من ثرثره ذاتيه لا يكفيها قلم او ربما كانت في وقت من الاوقات كده ومش عارفه ارجع للقلم تاني بس فعلا افتقد الفضفضه به واليه .. - آسفه لكي :: لأني ..... ( الغربة الأقسى هي غربة الروح ) ، وهنا أعطيتِ وصفاً بالخيانة .. فكيف نخون أنفسنا تحديداً ؟؟ حين نتنازل عن مبدأ بدون وجه حق فنحن وقتها نخون انفسنا .. - لم تكونو ؛ فكيف ؛ ولكن أولئك الذين يرحلون باختيارهم ، أتظنين من العدل مع أنفسنا أن نرثيهم أو نعاتبهم ؟؟ اه لان وقتها لا يؤلمنا رحيلهم بقدر ما تؤلمنا نفوسنا الاوقات ,, الذكريات ,, الكلمات ,, المشاعر ,, نرثي نفوسنا وذكرياتنا واوقاتنا في شخصهم الحزن على الغادر ليس حزنا عليه بقدر ما هو حزن علينا نحن .. - ارجوك لا تكن عاصي تحدثنا في هذا كثيرا واليوم ننقل الحديث هنا الحب ليس منطقيا تماما لنخضعه للمنطق وبذات الوقت هو ليس منفصلاً عن المنطق تماما فلنا فيه اختيار منطقي .. مارأيك ؟؟ بصي يا سمسمه في حب بالعقل بس وده بيكون مادي جدا ولا اعتبره حد من الاساس ( مقصدش مادي يعني فلوس بس اقصد له علاقه بالاشياء الملموسه ) وفي حب يتحكم فيه العقل والقلب وهو الحب الذي يكون له الحظ الأوفر من الدوام الواقعي لان هنا بيكون له احداثيات ونظم بتجعله اكثر قدره على المواجهه .. وفي حب بقى بالقلب فقط وده بقى حب نقي اوي لا بيلتزم بقواعد ولا قوانين ولا ماديات ولا اي حاجه مشكلته انه بيجي في الوقت الغلط او مش بيلاقي حد يسنده ده لاننا في مجتمع مادي من الدرجه الاولى عندنا بيدورو على الماده وبعد كده يفكرو في الحب ويقولك يجي بعدين مع ان الرسول في حديث قال وما للمتحابين الا الزواج يعني في حب الاول اهوه - انتماء ام انانيه<مسابقه القسم> وعن الإنتماء الذاتي حدثينا .. ؟؟ الانتماء الى الذات اساسي جدا عمري ما هقدر اطور من نفسي ولا اغير منها للأحسن ولا احسن عيوبي ولا اي حاجه الا لو كان عندي انتماء لنفسي واعتراف بيها للإنتماء دور اساسي في تطور البشريه .. - روح وقلم مكسور قد لايكون قلم كاتب إلا جزءا من روحه فماذا عن انكسارات النفس مايَجبرها ؟؟ نادرا ان كان هناك ما يجبر انكسار الروح فالروح قالبا من زجاج ان انكسر جرح وان حاول احدهم جبر كسره ربما اصلح شكله الخارجي لكنه ظل لا يصلح لدوره القديم .. - إشاره حمراء { وقانون منظم } لاأحد لاتُطبق عليه خطوط حمراء مهما بلغ قربه فقط موضع الخط الأحمر يختلف وفقاً لمكانة الشخص فماذا عن مُقرب يتجاوز حده ؟؟ نادر لما يكون في ف حياتنا شخص لا نضع خطوط في تعاملنا معاه لكنه موجود يمكن يكون رأيك مختلف عارفه بس انا مقتنعه ان اوقات بيكون في اشخاص قربهم مننا اكبر من اي خطوط .. هو مفيش حد معصوم من الاخطاء وحيث أن فيه مجال للأخطاء إذاً لايمكن أن يكون هناك شخص فوق الخط الأحمر بغض النظر عن مدى قربه ليكِ صحيح اللى بيحب بيسامح دايماً بس استحاله دايماً هتفضل تسامح .. وجهة نظر أخوكي الصوغنن - العراف ليس بالضرورة أن الشائع حق ولا العكس فيكفي الإنسان خسرانا لعقله أن يكون مُنساقاً .. عن حرية العقل تحدثي .. ؟؟ حريه العقل !! انتي كده عايزه مالين تلاته يا سمسم بتهزري اجابات مميزه جدااا سعيد بوجودك معانا فى الحلقه نورتينا أكيد سما ربنا معاكي ويوفقك بإذن الله فى حياتك وتحققي كل ما تتمنيه ،، وبكده تكون انتهت ثاني حلقه نتمني نكون وُفقنا فيما تم عرضه تابعونا مع المزيد من الضيوف الراقيين ,,

[دمعه حائره]

ياااه سما حبيبتى هنا بجد وحشانى جدا وكتاباتك كلنا مفتقدينها
قد ايه لينا ذكريات حلوة مع بعض هنا
وجمعتنا مواضيع ومسابقات ماتتنسي ابدا
نعم الاخت الخلوقه والصديقه الوفيه
ربنا يسعدك ويحققلك كل اللى بتتمنيه
تسلم يااحمد على الاستضافه

[توحد ارواح]

الاسئله ما شاء الله متنوعه بين علم النفس والادب ومجالات شتى
تطرقت بأسئله مميزه وهادفه
استطعت من خلالها ان نتعرف على انسانه جميله خلوقه من اجاباتها
التى تنم عن رقى ومبادىء قلما نجدها
شكرا ع الحوار الرائع
يدوم التميز

[العاشق الذى لم يتب]

ان شاءالله تكونى دكتورة سما
ماشاءالله حلقة جميلة بأسألتها المتنوعة الراقية
وسما ربنايسعدك ويوفقك فى الدراسة
ويرحم والدك
إجابات دكتورة مخضرمة ماشاءالله عليك
وشخصية هادية وراقية
بالتوفيق لك
والتوفيق ليك أحمد
مع البرنامج الجميل
وفى أنتظارضيوفك الراقين
تحياتى

[ابتسامة الزهر]

حوار راقى بمعنى الكلمة
واجابات اكثر رقى تعرفنا خلالها
على انسانة واضح انها مثقة جدا
وحياتها غير معقدة حبوبة رقيقة
تسلم يااحمد على الأستضافة
الرائعة استمتعت بكل كلمة كُتبت

[Mind language]

اولاً برنامج جميل يا ابوحميد
واول مره ادخل واقرأه كاملاً
بصراحة اجابات الضيفة شدتنى
جدا انى اكمل خصوصاً اما تكون
شخصية مميزة زى سما بسمع
عنها كل خير هنا اجابات جميلة
جدا منك انا استمتعت بقرأتها
اتمنالك التوفيق فى حياتك القادمة
باذن الله والى الامام اسئلة جميلة
منك يا احمد واستضافة اجمل
موفقين دائماً تحياتى ليكم .

[رآقيہ بأخلاقـى]

عجبتنى اوى الاسئله فيها تنوع
واجابات سما كمان جميلة جدآ كنت مستمتعه وانا بتجول بين حروفها
ربنا يكرمك ويوفقك فى حياتك العامة والخاصة
حلقة مميزة وجميلة ماجيك
تحياتى للجميع

[Lamees]

استمتعت حقاً بقراءة ردودك سما
كم انتِ جميلة وواقعية
ربنا يوفقك يارب في حياتك
حلقة جميلة ماجيك
ومجهود رائع
تستحق عليه كل الشكر والتقدير
دمت بود
روني ..~

[شموع الروح]

برنامج رائع وأسئله منوعه
اسعدنى التعرف علي سما
نورتينا وربنا يوفقك بحياتك ان شاء الله
البقاء لله في والدك
وان شاء الله الجي يكون أفضل
تحياتى لكى وليك يا احمد
تسلموا

[احساسى صحيح]

استضافه رائعه لانسانه رائعه فى كل شىء
وعجبنى جدا معظم الاجابات
ودكتوره سما شخصيه محبوبه من الجميع وتتميز بالطيبه والهدوء الكبير
ربنا يوفقك فى حياتك ويحققلك كل طموحاتك باذن الله

شكرا اسماء وماجيكو
استضافه موفقه واسئله ممتازه
وبانتظار ضيفكم القادم
احترامى وتقديرى للجميع ...