حلقة جديدة من ( أجمد عضو ) مع ( حرف هجاء )

[morshooo]

بسم الله الرحمن الرحيم

اهلا بيكم جميعا

وحلقه جديدة من برنامجكم

( اجمد عضو )



زى ما قولتلكم حلقه النهاردة

هيكون فيها اعترافات كتيرة جدا

وحاجات تقريبا اول مره تعرفوها

ضيفه حلقه النهاردة المتميزة /

حرف هجاء



تعالو نشوف مع بعض الحوار

س / فى البدايه اهلا بيكى فى اجمد عضو ؟

اهلا بيك يا أحمد
تانى مره دى انوركم فى اجمد عضو


س / جاهزة تفتحى قلبك فى الحلقه والا هنتهرب من الاسئله ؟

جاهزة ومش هتهرب ولا حاجة
اتفضل

س / طيب فى البدايه عايزك تختارى عنوان يعبر عن ( حياتك الشخصيه )
حتى الان ؟ وايه سبب العنوان دا ؟

اممممممممم
مشاعر منسية
ده اقرب عنوان
والسبب أن بعض الاشخاص فى حياتى تجاهلوا مشاعرى ونسيوها
والتفكير الاول والاخير كان للمصالح على حساب مشاعرى

س / الفترة الاخيرة شوفناكى متوترة فى المنتدى ودا اكيد بناء على
حياتك الشخصيه ؟

فى البداية هو فعلا فى توتر وجامد جدا ومشاكل لها 4 سنين
بس ملوش تأثير هنا غير فى مدونتى بس
وزى ما انت قولت مدونة يغلب عليها الحزن

س / انتى أم لبنتين ( زينه و اسيل ) مين فيهم الاقرب ليكى بالرغم
من ان ( زينه ) بنت اختك رحمها الله ؟

طبعا دى بنتى ودى بنتى وحبهم عندى واحد يمكن حب زينه
زايد شويه لانى بئيت ام من قبل ما اتجوز وكان كل اهتمامى
بيها وارتبط بيها اووى فعلا هى هادية اووى وملاك بجد
غير كده كمان زينه قريبة اووى لشخصيتى باحساسها
وعلاقتها باللى حواليها
لولو بئا هتخلينى انتحر قريب طبعا دى حته منى وبحبها
اوووى
شقية مووووت وجريئة لدرجه تخوف

س / انتى تم انفصالك عن زوجك (ابو اسيل ) الفترة الاخيرة ؟
شايفا ان الامور مكنش فيها تفاهم بينكم ؟

فعلا من شهور كده انفصلنا
مكنش فى تفاهم نهائى والجواز اصلا من البداية غلط لانه
مش مبنى على رضى الطرفين ده غير المشاكل اللى حصلت
طول فتره الجواز
وضرب واهانات وغصب على كل شىء ولك ان تتخيل
مش بقول انى ملاك على فكرة لا انا كان ليا ردود فعل وردود
قوية جدا وكانت فى حاجات بتطير فى الجو وتخبط فى اى حته بئا مش فارقه
شريره بمعنى الكلمة هههه
مش شر والله او انى مفتريه لا بس لما تكون فى حاجات بتحصل
غصب عنى
ببئا خلاص مش شايفة ادامى ولو كانت هترسى على قتل مكنتش
هتفرق معايا
المهم مفيش حاجة تتاخد منى غصب عنى
وعشان كده الانفصال كان احسن حل



س / طالما فى ضرب بالشكل الى بتكلمى عنه ليه ماتمش الانفصال من فترة ؟

مهو شغل فريق الطبطبة كان شغال على ودنه
معلش مش هيعمل كده تانى
وانت استحملها شويه
وبلاش العنف وووووو وحاجات كتير اووى
وعشان فى بنت بنا كله كان بيستحرم الطلاق عشانها
لكن انا على موقفى البنت كده او كده هتتربى
فتتربى فى جو مستقر احسن مليون مره من جو الرعب والاكشن
اللى كان شغال

س / شايفا ( اسيل ) اذاى الفترة الجايه خاصه وانها هتكون من غير
( والد ) ؟

ليه من غير اب ربنا يخليهولها
هو ديما بيجى يشوفها وعادى خالص وعلاقتى به دلوقتى
احسن من الاول
وبعدين مش أول ولا أخر بنت باباها وماماتها ينفصلوا
وادام مفيش طرف بيقسى البنت على التانى يبئا ان شاء الله مفيش
أى تأثير سلبى عليها

س / شايفا انك هتقدرى تعيشى من غير زوج الفترة الجايه ؟
والا شايفا ان حقك تفكرى فى الزواج ؟

مانا عايشه اهو بقالى فترة وتمام وفل الفل
بص انا عارفه انه صعب ان افضل لوحدى كده مهما حصل
من متاعب فى الحياة اكيد الانسان بيبئا محتاج يعيش حياته
وخصوصا لو كان اتظلم قبل كده فا محتاج يجرب كل
احساس كان نفسه يعيشه قبل كده ومحصلش محتاجه احب
واتحب ومحتاجه اهتمام ومحتاجه احس بأنوثتى وحاجات
كتير تانيه
بس المهم بئا فى الاختيار فى الشريك المناسب لان دلوقتى
الاختيار اختلف عن الاول لان اذا كان اى بنت واى شاب
بيختاروا بعض لتوافقهم مع بعض لشخصهم بس
لكن حاليا الاختيار بالنسبالى مبقاش لشخصى بس لان فى
بنات معايا وزى ما انا محتاجة لزوج بردوا محتاجه لاب
يراعى ربنا فيهم ويتقبل وجودهم لانهم قبل منى ولو مجاش
الشخص ده بالمواصفات دى ييبئا اقعد كده احسن حفاظاً
على البنات

س / لو والدك اجبرك على الزواج من شخص هتوافقى رغم
فشل التجربه الاخيرة معاكى والا خلاص لازم تكونى مقتنعه
بالى هترتبطى بيه ؟

خبطتين فى الراس توجع كفايه مره وفشلت اهى
يعنى فى النهاية الاجبر مش بينفع وخلاص مفيش استعداد لا
من بابا ولا منى على انى ممكن اخوض تجربه تانية بردوا
بالاجبار
واكيد هيكون بموافقتى

س / مش شايفا ان مطلقه ويعتبر معاها ( بنتين ) شايفا ان
المجتمع المصرى هيتقبلك كزوجه لشاب مصرى ؟ والا
الموضوع مش مضايقك ؟

خلاص نستورد رجاله من تركيا انا موافقه اوووى بالفكره دى
اهو نحسن النسل ههههههه
اهاااا بص اولا محدش اختار حياته تكون ازاى ربنا اللى
عايز كده
فا الموضوع مش مضايقنى نهائى
اما عن ان المجتمع يتقبل او لا
للاسف مجتمعنا الشرقى متخلف وتلاقى معظم العائلات لو ابنهم
بيحب وحده مطلقة
يقولوله انت لازم تتجوز بنت بنوت
وللاسف المجتمع ده ظالم المطلقة بشكل رهيييب
مع ان كتير ملهومش ذنب فى الطلاق
طب هل المطلقة دى ادام اتطلقت خلاص كده ملهاش حق
تعيش ؟
ولا تموت نفسها عشان المجتمع رافضها ؟
المفروض قبل ما ابصلها على انها مطلقة ابص انها انسانه
محتاجه تعيش زيها زى باقى جنسها
وطبعا فى كتير شباب يرفض امر الزواج بام وعندها اطفال
وده حقه لانها بتبئا مقدرة على التحمل فلو مفيش حب اكيد
مش هيبئا فى تحمل
وعشان يكون فى تحمل لازم وجود الحب



س / فى الحلقه السابقه لشاعرة الرومانسيه دخلتى رديتى مرتين
وكان واضح انك اضايقتى لما قولتلها انها مطلقه ؟ بصراحه الكلمه
وجعتك او حستيها ؟

كلامها وجعنى اوووى فى حاجتين اولا فى الاجبار من والدها
وثانيا فى نظرة المجتمع ليها
مع ان الاب هنا كان عايز مصلحتها وخايف عليها لكن مع ذلك
محطش فى اعتباره
مشاعر بنته ورغبتها فى شريك حياتها
ونظرة المجتمع اللى ديما متجنى على المطلقة
وان شاء الله ربنا يوفقها ويجى اللى يقتحم قلبها
لانى مش مع انها تفضل كده من غير جواز
بعد عمر طويل فى وقت مش هتلاقى اقرب الناس ليها مش
موجودين هى دى سنة الحياة
بالتالى هتعيش فى وحدة فظيعة

س / بصراحه ومن غير تفكير انتى اتقدملك حد فعلا وحاسه انك
هتوفقى على الزواج ؟

اهو من غير تفكير فعلا فى 2 اتقدمولى منهم ابن عمى ورفضته
رفض تاااااااااام
وفى شخص تانى وفى موافقة بس ربنا يستر ومش يعمل حاجة
تخلينى اغير رأيى لان زى ما قولتلك الاختيار بعد القبول له عندى
اعتبارات واولويات مهمه

س / ايه المواصفات الى بتتمنيها فى الزوج القادم ؟ او شايفاها فى
العريس الى متقدملك ؟

اهاااا وبعدين امورشووو معاك
اولا يكون عارف ربنا كويس ويتقى ربنا فيا وفى البنات
ويكون ليا زوج واب واخ وابن ووقت ما اكون محتاجه صاحب ألقيه

س / معانا عضو فى المنتدى اسمه ( ع ــكس قانونه ) طبعا
ماتعرفهوش دا اكيد ؟ ايه العلاقه الى الاسريه الى بينكم ؟

ههههههههه ولا عمرى شوفته من ده
حمود ده ابن واحد صاحب بابا ومن حوالى 5 سنين فى بنا شغل
هنا وفى الامارات
وقاعد هنا فى اسكندرية فى العمارة اللى جنبنا
بلغه بس امورشووو انه عليه ايجار الشاليه من شهر 11 هههههه
وكمان النت مش انا ادفع وهو مقضيها هههههههه

س / بحسك بتهربى من مواضيعه والردود عليه ؟ ايه الحكايه ؟

ااااااااااااااه والله فعلا بس بعد الحلقة دى اكيد مش ههرب تانى
بص انا مش بدخل مواضيعه ولا مدونته صح
عشان الكلام والناس اللى بتسبق تفكيرها
واللى ديما لازم يربطوا انك لو عملت لايك ولا متابع كتابات عضو
معين يبئا لازم يكون فى علاقة بينكم
طب استنوا واكيد هتعرفوا وعلى رأى المثل اللى بيزمر مش بيخبى
دقنه ولا ايه ؟

س / ندخل على المنتدى وهبدء معاكى من الاحداث الاخيرة ؟ انتى
زعلتى ليه ان اتقال ليه بالذات اسيل الى نزلت الحمله دى ؟

مبدئياً انا مش مسئوله عن تصرفات حد
وهقولك حاجه كل واحد له حياته الشخصية سواء قافل على نفسه
ومش بيتكلم مع حد او الناس تعرف عنه كل حاجة انا هنا فى
المنتدى اللى الاعضاء يعرفوه عنى انى متجوزه وعندى طفله
ازعل بئا لما يتفهم كلامى عن عضو فى ظرف بعينة ان فى علاقه
بينى وبينه ويتلقح عليا بكلام وحش وعك كتير ومش أول مره
يحصل كده
طب على اى اساس حكمتوا عليا كده ؟ ما اهو محدش يعرف عنى
حاجه
ولا المفروض انى مش اتكلم مع حد نهائى ؟
اللى يزعل بجد اننا المفروض متعلمين متحضرين ومش معنى ان اى
2 يحصل بيينهم كلام على منتدى يبئا فى علاقة بينهم
ومش عشان انا عملت الحملة يبئا فى سر خفى
ولو كان اى حد تانى غير نور كنت هعمل كده بردوا وبردوا كان
ممكن وحده غيرى تعمل الحمله دى بس هى جت كده بالصدفة

س / بصراحه وبأختصار شديد فى علاقه حب بينك وبين نور حاليا ؟

ههههههههههههههههههههه اقسم بالله انت مصيبة
لا مفيش أى حاجة نور اخويا وعشان انا اعرفه من وقت
ما سجلت فى المنتدى
والعشرة اللى بنا ده اللى بيربطنى به حاليا
وعشان كده انا قررت اجيب لنور عروسه عشان ارتاح من الكلام ده
وهو اكيد واثق فى ذوقى



س / شايفا ان الاستضافات الى عملتوهم مع مورشو وياسر كان ليها
اى اهميه فى المنتدى خاصه بعد الى حصل ؟

والله انا ليا هدف معين من البرنامج وهو لو فى خلاف بين اتنين وكل
واحد فيهم يوضح وجهه نظره وبالتالى هيكون فى نقط ألتقاء
وميكنش فى خصام بين اى اتنين
لكن للاسف الحوار جاب نتيجه سلبية

س / اتقال ان تم الاتفاق بينك وبين مورشو ونور ضد احساسى
صحيح ؟ ايه حقيقه الكلام دا ؟

اقسم بالله العظيم مكنش فى أى اتفاق بينى وبين مورشووو ونور
والله على ما اقوله شهيد
اهو حلفت ودى مش اول مره احلف

س / ليه قدمتى شكوى ضد مورشو ونور فى قسم الشكاوى ؟

عشان اسلوب العند اللى انتوا متبعينه مع بعض
لان كل واحد نشف دماغه على اللى هو شافه وبس
وده مش اسلوب مراقبيين المفروض يكون فى بينكم تفاهم ومصلحة
مشتركة تخافوا عليها انتوا الاتنين
ومش عايزة اتكلم فى الموضوع اكتر من كده لانه ممكن يتفتح تانى
وبصراحة انا تعبت نفسياً من الموضوع ده

س / طلبتى الانسحاب من الاشراف ولم يتم تنفيذ طلبك ؟ ايه سبب
طلب الانسحاب من الاشراف ؟

أنت السبب
ههههه
لانك بعد ما اتفاهمت معاك على توبيك جميع مواضيع اليوميات
ووصلنا لحل وسط ان الموضوع ده ملوش لازمه وهيعمل مشاكل
فى الوقت الحالى
انت رجعت بعتلى رسالة تقولى بعد كده انتى مش تدخلى فى اى
موضوع هنزله وانا مش هدخل فى اى موضوع انتى هتنزليه
ورديت عليك وقولتلك لا مش هينفع ان يكون وجودى زى عدمه
فى القسم ولو كده هسيب الاشراف
وبالفعل كتبت طلب باعفائى من الاشراف وامجد وماجيك وحوراء
رفضوا وامجد قفل المناقشه فية
لانى طبعا مشرفة زى العسل ومحبوبه من الكل غنية عن التعريف
يا افندم ههههههههه

س / طيب انا مع الاستقاله طالما انا السبب ؟ حاولى تقدميها تانى يمكن يقبلوها ؟

مفيش دم خالص كده
ههههههههههه والله معنديش أى مشكلة
انا بحب اليوميات وهشارك فيها سواء مشرفه أو لا

س / اخبار اليوميات ايه الفترة الحاليه من وجهة نظرك ؟

والله يا مورشووو ياخواييا من ساعة مانت سبت المراقبة فضيت
للقسم وبئا احسن
وعلى العموم
اليوميات جميلة اووى بتعيش مع كل عضو افراحه وذكرياته
ومواقف بتحصله
وهزار وكوميدايا وجو جميل

س / مفيش اى فكره جديده ليكى هتقدميها فى اليوميات ؟

حاليا لا مركزه فى توبيك المتزوجين والمتزوجات
بصراحة التوبيك ناجح وبيعمل روح جميلة فى القسم
وكفايه انه حاليا فى فتره الخمول دى بيجيب اعلى مشاهده وردود



س / تحبى تقولى ايه لبناتك ؟

اقولهم انهم اغلى 2 فى حياتى مقدرش يعدى يوم من غير ما اشوفهم
ربنا يخليهم ليا يارب ويحميهم ويبارك فيهم

س / تحبى تقولى ايه لزوج المستقبل ؟

ماشى يا مورشووو
بستحلفلك والله ليه الاحراج ده
هو بعد اللى انا قولته ده والمرأة الشريرة الشرسه دى لو فى حد
اكيد هيهرب هههههه
هقوله راعى ربنا قبل أى شى
وكون زوج بمعنى الكلمة عشان أنا اكون زوجة بمعنى الكلمة

س / اخيرا تحبى تقولى ايه لاعضاء المنتدى ؟

ااااااااااااااه بئا ده اهم سؤال
عايزة اقول بلاش التخمينات الفاضية اللى ملهاش داعى
مش عشانى أنا بس لا عموماًُ
احنا دخلين المنتدى عشان نفيد ونستفيد ونهزر ونلعب
ونقضى وقت جميل مع بعض
مش عشان نتخانق ولا نلاحق الاعضاء
فى مين بيكلم مين ومين بيحب مين
كل واحد مسئول عن تصرفاته اذا كانت غلط أو صح
كل واحد فيه اللى مكفيه وزيادة مش مستحمل كلام من حد
او سوء ظن
وداخل المنتدى عشان ينسى اللى هو فيه معاكم
ياريت نخاف على بعض ونحب بعض بجد
شكرا امورشووو على الاستضافة المحرجة دى
طلعت منى كلام بصراحة مكنتش ناوية اقوله



بكدا بتخلص حلقة النهاردة

انتظرونى وحلقة جديدة

وضيف جديد فــ

( اجمد عضو )

[عاشق متيم]

لما شفت البرومو وام لبنتين توقعت حرف هجاء
بس كلمه مطلقه وردك فى التوبيك خلتنى استبعدك تماما ً
=======
حرف هجاء
انت شخصيه محترمه وانسانه خلوقه
وربنا يجزيكى كل خير على تربيتك لبنت اختك
وربنا يرحم اختك ويرزقها الجنه
واتمنى انك مش تتسرعى فى جوازك
وربنا يرزقك بزوج صالح يتقى الله فيك
=========
حلقه صعبه يا مورشو
ومتميز كالعادة

[بحر النسيان]

احنا دخلين المنتدى عشان نفيد ونستفيد ونهزر ونلعب
ونقضى وقت جميل مع بعض
مش عشان نتخانق ولا نلاحق الاعضاء
فى مين بيكلم مين ومين بيحب مين
كل واحد مسئول عن تصرفاته اذا كانت غلط أو صح
كل واحد فيه اللى مكفيه وزيادة مش مستحمل كلام من حد
او سوء ظن
وداخل المنتدى عشان ينسى اللى هو فيه معاكم
ياريت نخاف على بعض ونحب بعض بجد


بجد استطافه رائعه

من عضو اسمه مرشدى

ربنا يرزقك الزوج الصالح الى يخاف ربنا ويخاف عليكى

وتعيشى معاه اسعد ايام حياتك

وربنا يعوضك خير بزوج افضل

اجابات ممتازه واستضافه رائعه يامرشدى

[Lamees]

بحي فيكِ أسيل قوتك في أتخاذ قرار حاسم زي الأنفصال رغم
انك عندك بنات ومعاكي حق العيش بهذة الطريقة مع زوج لا يقدر الزوجة
يهدر كرامتها ربنا معاكي حبيبتي وربنا يوفقك ويعوضك الخير

شكراً يا مورشووو على الأستضافة الجامدة اوي دي

[.نبض القلوب.]

و الله انا عاجبنى قوتك ف الردود
بجد انتِ ممتازة
وربنا يكرمك يارب ويوفقك
و يكتبلك الخير أينما كنتِ

حلقة جميلة موروشو

بالتوفيق لكما ..

[ع ـكس قانونه]

شهادتى بكِ اسيل مجروحه جدا
لانى عشت معكم وشوى من هالمأساة ناظرتها بعيونى
الله يخليلج البنات ويحفظهم
وان شاء الله ربى يوفقك للى تبى
وربى ان شا الله بيعوضك خير
ان الله مع الصابرين
لى عتب صغير ليش تخافين من كلام الناس
هيك يتكلمون وهيك يتكلمون
وانتِ تمام وما بتسوى شى غلط ما يهمج شى
وعن الايجار اذا مو عجبك انتحرى

صدق وحق يقال بحقج أنتِ واااايد قوية

[العاشق الذى لم يتب]

جميل الكلام
وعلشان قريت التوبيك واناناوى انام
اثبت حضوروان شاءالله
لى عودة
واستنى يااسيل ماتتجوزيش يمكن افكراخطبك
تصبحوعلى خير

[countess]

اسيل منوره ي قمرايه

مستر تشكرات على الحلقة

[شموع الروح]

ربنا يوفقك ان شاء الله
ويعينك ع تربيه البنوتين ويبركلك فيهم يارب
باذن الله

حلقه مميزه يا مورشوووو
تحياتى

[აα∂ Ԑγεა]

حقيقي واحده من اجمد الاستضافات اللي تابعتها في المنتدي هنا
من القلب للقلب زي ما بيقولوا

اانا حسيت في ردود اسيل انهم خارجين من قلبها وبتتكلم بعفوية
انه كل اللي في بالها قالته ودا اللي خلي الحلقة جميلة كده
فعلا عجبتني جدا ,,

كل حاجة دايما قسمة ونصيب وكل واحد له نصيبه اللي هياخده
اهم حاجة عدم التسرع وان شاء الله خير
اظن واعتقد واحب جدا اقتناعي انه لسه في ف الدنيا الخير
وانه مش كل الناس بتفكر بسطحية وتقاليد مجتمعيه غبية
فاعتقد انك باذن الله هتلاقي الحب وهتلاقي اللي يقدر ويحافظ

عجبني وضعك لبناتك قبلك وانه لازم يكون متوافق معاهم الاول
وانه هما محتاجين دلوقت لاب
عجبني كمان وضعك مع زوجك السابق وانه لسه في تفاهم
دا الافضل للبنات اكيد

ان شاء الله يكون نصيبك واختيارك الافضل والانسب ليهم :]
وربنا يخليهملك يارب ويباركلك فيهم ويعينك علي تربيتهم


بالنسبة للمنتدي اجابات صريحة وقوية جدا
انا تابعت الحلقة الاولي بتاعت مورشو
واسئلتك والاستضافه كلها كانت موفقه فعلا وعجبني موقفك فيها
الثانية ملحقتش اني اشوفها لانه كان عليا امتحان واتمسحت هيا
فدا كان سبب نقاشي وياكي في التوبيك اللي نزلتيه وكلامي عنه انه مش عدالة
لانه فعلا دي ملحقتش تاخد حاجة , وانا مشوفتهاش ودا غلط
لكن ف كل الحالات اناا عارف كويس انه انتي علي الحياد في دا

استضافه جميلة يا مروشو وموفقه جدا ومن اجمل حلقات البرنامج
اجابات جميلة جدا يا اسيل ربنا يوفقك يارب بقي