هل فعلا الحياة حلوة ؟

[SiLver Spectra]

" الحياة حلوة بس نفهمها
الحياة غنوة ما أحلى أنغامها "
كلمات أغنية لفريد الأطرش
لكن هل فعلا الحياة حلوة ؟
يعني لو وقفت بانصاف مع نفسك . هتكون اجابتك : أن الحياة حلوة ؟
حتى لو تذكرت أكتر لحظات السعادة اللي عشتها . فحاول تعيد التفكير تاني و دور عن السبب اللي يخليك تفتكر الحدث بسعادة بالغه كدا . تفتكر هتحس ان السبب يستاهل ؟ و لا الموضوع مجرد حاله نفسية مش أكتر بتوهمك بالسعادة ؟

فكر تاني و تالت و انت صغير مثلا باعتبار انها الفترة اللي الكل بيتمنى يرجعلها تاني ..افتكر الروتين اليومي . يصحوك الصبح و تبقى مضروب بالجزمة و تلبس لبس المدرسة و تنزل و تتذنب على الكرسي في الفصل ..بذمتك مش روتين ؟
يعني لو قولتلك يلا عيد من الأول اللي عملته دا ..بأمانة هتبقى مبسوط ؟
تخيل كدا صغرناك زي المحقق "كونان" بس بنفس عقليتك و تجاربك السابقة ..هتبقى مبسوط ؟ مع اني هشيل منك كل المسؤوليات و الكل هيفتكر انك صغير و ماحدش هيحاسبك . لكن هتكون بعقلية راجل كبير . فهل هيكون ليك خلق تلعب نفس الالعاب و تمارس حياة الطفل ؟ ما أظنش

من هنا استنتجت إن السعادة هي مجرد حاله نفسية بنخدع نفسنا بيها كنوع من تهوين روتين الحياة اليومي ..
انت مش عايز تفكر انك هتقضي من عمرك اللي جاي 20 ألف ساعة في العربية بتقضي مشاويرك ..و لا 120 ألف ساعة في شغلك قاعد موظف على مكتب مثلا
إنت عايز توهم نفسك بالمستقبل بدون ما تفكر في الروتين ..و بتحاول تغير مودك و حالتك النفسية و مش بتحاول تفكر في مشوارك اللي بتعمله دلوقتي و انت نازل تجيب كيسين سكر انك هتعمله لسه ألف مره أدام ..كل اللي بتفكر فيه هو انك هتجيب السكر عشان مافيش سكر و بس . لأنك لو فكرت في موضوع الألف مره دا احتمال ماتنزلش من بيتكم تاني

أحيانا بعد أتأمل في الأطفال الصغيرين و هما سعداء بدون سبب و أفتكر نفسي لما كنت صغير و برضو سعيد بدون سبب و شايف الدنيا كبيره بالنسبة لحجمي ..و بسأل : هو الطفل سعيد ليه ؟ ايه الحلو في الدنيا عشان تبقى سعيد ؟
طب الطفل ابو سنة دا اللي حياته كلها مقضيها متشال على الادين ..ايه المسلي في حياته ؟
لو رجعنا لمثال "كونان" تاني و قولتلك هنرجعك صغير تتشال على الايدين بس بنفس عقلك .هتحس بسعادة برضو ؟
يبقى واضح اننا لو بصينا بانصاف هنلاقي اصلا مافيش حاجه تخليك تفرح و لا تزعل مجرد حياة روتينية مملة

تفتكر لو جبتلك لعب و قولتلك يلا العب زي ماكنت بتلعب زمان ..هتتحمس تلعب ؟
طب اشمعنا الطفل ابو 8 سنين و عشر سنين كان بيبقى سعيد جدا لما تجبله اللعب و يعد يبتكر و يصنع منها عالمه ..ليه انت مش كدا دلوقتي ؟
حد هيقولك اصلك كبرت خلاص ..طيب يعني ايه كبرت ؟
ماهي لو الحياة حلوة هتبقى حلوة بنفس المقياس للكل ..لكن واضح ان شعور السعادة ماهو الا حالة نفسية بترجع من شخص لآخر حسب نوعه و شخصه و سنه

طب أنا ليه في المنتدى ماعدتش بفرح زي الأول ؟ ليه المشرف أول ما يتعين يفرح و بعدين يمل ؟ طب ليه مش مل من الأول ؟ مع ان هو نفس الشغل و نفس كل حاجه من الأول ؟
طب ليه حتى الطفل بيمل ..بيمل من الالعاب و اللعبه بعد فترة ..أمال هو كان سعيد ليه الأول و حاببها ؟
كانت حاله نفسية صح ؟
أو ممكن نقول التجربة الأولى دائما بتخدع الإنسان بالسعادة و لكن الاستمرار فيها و تكرارها بتصيبه بخيبة أمل بيكتشف بعدها إنه أوهم نفسه باسقاط السعادة على هذا الشيء

و في سبب بيتعلق بالتشبع ..انك تشبعت بهذا الشيء على عكس لما يكون نادر ..حاجه بتتعمل مره في الأسبوع لمدة ساعة فدا ممكن يخليها مصدر للسعادة بشكل مستمر ..حتى لو مسكنا في مثال الأكل ..و انت صغير تحب الشيبسي الايس كريم لان الحاجات دي كانت نادرة و مصروفك كان محدود ( أو حتى خليني أتكلم عن نفسي)
لما بتكبر مصروفك بيبقى لا محدود و كل اللي نفسك فيه بتجيبه و بأحجام عائلية . فتلائيك خلاص قرفت من الحاجات اللي كان نفسك و انت صغير تعد تاكل فيها ما لا نهاية و تعوم في بحر من الزبادي الفراولة

و لذلك فدائما الإنسان بينظر للغني و يقول يا حظه مش محروم من حاجه و بيعتقد انه سعيد . مش عارف ان في شخص تاني أكثر فقرا منه بيبصله بنفس النظرة . و مش عارف كمان ان الشخص الغني دا متشبع و هتلاقيه زهقان و قرفان . فيبقى عامل زي الكبير اللي قرف من كتر الشيبسي العائلي اللي بياكله أما الآخر فهو كالطفل اللي بياخد مصروف جنيه في الأسبوع يجيب بيهم كيس صغير و بيحلم في يوم يجيب طن شيبسي يفضل ياكل فيه ..

هي دي الحياة بدون مجاملة ..
بنحاول نصبر نفسنا بحالات نفسية . بنسميها ساعات دردشة - فضفضة - تغيير جو ..الخ
لكنها في النهاية لا تغير من واقع الحياة الحلوة


""لو حد انتحر أنا مش مسؤول ""

[حـ,ـكـ,ـآيـ,ـهـ,ـ ۅطـ,ـنـ,ـ]

تسلم الايادي على الموضوع الرائع


ودعوة رائعه للتفائل


جعل الله ايامك كلها سعاده


بالتوفيق

[حَرفُُ هجآءّ]

ظروف الانسان وظروف الحياة بحلوها ومرها هى اللى بتخلى الحياة حلوة
أو وحشه
لانها لاحلوه على طول ولا وحشه على طول
وزى ما انت قولت وصول الانسان للاشباع من شىء بيعمله
هو اللى بيغير الحالة النفسية من السعادة للروتين أو الملل
يمكن كتير بقول نفسى ارجع زى زمان طفلة
والسبب الوحيد هو المسئولية والضغط اللى بنكون فيهم
عشان كده عايزين نرجع اطفال
لكن لو بنفس العقلية
هيكون قمة الملل من الحياة ومن تعامل الناس اللى حواليك على انك طفل
وانت مش كده

موضوع جميل فعلا يدعو للتأمل
تسلم طارق

[ساحر الأحزان]

هي دي الحياة بدون مجاملة ..
بنحاول نصبر نفسنا بحالات نفسية . بنسميها ساعات دردشة - فضفضة - تغيير جو ..الخ
لكنها في النهاية لا تغير من واقع الحياة الحلوة

هى دة الحياة مع كل مرحلة بتاخد وقتها وتعدى بتحلم انك تحقق وتعمل او انك ترجع

على شان تعمل الى فاتك وكان حلو فى عينك


ومفهوم الحياة حلو

انك بتعطى نفسك جرعة تقدر تعدى بيها مرحلة الملل والروتين

ظريف الموضوع يا دكتور


ومفيش احسن من التفائل برضة

[Silver Flower]

صحيح كلامك
عشان هيك فش حد مبسوط في حياته او مرتاح باله
الغني الي عنده كل شي بيدور على سعاده البال
والفقير عم يدور على المصاري او الفلوس ظن منه انه هي سعادته
بتعرف شو هي السعاده
الاقتناع
لو كل واحد اقتنع في نصيبه كان طول عمره راح يكون مبسوط
بس بني آدم طول عمره طماع بده اكتر
عشان هيك ما راح يكون مبسوط في حياته

[۩۩ elMagic ۩۩]

الحياه مراحل بنمر بيها
اول ما بتخلص كل مرحله بتبدأ تمل منها وتلاقي نفسك دخلت في الجديده بحكم العمر
والعقليه اللى المفروض بتكبر أول بأول وبالتالي بتلاقي مسؤليات بتزيد عليك ،،
دايماً بداية مراحلك الحياتيه بتبقي الافضل علشان مسؤلياتها محدوده إن كان فيه مسؤليات أصلا
وبعد تكرار التجارب من خلال المراحل وتزويد الحمل عليك
بتلاقي نفسك عايش في روتين يومي مبيتغيرش ،،
عموما هي حياه مؤقته بتاخد وقتها وبتنتهي ونتمني تكون النهايه مقبوله .. تسلم لموضوعك

[Aya 7ekaya]

ههههههههه ايه اليأس ده
مانقدرش نحكم على الحياه ااذا كانت حلوة على وحشه بس الى حد ما فيها توازن اوقات بتكون حلوة وبنكون طايرين من الفرحه واوقات تانيه بتكون صعبه وقاسيه دى طبيعه الحياه
والفرحه دى مش مرتبطه بصغير ولا كبير ولا غنى ولا فقير هى بتكون اسباب
ولان مافيش حد حياته مثاليه فـ الاسباب دى ممكن تكون اشخاص قريبين مننا بنحبهم بيخلو الحياة لحوة وممكن العكس
ومممكن واحد فقير يكون سعيد فى حياته لان جوا قلبه رضا او لانه بيسعى للآخرة ومش ف دماغه الدنيا اصلا وممكن واحد غنى فلوسه ماتقدرش تجيب له لحظة سعاده من اللى بيحسها الفقير

الهموم والمشاكل لازم تكون موجوده ف حياة الانسان علشان تعلمه ولو كانت كل الحياه حلوة ومثاليه ماكنش حد هيتعلم ولا الانسان هيكون ليه اى لزمه اصلا
يعنى لو انت زعلان من المسؤليات والشغل تخيل حياتك بتصحى تلاقى الاكل قدام البيت مش محتاج تقف ف زحمه الشارع ولا محتاج تصحى بدرى تروح المدرسه ومهمتك تاكل وتشرب وقاعد كده
هتلاقى نفسك مش ليك قيمه اصلا
وربنا خلقنا لتعمير الارض وجعل السعاده الحقيقيه فى الجنه ان شاء الله
~

[Lamees]

الله يسامحك يا دكتور هي ناقصة
محنا عارفين انها مفيهاش سعادة وصابرين وساكتين
لازم تفكرنا بقى عموماً لو انتحرت ذنبي في رقبتك ^_^

[سيناا]

مافي حد مبسوط الحياة متعبيتك يا دكتور ومتعبيتنا بس ما رح نيأس وتضرب هل العيشة


الى ما بتذوق طعم المر ما بيستطعم بالحلاوة



اوووووه ع ايام كونان والالعاب والشقاوة واحنا صغار ولاحد كان شايل هم شي


اما اليوم امممممممم نكتة الموسم بكرا آحلى

[SaMa.]

موضوع دسم وشامل كل حاجه
الدنيا حلوة وربنا خلق كل متاعها ونعيمها لانسان وسخره ليه
مقابل انه يعبدة ويطيعه
م تلاقيش حد قريب من ربنا وزهقان او تعيس
ومهما بلغ نعيمها فهومؤقت وزائل عشان كده بنمل بسرعه
طعم الدنيا بيفرق من واحد للتانى مكن تﻻقى طفل فقير وبيلعب ف الشارع وفرحان
والتانى غنى وعند وا كل اللعب انما زهقاان وبيشتكى
السعادة ف الرضى والقناعه وان يكون عندو هدف عايش عشانو
وتلاقى لما بيوصلو يدور ع غيرو يجدد ف حياتو الروح
ربنا قال قل متاع الدنيا قليل
وده فيه امل لحياة افضل فى الجنة هو ده الهدف الل بيعيش عشانو م يزهقش
ثانكس ع الموضوع