البنات وخلفة البنات السودة

بعتذر على قساوة العنوان بس هيا دي الحقيقة اللي بعيشها انا واخواتي دلووقتي احنا 4 بنات وولد امي وابويا بيحبونا جداا وعمرهم مافرقوا بين حد مننا حتى بابا بالذات بيحبنا اووي والفترة الاخيرة بقى قريب مننا بيسمعلنا وكلو تمام المشكلة بقى اللي هاتقتلنا لما بتحصل اي مشكلة لو كانت تافهة جدااا تلاقي رد ماما يخربيت البنات وخلفتهم السودة على اللي عايز زفت بنات يعني ليه كدة طيب عارفين والله انا بقيت بحس بالغيرة من اخويا بالرغم من انو راجل بجد وبيحبنا جدااا وكل حاجة بنطلبها يجيبها غير المعاملة نفسها وطريقة كلامو معانا وكل حاجة فيه تجلينا نشيلو من الارض شيل عمرنا مابنزعلو ابداا بس طريقة تعامل امي معانا بتخلينا بنحس بالغيرة وانها بتفرق مابينا واخر بنتين كانت عايزاهم ولد واخر بنت لما عرفت انها بنت كانت عايزة تسقطها وقعدت تعيط وتقول لبابا كان نفسي اجيبلك ولد ده على اساس اللي عندك ده ايه يعني
وكمان عشان اخويا بيدرس ف مصر واحنا ف دولة خليجية فبيقعد معانا بس ف الاجازة فكل ماتحصل اي مشكلة لو بس بسيطة بينا وبينو تغلطنا احنا وتقول ده غلبان بيقعد معانا قد ايه عشان تزعلوه بس معلش ف الاخر اخ ومن نفس العيلة عادي مش ملك هوا وارد ان يحصل مشاكل عادي بس مش تيجي علينا دايما والله اتمنيت كتير ان كلنا نموت مرة واحدة عشان ترتاح من البنات
مع ان هيا معاملتها معانا كوويسة خالص والله بس طول الوقت حاسة دايما ان برضو لو كنا ولاد كان احسن
حبيت افضفض بس معاكوا لاني بجد زهقانة اووي ونفسيتي زفت
هوا لسة في كدة
بالله عليكوا تدعولي وتدعوا لامي ربنا يهديها لينا ويهدينا ليها

[™Amiliya]

كانو اهالينا بردو يقولو هم البنات للمات
دي كها موروثات وافكار قديمة في اعتقادهم ان الولد اقل مشاكل من البنت وانه سند العيلة الى اخره من الافكار
بس هي ممتك ممكن مقتنعة بحجات وان الاب بيحب الصبيان فنفسها تجيبلو راجل تاني
وممكن تكون خايفة عليكم كبنات فبدل ميكون عندكم اخ واحد يكون اخين ليكم يحموكم
وممكن من النوعية الي بتميل للصبيان متعرفين الاسباب
لكن عادة الام بتميل للصبيان والاب بيميل للبنات
وسبحان الله
بس متحوليش تزعلي من الافكار دي لانها مش بايديها اعذريها وزي منتي قولتي هي بتحبكم وبكرة لما تكبرو وتتجوزو وتخلفو هتشوفي حبها ليكم مختلف خالص لانها هتحس بحاجة مختلفة مع حياتكم الجديدة وانها ربت وبناتها بقو اخواتها وبناتها في نفس الوقت

ادلع عليها لما تقول كدا وقوللها البنت بتساعدك اهو وبتعمل كذا كذا وريها حسنات البنات
هتلاقي كلامها وقولها خلفة البنات مجرد كلمة مش حقيقة
ربنا يخليهلكم يارب وتشوفكم احسن ناس

[ساحر الأحزان]

هى أن كانت فهى بتتكلم من ورا قلبها يعنى مش ناقصها حاجة ربنا أعطاها البنات مع البنين

حتى ولو لد واحد يعنى ربنا ما حرمها من شىء ؟

وكلامها أن دل فهو بدل على ضعف قلبها وخوفها عليكم وأن كانت قالت فهو من ورا قلبها

ونقطة أخيرة التفرقة فى المعاملة بين الولد وبين البنت هى ألى بتزرع الغيرة وعدم الحب

بينهم ودى نقطة مهمة يا ريت الأهل يراعوها فى طريقة معاملتهم مع أولادهم

ربنا يوفقك مش تاخدى الحكاية بزعل دى كلها مناوشات أسرية بتروح لحالها عمر أهلك

ما يفرطو فكى أنتى أخواتك

[Aya 7ekaya]

اغلب الناس تفكيرها كدهوده للاسف انا نفس المشكله
ديما ف محتمعنا كمان شايفين ان الولد مش بيغلط ولو غلط ماينفعش حد يقول انه غلطان وكانه اله
بس ي حبيبتى ماتزعليش نفسك ولا تتضايقى وربنا يهون

[الأميرة رودي]

ياحبيبتي هى ثقافه موروثه
الولد بيشيل اسم ابوه
الولد هو اللى بيعمر البيت
البنت هموما ومشاكلها كتيــر
رغم ان الرسول أكد انه اللى بيربي بنت واحده تربيه حسنه بيكون له نصيب من الجنه
كمان البنت حنانها واهتمامها بأهلها بيفوق كثيــ{ حنان الولد واهتمامه
ولكن هى معتقدات صعب تتغيـــر

[Lamees]

معلش هو مجرد كلام من ورا القلب
ومجتمعنا هو اللي فرض ده
لأن الولد بيعتبروا همه أقل من البنت
والخوف كمان عليه أقل من البنت
بس والله البنت بتجيب ولد
يعني لو عندك بنت وبتجوزيها لزوج صالح
بيكون زوجها بمثابة الأبن الذي يسعى بكل جهده
لأرضاءهم

[إبتسامة]

اكيد انتو مزهيقنها مش تقول كده من فراغ
يعنى انا كل اولادى ذكور مع ذلك بقول لهم نفس الكلمة
على الاولاد وشورتهم السوده
مش لو كان عندى بنت كانت زمانها حاملة همى وبتساعدنى
ربنا يخلى الاولاد والبنات

[رآقيہ بأخلاقـى]

فى نوع من الناس كدة بيفضلوا خلفة الصبيان عن البنات
وانا شوفت من دة كتير عندنا جيران كدة
والمشكلة ان اللى مش بتحب خلفة البنات هى امراة
يعنى من زيهم معرفش ايه العقليات دى
ربنا يهدى