الزمالك يواصل انتصاراته بفوز صعب على اتحاد "العميد"

[توحد ارواح]

الزمالك يواصل انتصاراته بفوز صعب على اتحاد "العميد" حقق الزمالك فوزا صعبا على نظيره الاتحاد السكندرى بهدف دون رد فى اللقاء الذى جمعهما اليوم، على استاد الإسكندرية، ضمن منافسات المرحلة السابعة من الدورى الممتاز . سجل هدف اللقاء الوحيد اللاعب مؤمن زكريا للزمالك من تسديدة صاروخية فى الدقيقة 73، إثر ارتباك دفاعى فى قلب دفاع زعيم الثغر لم يتمكن على فرج من التصدى لها. بتلك النتيجة يرتفع رصيد الزمالك إلى 12 نقطة فى المركز الثالث ، وتجمد رصيد الاتحاد عند 5 نقاط فى المركز الـ16 . وظهر الاتحاد السكندرى للمرة الأولى تحت قيادة جهازه الفنى الجديد بقيادة حسام حسن، الذى تولى المهمة الأسبوع الجارى بعد استقالة طلعت يوسف. بدأ اللقاء بـ"جس النبض" بمحاولات من الطرفين، ولكنها لم تُترجم إلى خطورة حقيقية على مرمى الفريقين ، باستثناء هجمة للاتحاد أنقذها خالد قمر من على حدود خط المرمى. الدقيقة 17 من عمر اللقاء شهدت أول تهديد حقيقى لمرمى الزمالك، بعد هجمة خطيرة للاتحاد سددها التونسى أسامة بوغنيمى لاعب الاتحاد فى جسد أحمد الشناوى، بعدها حاول الزمالك البحث عن حلول عن طريق تنويع الهجمات فى العمق ومن على الأطراف ولكن الحذر الدفاعى والتخوف من الاندفاع الهجومى واستغلال الخصم للمساحات الخالية حال دون هز الشباك. حاول حسام حسن تنشيط صفوف فريقه عن طريق الدفع بإبراهيم هلال مكان أسامة بوغنيمى، وعلى الجانب الآخر حاول الزمالك الرد على تغييرات حسام حسن فدفع باتشيكو بأحمد توفيق بدلا من طارق حامد الذى لم يصنع الفارق فى خط وسط الزملك، حتى نجح مؤمن زكريا فى تسجيل الهدف الأول. الدقائق الأخيرة، أحكم باتشيكو إغلاق المساحات ونجح فى سد الفراغات أمام انطلاقات لاعبى الاتحاد، فلم يعان الشناوى من ضغط هجومى باستثناء تسديدة أوميدا أوكيرى التى أخطأت طريق المرمى وعلت العارضة بقليل.

[აα∂ Ԑγεა]

مش هتكلم فنيا كتير في المباراة لاني تهت الحقيقة فيها !
فنقول نفس الخطة ونفس اللاعيبه لكن افتقاد كبير للمسة وسرعه بديهه حفني
اما عن الاتحاد فكان بيلعب بكثافة عددية كبيرة في نص الملعب
وصعب الكورة علي الزمالك لكنه مكنش مميز برضوة ,

فرص قليلة في المباراة تقريبا 4 فرص بس للفرقتين منهم 3 للزمالك
يبقي فقط اللمحات الفنية الكتيرة ف المباراة اللي ادتها طعم ,


اداء اللاعبين ,,

مؤمن زكريا
لاعب بامكانه انه يكون افضل لاعب في الزمالك واسوء لاعب برضوة !
الوحيد في مصر اللي يقدر يلعب كمهاجم وهمي ويضرب الدفاعات ويعمل مشاكل ضخمة
لكنه يفتقد اللمسة الاخيرة في اغلب الاحيان وبيغلط في قرارته
لو يركز شوية ويعرف ينهي دايما الهجمات هيكون لاعب خرافي فعلا !
يبقي لحد اللحظه هداف الزمالك في الدوري ,


محمد كوفي
افضل لاعب ف المباراة بكل تأكيد !
لاعب بيلعب بروح وقتالية شديدة مش موجودة في اي لاعب تاني
حماسه فوق الوصف واداءه خرافي بثق تماما فيه
كان اكثر صفقة متحمسلها وشايف انه الزمالك كان لازم يتعاقد معاه
مش عايز انسي علي جبر برضوة الرهيب جدا جدا ولا الشناوي الافضل في مصر
نقدر نقول خط دفاع الزمالك عالمي بكل ما تحمل الكلمة من معني ♥
متفائل تماما بيهم لاول مرة من 10 سنين يكون معانا خط دفاع بالقوة دي
والطبيعي انه يبقي 5 مباريات علي التوالي من غير ما تتهز شباكنا ♥


ابراهيم صلاح
اللاعب دا مشي من الزمالك ممتاز جدا رجع الزمالك اعجازي !
مش معقولة المستوي اللي وصله اللاعب دا في سنة واحدة
حاليا وبكل بساطة افضل لاعب ف المركز دا في مصر
بالاضافة لزميله ف الفريق طارق حامد هو المنافس الوحيد له ف المركز دا !
عن نفسي شايف ابراهيم صلاح الاحق بكابتنه نادي الزمالك ,,



الف مبروك لكل الزمالكاوية الفوز واللي يارب يبقي العادة باذن الله
الاسبوع اللي جاي هنلاعب حرس الحدود
وفي حال فوز الزمالك بالمباراة هيبقي متصدر الدوري ان شاء الله
يارب وفق ♥

[توحد ارواح]

ربنا يستر الماتش الجاى انا غير مظمئنه
بس فعلا يارب تبقى عاده بقا
بالنسبه لماتش النهارده صراحة مش اتفرجت عليه

[აα∂ Ԑγεა]

اقتباس المشاركة الأصلية كتبت بواسطة توحد ارواح ربنا يستر الماتش الجاى انا غير مظمئنه بس فعلا يارب تبقى عاده بقا بالنسبه لماتش النهارده صراحة مش اتفرجت عليه

يعني هو مش ماتش ممتع لكن وصلنا للمطلوب وشخصيتنا واضحة ,
ان شاء الله خير
انا متفائل تماما باللاعيبة الحالين في الزمالك وشايف الامل فيهم
ان شاء الله الزمالك هيحقق الفوز علي الحرس

[توحد ارواح]

نتمنى يارب
حرس الحدود فريق جامد ومركز اول ومستوى لاعبيته ثابت
نفسى اتفرج على الزمالك وانا واثقه من فوزه
انا بجد عدت بخاف اتفرج والنهارده قلت اشوف النتيجه وخلاص ف الاخر
وكل شويه ابص ع الساعه لغاية لقيت الساعه 8 وخمسه قلت يلا بقا انا قلقانه
لان ده اول ماتش لحسام حسن مع الاتحاد
وهو طبعا حافظ الزمالك جدا وكمان كان عاوز يثبت نفسه
عموما الحمد لله ومبارك لكل الزمالكاويه ويارب دايما

[აα∂ Ԑγεა]

اقتباس المشاركة الأصلية كتبت بواسطة توحد ارواح نتمنى يارب حرس الحدود فريق جامد ومركز اول ومستوى لاعبيته ثابت نفسى اتفرج على الزمالك وانا واثقه من فوزه انا بجد عدت بخاف اتفرج والنهارده قلت اشوف النتيجه وخلاص ف الاخر وكل شويه ابص ع الساعه لغاية لقيت الساعه 8 وخمسه قلت يلا بقا انا قلقانه لان ده اول ماتش لحسام حسن مع الاتحاد وهو طبعا حافظ الزمالك جدا وكمان كان عاوز يثبت نفسه عموما الحمد لله ومبارك لكل الزمالكاويه ويارب دايما

يمكن كان نقطة الخوف الوحيدة هيا حسام حسن كمدرب للاتحاد
ومش علشان هو مدرب جامد " لانه اصلا ملهوش فيها "
لكن علشان جزئية الحماس والانتقام اللي هو مش بيجيد الا بيها

الماتش دا انا كنت شايفه كنقطة فاصلة للزمالك
يا هيعرف يفوز وبعدها ينطلق في انتصارات متتالية ياما هيمشي بسطر وسطر لا
ف الحمد لله الفريق شكله هياخد الفوز وعدم استقبال اهداف عادة

مفيش فريق في الدوري حاليا ضعيف وكل الفرق حتي اللي ف اخر الدوري
قادرين انهم يعطلو اي حد بالاخص الاهلي والزمالك
لكن برضوة مفيش فريق في مصر متكامل اكتر من الزمالك السنة دي
وعنده الجودة والحلول في كل مكان
مشوفتش اي لاعب في مصر يتفوق علي اي مركز في الزمالك لحد اللحظه ♥
افضل لاعب ف مركزه في مصر حاليا هتلاقيه في نادي الزمالك
وعلشان كدة انا متفائل جدا ♥
ان شاء الله خير
اكيد هيبان كله دا من المباراة اللي جايا الفوز فيها يعني تصدر الدوري باذن الله
وتبدد كل الشكوك اللي عند اي حد
مبروك بقي

[سارة بنت مصر]

الف مبروووووووووك لكل الزملكوية على الفوز النهارده ووصولنا للمركز الثالث ب12 نقطه
عقبال الماتش اللى جاى بالفوز ووصولنا للمركز الاول يارب

وعقبال الدورى