البدايه والنهايه ( مسابقه الفضفضه)

[Dr. AnOosHo]

بداية مرحله جديده ... بدايه لمستقبل جديد .. بدايه لعمر بنرسمه بإيدنا بدايتي بدايه مرحله الجامعه ونهايتي نهايه مرحله الجامعه مقدمه اتخرجت من الثانويه العامه من مدارس ****************** ويمكن نادر لما حد يعرف يعني ايه تكون دراستنا في دول الخليج خاصه لو بنت عامه بتبقى دول منغلقه تماما .. باص من قدام المدرسه لقدام البيت الدروس الخصوصيه لو موجوده فهي نادرة جدا عاده بتبقى في اخر مرحله من الثانويه وبيجي المدرس لحد البيت لا سنتر بره ولا بيوت مجتمع مغلق تماما .. محتاجه اي حاجه من السوبرماركت صعب نروح لوحدنا حد من اهلنا معانا لان مافيش حد بيمشي على رجليه نادر ماندر بنت تبقى ماشيه في الشارع على رجلها ( في ايامي مش دلوقت) خلصت ثانويه عامه في مجتمع مغلق تماما.. وقدمت على التنسيق وفضلوا اهلي منتظرين النتيجه وفي يوم الاتنين الموافق 22/8 ظهرت نتيجه تنسيق المغتربين ( دول الخليج) صيدله الزقازيق كان لازم ابان قدام اهلي ان ايه يعني زقازيق من قاهرة من اي محافظه تانيه غربتي هي بعدي عنكم ... لكن اهلي كانوا مصممين ان في القاهرة وسط قرايبنا وعماتي وخالاتي افضل ميت مرة من اي محافظه تانيه انا فضلت مصرة ومصممه وبقدر الامكان بوصلهم فكرة واحده ان انا مش قلقانه وعادي جدا وانا جدعه وبميت راجل حاولوا معايا ادخل طب القاهرة لان بياخد اقل من صيدله في سنتي .. لكن انا صممت واصريت اني قد تحمل المسؤوليه ومش حخبي عليكم اني كل يوم كنت من الرعب بحلم بكوابيس ههههه البدايه:- اول يوم كليه في جامعه الزقازيق ... 19 /9 /2002 الساعه 5 صباحا ركبنا انا وبابا واخويا الكبير السوبرجيت .. كان اول مرة في حياتي اركب السوبرجيت كنت حاسه فرحانه جدا بيه ومن جوايا خووووف من اللي جاي انا ماعرفش الجنيه من الربع جنيه ماعرفش الناس بتشتري الفاكهه بالحبه ولا بالكيلو ماعرفش فين ممكن اجيب اكل ليا ماعرفش بدفع كام في المواصلات ماعرفش الطرق ماعرفش الاماكن مرعوبه وخايفه وبظهر لهم القوة خوف على قلقهم وتحمل لمسؤوليه قراري قررت انام طول الطريق عشان اصحى على الزقازيق وعلى الواقع اللي رايحاله كفايه تخيلات تعبت الساعه 8 صباحا ... بابا صحاني يلا حبيبتي وصلنا نزلت واول ماحطيت رجلي بره السوبرجيت وقعت على وشي مكنتش عارفه ان المسافه بين اخر سلمه والارض كبيرة نزلت على الهوا قومت وقولت معلش كلنا بنتعلم .. بابا بدا يدورلي على سكن اقعد فيه المدينه الجامعيه كانت فكرة مش محبذه في بيتنا لان عارفين انها متعبه عليا قررنا نشوف شقه طلبه واخد اوضه فيها لا حد يضايقني بنور ولا دوشه لفوا وسالوا وصلوا لست عندها بيت والدور الاول منه ماجراه للطلبه كان ديما بابا يقول اوعي تقولي لحد انك من ****************** في الاول كان عارف ان الكل فاهم تربيه ****************** تربيه ورق دخلت الشقه وروحت لاوضتي بدات افضي شنطتي على بابا مايرجع من البنك بيسحب فلوس لقيت البنات جايه عليا وانا بطلع الحاجه من شنطتي واحده قالتلي هاتي 200 جنيه حعملك نموسيه لان هنا جسمك حيتاكل من الناموس والتانيه قالت الله عندك مكوى كويس نكوي هدومنا والتالته قالت معايا موبايل ممكن نستخدمه استقبال مش حنعمل منه مكالمات انا كان كل ردي اه اه ومخضوضه جدا دقيقه واتصلت على بابا ... تعاللى خدني من هنا انا مش مبسوطه ايه المكان الوحش ده حتى الشقه مش مريحه نفسيا جه واخدني وروحنا دورنا على مكان تاني في عمارة واحد اسمه عاطف ارتحت فيها .. الاوضه حلوة .. الشقه حلوة .. البنات حلوين كلهم من المنصورة او بورسعيد بعدها عرفت ان المكان الاول بنات من ارياف الزقازيق مكنش عندي اي اعتراض عليهم بس ماينفعش ومش حعرف اتعايش معاهم في اول مرة مواجهه بيني وبين مصر روحت الجامعه بعدها ودفعنا المصاريف .. وبابا واخويا روحوا ينامو وقالوا شويه ونرجع ناخدك اعرفي جدولك واشتري الكتب اول يوم كان توهان في الجامعه لا عارفه فين المدرج من السكاشن من مكان الكتب المدرج كبيييييييير وانا حرانه ومش متعوده غير على التكيف عماله اشرف مايه وبيبسي من قوة الحر انا الوحيده اللي حرانه ومحدش حران غيري اتصل عليا بابا قالي خلصتي قولت اه جه لقاني معملتش اي حاجه بس بتوه تاني يوم روحنا وعملي كل حاجه ورتبلي دنيتي وسافر ****************** وانا بقيت لوحدي اتعلمت كتير من البنات اللي معايا في الشقه .. من الاحتكاك فهموا اني مش فاهمه اي حاجه في اي حاجه وخلصت اول سنه كليه صيدله الزفازيق .. وحولت لحلوان نزلت القاهرة وانا فاهمه وعارفه ومتعلمه حاجات كتير من اول تجربه ليا في الزقازيق عرفت اني مش وش كليات وسكاشن .. انا عايزة دروس عرفت اني مش وش مواصلات .. انا عايزة تاكسي عرفت اني مش وش فهلوة ... خليني على جنب بدل منا قضيتها في الزقازيق نشل النهايه:- سنه ورا سنه اتعلمت وبدات اتحرك براحتي في مصر اتعلمت اشتري ايه منين اتعلمت اكلم ازاي مع اي حد طلعت من قمقم دول الخليج اتعلمت كل حاجه واغلب اللي المفروض يكون معروف في مصر .. الا حاجه واحده اني اركب ميكروباس او مترو اخر سنه جامعه كانت احلى سنه في عمري اخر يوم امتحان في السنه الاخيره .. كنت محبطه جدا جدا جدا ومش عايزة السنه تخلص مش عايزة احلى ايام عمري تخلص مش عايزة ابعد عن صحابي بحب الامتحانات جدا كنت .. بحب الدروس .. بحب لمتنا في الجامعه عشان نلعب ونعمل مقالب ونجري ونطنطت مش عايزة ابعد عن شلتي اخر يوم اجمعنا كلنا كان يوم 17 /5 /2007 ... كان احلى يوم قعدنا لحد 7 مساء في الجامعه لعبنا كهربا وعملنا مقالب وسلمنا على اجمل معيدين اتعرفنا عليهم في حياتنا قررنا نكمل دراسات عليا عشان منسيبش الجامعه ومنسيبش بعض لكن للاسف كان حلم وماتحققش .. بنات شلتي يا اجوزوا يا سافروا لو من دول الخليج وولاد شلتي اغلبهم اشتغل وتلاته منهم سافروا شافوا ان لازم يشتغلوا والدراسات مش حتفيدهم بحاجه في الاخر واقفين في صيدليه مهما خدوا من شهادات وانا بابا وماما قالوا تعالوا عيشوا في ****************** معانا بدام خلصتوا الجامعه واشتغلوا هنا اخر يوم جامعه انتهت فيها احلى ايام عمري اتمنى ارجع بعمري للبدايه .. بس للاسف مضطرين نكمل من النهايه اللي فات عمره مابيرجع

[♥○ moOoOoOna ♥○]

هههههههههههههههههه
ياعينى عليكى ههههههههه
وخدوا منك الـ 200 جنيه ؟ هههههههههه
بس مش كل الناس زى بعضها
عشان بس ماحدش يزعل
انا من القاهره بس فى كل حته الحلو و الوحش
وانتى دلوقتى عايشه فين ؟
بس جميله الفضفضه ضحكتنى
وهو فيه حد فى مصر مش بيركب المترو ؟

[دمعه حائره]

الغربه بتعلم كتير وبتقوى الشخصيه اكتر
رحله مكافحه ونجاح ربنا معاكى ويوفقك دايما

[كريم*]

هى تقريباً نفس حياة لمار
مع فارق ان كليتها او الاكاديمية كانت بنفس مدينتها
لمار اخدت بعض العبارات الخليجية
وبتتكلم بيها لدلوقتى بحكم طول فترة التواجد
لكن ما شوفنا منك اى عبارات كويتية زى كيفج صحتج احوالج
كمان اختى ما كلمتينا عن شق مهم
وهو البنت اللى اتقفل عليها طول عمرها بمجتمع خليجى
كيف تعاملت مع مجتمع مختلط شاب يقعد جمبك بالمدرج
او يستلف منك كشكول المحاضرات او حديث بالسكاشن
بمعنى ادق كيفية الانتقال من الانغلاق الى الانفتاح
كل الشكر

[Dr. AnOosHo]

اقتباس المشاركة الأصلية كتبت بواسطة ♥○ moooooona ♥○ هههههههههههههههههه ياعينى عليكى ههههههههه وخدوا منك الـ 200 جنيه ؟ هههههههههه بس مش كل الناس زى بعضها عشان بس ماحدش يزعل انا من القاهره بس فى كل حته الحلو و الوحش وانتى دلوقتى عايشه فين ؟ بس جميله الفضفضه ضحكتنى وهو فيه حد فى مصر مش بيركب المترو ؟

انااااااااااا معرفش اركبه ولا بتحمله ههههههههههههه

نورتي يمنوووون

[Dr. AnOosHo]

اقتباس المشاركة الأصلية كتبت بواسطة دمعه حائره الغربه بتعلم كتير وبتقوى الشخصيه اكتر رحله مكافحه ونجاح ربنا معاكى ويوفقك دايما

معاكي حق ومصر بالنسبه رحله غربه وكفاح

نورتي حبيبتي وتسلمي على دعوتك يارب

[Dr. AnOosHo]

اقتباس المشاركة الأصلية كتبت بواسطة كريم* هى تقريباً نفس حياة لمار مع فارق ان كليتها او الاكاديمية كانت بنفس مدينتها لمار اخدت بعض العبارات الخليجية وبتتكلم بيها لدلوقتى بحكم طول فترة التواجد لكن ما شوفنا منك اى عبارات كويتية زى كيفج صحتج احوالج كمان اختى ما كلمتينا عن شق مهم وهو البنت اللى اتقفل عليها طول عمرها بمجتمع خليجى كيف تعاملت مع مجتمع مختلط شاب يقعد جمبك بالمدرج او يستلف منك كشكول المحاضرات او حديث بالسكاشن بمعنى ادق كيفية الانتقال من الانغلاق الى الانفتاح كل الشكر

لا انا مش زي لمار خاااالص ههههههههههه لمار كلامها كله معوووج حضرتك .. انا عمري مكلمت كلامهم ولا احب اكلمه .. هم اللي بيحاولوا يكلموا مصري
مش لسبب والله خالص ولا عيب في لهجتهم بس ماحبتش ده

اما مرحله الانفتاح .. اول سنه وانا رايحه الكليه بابا كان بيقولي اللي ياخد منك قلم .. ليه ما اخدوش من زميله اشمعنى منك

انا اكيد كنت حاطه ده في بالي بس الفرق اللي بابا مفهموش لس انا كنت حطاه قدامي .. ان علاقات الجامعه دي اغلبهت بيبقى تسليه وحب تليفزيون ومسلسات الا من رحم ربي

فماكنش في نيتي ابدا اي علاقات مع اي شاب .. في الاول كنت ببقى محرجه لما ولد يكلمني لاني مش متعوده على ده وشويه شويه بدات اتعرف عادي واتكلم معاهم وصفصفت على شله من 4 اولاد و 7 بنات .. قفلنا على نفسنا وبقينا اكتر من اللخوات واهلي عرفوهم ودخلوا بيتنا وخدنا دروس سوا .. وطلعت من القمقم بقى وبابا الصراحه مرة واحدة اكلم معايا انا فهمته ان لا بفكر في علاقات ولا الكلام الفاضي ده وفاهمه كويسه ..وخاصه ان في الزقازيق اول سنه كان كل اللي معايا في الشقه عنده بوي فريند وانا مغلطش الغلطه دي ففهمني وعرف اني جدعه


دي فضفضه تانيه مخصوصه لك ههههههههههه... نورتني يكريم

[العاشق الذى لم يتب]

جميل ماشوفته هنانوشة
نعم انت
تعلمت وتعبت وشقيت
بس عندك القوة والمقدرة وتحمل السئولية
ومواكبة الظروف
والحياة تجارب
القلك الف مبروك التخرج
الف مبروك الشغل
الف مبروك الخطوبة
ربنايوفقك دومايارب
تحياتى
والتوفيق فى المسابقة
مع خالص دعواتى

[.Lamar]

فضفضة حلوة يا نوشة

بس مكنتش اعرف ان كلامى معووج يا بطة

لو عندك دكتور كويس ابعتيلى رقمه هههههه

و معلش تعبناكى و فضفضتى تانى مخصوص

بس كريم بيحب يلم بالتفاصيل ههههه

تسلمى يا جميلة

موفقة بالمسابقة

[Stop Ana Eltop]

هههههههههه فضفضه حلوه يادوك بقن
بس مالهم الارياف بقا دول احسن ناس
انتى الى كنتى خام بس مش اكتر

طبعا عندك احسم من مصر بكتيير
بالتوفيق ليكى بقن بره مصر اولاا

ثانيا فى المسابقه