الحلقه التانية ( لو كنت مكاني ) ولو مش عذراء

[phalsteen]

مساء الخير

في البداية بشكركم علي التفاعل المحترم
ع الفكرة واتمني تنول اعجابكم
للنهاية
هنـــــــــــــــــــا الحلقه الاولي
للي حابب يتعرف علي البدايه

مهــــــــا :

تبدأ الحكاية لانسانه مقفله كل بايبنها قافله علي نفسها 100 قفل
مش اجتماعيه ولا انطوائيه لانك باختصار متعرفش تحكم عليها غير
انها شكليا جميله وظاهريا في حالها حد كدة نقدر نقول عليه لغز
بدأت مشاكلها تكبر لما خرجت من بيتها تشتغل سكرتيره في احدي
المكاتب المحترمه حاجتها للخروج كانت اكبر بكتير من حاجتها للعائد المادي
اللي اخر حاجة ممكن تكون بتفكر فيها مها
كانت نسيت كونها انسانه مفروض تشوف وتعرف الناس
كان كلامها مع الكل رسمي اوي لدرجة خلت الكل يتأكد ان جمالها سر غرورها
مجتمعنا بيهتم بالظاهر شاف اللي في عينها غرور وملمحش الكسرة والحزن اللي
مالي عيونها الدبلانه

طـــــــــــــارق

انسان من عيله قديمه ليها عاداتها وتقاليدها
اخ واحد ل 4 بنات
والده متوفي واتولي تربيته خاله الكبير اللي صرف عليهم كتير
لان عيله مكونه من 6 افراد كان صعب اوي تعيش علي راتب موظف غلبان
مامته هي كل حياته
كفايه انه فاكر ان مامته اترملت في عز شبابها واستحملت لحد ما ربته
وشافت مشاكل كتير اوي من عيلته اللي طردتهم لسه اطفال من بيت العيله
وفاكر جميل خاله اللي ميقدرش يرفض جوازه من بنت خاله الصغيرة
اللي مامته ربتهاله علي ايديها عشان تبقي مرات ابنها الوحيد
طارق بقي مهندس كبير يبان قدام الكل سعيد علي حياته المثاليه
اللي وهبتهاله الحياه لكن محدش يعرف حجم الالم اللي ف قلب انسان
مضطر يرد الجميل باقي حياته ويكمل حياته مع انثي بعقل طفله
ارضاء لامه ورد جميل لخاله


المشكله :

بعد شهور من اعجاب متبادل بيدل عليه النظرات
والاهتمام والاحاديث الصامته
قرر طارق يتمرد علي كل الصمت والخوف اللي جواه
ويواجهه مها بحبه
وهو ميعرفش عنها اكتر من كونه حبها


هو :

انا مش طفل ولا بالمراهقه والجنون والرفاهيه
اللي تخليني مفكرش مليون مرة قبل ما اكلمك دلوقتي
واستحمل نظرات الخوف اللي ماليه عينكي
بس كمان بالعقل الكافي اللي يخليني اعرف احدد مشاعري
انا بحبك ومعرفش باي طريقه ولا لاي سبب كان
ولا المليون حاجز اللي حطاهم بينك وبين الكل مانعوني احبك
ولا هيمنعوني اقولهالك
احنا بنعيش كتير اوي ندور علي اللي يكملنا
وانا مش عارف غير اني عايزك انتي تكملي حياتي
ودي ابسط حق ادهولي ربنا
تتجوزيني ؟


هي :

بين الف دمعه ودمعه
بين كلام عاش كتير محبوس
وخاف مسيطر علي كل ملامحها
عن حب عاشت تداريه وفضحتها عينها
بين ذنب الايام والظلم اللي ضيع كل سنينها
صرخت تسأله ؟
تعرفني ؟
تعرف عني ايه خليك تقولي كلمه زي دي
حبيت اي مها بالظبط
مها البت العاقله الهادية اللي دايما ساكته
ولا اللي حزنها مكفيها ومكفي ايامها

انا مش كدة
انا من سنتين بس كنت لسه شايفاني طفله
لسه سامعه صوت ضحكتي العاليه
وجري وسط اهلي
انا العيله البريئه اللي دفعت تمن جشع العيله
والمال والسلطه والانانية
انا اللي لما اهلي ماتوا كتفوني عشان محلقش اصرخ
لان لسه الموت جاي
لسه الدور عليا ولسه ياما هصرخ
بدل ما يتولي عمي تربيتي ويحافظ علي امانه اخوه
جوزني ابنه اللي هو نفسه فشل بتربيته
وكانت النتيجة اني اني حصلت ع لقب مطلقه بعد 73 يوم جواز
انا عايشة بستخبي من نظرات الكل وكأني انا المجرم اللي يستاهل العقاب
عايشه بتعاقب علي ذنب المجتمع في حقي
بخبي صوت وجعي وبحبسه في الوقت اللي لسة بشوف اللي في سني
فرحانيين بشكل الدبله اللي منورة ايديهم
وانا اصغر بكتير من هاجس اللقب ونظرات الكل ليا

لسه عند كلمه تتجوزيني ؟
لسه مستعد تستحمل غضب الست الوالدة ونظرتها ؟
اللي لو كنت انا مكان واحدة من بناتها كانت قدرت اوي موقفي
لكن لو جه ابنها وقال عايز يتجوزني هتكون ببساطه المصيبة
اللي لا تغتفر ؟


لو كنتوا مكان ( طارق ) تعملوا ايه ؟
هتردوا بايه ؟


بقلم / سارة محمد
29/11/2015

[bobaOo]

مشكله فعلا
في ناس قلبها ميت
وبتعمي عنيها المظاهر
ولقب مطلقه مش سهل
فما بالك بعد 73 يوم بس !

لو فعلا حبها هيكون عند كلمتو
مش هيهمو حد غير الي اختارها تكمل حياته
الي جواها جوهرها والي بتحس بيه
وامو يقدر يقنعها مش صعبه
والحب يصنع المعجزات

تسلم ايدك سما
طريقه الطرح جميله جدا
متابعه معاكي للاخر
تحياتي لك

[(طائر الشرق)]

أحجز مقعد ولى عوده أن شاء الله

دعواتى بدوام السعادة

[Just Ahuman]

والله أنا شايف إن مفيش حاجه تعيبها كون إنها مطلقه .. المشكله إننا فى مجتمع غبي إلي حد كبير يهتم بالمظاهر الكدابه فقط .. من وجهة نظري لو حبها حب صادق مش هيسيبها وهيقف جنبها للنهايه وهيقف قصاد أي حد عايز يعرقل علاقته بيها .. وبالنسبه لخالو اللي رباه أكيد جميله على راسه من فوق وعمره ما هينساله اللى عملو معاه بس مفيش جميل يترد بزواج .. الزواج من الحاجات اللي مينفعش فيها جبران خواطر .. ولو والدته ست عاقله وعقلها كبير هتقدر ومش هتقف فى سكته

تسلمي على الطرح الرائع فى إنتظار الحلقه الثالثه

[دمعه حائره]

من امته الزواج كان عرفان بالجميل وواجب وقدر يستمر؟
هايظلم البنت بدل مايسعدها ويرد جميل خاله
اما البنت اللى حبها دى ضحيه مجتمع وعادات اثبتت فشلها
الحب لما يكون قوى وصادق يقدر يعدى اى محنه
بيدى ايمان جوانا نقدر نقنع اللى حوالينا باللى حابينه
وحتى لو محدش اقتنع الانسان بيعيش مره واحده
لازم يداقع عن حقوقه طالما مش بيتعدى على الاخريين
هى مصدومه ومش عندها ثقه فى نفسها انها زيها زى اى انسانه
من حقها تعيش وتنسي الماضي
والدور ليه هو لو بيحبها بيجد هايقدر يتم زواجه بيها
تسلمى على التوبيك سما

[حازم34]

اولا ومن كل قلبي احي ها القلم الذي سرد القصتين كما لو كنا نشاهد علي الشاشه

والسيناريو الجميل والدراما

حقيقي شئ جميل

انا تفاعلت جدا مع الموضوع

طارق احب بصدق مها

لانه تزوج ليس عن اقتناع بل هي مجاراه للام واعتراف بالجميل وهذا ليس بوارد في درب الحياه الجميله

الاصول

ولما خرج للحياه وراي الجمال الصامت احب ولم يعرف القصه

وكانت هي كذلك مثل ظروفه بالضبط تزوجت ابن العم وكان الطلاق

فهي ليس لها ذنب

والطلاق ليس بعيب علي الاطلاق

اهم شئ ان يروق لك الحبيب وترتاح له وياثرك بحبه وتعيش علي حبه وتنتظر الوقت ان يمر بلهفه حتي تراه


هنا فقط لاحدود ولا ظروف الصادق في الحب

يقول نعم احببت يا قلبي

ولو انا مكان طارق

كنت هقول الاتي

مها انا حبيتك بصدق وباخلاص واريد الزواج منك

وبعد معرفتي لظروفك احببتك اكثر

واكثر ولن اعيش الحياه بدونك

وظروفي هيا كا التالي

اني متزوج لاتمام الجميل

يعني لابد ان تعرفي ان لن اطلق الاخري الا اا رغبت بالطلاق

يعني وجودك في حياتي لن يكون سبب لافساد الزيجه الاخري

احببتك واتمني من كل قلبي ان توافقي

وهذا الشي يسعدني

واريد انا بعد ان تغيرت ظروفي واصبحت مهندسا ان اسعدك

وان ارفع عنك كل حزن والم تحملتيه

واهديها روحي

[العندليب الاسـمر]

الكلام النظري جميل والتنظير اسهل منه مفيش

الحقيقة هو موقف لا يحسد عليه كليهما

ف طارق لا يمكن بحال ان يتبرأ من دور عمه الذي كان نعم السند والمعين

ولا ننسي ان هناك ثلاثة معضلات رئيسية

الاولي انه لم يستكشف بعد ابنه عمة الصغيرة التي قطعا تحمل سمات شخصية طيبة كمن رباها وادبها

والثانية انه لم يستكشف بعد شخصية تلك التي توهم انه يحبها

والثالثة انه مهما حاول جاهدا التوفيق بين حبة لامة واهله وحبها لن يستطيع فقطعا امه ستكون علي قناعة تامة بابنة العم فضلا عن اي ام ترغب لابنها عذراء ولا شك

من وجهه نظري لابد ان يتاكد من مشاعرة جيدا ولن يتمكن من ذلك الا بعد الاقتراب من شخصيتها ومعرفتها اكثر لانه قطعا سيواجه مشاكل وصعوبات جمة ولا سبيل له لمجاهتها الا بحب يقيني قادر علي المواجهه

وفي نفس الوقت لا يغفل الاقتراب من شخصية ابنة عمة وسبر اغوارها وقطعا سيكتشف ما لا يتوقعة لان من يكبرون بالقرب منا ننظر لهم دوما علي انهم صغار ولا ننتبه للتطورات الكبيرة التي تحدث في شخصيتهم

بصدق اسلوبك وطرحك للفكرة عبقري نفرتيتي

احييكي بما تعني الكلمة

[Dr. AnOosHo]

ايه المشكله مطلقه ... حاسه انك بتقولي ماشيه على حل شعرها هههههههه

انا رايي ان فكرة مطلقه قلت جدا في مجتمعنا دلوقت وكتير جدا مطلقات بيجوزوا عادي جدا

الاهل معذورين الصراحه كل ام نفسها ابنها يجوز بنت يبداوا حياتهم سوا في كل حاجه يتعلموا الدنيا سوا ماحدش يكون عنده تجربه سابقه تاثر على حياتهم بعد.كده
تسلمي نفرو ع موضوعك

[الفيلسـوف]

استغربت يعنى ايه اولا كلمه مطلقه المعنى الصحيح زواج لم ينحح وليس فتاه سيئه السمعه والطلاق ممكن يكون السبب منه الراجل والكثير يكون ذلك البنى ادم ممكن يخطا ف جواز معين ولكن الاصح انه لايكمل ف طريق يزيد اخطائه عزيزتى الكاتبه انا حكون عكس سوالك هل طارق يكمل يحبها او لو كنت مكانه يحبها لانى القصه مش قصه ابيع واشترى واسدد انا بتكلم ف مشاعر انسانه لو قدر يعمل كده يكمل ولايرى شيئا غير مايريد ان يكمل بهما الى الطريق السوى فالمطلقه انسانه قبل ان تكون فتاه روح له حقوق بشر وكيان له حقوق لو كنت مكان طارق حفكر الف مره قبل مااكون سبب ف كسر بنى ادم رفقا بالقوارير واياك ودمعه المراه تقبلى مرورى ساره

[Lamees]

بعيداً عن المثالية
طارق يبعد
والجوازة مش هتنفع
هو مش ملك نفسه
هو ملك امه واهله اللي تعبوا عشانه