" آحمد مالك " وآهانة رجال الشرطة !

[αЛαstoOorα]

طبعاً بعضكم عرف قصة الفنان الشاب آحمد مالك واللي معرفهاش

الموضوع هيوضحله ف الفيديو دا ..آنا مردتش آجيب الفيديو الآصلي لآحمد مالك نفسه وجبت بس فيديو لحوار بين مذيعة المحور والمحامي بتاع آحمد مالك


طبعاً آنا رآيي آن آحمد مالك غلط ؟ وغلط غلط كبير والموضوع ف حد ذاته مُهين وآن العبرة مش ف آن المنتج دا بيتباع ف السوق وعادي؟ العبرة ف آن تقديم المنتج دا ف يوم زى 25 يناير لرجال الشرطة يعنى بيعني حاجات كتير من غير ماتتفسر كدا ف هي معروفة

آولاً آنا مع آن آحمد مالك يتعاقب بس متبقاش العقوبة رادعه لآنه ف الآول والآخر شاب وسنه صغير وممكن يكون اللي عمله دا عمله بدافع تهوره وبدون تفكير
بس آنا مش مع المحامي بتاعه خاالص لآن كلامه غير منطقي وبآمانة محامي ملوش آي لازمة ويجيب آعدام للواحد ..انا متعاطف مع آحمد مالك كا سنة وكا مستقبلة هيدمر بحاجة عبيطة عملها ..ومع آنه يتعاقب بس مستقبله ميدمرش ..بس بكلام المحامي بتاعه يخليني لو متعاطف معاه آطالب بعقوبة شديدة ليه

بتآسف لآي لفظ ف سماع آسم المنتج ..بس كنت عاوز آعرف رآيكم ف الموضوع دا ايه؟

[phalsteen]

باختصار شديد وبدون تفاصيل
بصرف النظر ان المبادئ مبتتجزأش ومقدرش احلل غلط
واقول ان الطريقه كويسه
بس عندهم حق
هو في ايه بالظبط
كلنا جوانا نار
ملعون ابو دا ظلم عشش جوه كل ركن في البلد دي
ازاي نحاسب واحنا الاساس منهار
انت وانا وغيرنا ممكن جدا يعمل اكتر من كدة مليون مرة
لو شاف بعينه سحل واغتصاب وتعريه وكل شئ مباح
ضرب واهانه واستهتار
وكل دا ولا خدنا حق ولا باطل
كل ما تحسبوهم هاتولهم حقهم
وهاتولنا احنا كمان
لكل بنت اتسحلت واتعرت وانضربت واتهانت علي يد بلطجي بمسدس
بيحميني وبياخد مرتبه من حقي
كل نقطه دم نزلت من شاب زي الورد علي يد واحد جاهل
متبرمج لا فاهم ولا عارف
علي يد كل واحد ساقط ب 60 % وواسطه بابا دخل وبيتقله يا باشا
الا ما رحم ربي عشان مكنش ظالمه
مشوفناش الدنيا قامت كدة علي كشف العذرية
ولا علي الاعتداءات اللي تمت علي بنات مصر من بلطجة الداخليه
مالك وشادي نفسهم من ضحايا الداخليه
عايزين ايه من شعب عاش طول عمره مظلوم
مطلوب منه بس يقول حاضر
يدوق الظلم وينكوي ويشوف بعينه قتل ودم
الرحمه
مالك وشادي معملوش اللي يستحق كل دا
ولو يتحاسبوا يبقي نجيب حقهم الاول
وكله بالعدل

نظام فاشل
حسبي الله ونعم الوكيل

[العاشق الذى لم يتب]

ضاعت الحقيقة
واختلط الحابل بالنابل
حسبناالله ونعم الوكيل
فى كل ظالم

[د/ عبد الله]

شوف.. أنا ممكن انتقد اللى عملوه فى حاجه واحدة
انهم سخروا من عساكر رايحين بس يأدوا مدة خدمتهم ونفسهم يخلصو النهارده قبل بكره
يعنى اللى عملوه مفيهوش اى اجرام ولا حاجه تستاهل
ان الدنيا تقوم متقعدش عشانها
عملو حاجه تعبر عن النار اللى جواهم واهانات وتعذيب هما نفسهم اتعرضوله من الشرطه العظيمه

ليه عايزين يخلو الشرطه حاجه مقدسة وكبيرة قوى كده
احنا شوفنا ايه حلو منهم؟
ع الاقل عاملوهم زى اى مهنه فى البلد هما مش احسن من حد

عايزين يحاسبوا شابين عشان حاجه عبروا بيها عن رفضهم ؟
طب وكل اللى الشرطه بتعمله مين هيحاسبهم عليه؟
مين هيحاسبهم ع الراجل اللى خدوه من بيته فى الشرقيه وبعد يومين
جابوه جثة هامدة وكمان قالوا انه انتحر؟؟؟؟

مين هيحاسبهم على كل اللى اتقتلو عشان نزلو يعبرو عن رفضهم

سبحان الله .... ايه انقلاب الموازين اللى احنا فيه ده

هى دولة الجيش والشرطة واحنا ملناش فيها؟

لما مصر تشترى مبنى فى أمريكا بقيمة 15 مليون جنيه مصرى عشان لواء وعقيد
هيقعدوا فيه.
واحنا نجوع؟ ما نجوع مش مهم. المهم نبقى كده

الله المستعان

[شاعرة الرومانسيه]

اسمع يا احمد انا لن اسمح لاى مخلوق

يغلط فى حق الجيش وحق الشرطه

هما اصلا عارفين هما ايه

واسأل اى طفل فىالشارع يقولك هما اسمهم ايه

فواحد جايب مقبول 50% يادوب يدخله الحمام

ولايفقه شىء يقول كلام زى ده

ده اقل شىء نقوله طظ فيك وفى الى وراك

وتحيا مصر وتحيا رجال مصر

ويحيا شرطة مصر وجيشها

ويحيا السييييييييييييييييييييييييسى

[αЛαstoOorα]

مممممم

مش عارف آقولكم آيه بصراحه!

غير آني بقولكم آن الداخلية والجيش

هما برضه المصريين؟ في فرق لما ننقد مسؤل او نحاسب ظابط او رتبة معينه علي فسادة وفي فرق لما نعمم ونشتم الكل ونقول داخلية وجيش وعسكر وظلم وآستبداد العسكري دا او الفرد المجند دا اخويا واخوك ؟ العسكري دا كان ممكن يبقة الماجيك مثلاً؟ آقل مثال يعني ممكن ابسطهولكو آعتراضي علي آهانة العسكري الغلبان اللي بيئدي خدمته وواقف ف عز الطل والبرد يحميني ويحميك من آي تجاوزات ..العسكري دا مجرد اله بتاخد اوامر آتحرك كدا متتحركش كدا الشجاعه آنك تخاطب المسؤل عن دا وتوجهله التناقدات اللي آنت شايفة وتطالب برفع الظلم لو انت شاف ظلم وآستبداد ودا من حقك كا مواطن مصر عمل ثورتين وشال نظامين ف مش من حق اى حد يقعد ع الكرسي يكمم الآفواه ويبقة ديكتاتوري ..مبنقولش لاءه ..بس العسكري اللي آتهان ماله؟؟؟
آنا مراعي اللي آنته بتتكلمو فيه لآن انا لو قولت مفيش تجاوزات بتحصل آبقة بضلل الحقيقة الراجل اللي عذبوه ف الشرقيه الظباط اللي عملت كدا اتحولت ع النيابة واترفعت من الخدمة وبيتحكم عليها حالياً معاكم ان مش كل حاجة فيها فساد بتحصل صاحبها بيتحاكم عليها غير لما بيتنور الضوء عليها من بعض وسائل الآعلام آو من بعض عامة المواطنين في ناس بتتظلم آكيد فيه فيه ناس ف الداخلية بتعدي حدودها آكيد فيه ..كل منظومة فيها الصالح والطالح صوابعنا مش زي بعضها بس وآخرتها ؟؟ آنا زعلان عاللى بيحصل زيكم بالظبط وعارف آن فيه حاجات كتير رجعت زي الآول بصراحة مطلقة كدا عشان مبحبش آضلل الحقيقة بس كل اللي بيحصل دا برضه مش سببه فرد؟ عني مش هو السيسي اللي سبب ف كل اللي بيحصل ..آنا ببص للموضوع من نواحي مختلفة ..ببص للبلد وببص للي حولينا بلاقي مصر واقفة علي رجليها ..ببص لنفسي وببص لغيري بره ف بعض البلاد العربية اللى قامت بثورات معايه ..بلاقي نفسي آمن وبشتغل وليا بيت وبلاقي غيري عايش ف مخيمات وبيتهدد كل يوم ومش لاقي اللقمة ببص لحدودي بلاقي كل يوم عساكر بتموت عشان تحميني من الارهاب ومنبقاش دولة محتلة من اي تظيم مثل داعش وخلافه وببص لغيري بلاقيه عايش تحت آحتلال آرهابي وف حرب يومية بينه وبينهم في تجاوزات ف الداخل آة فيه بس آحنا لازم نتكاتف عشان نغير ونغير بالعقل ؟؟ البلد مش حمل ثورة تالتة ولو قامت ثورة تالتة ثقو تماماً آن مصر هتبقة زيها زي سوريا وليبيا وخلافة هندمر بكل المقايس على قد ما فى تجاوزات وظلم بعض الشيئ على قد ما آحنا لسة مصر؟ لو نرجع بالزمن كدا وره ايام عصر مبارك ..كان الكرباج هو الحاكم وكان فيه ظلم واستعمار وفساد وقهر آكتر من دلوقتي بمراحل ومع ذلك فى ناس كانت بتعترف بآنه كان معيشنا ف آمان ..ف عصر محمد مرسي كانت الفوضي بتعم علي الشعب كله وكان فيه تسيب حقيقي خطف بنات وحمل اسلحة بيضة واليه علني ف المياديين وانتهاكات من قبل المواطنيين لظباط وافراد الداخليه يعني الآيه كانت مقلوبة لما كان سواق بيكسر اشارة وظابط يوقفه يكلمه ينزل السواق يمسك فيه ويضربه ويقوله مفيش حكومة ؟؟ كنا ف تسيب حقيقي مكنش للحكومة وجود ..رجعت تاني وفيها تجاوزات آة رجعت وفيها تجاوزات وفي ناس كتير بتتظلم انا معاكم بس مفيش حل غير آننا نحاول نغير بالطريقة اللي تخلي بلدنا تفضل واقفة على رجليها ..مش عشان نغير نهد كيانها كلها ونعيش تحت ارهاب ساعتها هنقول ياريت كان فيه ظلم بس كنا عايشين ؟ الجيش حاميني وحاميك والداخليه محتاجة لآعادة هيكلة ودا حقيقي ومحتاجة لتغيرات كتيرة ف التعامل مع المواطن بس دا يتسآل بيه الوزراء والناس اللي تقدر تغير ميتسآلش بيه عسكري غلبان منهنش عسكري غلبان بئدى خدمته عشان نوصل رسالة لفوق ؟

[د/ عبد الله]

أحترم وجهة نظرك وحيادك جدا
وانك مطبلتش ومشيت مع اللى ماشى واللى شايف دايما ان الجيش والشرطة حاجة مقدسة
مينفعش نقرب منها وكأنهم ألهه أو رسل مبيغلطوش
وطبعا معروف السبب اللى بيخليهم يقولو كده ويغمو عنيهم عن اى حاجه
ما علينا...

معاك ان انا وانت وغيرنا لسه عايشين فى بيوتنا وعندنا شغل والحمد لله
لكن فيه ناس كتير قوى اتحرمت من بيوتها وشغلها وعيالها وحياتها كمان بس عشان اعترضو وعبروا عن رأيهم.
عشان مش عاجبهم حال البلد وعايزين يعيشو فى حريه
عشان عايزين يجيبيو حق أهاليهم واصحابهم اللى اتسجنو واتقتلو ظلم

وطبعا انت عارف المقولة بتاعة أُكلنا يوم أُكل الثور الأبيض وهنزل قصتها فى رد تانى

وزى ما قلتلك انا مش مع اللى عملوه مع العساكر لانهم رايحين يأدوا خدمتهم وخلاص
لكن هو ده اللى قدرو يعملوه ومكنش جريمه ولا يستاهل كل التهليل ده
اللى حصل كان ممكن يحصل مع اى ناس فى مهنة تانيه او ناس ف الشارع وعادى جدا
طب ما العساكر او الشرطه عموما ناس عاديين برضو زينا (والمفروض) يتعاملو زينا

هكتفى بالرد ع النقطتين دول ومش هدخل ف الباقى
تحياتى ليك

[life]

وان كانوا غلطوا فكلنا شركاء في الغلط
بالظلم والرعب من الشرطه وانظمه الدوله عامه
بكل اللي حصل واللي لسه هيصل من 2011 لدلوقتي
لو كانوا حسوا بالعدل مكنوش دوروا علي الاهانه والسخرية من نظام مفروض بيملثهم

[αЛαstoOorα]

آنا من الناس اللي بتقدس الجيش جداً وشايفه فعلاً من الحاجات اللي ممنوع الآقتراب منها آو الآهانه فيها ودا مش تطبيل آد ما هو آحترام وتجليل ووفاء لرجاله اللي كل يوم بيموت منهم ع الحدود عشان يحمونا انا وانت وكمان آحترام وتجليل وتقدير من آجل آنه جيش مصر وشعب مصر؟ مش جيش نظام ولا جيش اي حاكم؟ واللي ثبت دا آنه علي مدار تاريخ الثورتين وعلي مدار التاريخ كله من قبل الثورات الجيش آنتمائه لشعبه؟؟ ولو رجعنا للتاريخ برضه هنلاقي الجيش طول عمره بيدافع عن حقوق المصريين ف عصر الملك طلعت الظباط الآحرار منه وحررولك بلدك؟ ف عصر عبد الناصر برضه الجيش اللي رفع رياتك لفوق ..ف عصر السادات هوهو الجيش اللي حارب وجبلك آرضك من جديد ..ف عصر مبارك هو هو الجيش اللي حاميك وثبت على موقفه وجبالك قطع من اراضيك مختصبة كان ممكن تموت اتفاقيتها مع موت السادات وتقوم حرب تانيه؟ ف عصر مرسي هو هو الجيش اللي ساندك ف ثورتك التانيه ورفع عنك وعن بلدك نظام آستبدادي ف عصر السيسي هو هو الجيش اللي بيحمي ف ارضك وف حدودك وبيموت كل يوم من الارهاب عشان تعيش انت وانا ف امان ..الجش مش السيسي؟ الجيش مش فريق؟ الجيش مش مؤسسة عسكرية فقط؟ الجش اسمس وآطهر وآجل من آي مسؤل آو حاكم الجيش اخويا واخوك ولاد مصر اللي بيحمو ترابها ف آنا بنسبالي الجيش من المقدسات فعلاً لآن لولا جيش مصر مش هيكون فيه مصر ..اما بنسبة للناس اللي اتشردت وملهاش مآوي عشان بتطالب بحقوقها ف لكل قاعدة شواذ وفيه آمور كتيرة لا آنا ولا آنت نقدر نحكم فيها بالعدل عشان مش شايفنها صح او بمعني آصح مبيحسش بالنار غير اللى طايلها اللي عمله مالك غلط لآنه اللي عمله آهانه لكل بني آدم مصر ودا من وجهة نظري المتواضعه اما الغلط اننا نموته آو نقضي علي مستقبله عشان نعاقبة كدا آحنا بنعالج الغلط بغلط لازم يكون فيه آحتضان ونقاش دائم وحوار مع شباب البلد اللي هما بيحبو البلد بجد احمد مالك اتصرف تصرف مُهين بس دا مبيقولش انه مش بيحب البلد ومش بيخاف عليها اكيد برضه عمل دا بدافع شبابه وحبه لبلده وانه لي فكر معين ماشي بيه نفهمه غلطه بس منتهمهوش بالخيانه نعاقبة بس منفدنهوش وندفن معاه مستقبلة ؟ بس دي وجهة نظري ..وانا بشكرك جداً لآنك من الآعضاء اللي تُحترم فعلاً ومن الآعضاء اللي لما بتتكلم ف السياسة بتتكلم برؤية محترمة وبتدافع عن وجهة نظرك بطريقة كلها رُقي بدون آي آهانات لآي كيان آو آساءات وكلام مرسل لا فايدة له الا الفتن واشعلها ..آحيي فيك رُقيك وفكرك ووجهة نظرك آحترمها جداً آكيد

[د/ عبد الله]

أولا أشكرك قوى على ذوقك وكلامك الجميل وأنت فعلا من الناس اللى أحب أتناقش معاهم

طيب جيش بلدى اللى عمل لى كل الحاجات دى ( من وجهة نظرك) لما انتقده يبقى ده غلط؟

الانتقاد ومحاولة الاصلاح دليل على الحرص على المصلحة
ليه انت شايف ان الجيش خط أحمر ومش من حق اى حد يتكلم عنه؟
مش شايف ان التقديس ده والثقة الزايدة تخلى اى حد ممكن يتحول من ملاك لشيطان؟
المثل عندنا بيقول: يا فرعون مين فرعنك؟ قال ملقتش حد يصدنى
لما ابقى عارف انى مش مُحاسب واننا ممكن اعمل اى حاجه ومحدش هيقولى ليه وازاى وفين
هيخلى نفسى تحرضنى ع الشر.
ربنا بيقول عن قوم فرعون:" فاستخفَّ قومه فأطاعوه"

احنا مع كل الانتهاكات اللى بتحصل والظلم وتكتيم الافواه وحبس الحريات مش بنشوف الاعلام ليه بيتكلم عن اى حاجه من الكلام ده. كل كلامهم بس عن حنية وحلاوة الشرطه. طب فين التجاوزات؟

احنا شوفنا الطفل اللى محبوس بقاله 500 يوم عشان لبس تيشرت مكتوب عليه وطن بلا تعذيب
واللى اتحبس عشان رايح يعزى واحد صاحبه اخوان
واللى اتحبس عشان نزل صورة او بوست ع الفيس

طب ما الاعلام كان طول النهار والليل بيشتم فى مرسى. حصل ايه؟

وأنا عن نفسى متوقع انى اتمسك فى المطار وأنا نازل بس مبقتش فارقه( مع الاعتبار انى عمرى ما كنت فى يوم تبع جماعة الاخوان)
احساس الظلم والقهر وضياع الحقوق والثورة يخليك تضحى بأى حاجه

واسمحلى هنزل موضوع أُكلنا يوم أُكل الثور الأبيض فى موضوع مستقل لانه يستاهل

شكرا ليك ولرقى حوارك