النكد الزوجى

[twitter man]

النكد الزوجى اكبر من انه يكون ظاهره مرتبطه بتأخير الراتب او زيارة الاهل او ..او .. او ..

النكد بين الأزواج هو المتنفث اللى من خلاله بيحصل استقرار ويكبر الأمان بين الاتنين

بحسبه بسيطه تقدر تقولى ازاى تعرف مراتك شارياك وباقيه عليك ؟

وانتى كمان تعرفى منين ان جوزك هيقدر يستوعبك وهيكون قد المسؤوليه ومش مندفع ويحافظ على الاسره ؟؟

من غير النكد الاجابه هتكون مستحيله ,, لانه بيكون ترمومتر العلاقه اللى من خلاله تقدرى تشوفى مستقبلك وتقدر تبنى خططك لاسرتك

تخيل ان الخناقه تكبر و تلاقى الزوجه اتراجعت وفضلت البيت واستقرار الاسره على مصلحتها الشخصيه ,,

وياسلام لو كانت الخناقه مستعره وهى بتلم في هدومها وهتروح على بيت ابوها وتدخل انت تقولها لو حد هيمشى يبقى المفروض ميكونش انتى دا بيتك

الكلام بيجيب نتيجه ,, معاك في كدا ,, بس الفعل حاجه تانيه خالص

في الوقت اللى المفروض الكل بيفضل كرامته ويتقمص فيها دور المحارب والفارص اللى مينزلش من على جواده

ومش انا اللى تكون جزمة جوزها ,, ومش انا اللى تمشيه مراته

بيكون الاتنين اللى على وعد انهم يكملوا حياتهم لحد ما يشوفوا احفادهم اعقل من انهم يوقفوا حياتهم على حاجات فارغه من نوعية الناس هتشوفنى ازاى او هتقول عليا ايه

كلام الناس : المدخل لخراب اى بيت ناجح والفيروس اللى بيدمر اى حالة سعادة اكتسبتها الاسره بعد كفاح مرير مع الحياه ,, والمسمار اللى بيدق في نعش استقرار الاسره

الناس بتخاف من الخناقات الزوجيه علشان مش متأكدين من صدق مشاعر الطرف الآخر وبيخافوا من ردة فعله

تلاقى الزوجه بتقول ياترى لو الخناقه كبرت وادلعت عليه شويه هيبقى عليا والا هلاقيه بيرمى عليا يمين الطلاق ,, ومش بعيد يروح يتجوز ؟؟

وتلاقى الزوج بيقول ياترى البت المجنونه دى لو زود العيار حبتين هتاخدها الجلاله وتطلب الطلاق وساعتها كرامتى هتنقح عليا وارمى عليها يمين واكون خسرت كل حاجه

النكد الزوجى قد يكون حاجه احنا مش حابينها ,, بس في الأخير هو اختبار لما بننجح فيه بيترسخ الصدق والأمان في العلاقه وبتتحول من حب عادى لحب عشره واسره وبيت واستقرار .

انك تبقى على جوزك ومتطبقيش كل نصايح المجلس القومى للمرأه دا في حد ذاته اعلان حسن نيه من ناحيتك وهيقابل بإعلان حسن نيه من الزوج انه يمنحك مسافه تكسبيها لقلبه وعقله كان بيحتلها ناس اخرين في حياته

وانك تحافظ على زوجتك وتشتريها ومتطبقش عليها كل نصايح الشله والاهل والاقارب فدا في حد ذاته اعلان حسن نيه منك هيقابله برده اعلان حسن نيه منها انها هتشوف السعاده منك ومعاك وتبدأ تقطع روابط في اتجاهات تانيه وتوصلها معاك ومع كل رابطه جديده بتنضاف بتملى عليها حياتها لحد ما تصبح بديل للناس كلها حتى أهلها

مش معنى ان في خناقه ان دا اخر الدنيا ,, بالعكس لازم نشوفه اختبار لتحسين رؤيتنا تجاه بعضنا البعض وترسيخ مفهوم الاسره في حياتنا واختبار اسرى بيحصل كل فتره للتأكد من صلاحية العلاقه وقوتها ومتانتها .



النكد الزوجى مش حاجه شويه

يلا اعلنوها نكد النهارده

[ندوشه 2011]

طب بذمتك النكد الأسري حلو دا بسبب الطلاق ووراء النكد الأسري عقربه . .الحما. .اللي تنشل ربنا ياخدها إن شاء الله..يووووووه كنت هنسي ابقي سلم لي عالتروماي بقي!!!!!!!

[twitter man]

اقتباس المشاركة الأصلية كتبت بواسطة ندي2011 طب بذمتك النكد الأسري حلو دا بسبب الطلاق ووراء النكد الأسري عقربه . .الحما. .اللي تنشل ربنا ياخدها إن شاء الله..يووووووه كنت هنسي ابقي سلم لي عالتروماي بقي!!!!!!!

لو ليكى اخ فمما لا شك فيه ان امك هتبقى (( حما ))

عارف انك هتقولى انهم مش كلهم كدا ,,

هقولك بس انتى اللى عممتى وافترضى ان النكد الاسرى مرجعه للعقربه الحما ,, وكأنك انتى نفسك مش هتكونى في يوم من الأيام حما


وبعدين لو عايزه تسلمى على التروماى مش لازم تاخدى حد كوبرى ,,

نورتى يا مزمزيل

[دمعه حائره]

بعيدا عن النكد فيه حاجات كتير تخلى الاتنين يحسوا
مين شارى ومين بايع
مين بيخاف عليك ومين مصلحته اولا
زى مواقف المرض والازمات المالية
بيبان معدن الانسان على حق
نقطة الخلافات والمشاكل اكيد ليها جزء مهم
لان الانسان مبيحسش بقيمة الاشخاص الا لما يفقدهم
بالاضافة ان وقت الزعل بيطلع اللى فى القلب
مش زى مابيقولوا غلطة لسان او ساعة شيطان
لكن وقت ماتحس ان خلاص هاتخسر شريك حياتك
اكيد بتتمسك بيه مهما كانت التنازلات
المهم ماتخسروش
عجبتنى جدا النقاط اللى وضحتها
وخصوصا ان مايدخلوش حد فى خلافاتهم
لانها بتكبر وبيدخل العناد بينهم
وعلى كدة بقا لازم يعملو يوم للنكد الزوجى ههههه
جميل قلمك وفكرك تسلم يامان

[حازم34]

جميل ما كتبت وخلي بالك مش كل الزوجات بتفهم ولا كل الازواج بتفهم


ممكن بس شويه خناقه تلاقي ابو حهل سيطر والشيطان بقي بيعمل عمايله


وتكبر

حقيقي ودا بيحصل لما تلاقي الحما تتصل علي ابنها بظروفها وتقوله


مالك فيك ايه يقولها زوجتي متخانقه وقالبه البيت نكد وترد بقي بعض الحموات


رد من ال هوا وتسخن ابنها بقي دا انت الف واحده تتمناك ويقول صح يا امي صح


وتشعلل الحكايه والروايه


اي بيت زوجيه لازم بيحصل فيه خناقات بس مش اي خناقات


وتكون ملح الحياه الزوجيه وتشعلل نار الحب وجماله والعتاب الجميل


ولكن وكما ذكرت بدون تدخل احد


موضوع جميل وطرحه جميل بس اهم شئ يكون فيه قلبين متحدين علي انه لا حدا يدري

باي شئ بينهم حتي الاولاد بالبيت


اما بقي الصوت العالي والسب والردح بتكون دي مصيبه مش خناقه تزود الحب


تحياتي الك الكاتب المبدع المغرد بكل ماهو جميل

[.Lamar]

مش هنكر انى استغربت موضوعك
وخاصة انه يجى من رجل
لان الرجل عموما اسهل اتهام عنده للمرأة
لو اتناقشت او حكيت بشي مو على مزاجه
فهى نكدية
و ادم دايما يتهم حواء بانها اصل النكد
و هو منزه عن هاى الصفة

الخلافات بتحصل بكل علاقة و بكل بيت
نتيجة ضغوط الحياة او الروتين
لكن بالنهاية الطبيعى لو الاساس صحيح
هتكون زى زوبعة فى فنجان
بتاخد وقتها
ووبعدها بتلاقى الطرفين بيسعوا للصلح
لانهم باقيين على بعض
ولان دة شى ء طارىء

عجبنى طريقة عرضك للموضوع
حقيقى من زاوية مختلفة
اهلا بيك معنا
نورت اخى

[السفيره عزيزه]

لا لا لا نكد اية الشر برة وبعيد
هو يعنى مفيش طريقة اعرف بيها هو
شاريني او بايعني الا بحفلة النكد دي.
انا فاهمة حضرتك عايز تقول ان احنا بنكتشف بعد
النكد اد اية صلابة جدران بيت الزوجية وان العاصفة
مهما كانت شديدة بتعدي ان شاء الله .ومش بس بتعدي
لا دي بتترك مؤشر ايجابي كمان.
يا فندم مش كل طبيعة البشر واحدة ..لالا انا رايي فى
النكد الزوجي انة بيضعف رصيد الزوج عندي قول لي لية.
لان هو اصلا رصيدة فوق فى السما وان انا لي زوج ولا كل الازواج متزن وجبل ما تهزك ريح وكدة يعني .
هو انا لسة بختبرة هيتمسك بي ولا اية ..
هو النكد هييجي هييجي انا عرفة بس مش من
اجل تقييم كل طرف لصبر الاخر وتمسكة بية ...لالا دا من اجل اثبات قدرة
العقل على التحكم والتريث والحنكة من الرجل فى نظر الدنيارة
تبعة اما من المراة .فقمة النجاح والاحتواء للموقف منها .سرعتها وبراعتها فى تحويل الموقف من الاصطدام الى النقاش.
الهادي بمعني تغيير الموقف باي طريقة وحواء لديها بنك
لا يفلس ابدا من طريق تناسب كل رجل ..
من هنا ينلاشي النكد ويتقلب لموضوع للنقاش المؤجل
الى اشعار اخر .ويمكن يتنسي ..

ربنا يجعل كلمنا خفيف عليهم .
طيب يبقي حد ينكد علية كدة.
دا انا كنت ..ياااااااربي.

احترامي وتقديري
السفيرة

[αЛαstoOorα]

مممم
النكد عامة مش حلو
وكدا كدا مفيش حياة من غير آختلاف
بس آنا من الناس اللي مبحبش النكد ف البيت
لآني ببقة طول النهار ف نكد وارهاق وتعب
وفي آمور كتيرة بعيداً عن المشاكل
بتظهر الحب والمودة بين الزوجين
مواقف صغيرة جداً مش غير مشاكل ومن غير
آي خناق
ممكن تبينلك آد آيه آنت غالي عند مراتك
وكل همها آنها تسعدك
ف مش منطق آن لازم يكون فيه مشاكل
عشان تكتشف دا
في حاجات كتيرة آوي بتتبني عليها تفاصيل الحب
وكل تفصيلة ليها معاني كبيرة ممكن نظرة ف موقف
تخليك تعرف انت ايه غالي جواها

[twitter man]

اقتباس المشاركة الأصلية كتبت بواسطة دمعه حائره بعيدا عن النكد فيه حاجات كتير تخلى الاتنين يحسوا مين شارى ومين بايع مين بيخاف عليك ومين مصلحته اولا زى مواقف المرض والازمات المالية بيبان معدن الانسان على حق نقطة الخلافات والمشاكل اكيد ليها جزء مهم لان الانسان مبيحسش بقيمة الاشخاص الا لما يفقدهم بالاضافة ان وقت الزعل بيطلع اللى فى القلب مش زى مابيقولوا غلطة لسان او ساعة شيطان لكن وقت ماتحس ان خلاص هاتخسر شريك حياتك اكيد بتتمسك بيه مهما كانت التنازلات المهم ماتخسروش عجبتنى جدا النقاط اللى وضحتها وخصوصا ان مايدخلوش حد فى خلافاتهم لانها بتكبر وبيدخل العناد بينهم وعلى كدة بقا لازم يعملو يوم للنكد الزوجى ههههه جميل قلمك وفكرك تسلم يامان

انا متكلمتش عن النكد كحل مطروح منى

انا بتعامل على اساس انه واقع حاصل واللى يقول غير كدا يبقى مش منصف

ضغوط الحياه بتخلق مشاكل ,, فانا رسالتى اننا نخلى من المشاكل دى دليل على الثقه والاستقرار ومحفز لاستمرار بناء الاسره والحفاظ على تماسكها بدل ما تحول هى الاسره لجحيم من نار انعدم الثقه والامان

نورتى الموضوع

[twitter man]

اقتباس المشاركة الأصلية كتبت بواسطة حازم34 جميل ما كتبت وخلي بالك مش كل الزوجات بتفهم ولا كل الازواج بتفهم ممكن بس شويه خناقه تلاقي ابو حهل سيطر والشيطان بقي بيعمل عمايله وتكبر حقيقي ودا بيحصل لما تلاقي الحما تتصل علي ابنها بظروفها وتقوله مالك فيك ايه يقولها زوجتي متخانقه وقالبه البيت نكد وترد بقي بعض الحموات رد من ال هوا وتسخن ابنها بقي دا انت الف واحده تتمناك ويقول صح يا امي صح وتشعلل الحكايه والروايه اي بيت زوجيه لازم بيحصل فيه خناقات بس مش اي خناقات وتكون ملح الحياه الزوجيه وتشعلل نار الحب وجماله والعتاب الجميل ولكن وكما ذكرت بدون تدخل احد موضوع جميل وطرحه جميل بس اهم شئ يكون فيه قلبين متحدين علي انه لا حدا يدري باي شئ بينهم حتي الاولاد بالبيت اما بقي الصوت العالي والسب والردح بتكون دي مصيبه مش خناقه تزود الحب تحياتي الك الكاتب المبدع المغرد بكل ماهو جميل

مفيش مانع من تدخل الناس للصلح بس فى اضيق الظروف لان تدخل الناس فى مشاكل الاسره بيحل جزء وبيعقد اجزاء

نورت الموضوع