انا مجرد عابر سبيل فى الدنيا

[طارق طروق]

وانا صغير كنت بفتكر القمر بيمشى معايا
ال ايه ال كنت لما امشى وابص للقمر الاقيه ماشى معايا
وفجأه اقف الاقى القمر وقف
شكلى كدا كنت اهبل وانا صغير

[طارق طروق]

نصيحه للبنات
شوفى هقولك حاجه يابت انتى وهى
الصديقه الحقيقيه والمخلصه
مش اللى تقف جنبك وتتحملك
وتفضل ترغى معاكى 24 ساعه
لا طبعا ابسولوتلى
الصديقه الحقيقيه هى اللى تخطبك لأخوها
لو معندهاش اخ تخطبك لأبوها

[طارق طروق]

حد فيكم يكلمنى عن احساسه
وهو راكب العربيه ويشحن بالكارت الموبايل بتاعه
ويرمى الكارت من الشباك وتجيلك رساله تقولك
الرقم الذى ادخلته غير صحيح

[طارق طروق]

نصيحه تانى للبنات
امممممممممممم
بس مش كل البنات طبعا
لو دخلت عليكى مامتك اوضتك ولقتها ضلمه
وقالتلك مضلمه الاوضه بتاعتك كدا ليه يابت؟
قوليلها عشان انتى منوراها يا عسل
هتفرح وتطلع من اوضتك وانتى بقى ترجعى تحبى براحتك فى الفون
وربنا يقدرنى على فعل الخير

[طارق طروق]

امتى بقى الواحد هيتجوز ويخلف عشان
اطلع عين ابنى
قوم ياض هاتلى اشرب
قوم ياض هاتلى الريموت اللى هناك ده
قوم ياض هاتلى مش عارف ايه من تحت
دا انا همرمط ابو ابنى

[طارق طروق]

النهارده فى الشغل كان فيه زبونه اموره اوى
كانت واقفه منتظره البيتزا اللى بعملها ليها
بس رفيعه اوى اوى العامله بتاعت الكافتريا
بتقولوها بحسن نيه هو حضرتك بتاكلى على كدا؟
قولتلها لا مش بتاكل لكن عايشه على الطاقه الشمسيه
لقيت الزبونه بعد ما كانت مكشره وهترد على العامله
سخسخت من الضحك

[طارق طروق]

مسكت مره ناموسه كانت بتمص دمى
قولتلها هو انتى مش ناويه تسبينى فى حالى؟
كل شويه تيجى تمص دمى
قالتلى اصلى انا بعشق وبموت فى الدم اللى مختلط بالعسل
حرجتنى مقصوفه الرقبه دى

[طارق طروق]

بتقولها اسكتى مش منى ولدت
قالتلها هى كانت حامل؟
لا يا ستى هى جايباه من كارفور

[طارق طروق]

من ذكرياتى فى الكليه
كان عندنا ماده صعبه جدا جدا
والدكتوره بتاعتنا كانت كل امتحاناتها صعبه
بطريقه السهل الممتنع
كان فيه سؤال صعب جدا
وكان اخر حاجه ذاكرتها وعدت عليها
اجابه السؤال ده
دخلت لجنه الامتحان وكان اول سؤال
من كتر فرحتى بالسؤال نسيت الاجابه

[طارق طروق]

مش جايلى نوم الساعه داخله على تلاته الا ربع
قبل الفجر ولسه منمتش
والمصيبه انى مش جايلى نوم ولا نعسان
والمصيبه الاكبر كلها كام ساعه ورايح الشغل
وبفضل واقف على رجلى طول اليوم فى الشغل
شكلى النهارده مش هعملهم بيتزا فى الشغل
شكلى هعملهم فطير
هحاول انام حتى لو ساعه
مع السلامه بقى