مستكة وحبهان(زوغان العين)

[ايمان طلعت]

مستكة وحبهان
و حوارات بينهم جنان
ممكن توديك المورستان
اقرأ معايا وشوف حواديتهم
واتعلم انت وهي منهم




مستكة وحبهان حلقات جديدة
واول حلقه عن
(زوغان العين)


السلام عليكم

عليكم السلام..غير هدومك على ما احط الغدا

طيب

مالك يا راجل

مفيش

اومال مبوز كدة ليه وبتنطق بالعافيه

يا ستي قولتلك مفيش

طيب براحتك يلا عشان تتغدى


بعد الغدا نام وصحي على صوت مستكة وهي بتذاكر للعيال


صحي النوم يا حبهان

هو انا عارف انام من صوتكم اللي جايب اخر الشارع

اومال مين اللي كان بيشخر دة يا حبهونتي

انا بشخر يا مستكة

لا دول الجيران هههههه

هقوم اعملك الشاي


قامت مستكة تعمل شاي
و حبهان فتح التليفزيون

مالك يا حبهان فيك ايه

مفيش يا مستكة قومي كملي اللي كنتي بتعمليه

قعد حبهان يتفرج ويبص على مستكة ويرجع يتفرج
لفت نظر مستكة اللي بيعمله بصت لقيته بيتفرج علي كليبات اغاني
سابت العيال وقامت


ايه اللي بتتفرج عليه دة يابو العيال دة بدل ما تيجي تذاكر لعيالك

انا مفياش دماغ للمذاكرة والكلام ده

وانت مالك عمال تبصلي كدة ليه

هبص على ايه يعني بتحسر على حالي

نعععععععم بتتحسر على ايه بقى مبقتش عجباك دلوقتي

بصي في المرايا وانتي تعرفي بتحسر على ايه

ااااه ابص في المرايا ...انت عايزني زي اللي بتتفرج عليهم دول

ياررررررريت

بسيطة اوي اقدر اكون زيهم في كام شهر بس

طب ياريت وانا استحمل الكام شهر دول

ماشي يا حبهونتي بس ايدك انت عشان اعمل المطلوب

اؤمري يا مستكتي عايزة ايه

عايزة اشتراك في النادي وكمان الجيم

وميزانية عشان اكل مخصوص ليا عشان اللياقة

و اشتراك في الكوافير عشان هروح كل يوم

وفيتامينات لتقويه الضوافر

و شوية هدوم كدة لزوم الشياكة والتناكة

وانت كمان تشفط كرشك دة و تزرع صلعتك

و تبقي زي ابطال الافلام الهندي

اه كمان كنت هنسى

وعايزة شغاله وطباخه و مربية

عشان مش هكون فاضية للكلام دة بقى




حبيبتي يا مستكة انتي صدقتي بردو انا كنت بهزر معاكي يا روحي

انتي حياتي و بحبك زي مانتي كدة

يا سلام عليكوا

رجاله مبتبصش في مرايات ابدا

[بنت خديجة]

هههههههههههههههه فصلتيني

يدوم حب المستكة والحبهان

[حـيـــــآة ❤]

ههههههههه بيعايبوا وهما العيب كله
نايس خزعبلايه ياحبي

[شاعر الحب الحزين]

هههههههههههاي

لا بجد حاجة من الاخر يعني

خلاص هنتعلم منهم ونضحك عليهم

بس بجد خزعبلاية حلوة وحقيقية وبتضحك

عايزين تاني من ده يا ايمان

تدوووم هالطلة والضحكة يارب

[فداااااااااااء]

وادى جزات اللى يعترض
يدفع يلاقى الحلاوة او يحمد ربنا على اللى عنده رجالة عايزة الضرب

سلمتى ايما للخزعبلاية الحلوة

[.Lamar]

ههههههههه
لا دى رجالة متجيش غير بالعين الحمرا
تصدقى فعلا يبقى فيهم العبر
يبقى كرشه قدامه مترين
ياكل و محتاج ونش يقومه
و يقولها تخنتى و يتريق
طب ما يشوف نفسه الاول

لا حلوة مستكة و حبهان
متابعة اكيييد

[طبيب الهوى]

حلوة الخزعبلاية يا إيمان

أزواج غاوية مظاهر تبئا تدفع وتغرم عشان الجسد الفاني

مع أني متعصب من حبهان لكني هدافع عنه ضد مستكه

وأكتب خزعبلاية باسم ريحان وخُبيزه

والله المستعان

قلمك موجود وبيكتب حاجات حلوة يا إيمان

كملي السلسة وأنا متابع معاكِ إن شاء الله

عشان ارد عليكِ وعلىَ الافترا بتاعك علىَ الرجالة الطيبة

أنتِ والبت مروة المُفترية حفيدة رَيا

تحياتي وودي وورودي

أبو عصام

[السفيره عزيزه]

حلوة حلوة ..عندي فووكيره بنت لذينه
تيجي نبعت لهم صفقة مراياااات
ولما يوجهو الحقيقة المره اوى اوي
يمشوا جنب الحيط .لا وايه فيه
ال هيبقي وشه للحيط على طووووول. .
ربنا يجعل كلامنا خفيف حليهم يارب

معاك ياتوتة على طول
لاحد الغمة ما تزوووول