دفتــــر الصفحـــاتـ 2

[بحر القمر]

ودلوقتي وانا بشرب فنجان قهوتي احب اكمل كلامي
انا مجرد انسان بيحب الحياه كده وبكل بساطه
حتى لما اكتب بحب اكتب بهدوء وبشيئ من العفويه اصل مفيش احلى من الكتابه بتعمق وصدق وفي نفس الوقت ببساطه عشان يكون لها شكل وقيمه مش مجرد شكل وبس

يمكن ولاني واخد كام يوم اجازه سهران رغم اني نادرا ما اكون سهران للوقت ده بس معرفشي عندي شوية تفكير خاصين بيا وبحياتي ده غير التفكير في الواقع اللي احنا عايشين فيه
زيي زي اي واح مصري بيحب البلد
بيحلم لها
بيحلم فيها
طموحات واحلام كتيره موجوده امتى تحقيقها العلم عند الله

بطبيعتي فيا كوكتيل غريب وعجيب ومتناقض في نفس الوقت
شويه صبور وشويه عصبي
شويه افرح وشويات احزن
مزاجي متقلب جدا بس فيما بيني وبين روحي
انا حد عارف جدا حدود ياسر
بعامل الناس ببساطه شديده
مدمن للورد والقهوه والسفر وطبعا شغلي قبل الكل
اممم غاوي حريه بس الحريه الطبيعيه مش حرية اخرى والحمد لله
يعني حريه مقننه ومغلفه بقيمنا الحلوه وعاداتنا الوسطيه السهله

عندي والحمد لله رصيد كبير من الاصدقاء سواء اصدقاء من وانا طالب او من جيراني او في شغلي او من الندوات والصالونات الادبيه اللي بتشرف بالحضور ليها ومعرفشي القوانين والنظام هنا تمنع اقولها ولا لاء بس انا مش هعلن عنها ربما يكون ممنوع وما احب المشاكل انا
اصدقائي دايما في جدال ونقاش سواء في السياسه او الكوره او الفن او الشعر والادب
احلى حاجه لما اسيبهم يخبطوا في بعضيهم وانا هادي ومشاهد ومتفرج وكاني ولا اعرفهم وهما بيتجننوا مني لما اعمل وياهم كده
طيب ليه انا كده ؟
اصل اخسر صديق ليا عشان سياسه ليه خصوصا وانا لا سياسي ولا بحب اصلا موضوعات السياسه بس للاسف السياسه اصبحت مفروضه علينا وكانها شريعة واسلوب حياه

انا بحب مصر اوي
بكل احوالها وظروفها وعيوبها ومميزاتها بحبها اوي اوي وبزعل على فكره لما اشوف تويته لحد عربي بيهاجم بلدي اصلها بلدي مهما كانت
بزعل كمان لما اشوف مستوى التدهور الفكري وصل للقاع بشكل مخيف وصلت منه الاجيال الجديده للتشوش واللاوعي وعدم تحمل مسؤليات الحياه لدرجة الشاب اليوم عايز يتخرج واليوم عايز يتزوج واليوم كمان عايز يخلف رغم ان ربنا سبحانه وتعالى خلق الكون في 7 ايام علشان نتعلم التركيز والصبر وعدم التسرع بس برغم كده الانسان عجول

ساعات اخرج اتمشى مع نفسي اشم ريحة مصر وادور على حاجات حلوه كتيره فيها حتى فكرت في فكره ممكن ندعم بيها السياحه في الظروف الراهنه


الفكره
ممكن كل حد يصور منطقه حلوه في مصر يارب تكون مثلا 5 صور واظن الامر مش صعب خصوصا في ظل التقدم الرهيب في صناعة الموبيلات يعني كل الحكايه دقيقه للموضوع بس هيكون مفيد اوي

النيل بقا والمشي عند النيل ده موال كبير اوي شويه كده وابدء احكي عليه اذا تسمحوا لي

[بحر القمر]

بعتذر اخواتي اخدوني بزياره جميله وعشان كده غابت ردودي


نرجع نكمل
كنت واقف عند الكلام عن النيل
وقطعا مهما حاولت روعة وعظمة النيل مش بالكلام عليه انما بالحفاظ عليه لان النيل ثروه لا تقدر باموال العالم كله

النيل
مسرح العشاق
وادي الاحباب
ملتقى الاصدقاء
مع النيل وبجوار النيل تتولد حكايات
ويتقابل شخصيات
ويرحل اخرين
ويفضل النيل الجميل شاهد على اهم ملامح جمال مصرنا الغاليه


فاصل مش اعلاني ونعود

[بحر القمر]

صباح الزهور على حضراتكم اجمعين
وعوده للكتابه بعد تاخير غير مقصود لبعض مشاغل وظروف عندي

عايز اقول شيئ مهم جدا عن حال مصر والوطن العربي كله
كل الحاصل في الوطن العربي وكل مشكله سواء عربيه عربيه او عربيه دوليه وراها تخديم على مصالح اليهود بكل الطرق !

نفسي اشوف وطن عربي واحد تحت رايه واحده لو حصل ده والله نقدر نعمل المستحيل نفسه علما بشيئ مهم ربنا امرنا بالوحده والتوحد ..

عايز اتكلم عن كرة القدم شويه وانا اهلاوي ( غير متعصب ) وبحب كل لعبه حلوه من اي فريق ونفس المنافسه على الدوري يكون فيها اكثر من فريق خصوصا واندية الشركات اصبحت قويه جدا ولها باع قوي

عايز اقول كمان
شوية ضمير
مصر محتاجه شوية ضمير وهتكون احسن دول العالم بامر الله


اخر شيئ احب اقوله

عايز اقدم الشكر لكل اخ ولكل اخت هنا بالمجموعه الطيبه دي
سواء وقفوا معايا وفهموني بعض الامور بالمجموعه او اهتموا ببعض افكاري


واتمنى يارب اكون ضيف خفيف هنا ومجددا بقدم كل شكري للأستاذ سهر على ترشحي للحوار هنا

وامنياتي للجميع بكل خير وسلام وسعاده يارب

[بحر القمر]

بناء على طلب أ سهر
اختار بعدي وليا الشرف
أ / دمعه حائره
اترك لها المايك بقا ههههههههههه

[دمعه حائره]

شكرا ياسر على الدعوة ومش عارفه ينفع ولا لا
وهل هضيف جديد للموضوع مافتكرش
افضل حد مايكونش شارك قبل كدة
وشكرا لكل اللى ذكرنى بالخير بجد انا بعتز بكل كلمة وحرف
وكل الاعضاء الى عرفهم فى المنتدى اتعلمت منهم كتير حاجات
صعب تتنسى مهما مرت سنين
بتمنى ليكم كل التوفيق والسعادة فى حياتكم