المسجد الأقصى في سطور

[reda galal]

""" المسجد الأقصى في سطور""""
قبل بس ما أحكى لكم تاريخ بناء المسجد الأقصى ومين اللي بناه هقولكم شوية حاجات عن عمارته...

تخيلوا انه مساحته حوالى 141 ألف متر مربع !!
اه بجد طب ده معناه ايه؟؟

معناه انه مش هو بس الجزء اللى بنشوفه في الصور، وان المسجد هو كل المساحة المحصورة داخل السور المبني على هضبة موريا بالقدس في فلسطين العربية المحتَلة ،
يعني بيضم أكتر من حاجه .....
(المسجد القبلى) اللي عليه القبة الرمادي وده بناه عبد الملك بن مروان ولما مات كمله ابنه الوليد بس اول حد بناه سيدنا عمر، وكمان (قبة الصخرة) اللى لونها ذهبي، وهي دي اللى معظم الناس بتفكرها المسجد الأقصى، و (المصلى المرواني) ويقع أسفل الجزء الحنوبي الشرقي للمسجد الأقصى، (وحائط البراق)، وللمسجد 4 مآذن بنيت في العصر المملوكى ، وله كمان 14 باب منها 4 أبواب مسدودة حاليا, وفيه كمان أسبلة وابار للمياه.

يلا بينا بقى نحكي تاريخ بنائه وده بقي أخبرنا عنه رسولنا الكريم في حديثه الشريف( عَنْ أَبِي ذَرٍّ, قَالَ : قُلْتُ : " يَا رَسُولَ اللَّهِ أَيُّ مَسْجِدٍ وُضِعَ فِي الأَرْضِ أَوَّلُ ؟ قَالَ : الْمَسْجِدُ الْحَرَامُ . قَالَ : قُلْتُ : يَا رَسُولَ اللَّهِ ثُمَّ أَيُّ ؟ قَالَ : الْمَسْجِدُ الأَقْصَى . قَالَ : قُلْتُ : كَمْ بَيْنَهُمَا ؟ قَالَ : أَرْبَعُونَ سَنَةً ، وَأَيْنَمَا أَدْرَكْتَ الصَّلاةَ فَصَلِّ , فَإِنَّمَا هُوَ مَسْجِدُكَ " .

طب مين اللي بناه ...؟؟؟؟
المورخين اختلفوا في مين أول من بنى المسجد؟؟... ما بين مؤرخين بيقولوا "الملائكة" وتانيين بيقولوا " سيدنا آدم "ومجموعة تالتة بتقول "شيث بن سيدنا آدم" وغيرهم بيقول "سيدنا ابراهيم"
وعلشان ما ندخل في تفاصيل هريحك وأقولك: إن الأرجح واللى اتفق عليه معظمهم وبالأدلة إن سيدنا آدم عليه السلام هو اللي بنى المسجد الأقصى
كده عرفنا 3 حاجات حدود المسجد ومين اللي بناهه وايه تاريخ بنائه.

يلا بقى بينا نعرف أول حد سكن البقعة المباركة؟؟؟
اول حد سكن هناك كان (اليبوسيين) .... ايه ياعم اللوغارتمات دي ؟؟ يطلعوا مين (اليبوسيين)؟؟!!
اليبوسيين يبقوا من بطون العرب الأوائل وسكنوا هناك من أكتر من 6000سنة!! يعني مش اليهود اهه ما شوفش حد بقى من فشلة الاعلام يطلع يقول مش بتاعنا .. ده بتاعنا اهه قبل حتى ما نكون مسلمين ...

وللعلم المسجد مر بمراحل تجديد واعادة بناء في مختلف العصور قبل الاسلام واشهرها لما أعاد بناؤه ونجديده سيدنا سليمان مرة أخرى... وده كمان أخبرنا عنه رسولنا الكريم في حديثه الشريف ( عن عبد الله بن عمرو بن العاص قال: قال رسول الله : « إن سليمان لما بنى بيت المقدس سأل ربه عز وجل خلالا ثلاثا، فأعطاه اثنتين ونحن نرجو أن تكون لنا الثالثة، سأله حكما يصادف حكمه فأعطاه إياه، وسأله ملكا لا ينبغي لأحد من بعده فأعطاه إياه، وسأله أيما رجل خرج من بيته لا يريد إلا الصلاة في هذا المسجد خرج من خطيئته مثل يوم ولدته أمه، فنحن نرجو أن يكون الله قد أعطانا إياها .
وعلشان كده اليهود بيتلككم بقى ويقولك (الهيكل) اللى هو مش موجود أصلاً ....بس علشان يهدوا المسجد وخلاص .. ... ربنا يهدهم بقى لحد ما يجيلنا حد يرجع المسجد لنا.

أما بقي تاريخ المسجد في العهد الاسلامي فالمسجد ظل تحت حكم البيزنطيين لحد ما جه سيدنا عمر وفتحه على يد القائد المسلم ابو عبيدة ابن الجراح سنة 15هـ، وأعطى للنصارى الأمان فيما عرف ب (العهدة العمرية) .

واستمر المسجد تحت حكم المسلمين وفي رعايتهم لحد ما جه الصلبيين واستولوا عليه أيام الفاطميين سنة 492هـ وكان والى القدس في الوقت من الفاطميين اسمه (افتخار الدولة) ... وكان حجتهم ان الخليفة الفاطمى الحاكم بأمر الله هدم كنيسة القيامة، وحاول المسلمين يرجعوه لمدة سنين طويله أيام السلاجقة والدولة الزنكية في عهد عماد الدين زنكي ونور الدين محمود لحد ما جه صلاح الدين الايوبي وانتصر على الصليبين في (معركة حطين) سنة 583هـ ورجع الاذان تاني للمسجد الأقصى بعد ما وقف حوالى 100 سنة وأحب بس أقولكم ان صلاح الدين الايوبي استقدم المنبر اللى صنعه نور الدين محمود في حلب للمسجد الاقصى وفضل المنبر ده فيه لحد ما حرقه المتطرف اليهودي دينيس مايكل روهان في 21/8/1969م
شوفتوا ازاي كان نور الدين محمود واثق انه هيرجعه ومجهز المنبر اللي هيخطب عليه بعد النصر

[روح الروح]

سلمت يداك
تحياتى

[محمد ابو رفعت]

مووووووضضوووووووع جميييييل

[وارث علم النبوة]

كل رمضان وأنتم بخير وعافية

[كريمة سالمي]

الله يعطيك العافية يا رب تسلم

[yotta medical school]

حلو اوى

[maspero11]

ربنا اتنا في الدنيا حسنا وفي الاخرة حسنا وقنا عذاب النار