random variable

[ahmed 22]

قريت خبر انه سيتم التحقيق النهاردة في بث مباشر
مع جيف بيزوس صاحب امازون و روكزبرج بتاع الفيس بوك
وتيم كوك ( ابل ) وساندر بيتشاي ( جوجل )
في الكونجرس الامريكي علي شبهة استغلال ازمة كورونا
يعني هيناقشوهم في اسباب تضخم ثرواتهم اثناء ازمة كورونا بشكل رهيب

واحد هيدخل يقول ما هو طبيعي اصلا الشركات دي تستفاد من ازمة زي كورونا
تلقائيا وتتضاعف ثرواتها ... لان امازون ماضربتش حد علي ايده
عشان يدخل يستخدم موقعها ويعمل شوبينج من خلاله عشان خايف ينزل من بيته
بسبب كورونا .... وبالتالي ده بديل امن بالنسبة ليهم ..

بس هنا تقريبا الكونجرس الامريكي عاوز يقلب الناس دي في قرشين من الاخر
يقولهم يعني شاركونا الضرر ما احنا حالتنا ضنك ..
وبالتالي مثلا ياخد نسبة من ارباحهم الفترة اللي فاتت دي
ولو حتي 50 % ...
دي اكيد مشورة ترامب وحزبة بينفذها عشان يساعدوه في انه يقوم الاقتصاد الامريكي تاني ..

اعتقد ان الموضوع هيكون مثير عالساحة الفترة دي خارجيا
وبالذات انه فعليا الناس دي تعتبر الاقوي والاكثر تأثيرا في العالم الفترة الحالية

طبعا
احنا مالناش دعوة بالعالم دي ..
خلينا مشغولين بالكباري بتاعتنا ..

[ahmed 22]

غالبا والله اعلم
انا لبست كورونا
فقدت حاسة الشم والتذوق
فعملت عزل صحي لنفسي من بتاع اسبوع اهو
صحيح اعراض خفيفة ... بس احتياطاتها سخيفة

الصراحة الحياة سخيفة بين 4 حيطان 24ساعة*24
الواحد اكتشف انه عادي زمان انه ممكن يقعد في هدوء
لمدة يومين او تلاتة او حتي اسبوع
من غير ما يكلم او يشوف ناس
وكان الواحد ممكن يحب كدا كمان
بحب الهدوء عامة ..

بس لما بتنجبر علي انك تعزل نفسك
فالشارع فجأة بقا حبيبك اللي مش قادر تستغني عنه هههههه
والناس فجأة وحشوك ... والحياة بقت يتحكي عليها امثال
اه والله .. ددنيا


اسوأ ما في الموضوع ده الصراحة
بعيدا طبعا عن مخاوفك ليكون فعلا فيه حاجة
وانك ممكن تعدي اهلك وكدا ...

اني اول مرة افقد حاسة التذوق والشم
وماكنتش عارف احساس الموضوع ولا فاهم اساسا بيكون ازاي...
وكنت فاكر اول يومين ان الاكل اللي فيه حاجة
واقول الله .. هو كل الاكل ماله وحش ليه كدا
هو مافيش توابل .. طب الجبنة بايظة طيب

في الايام دي بالذات لما تلاقي في حاجة غير طبيعية
في تذوقك للاكل ومش فاهم ...
هات ازازة برفان وشمها .. لو لاقيت نفسك عالابيض اعزل نفسك عاطول
لأن ماخدتش بالي غير بعد يومين
لما فجأة تنبهت انه احتمال يكون شبهة كورونا
فعملت كدا

من الاخر لو فاكر نفسك ناصح وقاري عن اعراض الكورونا ميت مرة
فماتعتمدش علي دماغك
لأن فعلا لما حاجة بتجيلك
اخر حاجة بتفكر فيها هي اسوأ مخاوفك
لا اراديا كدا


انا قلت اشارك من يقرأ تلك النصيحة

[ahmed 22]

مقال كنت كاتبه الشهر اللي فات عن سد النهضة بتاريخ 14-6

يا تري رايحة بينا علي فين يا اثيوبيا

بعيدا عن اي افلام سياسية وتحليلات استراتيجية وافلام هندية
او فكرة ان احنا اتعاملنا في الموضوع ده من الاول بسبب ظروفنا كان فيه اهمال
وبعد ما انتبهنا لخطورة الموضوع مشيناها بالحب والحلفان ..

خلاص الموضوع بالنسبة للجانب الاثيوبي خرج عن سيطرة انك تعمل اتفاق بشروط فيها نوع من التكافئ
او التوازن او حتي انك تخرج باتفاق فيه 40 / 60 حتي لصالحهم..

والله مش بعيد فكرة انهم عاوزين يطلعوا باتفاق يتم فيه استغلال كافة مواردهم المائية
اللي فعليا انتبهوا انهم قادرين يقولوا كمصب ان احنا في ايدنا نعمل كل حاجة
وكل يوم الكفة بتاعتهم بتزايد لأن الكل بقا كل يوم هو اللي بيسعي يحاورهم
ويسترضيهم ودي اصلا لوحدها تخليك متعجرف في قراراتك
لان حسيت ان اللي حواليك انعم من انهم يوجهوا ليك كلام قوي حتي..

الرجل رئيس الوزراء بتاعهم دماغه عالية وقدر يجر الكل في السكة اللي هو عاوزها من الاول
بسبب فهمه لعقلية االقائمين علي الدبلوماسية المصرية.. دبلوماسية دون لجوء لحلول اعنف....
يعني ممكن المعادلة توصل انه عشان يكون فيه اتفاق يقولك الدفع مقابل المياه كحل وسط بالنسبة ليهم

علي اساس انت بتصعد فواحد يدخل في السكة يرمي كلمة تعويض مقابل تأخير الملي ..
لأن خلاص كل يوم الحدود بتعلي .. لازم تقدمله اللي يخليه يأخر مليه للسد ..
يعني اصلا موضوع الاسباب الفنية مابقاش ليه قيمة
في الوقت اللي انت بدأت تتفاوض معاه علي ان السد يتملي في 3 سنين ولا 7 سنين ..
وبالتالي ده اعتراف انه جاهز .. بس انت عاوز تحدد يجهز امتي وده في عرفه مرفوض ..
لانه مش مضطر .. ولانه بقا قادر .

بس كله مثلا متجه لفكرة ان اثيوبيا مدعومة من اسرائيل او تركيا او قطر .. ودول اللي مقويين شوكتهم ...
ده كنظرية مؤامرة ممكن ..
بس فعليا اللي مقوي شوكة الحكومة الاثيوبية هما الشعب الاثيوبي
وده اللي احنا مش حاطينه في المعادلة بتاعتنا خالص ..

دايما بنبص الامور من وجهة نظرنا .. بس ماحدش فكر يبص للموضوع من الطرف التاني شكله ايه ...
وخصوصا النظرة الشعبية

يعني اساسا فكرة ان الحكومة تتراجع عن شئ هما شايفين ان بقا ليهم السيادة الكاملة
عليه في الوقت الحالي عكس اي وقت قبل كدا في القرن الماضي ..
وانهم خرجوا من عباءة اتفاقات استعمارية وتاريخية
وان قبل كدا في سعيهم لبناء السد تم ضرب الامدادات اللي بتبنيه في السبعينات تقريبا مننا
وكل شوية لما يحصل تراجع في البناء بيتشبثوا بالموضوع لحد ما بقا قريب منهم ..

ودي كلها رواسب تاريخية محسوبة علينا كدولة مصرية من وجهة نظرهم....
وبنت نوع من الضغينة داخلهم .. فطبيعي عاوزين يحسوا بانتصار عليك ولو معنوي ..
وانت مانبتهتش للنقطة دي من الاول اساساا وفاكر انك بتتعامل مع اخوك ...
مع انك يعني عارف ان الاخوات ساعات بياكلوا حق بعض عادي ..

لأن فكرة الاستفادة من السد باسرع وقت كمصدر طاقة بقا كل يوم ويزيد ويمثل ليهم امل نهضة بقا اكبر
من اننا نتعامل معاه بالطريقة اللي احنا ماشيين بيها دي ..
الحكومة والاعلام في البداية صدروا العامل الوطني في الموضوع ..
والشعب الاثيوبي دخل عالموجة فبقا اكبر دافع تجاه احلامهم واكبر ناقض لحكومته
لو اتخلت عن اي شرط من شروطها او اي تأخير ل 3 او 4 سنين ..

وشايفين ان اي مساس بالحلم ده من اي نوع فيه اعلان حرب علي بلادهم ..
وبالتالي دايما تصريحاتهم مبنية علي ان في عداء بتصدره مصر ...
مع اننا كحكومة ماجبناش سيرة ضرب السد اطلاقا ..
بالعكس يمكن ده كان في الاول حسم الموضوع لو كان فيه تنويه ليه بطريقة ذكية ..
يعني بتوريله العين الحمرة بس بالبلدي كدا ..

بس بالعكس تلاقي في عز المناقشات والمراحل الاخيرة منها من كام شهر ..
وزير الري طالع في لقاء يكلم فيه عن اجراءات الدولة بتاخدها في مجال الزراعة
وترشيد المياه في حال فشل المفاوضات ... وده بيتنافي مع ارادة الشعب
انه شايف ان الموضوع ده خط احمر وبالنسبة ليه حياة او موت ...
وصدروا دعاية سلبية عننا اساسا .. واديت انطباع انك مسلم بس بتقاوح وخلاص ..

وبأكد تاني ان لاثيوبيين الي حد كبير كشعب مش حابينا اوي كمصريين..
وفكرة انهم شايفين امل يخرجهم من الفقر الي التنمية عن طريق مشروع قومي الكل التف حواليه ..
ده هيخليهم اشرس علي طول الخط ... والاعلام بتاعهم هيكون زلزال عالحكومة في اي قرار لانه مسنود بدعم شعبي ..
وده مخلي الحكومة حاليا اقوي في قراراتها وحتي الجيش بتاعهم بقا بيصدر قرارات باسم الشعب
يقولوا ان الشعب الاثيوبي عنيد ومعروف بجبروته وافلام كدا ....

من الاخر الحكومة عندنا حطت نفسها في موقف ضعيف جدا
سواء في المفاوضات او حتي في اخذ قرارات اصعب من أنك تتعامل مع نتايجها من وجهة نظرك ....
وقت الشعارات بقا مالوش مكان حاليا في كلامنا... وقت الاحلام بيزيد عند الاثيوبيين ...
فالمفروض انت هتخرج من المأزق ده ازاي كدولة ...
مع العلم انك حتي لو فكرت تتعامل عسكريا عشان حتي توجه ضربة جوية للمطار محتاج قاعدة ليك
في دولة قريبة وده مش متوفر وعنصر المفاجأة راح ..وانت ماكنتش تقريبا مرتب ليه..وحتي الموضوع ليه
نتايج اكبر من اننا نتعامل معاه لو حصل .

و فيه كلام انه تم استخدام ميليشيات مسلحة معارضين للحكومة الاثيوبية من الجانب المصري
بشكل خفي وتم احباطهم اكتر من مرة اثناء محاولتهم مهاجمة السد .. وتم توجيه اتهامات مبطنة من الحكومة الاثيوبية بالموضوع ده ... وطبعا ماحدش قدر يثبت حاجة ..

بأمانة حاسس انه هنرضي بأنصاف حلول بتفكير القائمين علي صناعة القرار..
وهنضطر نتعامل بمنطق اقل الخساير ...

الا اذا حصلت مفاجأة ذات طابع استراتيجي ويتم النظر للموضوع بتوابعه اللي هتكون غير متوقعه
وفيها عامل المجهول .. انه فيه مكسب شعبي من خلالها القائمين عالحكم يكسبوا ثقة الناس من جديد ..

وعامة انا نفسي قبل ما اموت نكسب حاجة في حياتنا غير ماتش كورة الصراحة

[ahmed 22]

والله بلدنا من فترة كدا قالبة علي موجة كوميدي الله يرحمها

بالبلدي كدا تحس ان الدنيا ماشية عاطول في اتجاه الحكمة العظيمة اللي بتقول


كل ما تتخزوق ... افتكر ان اللي جاي اسوأ

[ahmed 22]

الرجل بتاع مصلحة الضرايب النهاردة طلع قرار عنب

بيقولك تاجر المخدرات او بتوع الدعارة او حتي بتوع الدروس الخصوصية
لما يتمسكوا ويعترفوا بجريمتهم
بتاع الضرايب هيروح ياخد منهم اقرارهم الضريبي
ويعرف هما تاجروا بفلوس اد ايه مخدرات مثلا وبقالهم كام سنة
وهيحاسبهم ضريبيا ..

شوف انا ماعنديش مشكلة نشوف الخبر فيه كوميديا ولا صح

بس قسما بالله الرجل اللي مسك البلد ده مبدددددددددددع في لم الفلوس
يخربيت دماغه ..بهتت علي حكومته ... يعني شوف الدماغ وصلت لفين .. ابدااع
بيعرف يقلب الناس في فلوس طول الوقت
كل ما تتزنق طلع قانون وقلب الناس في قرشين
احنا في لم الفلوس ماعندناش يا اما ارحميني

[ahmed 22]

كل عام والجميع بألف خير
عيدكم مبارك ان شاء الله ...

[ahmed 22]

قريت قصة حزينة النهاردة

بوست بخبر بعنوان

قالت باكية : لقد خانني مع محمود بعد 16 عام من الزواج

طبعا هنا اتوغوشت وقلت خلاص عليه العوض في الدنيا
لا حول ولا قوة الا بالله .. بس هنا حسي الفلسفي زارني
فسألت نفسي يا تري هي بتبكي عشان خانها بعد 16 عام
ولا بتبكي عشان خانها مع محمود ...
في الحالتين انا اتعاطفت معاها الصراحة

انا الصراحة دخلت اشوف الخبر عشان اطمن علي الولية الغلبانة علي غير عادتي
واشوف احوال محمود بعد الفضيحة دي وخاصة ان طارق اللي هو الطرف التاني
مش في دماغه ..

ادخل اقرأ الخبر بالكامل
اول سطرين بتحكي انا اتشديت للحدث
هوب لاقيت فرملة
والاقي الموضوع انها بتقول ان صاحبنا
كان مسجل اسم الولية اللي بيخونها معاها
عالتليفون باسم محمود ...

اسأل نفسي هو الرجل المحرر ده بيزاولنا ليه عالمسا
ما يكتب الخبر بما يرضي الله ... وسيبته ومشيت عادي
يعني هعمل ايه .. مش ناقصة تشويق

والتاني بعدها بدقيقتين كاتب عنوان عليى فيديو يوتيوب
شاهد قبل الحذف ... فضيحة الفنانة كذا
وصورة مفزعة كدا للفنانة من فيلمها الاخير مع العنوان
فبتتوتر وترتبك .. من هول ما رأيت
الموضوع تحسه خطير

لأنك طبعا انت من جواك بتقلق عالفنانة فبتحب تدخل عشان تطمن اكيد
انت ممكن فعليا لو ماطمنتش تموت يعني ... او يحصل ضمور لفضولك ..
او يجيلك سكتة ... الموضوع بيبقي حياة او موت الصراحة
فلازم تدخل ... هتقف عالباب ليه ..
فتدخل تلاقي الفنانة غالبا عندها مشاكل في الضامة
ولا ماتفهمش بتلعب في حواجب صاحبتها
المهم الموضوع مش بيبقي عاطفي خالص وشكلك بيبقي وحش
لما تلاقي الفضيحة فشنك
فحسك الوطني تجاه الموضوع بيختفي
فبرضه بتشتم الرجل اللي نزل الفيديو وتمشي ..
وغالبا نفس الرجل بعد كام يوم بينزل نفس الخبر
وبرضه بتدخله وتسيبه وتشتم ....
تحس الموضوع قلب اسلوب حياة

الاسلوب ده اللي بيتبعه غالبا محررين الاخبار في النشر
اسمه clickbait ( محتوي مضلل)
يعني بيحط العنوان غير المحتوي ... ي
عني بيشدوا مشاهدات وكدا لحساباتهم بتاع التواصل
او قنواتهم عاليوتيوب
وغالبا الناس بتقح في نفس الفخ كل مرة
بدليل ان لسا معظم الاخبار بتلاقيها كدا ..

المهم يا صاحب المحتوي المضلل
اتقي الله ... وانت يا عم اتعلم بقا
ماتقعش في نفس الفخ كل مرة ...

سيب محمود لربنا يحاسبه
مش لازم تخمس معاه في الحساب ..

والله بفكر اكتب هنا علي طول اي ثقالة دم كدا
بلا مواضيع بلا بطيخ ...

[ahmed 22]

في نوعين من الناس بيسعوا دايما يحصلوا عالانتباه :

النوع الاول : attention whore

والنوع التاني : attention seeker
بتوع اغنية
You just want attention, you don't want my heart

النوع الاول : دول بتوع دراما .. بتوع اشاعات .. دايما يدعوا البراءة في انفسهم
وشايفين نفسهم ضحية ولازم تطلع الناس حواليها اسوأ ناس .. ظاهرة صوتية .. من غير ضرر ..
اجبن خلق الله .. بس مع الوقت بيتحولوا لظاهرة مجتمعية
اذا تحولوا لشخصيات عامة ليها وزن
وخصوصا لما يكون معظم اللي حواليه عليهم علامات استفهام وغلطاتهم واضحة فيستغلوها ..
بس بيحاولوا دايما يحصنوا نفسهم من ضرر الناس اللي مالهومش داخلة بالقانون ..
فيظهرو للناس انهم خوارق وفوق القانون ..

النوع التاني : اسوأ من النوع الاول بمراحل ....
ده يقدر يوظف النوع الاولاني لصالحه اساسا ويطلع بشكل اشيك
ده واحد فعليا يملك تزاوج السلطة بالمال ومن خلالهم عاوز يحصل عالشهرة والامتنان ....
عقدة نقص بعيد عنك... ده مشكلته انه يملك نقاط ضعف الناس ..
بس الناس خايفة تواجهه بحقيقته .. فبيترفع عن العامة ..
بس المهم يملك النفوذ علي الشخصيات العامة ..اللي بيحترمهم العامة .. فياخد حقه منهم ..
بعيدا عنك استاذ ورئيس قسم .. قلتلك seeker باحث و ساعي للمتعة ...
مالوش حدود .. لانه ملك علي من يملكها .. او هذا ما يظنه ..

طبعا اللي متابع كورة هيعرف مين دول

[ahmed 22]

يعني لما الناس مش عاوزة
حتي تفهم قصدنا من كلامنا
هعمل ليهم ايه

كل واحد حر ....

بس نفسي الناس تفهم ايه معني انك تطرح قضية للنقاش
وهو انه تفرد ليها مساحات وابعاد جديدة
وتحاول تشملها وتحطها في مكانها الصحيح
عشان يكون فيه تطوير لارائنا ونتبادل الحديث
عشان توصل لنقطة اتفاق ..
او كل واحد يحترم في النهاية اختلاف التاني
مش لازم مخانقة يعني ..

يلا الله المعين

[ahmed 22]

مش عارف انا ليه دايما لازم انزل الرد من دول 10 متر
ومواضيع 5 كيلو ..
مش فاهم الواحد ليه مش زي مخاليق ربنا

كل مرة والله انزل الرد من دول ولا الموضوع
الا لازم احس بالندم اول ما ادوس علي كلمة ارسال ههههههههه
واقول اخر مرة دي... وبعد كدا هاكتب اي تسليك وخلاص
وارجع تاني اكتب رد اطول من اللي قبله

والله ما انا فاهمني ..
يخربيت كدا