محتاج رأيكم

[ahmed 22]

بسم الله

ان شاء الله يكون الجميع بألف خير ..
انا عارف انه قليلين اللي بيدخلوا حاليا المنتدي ...
يعني ربنا يعين كل واحد علي ظروف حياته ..
بس اتمني اني استفاد من رأي الكل بقدر الامكان ..
يعني المفروض نكون مراية بعض ..

انا من فترة طويلة عندي امل اني في يوم ما اقوم بتأليف كتاب او رواية
حاولت اكتر من مرة كذا محاولة بس ماكملتش ...
يعني الي حد كبير مازلت غير مؤهل لحاجة زي كدا ..
بس ادينا بنحاول .. الموضوع مش اني عاوز ابقي كاتب ..
الفكرة اني حابب اجرب ليس الا هقدر اوصل لايه او لفين ..

بس انا حابب استفسر من حضراتكم او مثلا اللي متابع اللي بكتبه
او صادفه انه يقرأ موضوع ليا هنا ...
عن نقاط القوة ليا سواء كان في الاسلوب
او نوعية المواضيع اللي بيفضل يقراها اكتر ..
او مصادر الجذب في الكتابة ... ولا اصلا مافيش حاجة خالص
واقفلها سيرة هههههه يعني اي كان الرأي هحترمه طبعا ..
يعني اكتر حاجة بتشده وشايف انه ممكن يكون
نقطة بداية او شئ المفروض اركز عليه اكتر من الباقي
وايه السلبيات اللي مفروض اتفاداها عامة ..

يعني حابب حضراتكم تفيدوني اكيد ..

[ملك جبال الاحزان]

هقول رايي بره سؤال شوية معلش بقا ✌
للاسف انا مش متابع الكتابات اوى فترة كبيرة غياب
وانا اساسا هايف فمبحيش اتترك للكتابات اوى 😂😂😂
نيجى للمهم اكتر حاجه حلوة فى الموضوع انك حابب المحاولة وده اهم حاجه
مش مهم عندك النتيجه طالما حابب يبقا كمل فى محاولاتك بكل اللى عندك فكرة عنه طالما بتنوع فى كتاباتك ويمكن حاجه فيهم هى اللى تطور فيها لان الكتابه خبرتها بتيجى من القراية والكتابه والمحاولات تابع وطالما عندك الفكرة والمبدء يبقا اكيد هتوصل لحاجه وهتعرف تطورها
بالتوفيق يا حبيبى ولو عوزت اى مساعدة متناديش عليا لانى مبعرفش اكتب اصلا اشطا ✌😂😂
حبيبى ربنا يوفقك 💗

[شروق محمود]

انا هنا ف المنتدى من فتره قصيره
ولكن انا قرات لك كل كتاباتك
فعلا ماشاء الله عندك ثقافه جامده
وملم بحاجات كتيره
وعندك من الاسلوب يخليك تكتب حلو
بالنهايه اتوكل على الله وابدا
بس ابقى اعرض علينا اعمالك بقا
ربنا يوفقك

[مارد الغضب]

استاذنا الكبير
أنا شايف انك من الناس الاذكياء
كتاباتك تتصف بالموضوعية و القوة
و المعاصرة
كمان الاعتدال فى الحكم على الاحداث
الى جانب سعة الاطلاع و هذا ما
يحتاجه الكاتب ليخرج عملا جيدا
و بعدين انت حظك حلو ان بلدنا مرت
باحداث تستطيع استخلاص مئات الافكار
منها
و لكن حاول ان تبلور افكارك و لا تطنب
في السرد
خذها نصيحة منى
اكتب للاذكياء فقط...فسوف ترتفع معهم
و لا تكتب لمن يجذبك للاسفل
اخيرا
اتمنى لك حظا موفقا
تحياتى لسموك المحترم

[ahmed 22]

اقتباس المشاركة الأصلية كتبت بواسطة ملك جبال الاحزان هقول رايي بره سؤال شوية معلش بقا ✌ للاسف انا مش متابع الكتابات اوى فترة كبيرة غياب وانا اساسا هايف فمبحيش اتترك للكتابات اوى 😂😂😂 نيجى للمهم اكتر حاجه حلوة فى الموضوع انك حابب المحاولة وده اهم حاجه مش مهم عندك النتيجه طالما حابب يبقا كمل فى محاولاتك بكل اللى عندك فكرة عنه طالما بتنوع فى كتاباتك ويمكن حاجه فيهم هى اللى تطور فيها لان الكتابه خبرتها بتيجى من القراية والكتابه والمحاولات تابع وطالما عندك الفكرة والمبدء يبقا اكيد هتوصل لحاجه وهتعرف تطورها بالتوفيق يا حبيبى ولو عوزت اى مساعدة متناديش عليا لانى مبعرفش اكتب اصلا اشطا ✌😂😂 حبيبى ربنا يوفقك 💗

هههههههه تسلم يا حجيج
يكفيني روحك الحلوة اكيد

طبعا المحاولة هي الاساس زي ما بتقول
بس يمكن في وقت ما الواحد بيجيله وقت
بيعزف فيه عن المحاولة لما يستشعر انه مش عارف يبدأ منين
فبيحاول يبحث عن اي خيط عشان يبقي نقطة بداية جديدة
يستند عليها .. حاليا انا بحاول ابحث عن نقاط القوة فين اصلا في الاسلوب
من خلال ممكن حاجات كتبتها هنا ..
عشان اعرف اطورها .. عاوز عين غير عيني هي اللي تدل..
لاني بقيت بشوف كل حاجة شبه بعضها الصراحة ودي اسوأ حاجة
لانه اكيد مش كل حاجة كتبتها كويسة او وحشة
بس اكيد في حاجات او نوعية معينة بتعلم اكتر
او ليها اثر ودي اللي عاوز اعرفها..
مش عارف اقولها ازاي .. يعني حاجة ماكونش شايفها ..

[ahmed 22]

اقتباس المشاركة الأصلية كتبت بواسطة شروق محمود انا هنا ف المنتدى من فتره قصيره ولكن انا قرات لك كل كتاباتك فعلا ماشاء الله عندك ثقافه جامده وملم بحاجات كتيره وعندك من الاسلوب يخليك تكتب حلو بالنهايه اتوكل على الله وابدا بس ابقى اعرض علينا اعمالك بقا ربنا يوفقك

اعرض اعمالي مرة واحدة ههههههه
ربنا يباركلك يا شروق
كلامك ده شئ يسعدني
وبتشرف بشهادتك طبعا ..
ويا رب دايما موفقة
ويكون حضورك دايما ليه نصيب من اسمك ..

وبإذن الله يكون الجاي احسن

[ahmed 22]

اقتباس المشاركة الأصلية كتبت بواسطة مارد الغضب استاذنا الكبير أنا شايف انك من الناس الاذكياء كتاباتك تتصف بالموضوعية و القوة و المعاصرة كمان الاعتدال فى الحكم على الاحداث الى جانب سعة الاطلاع و هذا ما يحتاجه الكاتب ليخرج عملا جيدا و بعدين انت حظك حلو ان بلدنا مرت باحداث تستطيع استخلاص مئات الافكار منها و لكن حاول ان تبلور افكارك و لا تطنب في السرد خذها نصيحة منى اكتب للاذكياء فقط...فسوف ترتفع معهم و لا تكتب لمن يجذبك للاسفل اخيرا اتمنى لك حظا موفقا تحياتى لسموك المحترم

انا يمكن محظوظ اني كتبت الموضوع ده
وصادف انه يكون في وجودك استاذنا المحترم
عشان اقدر استفاد برأيك بصورة أكبر ..
شهادتك فيا دايما شئ بيشرفني ..
وانت طبعا من الناس اللي بحترمها
وبلاقي في ارائها كل مفيد ..

هو في نقطتين عاوز رأيك فيهم .. لما فكرت لقيتهم عاوزين جزم مني
تجاههم .. بس محتار ..

واللي شايفه انه كل مجمع ان القراءة والكتابة هي ادوات التطور
اوك انا بكتب .. بس انا ما بحبش اقرأ وبمل بسرعة علي الرغم مني اني بكتب ردود صفحات هههه ..

يعني عشان اكون امين انا مش ماعنديش ثقافة الاطلاع وعمري ما قريت كتاب عامة
ولا حتي رواية او قصة ...
ولما حاولت اقري مرة اخري كان عشر صفحات وزهقت ..
اخري اشوف مقال يصادفني علي الفيس لما عنوانه يجذبني
او احيانا اسمع علي اليوتيوب بعض الناس كل ست سنين مرة زي معظم الناس يعني
يعني من الأخر كدا انا اخري اعرف اقرأ مواقف بتحصل قدامي علي الساحة
او استنبط الناس بتفكر ازاي او اربط احداث .. لما حد يناقشني بتناقش بالفطرة عامة
ولما اكون محتاج مثلا اطلع علي حاجة عشان اكتب موضوع او عاوز معلومة تخدم نقاش
بعرف اجتذب ليا المصادر اللي اقراها علي هيئة اختصارات او سطور
ماعرفش ازاي بس بحاول اعمل منها فكرة جديدة او اسخرها واربطها
انها تخدم افكار لحظية جاتلي ..كدا يعني .. حاجة ماتشرحش كدا ..

الفكرة بقا اني متخيل او عندي اعتقاد ان قلة القراءة وقلة تأثري بأفكار مؤلفين او كتاب هي نقطة قوة
وهي ان افكارك تكون بيور او نقية بدون اي تأثير من حد ده ممكن يكون تأثيره ايجابي اكتر علي المدي البعيد ...
وان كل ما بتقرأ كل ما خيالك يقل ... او مساحة الأفكار والموضوعية عندك تحس انها قلت لما يتم استقطابك لشئ معين .. وخصوصا واحنا بنكلم عن الفكر والسياسة بالذات مش القصص والادب ..
مش محتاج غير أنك تكون متطلع علي رطوش اكتر منها اصول
فهل ده ممكن يكون فيه نسبة صح ؟ ولا انا بقنع نفسي بالغلط ؟


النقطة التانية

وهي اللي حضرتك اكلمت فيها ..
انا لما بحب اكتب ... موضوع السرد مش بيشغلني اني اقل او اكثر فيه ..
بقدر ما بيشغلني انه يكون في سلاسة في القراءة حتي لو طويل ..
فلما توصل لاخر كلمة تكون انت حاسس بشئ من الاشباع والاقناع ..
حتي لو فيه اختلاف ... ماقدرش اقيس نجاح ده من عدمه .. لانه بيختلف من شخص
للتاني .. ومن واحد مهتم لشخص الموضوع بالنسبة ليه عابر ...

بلورة الأفكار في بعض الاحيان عارف انها مطلوبة
بس اساس البلورة هو انك تزيل الغموض عن الكلام او الفضول علي حد علمي
فكل ما كان في مساحة انك تقتل الفضول والغموض بالتدريج
كل ما كان فيه نجاح ليه .. لأنك المفروض تكتب لشريحة اوسع من المكان اللي انت فيه ..
فده صح ولا ايه ؟

[SaMa.]

ممكن تكتب روايه وتبين تفاصيل نفسيه للابطال هتبقا حلوة

[ahmed 22]

اقتباس المشاركة الأصلية كتبت بواسطة sama. ممكن تكتب روايه وتبين تفاصيل نفسيه للابطال هتبقا حلوة

انا فعلا بحب التفاصيل النفسية والجوانب السيكولوجية
والله بشكرك لحسن قرائتك بأمانة ..
تحياتي

[رحاب زمان]

بالرغم مش متابعة لكتباتك للاسف الشديد
و لكن كنصيحة لا تيأس و لا تترك أحلامك
و الأهم تعلم و اصبر و سوف تصل لمرادك
بالتوفيق