العمل الحر من خلال الانترنت

[ahmed 22]

ماعرفش حد جرب هنا فكرة العمل الحر عن طريق الانترنت ولا لاء ...
بس قلت اكتب الموضوع ده كتجربة شوفت أن كتير ممكن يستفاد منها
او يلتفت ليها ويجرب .. ومش هيخسر حاجة بالتجربة عامة غير أنه حتي لو ماكملش
هياخد خبرة أكتر في الدنيا حواليه .. ويكتسب معلومات اكتر من خلال البحث المتواصل
في انه يحاول يدخل المجال ده .. وممكن يصادف في البحث ده شئ يستهويه اكتر ..
وممكن كتير من الناس يدخل فيه بسهولة ويستغل طاقته او امكانياته لو عنده وقت فراغ وصبر ..

اهم حاجة الصبر لأن دي الحاجة الوحيدة اللي خلتني ماكملش
في الحوار ده لأني ماعنديش طولة بال الصراحة ولا دافع صريح يخليني اكمل فيها ...

بس اتعلمت حاجات كتيرة السنين اللي فاتت دي
وعرفت ايه اللي ممكن من خلاله يكون ليك دخل شخصي ومحترم كمان ...

لأن كتير بيشوف الربح عن طريق الانترنت وهم كبير ..
بس أنا مش هدخلك في الوهم..
بس هقولك الصعب فين واللي محتاج حظ الي حد ما لأن الفرص فيه قلت ..
والممكن فين وده اللي امكانياتك لو صادفت انها موجودة فيه
واللي ممكن تطوره في نفسك تقدر من خلال اجتهادك توصله ..

اعتقد ان الموضوع ده مهم لكتير من الشباب فلو انت مهتم كمله للنهاية
ومش هتندم ان شاء لله
فمن خلال الموضوع هعرفك بداية الطريق منين ...
وهقولك تبحث ازاي أنك تكمله ...

انا قلت انزل الموضوع في الفضفضة
ماعرفش هو المفروض ينكتب فين
بس مجرد ما الموضوع يتم قبوله ...

هبدأ انزل في الردود بشكل متتالي ..

[Totoa top]

موضوع حلوه
وفكره جميل
جداً
تسلم ايدك
ربنا معاك

[ahmed 22]

العمل الحر من خلال الانترنت يعتبر من أفضل الطرق اللي تقدر تستثمر فيها امكانياتك بسلاسة ..
مع بعض المثابرة في البداية والاجتهاد هتقدر يكون ليك دخل كويس
وممكن تطور فيها نفسك بشكل ماتتوقعوش ... وكمان هي المستقبل ..
او احنا بالنسبة ليها الماضي
لأنها مجال لو حد دخل فيه من 10 سنين فاتوا و آمن بيها كان اتغيرت حياته ...
لأن كانت الفرص فيه اكتر ومفتوحة جدا ..

في أكتر من طريق ...
هبدأ بحاجة في الامكان ...


طبعا كلنا عارفين موقع امازون ((amazon
امازون عبارة عن منصة للتجارة الإلكترونية ..
كتير متخيل ان موقع زي أمازون كل اللي ناس بتعمله من خلاله
أو دوره مقتصر علي أنك بتشتري منه او بتعمل شوبينج ..
زي موقع سوق دوت كوم عندنا اللي هو بقا تبع امازون في الشرق الاوسط ..
بس في الحقيقة ده انطباع غلط ..

ركز معايا ... الكلام هتحسه غريب شوية في البداية لو ماعندكش خلفية عن الموضوع ..
بس هو سهل جدا لما تطبقه بنفسك وتبحث أنك تفهمه
لأن فيه شروحات كتيرة جدا موجودة علي اليوتيوب وممكن ان شاء الله هقولك علي ناس تسمعها وثقة تستفاد منها كمعلومة سهلة وفي المتناول أنك تطبقها ..


فيه اكتر من 3 طرق تقدر من خلالهم تفتح مجال للعمل ليك علي موقع امازون ...
أنا عندي خلفيه عن 2 منهم

الأول هو
AMAZON FBA >> و ده ماجربتوش
بس فهمت عنه كتير وهو متاح
لبعض الناس اللي بيستهويهم التجارة الالكترونية ..
ده باختصار هو أنك تقدر تشتري مثلا عن طريق موردين من الصين بضايع رخيصة ..
أو انت مثلا في مصر عندك بضايع رخيصة ..
وبعد كدا تشحنها علي مخازن امازون .. عن طريق أنك تسجل في الموقع كبائع ..
وتشحن بضايعك هناك عن طريق الموقع ..

وموضوع التسجيل ده مهم جدا
ومحتاج خطوات أنك لازم تطبقها بطريقة صح ... وبرضه خطوات الشرح ده بكرر متوفرة عاليوتيوب بكترة
وبعد كدا امازون بتعرض منتجاتك دي في الموقع بتاعها .. وبتوفرلك اهم حاجة محتاجها اي منتج
عشان ينجح وهو التسويق ..
والناس لما تيجي تبحث بتلاقي منتجك وبتشتريه ..
وطبعا التعاملات دولارية او باليورو ...

خلي بالك من نقطة في امريكا مثلا اللي شركة امازون يعتبر مركزها هناك فيها
التسوق من خلال الانترنت ده اساسي جدا ... قليل جدا اللي بينزل يشتري حاجة ..
كله عن طريق مواقع زي امازون كدا .. بتوصل لحد بيتك ..
ثقافة الشراء من خلال الانترنت في امريكا واوروبا منتشرة بنسبة فوق الوصف ..
مش زينا هنا في مصر مثلا. .. وبالتالي انت بتخاطب ناس ثقافتهم غير ثقافتك فلازم تكون واعي لده جدا
لما تيجي تسوق نفسك هناك .
وبالتالي امكانية أن منتجك يتسوق ويتباع بصورة كبيرة فرصه أكبر لأنك مش هتلاقي حد يعملك ماركتينج بالسهولة دي غير امازون .. انت بتعمل عرض لمنتج عليه الطلب كتير
وده كله عن طريق تعاملات موثوقة عن طريق اللاب توب بتاعك وانت في بيتك ..
بتسجل من خلالها تحركاتك المالية والشرائية ...
وبالتالي الموقع مزدحم طول الوقت يعني ممكن هتلاقي كل يوم 40 مليون شخص مثلا
بيدخلوا في اليوم لغرض الشراء .. وبالتالي صاحب شركة امازون كان بيصنف اغني رجل في العالم ...
مش من فراغ يعني ..

أهم حاجة لو عندك النية لحاجة زي دي ... فاللي بقوله مجرد قشور
بمعني انك المفروض بتدرس الموضوع من كل الجوانب ..
في حوارات الشحن والجمارك ودراسة المنتج ..
وده كله في البداية هياخد منك جهد ..
بس مع انتهاء اول دورة للبيع ... هيبقي مجرد شئ سهل وسلس
بحكم العادة .... وهتعرف اسرار كتيرةفي المجال ده كل ما تبحث اكتر ...

يعني ممكن مع الوقت تشتري بالجملة من الموفع الصيني بتاع علي بابا
وتبيع في الامازون ... زي ما في ناس في امريكا مثلا لو بتسمع عن موقع
e bay بيشتروا منوا واللي بيشتروه بينزلوه بأسعار أعلي في نفس الموقع ..
هتلاقي تضارب رهيب لنفس المنتج بأسعار مختلفة ...
لأن البحث بيخدع الشاري ..
قصدي في حاجات كتيرة هتتعلمها كل ما هتتعمق ترغبك لو انت عندك الميول ...

[ahmed 22]

في معلومة عالماشي لو انت في يوم اضطريت تشتري حاجة من خلال امازون ..
كواحد عادي محتاج مثلا شئ ضروري ومش موجود غير علي امازون يخص دراستك او شغلك ...
فأكيد مش هتسافر تجيبه يعني ...
فأنت لو عايش في مصر مثلا ... فلازم تعرف أن امازون مالهاش مركز هنا
وبالتالي عشان تشتري حاجة من هناك ... لازم يكون في مواقع شحن عالانترنت
وسيطة بتشتري من خلالها وبتسهلك العملية .. يعني ماتقدرش تشتري بشكل مباشر من الموقع
زي موقع سوق دوت كوم ...
ودول موجودين يعني .. كل الفكرة أنك بتشتري وبتخلي الوسيط يوصلك طلبك لمصر ..
وانت بتتبع شحنتك من خلال التليفون بقا برسايل وايميلات وكدا من الموقع الوسيط ده ...
وبتاخد ممكن من 20 الي 30 يوم عشان طلبك يوصلك

في حاجة برضه و لو اشتريت حتي كوتشي لازم تعرفها ..
أعرف انه هيعدي عالجمارك وهيتفتش وهيتفتح ... وبرضه في بعض المحظورات اللي ممكن تشتريها وماتدخلش فلازم تكون عندك علم بيها ... عشان ماتشتريش وحاجتك تقف في الجمارك
وتتعبك في مجايبهااو فلوسك تروح ... عشان انت اصلا دافع مقدما ..

وبرضه علي حسب الوزن بتدفع جمرك عليه
غير قيمة الشحن الدولي ...
يعني انت لو اشتريت حاجة سعرها 100 دولار وكان وزنها مثلا 5 كيلو
فتوقع أنك هتدفع جمارك عليها ما يوازي 4 ضعف ثمنها ...
بالاضافة لقيمة الشحن الدولي للوسيط اللي بيوصلك طلبك اللي بياخد علي حسب الوزن ..
عشان ماتتفاجأش ...
لازم تاخد بالك من الوزن والجمرك لأنك مش بتتبلغ بيه غير لما الطلب يوصلك فممكن تنصدم...
لأنك ممكن تدفع اكتر من تمن الحاجة اللي انت جايبها اصلا باضعاف لو مش واخد بالك ...

وفي ملاحظة

انت حالا اكيد هتقول انا عايش في مصر ازاي هشتغل في موقع مركزه امريكا وانا قاعد هنا ..
الفكرة كلها وانت بتسجل من شروط التسجيل أنك بتفتح حساب الكتروني امريكي اسمه payoneer
وبتربطه بحسابك في امازون ..
وده التسجيل فيه سهل جدا ... بيتم التحويل ليه من امازون ...
ومنه لحسابك الشخصي في مصر .. لو فيه عمليات دفع او شراء لو انت رايح تشتغل معاهم ..

وبرضه بتوافق ان الضرايب يتم خصمها تلقائيا هناك ... يعني بتيجي صافية .
كلها امور وانت بتسجل بتعملها مرة واحدة في البداية وخلاص ..

دي تفاصيل يعني هتصادفك في النص ..

[ahmed 22]

تاني حاجة تقدر تشتغل عليها من خلال موقع امازون هو قسم

MERCH BY AMAZON

السكة دي بقا خدت من وقتي كتير زمان ... مغري جدا .. وبيعشم بزيادة ..
وده اللي كنت بقول عليه محتاج حظ ... وكتير كان بيسمع عن الموقع ده ويحس انه بكرة
هيبقي مليونير ... ويتصدم بأن الموضوع صعب بعد كدا او يترفض ..

عبارة عن ايه الميرش ده ..
ده ببساطة من خلاله بتعمل تصميمات تشيرتات عن طريق الفوتوشوب مثلا او الاليستراتور
او حتي البيمب
والتصميم ده سهل جدااا ... ي
عني مش عاوز اقولك ان في تيشرتات بيتكتب عليها كلمتين بشوية تفاصيل بسيطة جدا
وبيتباع منها مئات ... ومش محتاجة منك في البداية خبرات في الفوتوشوب
ممكن لو متعلم مع نفسك كدا تقدر تعيش وتتعايش
بس زي ما قلتلك فوق تكون عارف انت مقدم المنتج لمين ..
يعني مثلا بتعامل امريكان .. في مناسبة زي الكريسماس .. بتعمل تصميمات الكريسماس
مثلا مناسبة ليوم البيئة .. تعمل حاجات تخص البيئة ... حاجات تخص مناسباتهم هما
.. مش مناسباتك انت ..
شوف انت بتقدم التصميم لمين ..
واكيد طبعا لو انت مميز في الجرافيك فدي فرصة عمرك أنك تقدم حاجات بلمسة مميزة ...

وبعد ما تعمل التصميم بتنزلها عالموقع ده ..
وعن كل قطعة بتتباع بيكون ليك عمولة .. والعمولة بالدولار طبعا ..
يعني ممكن تسعر القطعة ب 25 دولار ويكون ليك 6 دولار علي كل قطعة تتباع ..
وممكن تنزل كل يوم 4 او خمس تصاميم ... وده سهل ورقم بسيط

بس ايه المميز في الموقع ده عن غيره يخليه مغري جدا لو اتقبلت
فيه مع ان فيه عشرات المواقع المشابهة اللي بتقدم نفس الفكرة ..
زي RED BUBBLE و TEESPRING و SUNFROG و ETTSI

انا دخلت المواقع دي وجربتها بعد ما فشلت طبعا اني اسجل عالميرش .. ب
س ماكنش عندي صبر ليهم

بس و الله في كذا سبب يخلي ميرش باي امازون مغري

1 – زي ما قولنا بسبب ان امكانية البيع اكبر من خلاله بسبب نسبة الناس اللي بيدخلوا هناك اللي بتتجاوز الملايين يوميا .. الموقع مزدحم سواء زوار او ناس بتشتري فعليا ..
انت عندك قاعدة طويلة عريضة في امريكا واوروبا ...

2 – وده الاهم طبعا أن موقع امازون بيوفرلك كل حاجة ... انت مجرد شخص بتحط تصميم لتيشرت ...
وهو بيعرضلك منتجك ويسوقك من خلال انه بيظهر علي محركات البحث الخاصة
بالموقع ولما حد يشتري التصميم ...
هو بيطبعه علي تشيرت وبيرسله ... انت مجرد مصمم .. وبتاخد عمولة وخلاص لما يتباع حاجة ..

وده عكس المواقع اللي فوق دي ...اللي بتعتمد اكتر انك بتنزل لتصميم ولازم تسوقه ...
بمعني أنك لازم يكون علي الأقل ليك صفحة عالفيس بوك فيه متابعين اكتر ...
او عندك قناة عاليوتيوب .. عشان توري الناس التصميم ... الموقع مش مسؤل انه يظهرلك تصميمك علي محركات البحث بتاعته ... بالاضافة اصلا انه اكيد حجم الزحمة علي المواقع دي مايتعداش 5 % من امازون
اللي هو الاشهر والاكبر والأقوي ..

او بتاخد الرابط بتاع تصميماتك في المواقع بتقعد تلف بيها بقا علي صفحات اجنبية ..
وده بامانة مش مجزي بالذات في العالم العربي ...
لان المتسوقين اللي هيروحوا يشتروا قطعة تيشيرت ب 15 او 20 بالدولار اكيد مش من هنا ..

وبالتالي المواقع التانية غير الامازون بتكون مفيدة اكتر للعالم بتوع السوشيال ميديا .. تلاقيه مثلا
عامل ميرش باسمه وتشيرت في اللوج بتاع قناته عاليوتيوب او السوشيال ميديا
وبيسوق من خلالهم عن طريق المتابعين بتوعه اللي بيحبوه ومتأثرين بيه وبالتالي بيشتروا منه ...
سواء عن طريق موقع خاص بيه او لو ماعندوش موقع بيستخدم المواقع اللي فوق دي كوسيط ..
وهو بيسوق ليها والامر بيكون سهل بالنسبة ليه عكس الشخص العادي ..

مع ان المواقع التانية ممكن بتقدملك ميزة زيادة وهي أنها ممكن تحط التصميم بتاعك علي مخدات او استيكرات او ماج او حاجات كتيرة ... بس هتعمل ايه بخيارات كتيرة من غير تسويق ...
وفي نفس الوقت الاقبال عليهم مش زي امازون زي ما قلنا ..

وبالتالي انك تتقبل من خلال شركة امازون في تصميم التشيرتات دي فرصة بتوفر عليك خطوات كتيرة ...
ليه بقا انا بقول صعب ... او ايه اللي يمنع ..

الموقع طبعا موجود من سنين طويلة ... يمكن عدي 10 سنين ...
وبالتالي يعتبر موجود فيه مصممين اصحاب خبرات كتيرة علي مر السنين ...
فعشان تتقبل لازم تقنع الناس بيك ... عن طريق تقديمك لنفسك في النبذة اللي بتقدمها خلال التسجيل عن خبراتك .....
لازم تظهر ليهم أنك فعليا عندك شئ جديد وده الصعب ...وده اللي مش بيقولوا الناس اللي بيعملوا فيديوهات عاليوتيوب ... اللي بيرسمولك احلام وردية ... يقولك مثلا عنوان فيديو كسبت 10000 دولار في
شهر واحد من تصميم تشيرتات ... ويسهلك الامور بس فعليا بيعشمك بزيادة

بمعني انت مش هتقدر تقنعهم بمجرد انك تقولهم انك عندك خبرات في الفوتو شوب
سنين طويلة وكورسات وافلام كتيرة بس ...
لاء لازم عشان تعزز فرصك تعمل مثلا مدونة او موقع فيه مجموعة لتصميماتك وتدرج الرابط بتاعك .... ب
س هي فرصة لو جاتلك هتفرق كتير معاك ..

فيه خطوات للتسجيل طبعا في الموقع
وبعض الخطوات هتحتاج تركيزك ...

ده اسم قناة علي اليوتيوب
عزيز باشا - Aziz Basha

هتدخل عالقناة وتشوف خطوات التسجيل وتتبعها ...
وبرضه هتلاقي خطوات التسجيل بتاع ال FBA AMAZON
هي القناة مفيدة عامة في حوار الانترنت ..
كأساس تبني عليه ... بس ما تبنيش اوهام من الارقام اللي بيقولها هو او غيره لانها حالة بذاتها ..
مش شرط تتكرر ..
وكل شئ المفروض تاخده بواقعية الفرص والوقت اللي احنا فيه ....

وانك تطلع عالحاجات دي هي خطوة أنك تشوف حاجات تانية وانت بتدعبس هتصادفك
المهم تميز بعقلك المهم ... وتقدر تقيم الصح ..

[ahmed 22]

بالليل او بكرة ان شاء الله
هكلم علي مواقع ال freelancing

[ahmed 22]

اقتباس المشاركة الأصلية كتبت بواسطة Totoa top موضوع حلوه وفكره جميل جداً تسلم ايدك ربنا معاك

نورتي الموضوع توتا

[Totoa top]

اقتباس المشاركة الأصلية كتبت بواسطة ahmed 22 نورتي الموضوع توتا

ده نورك
منوره بوجودك
شكرا ليك

[ahmed 22]

upwork.com
freelancer.com
mostaql.com


طبعا مواقع الفري لانسينج كتيرة جدا ..
بس كبداية دول افضل المواقع اللي ممكن تستخدمها
2 اجنبي والتالت عربي بشكل كامل اللي هو موقع مستقل ...

يعني ممكن تبدأ من موقع مستقل وتعرف الاجواء باللغة العربية
وهو موقع مصري علي فكرة ... ابدأ بيه لو حابب ..
عشان تكسر غربتك من المجال لانه جديد
وبعد كدا اتعامل مع التانيين بالانجليزي بتاعهم ....
بس لازم تتعامل مع اكتر من موقع وتسجل فيهم
ولازم تبحث وتتعلم وتاخد فكرة شاملة عن الشئ اللي بتتعامل معاه
وتفهم وبعد كدا تدخل بقلب جامد ..

بس بالنسبة لموقع upwork علي ما اتذكر
فهما برضه بقوا بيقبلوا ويرفضوا ناس ..
علي حسب حاجتهم لمجالك واكتفائهم ...
بس زي ما قلتلك في مواقع كتيرة جدااا والموقعين التانيين ممتازين
وانت لو بحثت هتقدر تلاقي افضل كمان
المهم تكون عاوز او حابب ..

طيب
عبارة عن ايه مواقع الفري لانسينج دي ؟

ببساطة دي مواقع وسيطة ...
من خلالها اي شخص عنده مشروع عاوز ينفذه زي مثلا كتابة مقال
أو عمل تصميم معين من خلال الفوتوشوب أو ترجمة لأي لغة ...
انشاء مواقع .. التعامل مع الشبكات ... عمل قصص قصيرة
مجالات لا حصر لها .. كتيرة جدا
يعني احيانا في ناس بتطلب حد يعملها داون لود لقائمة اغاني ...
عشان ماعندهاش وقت ... او مثلا بحث دراسي ... او حل مسائل رياضية ..

المهم الشخص اللي بيدرج مشروعه ده كأن زي المنتدي هنا كدا
بيقول مين يقدر ينفذ المشروع ده
وبيعمل بادجت او ميزانية حسب حجم المشروع
والناس اللي هما مسجلين في المواقع دي كفري لانسرز
بيرموا بياضهم ...
بمعني أن كل واحد بيقول انا عندي امكانياتي 1 2 3
واقدر انفذلك المشروع ده في اقل وقت ممكن مثلا وبكفاءة
وعندي مثلا مؤهلات دراسية كذا وعامل ماجستير في كذا ....
ولو انت مثلا عندك اعمال سابقة
بتعرضها للرجل وبتقول انا عملت حاجة مشابهة زي دي وممكن تشوفها
يعني بتعرض امكانياتك وبتحاول تقنع بيها العميل...
والعميل صاحب المشروع بيختار الأفضل .. وبيوظفه للمشروع
يعني ممكن يوم او اتنين .. واحيانا فيه مشاريع بتكون مع اصحاب مشاريع
لمدة شهر .....
وبتاخد علي اقل مشروع اللي هي ممكن تكون ترجمة او كتابة مقال كام صفحة
وبياخدوا حوالي ساعة ولا اتنين من وقتك حوالي 25 او 30 دولار ...
وفيه مشاريع تانية ممكن توصل ما بين 250 و300 دولار ...

في البداية طبعا مش بيكون همك الفلوس بقدر ما همك انك تكون سمعة ليك
ما بين الناس اصحاب المشاريع وبمعاملة محترمة والتزام بمواعيدك وتنفيذ مشروعك بدقة

وفي ناس علي فكرة بيحبوا يوظفوا جدا المستجدين في الموقع ..
يعني لو اقتنعوا بمؤهلاتهم اللي كاتبينها وطريقتهم في تقديم عرضهم ..
واحيانا اصلا بتكون المشاريع هايفة جدا ... فبيقولوا نجيب ناس جداد
عشان يكون عروض الفلوس أقل ... وانت بتقبل عشان تكسب ارضية ..
فما تيأسش من المنافسة اللي هتكون في البداية

ولازم تلابط في الاول وتخليك مثابر وماتزهقش بسرعة لحد ماتدخل اللعبة
لأنك هتكون في منافسة المفروض تكون فاهم انها مش سهلة في البداية ...

بس لو قدرت تطور من نفسك وتزود من قدراتك ...
وليكن مثلا انت حاليا مميز في الترجمة بنسبة 50 المية
يبقي لازم تعرف أنك مطلوب منك انك تطور من الترجمة ... مش هتترجم من جوجل يعني
لأن بيستلزم منك ترجمة احترافية ... واللي بيعين فاهم بيكلم منك ..

ولازم تكون ملم بحاجات رفيعة كدا سهل تتعلمها زي _ seo _ الخاصة بمحركات البحث
عشان لو مثلا انطلب منك مقالات للنشر في منتديات بقواعد السيو
تكون فاهم .... دي مهمتها ايه ولأي سبب صاحب المشروع بيطلبها ...

أنت أولا واخيرا بتوظف مهاراتك في المكان المناسب
وانت سجل في ال 3 مواقع وكتر من فرصك طول الوقت ...
وقدم علي كل وظيفة من دول تلاقيها
تناسب امكانياتك ... لأنك اكيد هتلاقي ...
وماتقدمش لمشروع وانت مش واثق أنك مش قده
لأنك بتاخد تقييم من كل صاحب مشروع بتتعامل معاه لو كنت سئ او خلفت
ولو تقييماتك سيئة ... هيكون اختيارك اصعب مستقبلا ...
وافتكر دايما أنك بتكون سمعة ليك ..

ولازم بتكتب نبذة عنك قوية في الملف الشخصي بتاعك
زي المنتدي هنا كدا ...
انا مثلا بدخل صفحتك الشخصية بعرف انا بكلم مين او بتعامل مع مين
او بتعرف تكتب شعر او مقالات او مميز في ايه ..

هو كذلك برضه لو اقتنع بتقديمك للوظيفة ...
بيدخل يشوف تقييماتك السابقة ... وبيدخل يشوف معرض اعمالك
اللي انت مثلا بتنزلها في الملف الشخصي
يعني فرصا انت متخصص في الفوتو شوب
بتقوم حاطط كام تصميم ليك مميز ... في ملفك الشخصي
ويكون المعرض الخاص بيك ... لأنك لسا مبتدأ ومحتاج تعرف عن نفسك ...

الفري لانسينج ده مجال محترم جدا ...
لو قدرت تحفر لنفسك فيه مكان ... وسهل علي فكرة مع الصبر والمثابرة
والاجتهاد ... أنك توصل فيه بسرعة ويكون ليك دخل من خلاله كمان
افضل من اي وظيفة ممكن تتخيلها ...
فأنت هتتعامل بالدولار في مواقع الفري لانسينج
يعني لو فرضا عملت 10 مشاريع في الشهر من اللي هما صغيرين دول
في 50 دولار .... يعني حوالي 500 دولار بحوالي 8000 مصري
ودول اقل الطموح علي فكرة ... وممكن تعملهم في وقت فراغك كعمل جزئي بجانب شغلك
يعني فيه امكانية اعلي من كدا بالاستمرارية بمرااااحل
المهم تكون كارير ليك هناك الاول ... وتفهم انت فين .. وليه ..
وبالتالي تعبك في المجال ده لو انت مقتنع بيه وحابه مش هيروح هدر
لأنه في ايدك كل شئ ...
فيه منهم طبعا نسبة للموقع اللي بتشتغل من خلاله
بتكون متحدد سلفا بس مش كبيرة يعني..
وده طبيعي...

اما بقا بالنسبة للتسجيل في المواقع فهو سهل
وممكن تطبق الخطوات بشكل مباشر عن طريق اليوتيوب
لو حاجة قابلتك ...
هو بس دايما اللي غالبا بيشغلنا كمصريين هو ازاي هيحولوا لينا الفلوس
هتعمل بس حساب عال paypal وهتربطه بالمواقع دي وهما هيبعتوا عليه
وهما غالبا بيدعموا الباي بال ..
وانت من ال paypal بتبعت علي حسابك الشخصي ...

فما تقلقش مافيش نصب في مجال الفري لانسينج ...
كلها مواقع موثوقة وجدا زي امازون كدا ..

[ahmed 22]

فيه بقا حاجة مش عارف اكلم عنها ولا لاء ... بس هقول باختصار يعني
وهو التداول في الفوركس والاسهم والحاجات دي ...

فيه نوعين من المواقع ..
النوع الأول : مش هقول اسماء لمواقع خاصة بيه

وهو التداول في الخيارات الثنائية وده من الاخر حرام
ومالناش دعوة بيه ....
... عامل زي القمار كدا ...
بتعمل صفقات علي سهم معين ما ممكن الصفقة دي
تكون في دقيقة وممكن تكون في يوم
وتقول السهم هيطلع فوق ولا هينزل تحت ..
يعني كل اللي بتعمله أنك بتتعامل مع مؤشرات
بتحاول من خلالها أنك تتنبأ بحركة السهم ...
ودي ماتقدرش تحكمها بدراسة .. ووفيها حرمانية ...
صحيح سهل تكسب منها فلوس لو اجدت اللعبة
بس برضه سهل تخسر كل فلوسك لو انت مش فاهم
بس اولا واخيرا معظم الشيوخ بيقولوا حرام ...

بس هو خيار موجود وليه مواقع متوثقة والربح فيها حقيقي ...
والخسارة برضه حقيقية اكيد .. وكتير .

اما النوع التاني اللي هو التداول المبني علي الدراسة من خلال المواقع
في موقع اسمه etoro ... يعني ممكن اللي بيتبابع كوره
هيلاقي مثلا في اللوحات الاعلانية دي اللي حوالين الملعب
في اوروبا بيظهر الاسم ده كراعي للماتشات وكدا في دور ابطال اوروبا ...

يعني مصدر ثقة ..
المهم انت بتسجل في الموقع ده من الموبايل حتي
وبيطلبوا منك صورة بطاقتك وصورة من كشف حساب بنكي ..
وبتنتظر بتاع 3 ايام عشان يتأكدوا من معلوماتك
ولو بياناتك صح بيقبلوك ...

المهم ايه المميز في الموقع ده ..
طبعا هو موقع تقدر من خلاله أنك تعمل نسخ
لتعاملات متداولين في البورصة عندهم خبرة
وانت بتختار منهم من البيانات اللي بتتقدم عن طريق الموقع
في ملفاتهم الشخصية ... وبتشوف تقييماتهم ونسبة المجازفة اللي بيقوموا بيها
وبتقيم ..
وبتقوم عامل نسخ لو انت مبتدأ في المجال لتداولات عميل ما
وبالتالي الصفقات اللي بيقوم بيها في الفوركس وغيره
بتدخل فيها مياشرة ... ومكاسبه مكاسبك
وبرضه خسايره خسايرك اكيد
بس الفكرة أنك بتختار ناس تعاملاتهم امنة وليهم خبرة عنك في المجال
ودي ميزة للموقع ..

المواقع اللي زي بتقدم ليك برضه خدمة حلوة تانية
وهو أنك قبل ما تحط فلوس في حسابك الخاص بالموقع
عشان تتداول بيها ...
فيها بيكون حساب اقتراضي بفلوس وهمية طبعا
تقدر من خلاله تتعامل وتدخل في صفقات وتعرف السوق
وتتعلم وتقرأ طبعا نشرات البورصة وتجرب ...وكدا ...
وده شئ انا شايفه محترم يعني ...
وتقدر من خلال الحساب الافتراضي تعرف
انت مؤهل لحاجة زي دي ولا لاء ...

المهم تكون امين مع نفسك عشان ماتعرضش نفسك للاذي
اقل فلوس ممكن تدفعها هو 200 دولار ...
اقل من كدا ما تقدرش تتداول ... او تبعت فلوس لحسابك ...

ودي حاجة مش هكلم فيها كتير
لأن مش الكل مهتم بالبورصة يعني ...
بس اللي مهتم اهي نبذة ممكن توجهك للطريق ...