اغلي برجر في العالم (بقيمة 1500 دولار )

[ahmed 22]

ده اكبر عنوان في التاريخ

المهم
اندي جورج .. شاب امريكي .. تقريبا كان قاعد فاضي ..
قالك انا عاوز اعمل ساندوتش برجر فراخ من الصفر كتجربة ..
المهم صاحبنا حب يعمل التجربة من الطبيعة والي معدته ...
يعني باختصار زرع القمع وحصده وخد طيارة لولاية تانية عشان يطلع من المحيط
الملح وهو راجع اتمسك بيه في المطار وكان هيتسجن ...
المهم انه ربي الفراخ ودبحها
وحلب البقره وطلع منها لبن عمل منه جبنة وطحين وزرع خضار ..
من الاخر عمل ساندوتش من الصفر في مدة 6 شهور بتكلفة وصلت 1500 دولار..

لحد ما وصل للحظة الحقيقة ...المهم بعد ده كله جيه ياكل الساندوتش ..
وطلع طعمه زبالة ...من غير تشويق .. انت مستني ايه يعني ...

ده يثبتلك ايه ..انه لا تثق في حد اسمه اندي ... عيل تلفان مالوش عازة ..

المهم ازاي نوظف القصة دي في اطارها كدا ...

1 - غالبا واحد ابن حلالها هينقل القصة زي ما هو فوق كدا في بوست وخلاص
فلما حد هيقرأ القصة دي او يسمع الفيديو بتاعها
اول حاجة هتيجي في دماغه هي التريقة
وهتلاقي الموضوع غالبا مختصر في تعليقين علي اندي

شكرا ... روح لامك ....
او ماتخافش من الهبلة .. خاف من خلفتها ...
وده منطقي

2 - و في العالم الموازي بتاع الفلاسفة والمثقفين والمؤثرين العرب ...
ممكن نعمل قصة فيها تشويق بين قصة اندي وواحد مثلا عمل سلسلة مطاعم عالمية وبدأ من الصفر
عشان الناس تاخد العبرة وان فيه طرق اسهل عشان تعمل حاجة طعمها لذيذ وناجحة في نفس الوقت..
وازاي نقدر نستخدم خوارزمية او استراتيجية ابسط وبطرق اقصر ونعمل قصة ملهمة ..
تخلي الشباب ينبهر.. بين حمورية اندي اللي ضيع وقته وفلوسه وبين عبقرية واحد تاني قدر ينجح ..

في الحقيقة هو ده فعليا اللي حصل اخر 3 سنين بعد ما القصة دي اتشهرت في الاوساط العربية ...
يعني القصة بتاع اندي دي عالرغم من انها تقريبا من 2017
بس هتلاقي بعض الناس لحد يمكن شهرين
فاتوا بينزلوا عنها فيديوهات او بوستات وبعناوين تشدك عشان غرابتها ..
زي العنوان بتاع الموضوع كدا ..

بس الحقيقة اصلا انه اندي هو شاب يوتيوبر اساسا بيعمل محتوي فيديوهات واسم قناته ...
how to make every thing
وده كان مجرد محتوي بيجربه كدا عادي
ونزله في فيديو من ضمن فيديوهات بينزلها كفكرة قناته يعني ..
هو بيعمل حاجات شبه دي طول الوقت
ودي الحاجة الوحيدة اللي عمرك ما هتسمعها في الروايتين ..
لاني الوحيد تقريبا اللي كتب اندي جورج علي جوجل عشان افهم اصل القصة ...

بس فعليا انت لما عرفت حقيقة الموضوع مثلا وان اندي مش حمار
.. فده مثل ايه جديد بالنسبة ليك ؟

يعني لو واحد جيه قالك ان في واحد يوتيوبر عامل تجربة مقصودة انه يعمل برجر من الصفر وكدا ...
ايه هيجذبك للموضوع ؟
اعتقد هيمر عليك عادي

انما فعليا هيجذبك وهيلائم ثقافتك انه واحد نقل عن واحد انه في موضوع بيتكلم عن كذا فعمل توجيه ليه للشكل اللي انت حابب تشوفه عشان ينتفع بيه كمشاهدات فيكسب من وراه لما تزوره انت وغيرك ...بعنوان لفيديو مكتوب عليه ( اغلي برجر في العالم بقيمة 1500 دولار ) بمحتوي كما ذكرنا غير معروض فيه الجانب الغير مثير من القصة ..

لأنك اول حاجة هتدخل تشوف ايه ال 1500 دولار اللي يتعمل بيهم برجر دول .. مين الاهبل اللي هيعمله ومين الاهبل اللي هيأكله ...

ده الماركينتج بتاع التريند

فكرة الركوب عالحدث او الخبر هي اكبر هواية بيتم ممارستها عامة في الوقت الحالي ..
بمعني ادق ( التوجيه )..
مش شرط التحقق من صدق الرواية او الخبر .. مش شرط مين بيقول الخبر ..
مش شرط حتي مين ممكن يتضرر من انتشاره.. مش شرط حتي مين يؤيد ومين يعارض
...
الشرط الوحيد اللي لازم يتحقق هو رد الفعل اللي لازم يتوجد عالخبر
لما نقدر ننقله بالشكل اللي احنا حابين ننقله بيه بعد ما ياخد مجموعة مراحل من الفلترة
بين اكتر من جهة ومصدر تغير من ملامحه بشكل يلائم انتشاره لصالح قلة منتفعة
في ايدها التأثير وقادرة توجهه حسب اوجه المصلحة الخاصة بيها ...
سواء اقتصاديا او اجتماعيا او سياسيا ..

يعني مش كل جهة هتسمع الخبر ويمر بيها هتستغله ..
الجهة الوحيدة المنوطة لاستغلاله بعد التغيير في ملامحه
وبقا فيه اشكالية جهل مركب مقصود عشان تستحوذ عالتأثير بتاعه ...
هي الجهة المنتفعة منه
وفقط والشريحة اللي بتصدقه وبتؤمن بيه وبترفع اسهمه ( الشريحة دي هي اللي بتحكم )
سواء جزء منها حقيقي او جزء منها ( جيوش الكترونية )
لانه سهل انك تتحكم بشريحة فيها كام ميت الف ..
لأن دول الرأي العام اللي لازم تصنعه عشان يكون خلفية او برواز...
دول اللي بيستند عليهم الإعلام عشان يملك تغطية لارائه في كتير من الدول ....
اي تريند من نوع تاني مش هيتسمع صوته..
ده لأنه لا يملك حق الانتفاع ... ده يملك حق التهميد فقط ..
يعني مجرد (فك غيظك انت في غيطك )

التريند حاليا هو لغة الحكومات في السيطرة عالاحداث في بعض الاماكن ..
ولغة الشركات في الترويج لمنتجاتها او الاساءة لمنافسيها ..
وفي اماكن اخري هي لغة العالم في توجيه الشعوب لبعض اشكال قضاياهم التي تستحق النظر ...

العالم يحكمه التريند ..
ولكن من يحكم التريند ؟

[دمعه حائره]

انا كل يوم الصبح افتح اشوف ايه التريند النهارده
هو فعلا التريند بيقدر يغير كتير وليه قوه مؤثره سواء علي الحكومات
او في اتخاذ قرارت او العكس الرجوع عنها
لكن زي ماقولت فيه جيوش الكترونيه بتحرك مجموعه وتأثر فيها
وفيه اكونتات فيك كتير بتظهر بس تحرك التريند
كتير بشوف تريند موجه عشان يخلي الناس تدعم حاجه معينه
انت بنفسك تقدر تعرف مين متحكم ومين ليه هدف او مصلحه من طريقه الكلام
السويشال ميديا بقت هي المحرك والمؤثر القوي علي الشعوب والحكومات

تسلم علي الموضوع

[Daila]

مقال مميز مشكور