تحالف عدواني

[جنون قلب]

تحالف عدواني

ف المفتتح .. احنا كبرنا والقهوه خدت مننا عمرنا
واتسرقنا
اتسرق مننا الضحكه اللي من قلب صافي
اتسرق حبنا الدافي
وصبحتي بارده .. غزاله شارده
وصبحت انا قلب جافي

بعد التحيه والسلام .. جاي استأذنك وابيعلك حبه كلام
من القلب لللقلب رسول .
ما هو مش من المعقول نتفارق بدون سابق انذار
انا ساعتها كنت جاهل
وانتي دخلتي حياتي وعارفه اني عمري ما كنت نذار
دا انا حته عيل طايش .. عايش حياته عشان عايش
ورامي ورا ضهره من الحب مخلَّفات
وقلبي مع الدنيا ياما ارتكب مخالفات
واتسحبت مني عينات الدم
يوصل عروقهم يقولوا رجعوه دا ميت من كتر الهم
يشاوروا بصوابعهم مستغربين
ويقولوا دا مات
قال يعني مش عارفين

جيتلك وانا تايه وشايل ذكري من امبارح
كنت مجروح بقدره قادر بقيت جارح
انا طمعان نكون سوا
طمعان في قصه مفيهاش مدبوح ودابح
انا مسامح في كل اللي فات
وانتي ضحيه في كل الذكريات
قلب بعد اما مات راجع وينبض ليكي حياه
يا ست البنات .. بحلفك بالله
تكوني ليا دنيا ..


ضعفت من تاني
بعترف انا كنت اناني زي ما كنتي قايله
بعترف اني كنت غبي عشان سندت عليكي
مخدتش بالي انك كنتي مايله
ولا خدت بالي وانتي بتهربي مني
وغصب عني كنت احنلك تاني
منا بعيد عنك ببقي وحيد
وقصه انسان اصبح تعيس في قربك كان سعيد
حتي لو سعاده عن طريق الكذب
كنت فاكر اني حر طول ماانا برفرف بره السرب
اكتشفت اننا كنا في حرب واحنا اعداء بس متحالفين
وحالفين نكمل طريقنا سوا
لا اانا طايق قربي منك ولا انتي طايقاني
نبتسم .. وكل واحد مننا من جواه بيعاني
وعارفه اني بايعك وعارف انك كمان بايعاني
بس فيه بينا تحالف
وفي بينا عقد
لا عمرنا هنبقي لبعض
بس مينفعش يكون في بينا بعد
ومتنسيش انك حالفه .. زي ما انا كمان حالف

اقسمت علي الجراح
اللي كنتي سبب فيها .. اني عمري ما حبيتك
ولا دخل حبك في قلبي ولا سكن ثانيه
انتي كنتي مجرد دنيا
وانا كنت زاهد فيها .. حاربت عشانك وطن
وخسرت كل المعارك
بكيت بحرقه م الخساره .. بس اكتشفت خسارتك
هي الحاجه الوحيده اللي نجتني من المهالك

[دمعه حائره]

مشاعر متضاربه بس المعاناه فيها غالبه
اوقات كتير الظروف بتوجهنا لاختيارات منقدرش عليها
بس كان لازم ناخد اتجاه واحد
جميله الكلمات تسلم يااسلام ويدوم وجودك

[gold rose]

حاولت أجمع حروفي وألاقي رد يليق بالروعه الي انت كاتبها دي , حقيقي تسلم أيدك

[عاشق ولهان]

ايه الجمال والإبداع الرائع ده

فلسفه جميله وقلم قوي

خليط من العشق والعتاب

يتشكل ويبدع كما يريد صاحبه

كل الشكر والتقدير لك يا صديقي

تقيمي ونجومي وتحياتي

[فداااااااااااء]

كلمات قلب متألم وعتاب بين السطور قاسي
حزينة سطورك اخي جنون ولكن ابدعت فى تعبيرك
رغم ان المشاعر متضاربة في الكلمات لكن دا طبيعي في مثل هذه الحالة
سلمت اخى ودام نبضك الراقي

[(طائر الشرق)]

كلماتك تُشبه رقصة الجريح قدم تترك أثر


وقدم تقطر دمآ من سهم سكن القلب


أتى من حيث لا تتوقع


دمت بسعاده أخى الحبيب

[واد حبيب]

ابداع جميل وراقي منك كعاده
دايما حروفك ليها ابداع خاص
تقبل مروري البسيط هنا
تم التثبيت لجمال الكلمات

[جنون قلب]

دمعه حائره
هي مجرد ثرثره من الماضي
وجرح قديم بيحاول يتفتح
بس الكلمات كانت اقوي منه
شكرا لوجودك بجد

[جنون قلب]

Gold rose

يكفي تواجدك وحضورك
سعيد جدا بكلامك
وشكرا ليكي عل مرورك الجميل
ك جمال روحك

[جنون قلب]

عاشق ولهان

لا عمره ما كان عشق
دي حاله خوف فقط لا غير
شكرا ليك اخوي
سعيد جدا بتواجدك هنا