الحلقه العاشره من حلقه استضافه ومعانا احد اعضاء الزمن الجميل ( ميشو)

[واد حبيب]

السلام عليكم ورحمه الله وبركاته
الحلقه النهارده حلقه من زمن الابداع الجميل
من زمن العطاء والابداع والاخوه والنشاط الطويل
معانا عضوه كانت من انشط الاعضاء في المنتدي وابداعهم كتابه واخلاق
بفرح لما يشوف ناس كانت مبدعه وكانت نشيطه ودخلت هنا تاني
يمكن اعضاء كتير مش تعرفها ولكن هيعرفوها من كلامها قد اي محترمه وبنت اصوت
معانا في حلقه استضافه النهارده المبدعه المتالقه دايما

ميشو

منتديات بنات مصر - مشاهدة الملف الشخصي: misho

عرفتي المنتدي ازاي وسجلتي علطول ولا لا
عرفته صدفة كان سيرش عن حاجة و ظهرلي وسجلت

ميشو ده اول اسم ولا كنتي مسجله باسم تاني
اه كنت مسجلة بأي إسم وخلاص لأني مكنتش ناوية أكمل بس كملت 😁
ايه اللي شدك انك تكملي وتفضلي كل ده
الروح الي كانت موجودة في المنتدي
من هى ميشو لكى يتعرف عليها الاعضاء الجدد
انا شيماء 😀
مسجله في المنتدي ده بس ولا في منتدي تاني
ولا اي منتدي تاني
اول ما دخلتي المنتدي كان في ترحيب بيكي ولا لا
آه جدا أنا من أول الناس إللي إشتركت في المنتدي كان عددنا يتعد علي الصوابع وقتها

فاكره اول موضوع ليكي في المنتدي
لا 😂

اي اللي يميز المنتدي ده عن اي منتدي اخر
كان بيمبزه الروح الحلوة بيننا وكلنا عارفين بعض
المتتدي كان سلبي ولا ايجابي لميشو
ايجابي جدا
انتي كنتي متميزه في المنتدي اي الاقسام اللي بتحبها هنا
بقلم الأعضاء وصفحات مكشوفة والخواطر

اي الفرق بين المنتدي دلوقتي وزمان
دلوقتي معرفش بصراحة لأني تقريبا الكل جديد او المعظم

انتي كنتي اداره في العصر الذهبي للمنتدي كنتي بتتعملي ازاي مع الاعضاء
ولا أي حاجة كنا أصحاب

طارق كان شديد في الاداره ولا كان بياخد راي الكل
لا كان ديمقراطي والله وكان دايما بيعمل الي شايف إنه الاصح
مين العضو اللي كان بيعمل مشاكل دايما
مش فاكرة والله بس مكنش في مشاكل تذكر الا من الأعضاء الجديدة
اي الفرق بين طارق وضياء في الاداره
الاسلوب لس و طريقة التعامل بس آلأتنين محترمين جدا

اي المشكله الاداريه اللي قبل ميشو اثناء الاداره
مفتكرش ان كان فيه مشاكل خالص

لو قولتلك امسكي الاداره تاني تقولي اي
حاليا لا
اي الفرق بين الاداره دلوقتي وبين زمان
معرفش الإدارة دلوقتي مين هههههه
هل في توصل بينك وبين اي حد في المنتدي
اه آية و نودي و منة و حنون

مين كلمك علشان ترجعي المنتدي
ولا اي حد انا فجأة حسيت اني عايزة ادخل المنتدي استعيد
ذكرياتي كلمت منة عشان تكلم هيثم يظبط لي الباسورد ودخلت
اي سبب غيابك الفتره الكبيره دي كلها
كنت بستقر وبعمل اسرة وبشتغل ههههه

عملتي اسره الحمد لله شغاله في دلوقتي
انا عندي شوو رووم بعرض فيه حاجات كتير تخص المنزل
والبيت و الديكور
ووكيلة ل براند ريحانة منتجات طبيعية للبشرة والشعر
و كمان سيلر لماركة تابروير
اكتر شخص المنتدي مفتقدو في الوقت الحالي مين
كل الناس إللي كانوا موجودين

مين من الاعضاء اللي نفسك يرجعو المنتدي تاني
نفسي كلهم يرجعوا ويرجع المنتدي تاني زي الأول بس صعب

لو قولتلك قولي اقتراح نرجع الاعضاء اللي غايبه تقولي اي
حاسة انه صعب المنتدي يرجع زي زمان كل واحد انشغل ب حياته
مين كان صحاب ميشو اوي في المنتدي
آية و نودي و سما و محمد لطفي ومحمد قاسم و محمد خطاب

مين من الاعضاء اللي كنتي بتابعي موضعهم باستمرار
اي حد كان بيكتب في قلم الأعضاء كنت بحب أقرأ في القسم دة

ميشو هتستمر معانا ولا هتغيب تاني
والله مش عارفة بس انا حاليا مستغربة المنتدي

اقولك اسماء وتقولي رايك فيهم
طارق عبقري
ضياء دماغه حلوة
حنون جميلة
قلم بلا حبر مثقف
متركس مجنون ههه بس كان طيب جدا
رحيق الجنه حبيبتي الهادية صاحبة القلم المميز
سكره سكر المنتدي
ليه مش بتشركي دلوقتي
حاسة ب غربة شوية لسة
عوزين منك موضوع لقسم الشعر والخواطر
هحاول 🙈
كده خلصنا من المنتدي
عوزين نتعرف علي ميشو في بعض السطور اسمك وبلدك ودرستك
شيماء ربيع
القاهرة
ليسانس ألسن إيطالي

ماهى نظرتها للحياة الان
متفائلة جدا و عايزة ابقي آحسن إن شاء الله

ماهى هوايتك المفضلة ومازلتى بتمارسيها ولا لا
الكتابة ولا مش بمارسها ظهرت هوايات أخري 😂

ميشو حققك احلامها في الحياه ولا لسه
عمري ما هبطل احلم واحقق أحلامي إن شاء الله

اي اكتر حلم بتحلمي بيه ونفسك يتحقق
شغلي يكبر و يبقي مكان كبير و أسافر إيطاليا ❤
لو رحتي ايطاليا هتعملي اي
هزور حتة حتة فيها وأجرب كل حاجة واعيش في فينيسيا
ماذا تفتقدين فى حياتك
الهدوء هههه

ما هى الصفه التى لا تستطيعى تغيرها فى نفسك
العصبية
ما هى اكبر خطا ندمتي عليه طول حياتك
إني اتعرفت علي ناس ندمت علي معرفتهم
ندمتي علي حد عرفتيه من المنتدي
مش لدرجة ندم
شيماء مسامحه ولا قلبها جامد
أحيانا بسامح واحيانا لا و بقوة حسب الموقف
اي الشي المميز في ميشو غير باقي الناس
إني واخدة الحياة ببساطة ومش بكلكع الامور
لو وجهتك مشكله في حياتك هتوجهها ازاي
بالدعاء والمواجهة

ميشو طباخه ماهره ولا ملهاش في المطبخ
ماهرة جدا
اي اكتر اكله بتحبي تعمليها دايما
المكرونات بكل أنواعها والسمك بكل انواعه وحاجات تانية كتير
ميشو رومانسيه ولا اجتماعيه اكتر
رومانسية و إجتماعية نص نص

جوازك كان عن حب ولا جواز تقليدي
بدأ تقليدي وبقيت مقدرش استغني عنه
اكتر صفه بتحبيها في جوزك
إنه ب يسمعني وبيراضيني
اللي بتزعلك منه
مش بزعل منه بجد لأني عارفة انه أكيد مش قاصد يزعلنى
شيماء كونت اسره من كام فرد
احنا أربعة انا وجوزي
و چيدا 5 سنين
و حمزة 6 شهور
اي الفرق بين جواز الحب والجواز التقليدي
ولا حاجة المهم تختار صح

ميشو اي اكتر دوله نفسك تروحيه
ايطاااالياااا❤
وجهي كلمه لمنتدي واعضاء المنتدي
اتمني المنتدي يرجع زي الأول ❤
ا

[فداااااااااااء]

حلقة جميلة جدا
وضيفة روحها حلوة
نتمنى أن تتواجد دوما
انا فاكرة اسمها بس مكنتش اعرفها الحقيقة
بس لما تسافر إيطاليا تاخدني معاها لأني بحبها هههه
تسلم اخى محمد

[شروق محمود]

اهلا بيكى شيماء منوره الاستضافه
ونتمنى ترجعى المنتدى تانى
الاجابات عجبتنى جدا
تسلم ع اختيارك الجميل
ويدوم التميز

[big bốss]

ميشو ياااااه فكرتينا بالذى مضى و الناس الجميله

ميشو من الشخصيات المحترمه و الذوق ربنا يبارك لها فى اسرتها

و ياريت ترجع تشارك معانا

شكرا يا محمد على الاستضافه

[دمعه حائره]

ميشو حبيبتي منوره المنتدي من تاني وفرحت جدا بعودتك
انا فاكره زمان لما كنتي اداره كنتي هاديه وبتحلي الامور ببساطه
وتعاملك مع الجميع كان زوق وراقي
ده غير قلمك المبدع ياريت تكتبي تاني
وتفضلي معانا وربنا يحفظلك عيلتك يارب وتفرحي باولادك
شكرا محمد علي الاستضافة

[.Lamar]

اهلا بيكى يا شيماء
منورة من تانى
للاسف مكنتش موجودة وقت ما كنتى موجودة
بس مبسوطة انى اتعرفت عليكى من اجاباتك
ان شاء الله ترجعى تشاركى معانا من تانى
بس كنت حابة اسالك
انتى خريجة السن ايطالى
ليه محبتيش تشتغلى فى مجال دراستك

ربنا يبارك لك فى بيتك واولادك
شكرا ابو اياد على الاستضافة المميزة

[ايمان طلعت]

شوفت اسم ميشو بيدخل من قريب ومعرفش دة ولد ولا بنت
اهلا شيماء نورتي مكانك تاني
معظم الاسماء اللي وردت في الاستضافه معرفهاش
ربنا يخليلك عائلتك وتحققي كل احلامك
وابقي ابعتيلي مكرونه وبيتزا من ايطاليا 😁
مشكور محمد على الحلقة الراقية

[حازم34]

استضافه جميله واسأل الله ان يسعدها ويحقق لها كل الأماني وتكون موجوده دايما معانا بإذن الله ومشكور اخي محمد علي المجهود الراقي والاستضافه الجميله

[سيناا]

شيماء نورتى المنتدى تاني وتتالت ورابع

قل للزمان إرحع يازمان

شاركينا ياصديقتي وشوفي كيف زمننا آحلى من زمان الجميل هههه

نورتى الإستضافة مع محمد

يعطيكم العافية ياحلوين