~ فضفض وحل مشاكلك مع بنات مصر~part1 ~

[حـيـــــآة ❤]

مساء الخير

كنت نزلت توبيك فيه لينك صراحه عشان تفضفضوا فيه براحتكم بدون معرفة الهويه.. و سوري عالتأخير



دي رساله شدتني الصراحه 😂
يعني امته نموت دي مش بإيدنا ولا بعلمنا ثم معتقدش حد فينا مؤهل او جاهز ان هو يموت فاربنا يحسن ختامنا جميعاً ❤️ ويتوفانا على حال يحبه 😊



دي بردو مشكله شدتني
هو اغلب الجوازات بيحصل فيها تغير كبير ف المشاعر و دا بسبب الضغوطات طبعا وان الحياه بقت مش زي الاول.
مش هعملك فيها رضوى الشربيني بقى بس انا ضد ان الراجل يضرب مراته يعني مهما يحصل المفروض ميوصلش للمرحله دي فا انتي لازم تاخدي موقف بس بالعقل خصوصاً وان في اطفال او عيال عموماً يعني زي انه تتعاملي بوش خشب لحد م ياخد باله انه غلطان وميصحش..
يا إما تقعدي معاه بهدوء وتتكلموا ف كل ال بيدايقك منه.
و ان شاء الله خير، ❤️


دي كانت ردودي نشوف بقى باقي الاعضاء رأيهم اي❤️

لينك المشاكل اهو لو حد حابب يشاركنا💚

https://sarahaa.com/w/12540265

[ahmed 22]

انا حابب ادلو بدلوي معاكم

بالنسبة للسؤال للاول

فاحنا هنموت يابني لما نبطل نعيش

بالنسبة للمشكلة التانية

مافيش حياة بترجع زي الاول ولا سعادة بتتعاش مرتين بنفس الطريقة ..
دي ذكريات لجزء من حياتكم عشتوه في وقت لسا ماكنتوش
شيلتوا اي مسؤلية ولا الحياة عرضتكم لصعاب الحياة بعد الزواج
ولا مسؤلية الصرف علي بيت وعيلة
الحياة بقت مادية بغباوة ودي آفة الزمن ده ..
من الآخر تكوين المادة طغي علي افكار الكل ..
ودي غالبا هي مشكلة معظم البيوت حاليا

والزوج الايام دي فعليا مطحون في البلد دي
وبالتالي اول متنفس بيصب فيه غضبه بيكون علي اقرب الناس اليه
بسبب انه مكبوت .. مش قادر يكلم مديره ..
مش قادر يرجع حياته لوقت فيه كان حر
من حاجات كتير .. وفجأة حس انه بقا ظهره للهوا .. ومش قادر يفرده
فعايش مقوس كدا ما بين صعوبة مسؤلياته اللي مش قادر يوفيها
وخصوصا وهو في مقتبل حياته ...
ومابين ما يجب تقديمه لاسعاد اهل بيته ...
والبال لما بينشغل .. القلب بيفقد دوره ..

هو مش قادر يكون فاشل قدام اولاده ومراته ... بس ده ضريبته مع الوقت
هيودي لنفس النتيجة بدون ما يدرك .. وهو انه يخسر مشاعره تجاهه مراته
وهيستمر الزواج بحجة انه عاوز يحافظ علي بيته وابنه ..

اول خمس سنين في الجواز
هما اخطر خمس سنين لو الطرفين ماتفهموش دورهم في الزمن ده لو استمر الزواج بعدهم...
وبقول استمر .. لان استمرارية شئ بدون تفاهم
وهو اعدام طوووويل الامد ... الحبل تحسه طول الوقت علي رقبة الاتنين
بدون ما يقتل .. وده شعور اعنف من الاعدام اللحظي بمراحل

... اعتقد ان اول طريق الحل اننا نشيل فكرة يا ريتنا نرجع زي زمان
قول للزمان ارجع يا زمان من دماغنا ... السعادة اشكالها كتيرة
محتاجة بس اللي يقدر يتفهم ازاي تتكون ..
لأن المشكلة مش ان المشاعر بتتغير
المشاعر مشكلتها انها مش بتتطور طبقا للمرحلة اللي عايشينها
والحياة اللي اخترنا نتشاركها بصعابها ...

المشاعر لما بتتطور لازم يصاحبها تضحية
لازم يصاحبها ايثار ... بس لازم تبدأ من شخص
ومع الوقت هتتبادل بين الطرفين ..

وبالتالي جزء من مسؤلية الزوجة طالما السائلة هي الزوجة هنا
وبالتالي الكلام موجه لطرف واحد .. طالما الاخر غير موجود
ان مع مراعاة مسؤلياتها الكتيرة تجاه اولادها وبيتها
وده يمكن ظلم الي حد ما ... بس الواقع بيفرضه علينا
انها تتفهم فعليا يعني ايه زواج في الوقت اللي احنا فيه ده ..
وتفهم زوجها فين من واقع المجتمع اللي عايشينه ..
وتتقبل الواقع ده ... بالتالي هتعرف مفاتيح السعادة لبيتهم ..

لو كان الواقع اللي بيؤرق جوزها هو مسؤلياته المالية او واجباته او طموحه يمكن
وده ظني عامة
فالست محتاجة تكون شخصية ... وذكية
شخصية بمعني انها قادرة تسمع مشكلاته جوزها
وتناقشه فيها بدون ما يكون جواها كلمة ( انا مالي ) ( دي مشكلتك انت )
من غير افأفة من الاخر .. ماتتنصلش منه .. لان معظم الزوجات حاليا
عاوزة واحد فايف اوبشنز .. بدون موتور
الزوج محتاج تحفيز يخليه كل يوم الصبح قادر يقوم
مش كلام يسد نفسه مع مشكلات شغله وحياته ..
لو التفاهم اتخلق فهو مش هيجيب فلوس حاليا بس هيجيب سعادة انتي مفتقداها
ولو الحافز اتخلق فالزوج هيقوم بحياته للافضل والزوجة هتكون ملكة علي قلبه في وقت الرخاء ..

[fanaa]

بالنسبة لأول رسالة كلمة الموت تنطبق على كل من هو حي
وأحنا مش أحياء.احنا معشناش عشان نموت اصلا🤐
تاني رسالة اتكلمى معاه وحاولى افهمي ليه بيعمل كده

[*فجر الاسلام*]

هو انتي مواضيعك نصها متاكل ليه نفسي افهم يعني 😒

[ياسمينااا]

بالنسبه للسؤال الأول
مش لازم الروح تخرج من الجسد عشان نموت في ناس ميته وهي عايشه فعلاً لما الشخص دا يكون فاقد الرغبه في الحياة أو فاقد الشغف بأي حاجه في حياته أو مش سعيد وحياته كلها عباره عن كلاكيع وعقد ومشاكل فدا بيكون محطم نفسياً وبالتالي بيكون ميت بس حي هو الوحيد اللي قادر أنه يرجع الحياة لنفسه من جديد لما يشوف الدنيا برؤيه مختلفه لما يحط ليه هدف ويعرف يوصله لما يحب حياته عموما بكل ما فيها سواء وحش أو حلو ما هو اصل الدنيا دي مش بتمشي علي مزاجنا لكن احنا اللي بنحاول نماشيها عشان نعرف نعيش بجد مبقاش ميتين وأحنا عايشين لكن لو قصدك خروج الروح من الجسد فعلاً فدا في علم الغيب وحتي دا بردو حالياً منقدرش نقول إننا جاهزين نقابل ربنا أكيد لسه بنغلط أكيد لسه مقصرين مهما بنعمل في حق ربنا أو أنا دايما عندي الإحساس دا دايما بحس اني لسه في حاجات مقصره فيها
أما بالنسبة للسؤال الثاني
فانتي غلطتي جداً انك موقفتيش لجوزك من أول مره مد ايده عليكي
رغم أنه ممكن يكون انتي السبب أنه يضربك ممكن تكون بتنرفزيه او ممكن يكون في ضغوطات الحياة اللي موجوده عند الكل بس كان لازم من أول مره تقفي تتكلمي معاه تعرفيه انك مش هتسمحي ليه أنه يضربك تاني وإن لو دا حصل مش هتبقي عواقبه كويسه ويعرف إنك قويه ويعمل لكي حساب لكن هنا لازم تدخل الأهل شوفي مين الشخص اللي بيقدر يأثر عليه أو بمعني اصح يحكمه أنه ميضربكيش تاني ولازم تكلميه وتقوليله علي أفعاله معاكي ولو استمر بعد كدا لازم تقولي لأهلك ويتدخلو عشان يقف عند حده ويعرف أن الموضوع مش سهل وإن لكي أهل يقدرو يقفو ليه بس يقفو بالعقل ويكونو عارفين هيعملو ايه عشان متخربيش بيتك وانتي عندك ولاد لازم تحاولي بكل الطرق عشان متوصليش معاه لطريق مسدود وهما اللي في الآخر هيدفعو التمن عشان كدا لازم الحل يكون بعقل
وربنا يهديلك ويصلحلك حالك يارب

[حـيـــــآة ❤]

اقتباس المشاركة الأصلية كتبت بواسطة *فجر الاسلام* هو انتي مواضيعك نصها متاكل ليه نفسي افهم يعني 😒

انا بردو في مواضيع يلاقيها حادفه شمال

[*فجر الاسلام*]

اقتباس المشاركة الأصلية كتبت بواسطة حـيـــــآة ❤ انا بردو في مواضيع يلاقيها حادفه شمال

هو كده فعلا مستغربه اللي بيردو بيردو ازاي انا نص الكلام مش شايفاه

[ساحر الأحزان]

الموت كل شيء بامر الله

نعيش حتي يامر الله امره

اما الزواج والعلاقه بين الزوجين اهم شيء سعه الصدر والتفاهم

بين الزوجين واختيار الوقت للمناسب للتشاور في حل امور الاسره

وصبر كل شريك علي شريكه وعدم التسرع واصطياد الخلافات

حتي تسير الامور بكل تفاهم وحب

بالتوفيق حياه

ويدوم المجهود

[L o o o l y]

كل واحد له عيوب
ولازم الواحده تتعايش مع العيب ده
بمعنى تصبر عليه شوى
الله المستعان والدنيا تتظبط

[Leen Ibrahim]

كل واحد له عيوب
بمعنى تصبر عليه شوى
الله المستعان والدنيا تتظبط