الحب في الله و الخير يبقى الي قيام الساعة

[بحر القمر]

اقسم بالله .. الانسان مننا علي راي سيدنا عُمر مجالوش نعمه بعد الاسلام .. افضل من انه يلاقي صاحب صالح يحبه بضمير ؟! .. او صاحبه تحبها بشهامه وجدعنه !!
الجو حر ولعه .. الشمس طالعه بعزمها وقوتها .. ناس عرقها واصل لحد سُرتها .. و ناس غرقانه في عرقها يوم القيامه !! .. وانت وصاحبك او انتي وصاحبتك واقفين في الضِله تحت عرش ربنا !! .. لا ليكوا دعوه بصهد ولا حر ولا شمس ولا زحمه وخنقه ورُعب ! .. ليه ياعم ؟! اشمعنا احنا ؟! .. لانكم ف الدنيا حبيتوا بعض بضمير ! بس كدا ؟! اه والله .. !!
- سهران بره مع صحابي .. لقيت اختي من شويه بترن وبعتالي رساله وبتقولي رد عليا ضروري .. قولت باااس يبقي في بلوه سوده حصلت يابومه .. خير يا حاجه ؟! قالت .. الله يسعدك يا احمد ديمًا بقول عنك جدع .. قولت اااه يبقي في مصلحه ;😀 مبشوفش الوش الكيوت دا غير وقت المصالح .. قالتي الصراحه كدا .. كنت بتكلم مع صاحبتي فلانه الفلانيه ع التليفون من شويه .. قالتلي انها المفروض كانت معزومه هي واهلها ع العشا بره .. ودلوقت هي مراحتش معاهم وقعدت مع جدتها .. وقالت انها مكلتش حاجه من الصُبح .. ف انا حضرتلها لقمه ونفسي اوديهالها تعالي معايا نروح واعملهالها مفاجئه .. استأذنت اصحابي .. وقولت لاختي اقفي قدام البيت وانا جاي اهو .. المشوار لصاحبتها حوالي ١٠ كيلو .. خدت عربيه وروحت عند البيت لقيتها مستنياني .. .. وصلنا ورنت عليها وقالتها انا قدام بيتك انزلي .. وقفت انا علي اول الشارع .. صاحبتها نزلت لقت اختي واقفه بكيس فيه اكل .. عن كمية الفرحه والاحضان الصادقه اللي حضنوها لبعض انا نفسي دموعي نزلت من جمال الموقف .. وقد ايه البنت اتصدمت وفرحت ان اختي تروحلها الساعه 12 بس علشان بتحبها ومحبتش تنام جعانه !




الصاحبه الجدعه مبتتلقاش كتير .. عُمله نادره .. الواحد من غير صاحب عامل زي اللي واقف ف مكان واسع فتره طويله ومش لاقي حيطه يتسند عليها !! الصاحب والصاحبه حيطه وضهر وسند .. سيدنا عُمر لما كان بينام .. اوقات كتيره كان بيصحي من النوم الساعه ٣ الصُبح .. ويقول ما اصعب الشوق .. اشتقت الي اصحابي !! ويدعي ان الفجر يأذن واول لما يدخل المسجد يقابل صاحبه ويحضنه ويقوله اشتقت اليك !! ويكون لسه شايفه في صلاة العشاء ! بس الصاحب مهما قربتوا واتكلمتوا يستحيل تزهق منه او تمل .. اخ امك مولدتوش .. نفذ وصية النبي واحجزلك مكان تحت عرش الرحمن دلوقت حالاً يالا .. النبي بيقول : اذا احب احدكم احدًا فليخبره ! قول لصاحبك انك بتحبه .. قولي لصاحبتك انك بتحبيها .. الاعتراف بالحُب خيط بينسج ويقوي قُربكم لبعض اكتر .. والنبي قال ( الكلمه الطيبه صدقه ) ومفيش اجمل ولا اطيب من كلمة #بحبك ! ❤️

#الحُب_في_الله ❤️👌