بقولك داخلين علي ايام زي وشك

[ahmed 22]

علي فكرة قبل ما ابدأ
فيه موضوع النهاردة تقريبا الذكري الشهرية بتاع كتابته
كنت منزله في قلم الاعضاء الشهر اللي فات زي اليومين دول كدا
قبل الحرب علي اوكرانيا ..
بس عشان ماحدش بيدخل لسا ماتقبلش .....
فقلت ماكررش نفس الغلطة واكتب هنا في قسم الشعر ....
عشان بس لو فجأة ظهر من العدم في يوم ما ولا حاجة
ماحدش يتفاجأ من عنوانه ...

المهم

في يوم ما كنت كاتب هنا موضوع في بداية 2018 موضوع بعنوان موسم الانتخابات
كانت قبل الانتخابات الرئيسية اللي فاتت..
ايام والله ...
ايام بقا لما الواحد كان متخيل اننا هنغير في الرؤساء زي الشرابات كدا كل كام سنة
بس ماحصلش نصيب .... بيقولك البوم بيولد بوم بوم

بالمناسبة السنة دي كانت المفروض معاد الانتخابات الرئاسية برضه
لو كنا عالنظام القديم .. نظام قدر ولطف
اللي اتحول لنظام ادفعلي شكرا ..

بس يلا خير ... ربنا لطف بينا
كان هيبقي كورونا وحرب وفيلم هندي في سنة واحدة
كتير والله

ويا ريت لو فيه نية انهم يعملوها في معادها كمان سنتين
مايعملوش والله ويوفروا الفلوس
ويتبرعوا بيها للفقرا ....ده لو عشنا لسنتين قدام

المهم ... ال يعني كنت كمواطن بحدد موقفي وكدا وقتها
فكنت بحاول اقيم الوضع الاقتصادي في الفترة الرئاسية اللي قبل 2018
ال يعني كنت هروح انتخب ... فراغ بعيد عنكم

وكنت كاتب موضوع اطول مني كدا كالعادة لمن يحب ان يتطلع عليه
وال يعني حد ليه دماغ يقرأ ده ... عشان يروح يقرأ التاني ...
الموضوع ده هيكون كله قافية كدا ... سواد بعيد عنك
وكنت متشائم من الوضع الاقتصادي اللي رايحة ليه البلد
هو تقريبا بيعكس الوضع الموجود حاليا ...
وان بقولك كدا عشان اثبتلك اني شخص فشيخ وبفهم
وده واقع .. لأني فعلا بفهم في التشائم جدا ...
اموت انا فيه لما احب اعيشه ...

نرجع بقا للتفاؤل المفرط
وده اللي كانت مبنية عليه السياسة الاقتصادية لبلدنا

العالم اللي ماسكين البلد من 2014 كان عندهم توجه حميد للبناء
وكان فيه علاقة حميمة بين الدولة وبين الطوب والاسمنت
وانا ماقدرش اقولك انها غلط ولا صح ...

بص نقطتين اثبتولي ان احنا عايشين في مية البطيخ
علي مدار السنين دي ....

الأولي / لما القائم عالبلد في خطاب ما من كام سنة ما وسمعتها بوداني
فيما معناه يعني ان احنا مش بنعمل دراسة جدوي لمشاريعنا
والا ماكناش هنعملها

الثانية / وهي روحية شوية وان البركة زالت لما فيه ناس عينوا انفسهم وصاة علينا
لما قرروا انهم يزودود الفترات الرئاسية لمن يحكم بدون ادني وجه حق ..

يعني لما نكون متفقين علي 8 سنين وفجأة يبقوا 16 سنة
فدي قلة زوق والله ....
وده اسمه .... تعدي علي المستقبل ..
ده اسمه سلب حقوق .. اغتصاب ارادة
اغتصاب امة بأكملها في وقت هم فيه مجبرين علي الصمت بحكم الكثير من الامور
لا داعي للبت فيها ....
ومن الواضح ان البعض قد استمتع بهذا الاغتصاب
في الميديا والميجلس بتاع الشعب .. وكدا ...
وهما اللي كان بيصبرونا اثناء الاغتصاب ده والله ..

المهم التفاؤل الاقتصادي من الحكومة كان مفرط بشكل هيخلينا ندفع ثمنه حاليا
لانه ماكنش فيه تخطيط فعلي لاحتمالية المخاطر العالمية
وبالتالي التأثير هيكون اضعاف الوضع الطبيعي ..
عارف اللي هيقولك ان الازمة طايلة العالم كله ...
وان انت مش احسن من امريكا واوروبا والعالم دي ..

ايوة وهي دي لب المشكلة
انك ماكنتش فاهم انك مش دولة كبيرة اقتصاديا
وبالتالي كان لازم تخطيطك لاقتصادك يكون مبني علي ده
والحاجة اللي بتعملها في سنة تعملها في 4 بشكل منتظم
وتوجه سياساتك اكتر نحو بناء اساسات واضحة للتصدير
اكتر من البناء لجذب المستثمر ... جذب المستثمرين مهم
بس حابب اقولك ان المستثمر ممكن تجذبه بطريقة سهلة جدا
وهو انك تشيل كل عوائق البيروقراطية اللي بتعيقه في تأسيس مشروعه مش اكتر
وتسهله ضريبيا وتعطيه مزايا تنافسيه مع سوقك ..
لأنك لو بلد مصدر فعليا كنت هتكون اسعد الناس لما الدولار يوصل 40 جنيه حتي
لأن كل ما قيمة عملتك تقل انت تنافس العالم كله في التصدير
انما انت زي ما نت من 100 سنة ...
يعني ممكن تكون زودت تصديرك في شوية فاكهة وخضار
بس انت مازلت بتستورد غالبية المواد الخام والاحتياجات اللي بتقوم عليها
البلد بشكل لحد النهاردة ...
وبالتالي لو الناس هتعاني بره قيراط فاحنا هنعاني هنا 24
صحيح كان لازم الكل يتشارك المعاناة نتيجة كورونا والحرب وكدا
بس ليه احنا طريقنا مش واضح .. ودي مشكلة
لأن احنا فعليا انهكنا الناس بالضرايب والحاجات اللي كل شوية الحكومة بتطلعها
والناس جايبة جاز فعليا ....
وبالتالي لو اللي اتعمل اسمه انجاز فهو لا يوازي قيمة الانتكاس اللي كان نتيجة لهذا الانجاز
انت هديت المواطن اللي هيقوملك البلد واستبدلته بشوية طوب بغباء
اصعب حاجة لما انت يجيلك انتكاسة من شئ انت شايفه انجاز ...
عارف ان فيه كتير اتعمل ... بس احنا رسمنا صورة
احنا مش مؤهلين حتي نميزها ...
ممكن تكون النوايا طيبة .... بس احنا مش هنتقدم بالنوايا
هنتقدم بالعقول اللي قادرة تاخدنا لقدام ...
مش شرط ان حد متخيل ان لازم ياخدنا بايديه للطريق
ان مش محتاج تاخدنا ... انت بس محتاج تشاور او تدل
وتسيب الحياة تاخد دورتها الطبيعية للتقدم ..

وباختصار كدا عشان مازودش كتير في التفاصيل
لأني فعليا والله ماليش نفس اكلم في تفاصيل مع انها كتييييييييييرة جدا
وعاوزة صفحاااااااات

عاوز اقولك ان اللي فات لو كنت شايفه صعب ولا يحتمل فهو حمادة
واللي جاي حمادة تاني خالص

الاسعار قبل الحرب بتاع روسيا واوكرانيا وبسبب الكورونا
وازمة سلاسل الامداد فقط اللي نابعة من كورونا
زادت من 50 الي 70 المية خلال الشهور اللي فاتت
وكان لسا فيه زيادات تانية في الطريق لحد شهر 6 الجاي ...

يعني لو فرضا كنت بتجيب الحاجة ب 10 جنيه كنت هتجيبها ب 17 ثم 20
حاليا مع حوار الحرب ده وتحرير الدولار بشكل كامل مع الوقت ..
وده تقريبا الاجراء اللي الحكومة المصرية هتضطر تاخده ومأجلاه من سنتين
وبتحاول تحافظ ان الدولار ما يعديش 16 جنيه ....
بس فعليا الدولار بيساوي 28 او 30 جنيه
الزيادات في الاسعار ممكن توصل ما بين 150 الي 200 المية
بسبب حوارات في وقف التصدير من جانب بلد زي روسيا وارتفاع اسعار الغاز والنفط
وتبعات تانية كتيرررر ...
وده مع جانب حاجات كتيرة جدا وسداد ديون علي الدولة المصرية ....
احنا ملتزمين باقساطها ...
وعلي فكرة هنضطر نوقف العمل بالكثير من المشاريع العقارية والبناء بسبب الغلاء ده

انا عاوز اقولك بكل المعطيات الموجودة حاليا
ان احنا داخلين علي ايام ادعوا ربنا بحق الشهر الكريم اللي جاي
انها تعدي علي خير ..

[دمعه حائره]

ربنا يعديها علي خير وفعلا الحال بقي صعب
ولازم الدوله تتجه للمواطن وتحسين مستواه ويلحقوا الفاضل من الجنيه
البناء اهلكنا في حين كنا محتاحين اولويات اكتر منه
واتفق معاك في الغاء الانتخابات خالص
تسلم

[فداااااااااااء]

شوف هو الوضع كارثي فعلا بس تعرف مين السبب مش هقولك اللي ماسكها لا
اللي خلوه يمسكها واللى دعموه واللي نزلوا موافقين على تعديل كارثي للدستور
ماهو لما تجيب حد مش فاهم وتديله المسؤولية تبقي دى النتيجة
وانا زهقت من السياسة فعلا رغم انها كانت من اولى اهتماماتى بس اكتشفت ان سعد زغلول عنده حق لما قال مافيش فايدة خاصة لبلدنا

[Semsema El Masry Kitchen]

احم انا مش بحب السياسه بس اعمل ايه؟
قولت ادخل اقرا بما انها ايام شبه وشي فقولت اكيد ايام حلوه...
بس ياريتنى كنت بصيت ف المرايه الصبح مكنتش هدخل اقرا
مش هقول غير حسبنا الله ونعمه الوكيل اصلا خلاص احنا كمواطنين جبنا اخرنا ومافيش حاجه تانيه ممكن نستحملها لو حصل اى غلاء تانى حرفيا ناس كتير هتموت وهتحصل مجاعه
ربنا يسترها يارب

[يحيى الفضلي السودان]

رمضان مبارك
مستنين جديدك