هتعرفي تفتحي بيت؟

[دمعه حائره]

بسم الله الرحمن الرحيم
هتعرفي تفتحي بيت؟
سؤال لازم يتسأل لكن بنت هتتجوز وكمان لامها علمتي بنتك ازاي تفتح بيت؟ جمله يمكن تبان سهله لكنها مفتاح لابواب كتير محدش يعرفها الجواز حياه مختلفه خالص غير اللي البنت بتعيشها في بيت اهلها وزوجها مش ملزم يعيشها بنفس الطريقه لانها خلاص كبرت وبقت هي ست البيت يعني الدلع وعدم المسؤلية اللي كانت عايشه بيهم مبقاش ينفع تكمل بيهم في بيت الزوجيه اه يدلعها ويجيبلها طلباتها في حدود امكانياته مش امكانيات والدها اللي وصل ليهم بعد ٣٠ سنه كفاح، ايوه الزواج مشاركه لكن مش كل حاجه تتاخد بالعند والنديه اللي نهايتها خراب بيوت، واي جروب او مجتمع بنات بيقعد يرغي ويحرض المتزوجات علي ازواجهم اعرفي ان نصهم مقهورين في بيوتهم وبيخرجوا العقد دي علي غيرهم، محترفات في خراب البيوت وتحريض الزوجات واول ماهتطلقي مش هتلاقي واحده فيهم تعرفك ولا تفتحلك بيتها، الراجل مش بيتعاند ولا ينفع تناطحي معاه زي التور لانك هتئذي نفسك في الاول والاخر، ومش معني انك بتسمعي كلامه يبقي انتي كده ملكيش شخصيه ولا هيتمرع عليكي زي ماالي عاوزين يخربوا بيتك بيقولولك، الحياه الزوجيه مشاركه وحب وتفاهم وقبلهم موده ورحمه زي ماربنا قال، العلاقات دي زي الورد هتسقيه وتهتمي بيه هيكبر ويزهر معاكي وهيفرح قلبك، ف كل واحده تتعلم الاول ازاي هتفتح بيت قبل ماتتجوز وكل ام تربي بنتها علي كده ومع احترامي لكل حقوق المرأه الراجل راجل والست ست ولو عاوزه تحسبيها انتي بردو هيبقا ليكي النصيب الاكبر ومحدش هيقل منك الا لسانك
موضوع للنقاش احب اعرف رأيكم فيه
#mena_hassan

[ساحر الأحزان]

معظم فشل زوجات اليوم برغم انها بتكون عن حب

هو عدم التوعيه لمعرفه اسس الحياه الزوجيه

ليست الحياه السعيده بكام جاب اهلك ليكي جهاز بربع مليون ولا اكتر وابوكي مضي علي كام شيك

الا من رحم ربي فيه ناس بتتداين وتبيع ما تملك علي شان تجهز بناتها

والشاب ليست السعاده بكبر الشقه وفخامه تشطيبها


كل ده ممكن يضيع في هفوه وتسرع ويبقي بدل ما نبني اسره بنهدمها

الحياه الزوجيه ليست بالرفاهيه الكامله بل بالاحساس من الطرفين في تحمل الحياه الجديده وما يتبعها من مشاركات

في الحياه ليت الفتيات والشباب يعلمو ان الحياه السعيده لن تاتي من دون المشاركه والاهتمام بين جميع الاطراف

مقال جميل منه احسنتي

تحياتي وتقديري

[نجاة حسام]

هعرف اكيد هيدينى مفتاح 🤭🤭
حبيبتى يامنونه
كلمة هتعرفى تفتحى بيت مش تتقال للبنت
محدش قال انى عشن اتجوز وافتح بيت
ابقى مقهوره ولا اشيل مسؤليه لوحدى ابدا
وانى استحمل ضغط حياه بكل ظروفها لوحدى
واخاف من كلمة مطلقه اصلى الناس هتتكلم عاليا والمفروض ندفن بعدها
لو الانسان ده مش كويس وتقدر تكمل حياتها لانها بتختار رفيق عمر
يكون اب واخ وصديق وحبيب وزوج
يبقى الله الغنى تفضل فى بيت اهلها
وعوزه اقولك كده كده الناس مش بسيب حد.فى حالو
مش اتجوزت ياه انتى كبرتى واللى قدك خلف وعيالو معه
اطلقتى بيتحكم عليكى من اقرب الناس ليكى
حتى الارمله بيتقال عاليها بردو نحس
بمعنى مس هنعلق حياتنا ابدا عشن رئى الناس
هتفتحى بيت بالحب والعشره الطيبه بالاصول
هيرعى وجودك وهيبقى سند ليكى
اكيد بيتك وقتها هيكون قصر حتى لو ظروفكم على قدها
الموده والرحمه مش ان واحد يستحمل والتانى يفرض سيطره لمجرد انو راجل والست المفروض تستحمل
مش عارفه هتفهمينى ولا لا يامنونه

[big bốss]

المثل المناسب فى الحاله دى

اكفى القدره على فمها تطلع البنت لامها

و فيه مثل تانى المراه تدخل جوه البحر تطلع ناشفه

فمن منطلق هذا البنت لو امها فتحت بيت هتطلع زيها

اما لو كانت هى راجل البيت هتطلع معقده و فاشله

و النتيجه اولاد مشرده و طلاق و محاكم

[اندرسون]

المفروض يكون بين الزوجين خطوط عريضة بيتفقوا عليها
في محاوله عيش حياه مستقره لانه الوضع أصبح مؤسف الزوجين اصبحو عقولهم عقول اطفال للأسف

[شاعر الحب الحزين]

لو الكل بيفكر بطريقتك كانت هتبقى الدنيا بخير
للأسف الجهل متفشي بشكل كبير جداً في حياتنا
إعلام ومسلسلات وأفلام وأغنيات وحكايات وصاحبات
ورغبات ودجالين حاجات خلت بنات كتير تخرب بيتها بإيديها
لازم البنت تعرف ايه معنى كلمة بيت واستقرار
ولازم الأهل يبقوا عارفين هما بيجوزوا بنتهم لمين
الجواز المبني ع التفاهم والحب والأهم الدين والخلق الحسن
ده هو الجواز اللي بيبقى فيه استقرار أي كانت الظروف والأقدار

أنا بحييكي منة على صدقك وكلامك الباني لا الهدام
رسالة لكل البنات اسمعوا كلام منة ومتسمعوش رضوى الشربيني 😅😊
أتمنى يتم تثبيت الموضوع ليستفيد الجميع
أحسنتي قولا ونصحا منة
شكري وتقديري وامتناني 🌺

[phalsteen]

انا شايفه ان موضوع البيت دا يرجع الاول
لسن الزوج والزوجة
وكمان الاستقرار المادي
وبعد كدة تفاهم الزوجين
كمان اعتقد ان مفيش ست هتقدر تفتح بيت لوحدها
اكيد بالمشاركه والحب والأصول
كل حاجة هتبقي كويسه

[احساسى صحيح]

كلامك كله جميل يا منة بس مين يسمع
التيك توك والانستا خربوا الدنيا ع الاخر
والدنيا بقت سداح مداح والبنات كلها بتبص لبعض
ولما تقع الفاس ف الراس يرجعوا يعيطوا

[ويبقى الأثر]

لا هيا هتعرف تفتح نت مش بيت
من بعد مابقت البيوت مفتوحه على السوشال ميديا واتس وفيس
وكل واحده بقت بتتباهى باللى عندها وبقت فى مقارنه
واشمعنا ميكونش عندى وعندى زيها والدنيا خربت
البنت بقت تحط سقف عالى لاحلامها وترفض تعيش فى الواقع
وعلى القد او انها تتحمل مسؤليه
بس فى النهايه التربيه والنشأه من ناحية الوالدين بتأثر
جميل موضوعك منه
تسلمى ويسلم حرفك

[دمعه حائره]

اقتباس المشاركة الأصلية كتبت بواسطة ساحر الأحزان معظم فشل زوجات اليوم برغم انها بتكون عن حب هو عدم التوعيه لمعرفه اسس الحياه الزوجيه ليست الحياه السعيده بكام جاب اهلك ليكي جهاز بربع مليون ولا اكتر وابوكي مضي علي كام شيك الا من رحم ربي فيه ناس بتتداين وتبيع ما تملك علي شان تجهز بناتها والشاب ليست السعاده بكبر الشقه وفخامه تشطيبها كل ده ممكن يضيع في هفوه وتسرع ويبقي بدل ما نبني اسره بنهدمها الحياه الزوجيه ليست بالرفاهيه الكامله بل بالاحساس من الطرفين في تحمل الحياه الجديده وما يتبعها من مشاركات في الحياه ليت الفتيات والشباب يعلمو ان الحياه السعيده لن تاتي من دون المشاركه والاهتمام بين جميع الاطراف مقال جميل منه احسنتي تحياتي وتقديري

فعلا ياامجد بيهتمو بالجهاز والشقه وبينسوا يعلموا اولادهم
ازاي يتحملو مسؤوله بيت واسره سواء ولد او بنت
شكرا نورتني