الناقد السينمائي (اغلي من حياتي )

[Sorara]

اسعد الله أيامكم بالخير
في الفترة الاخيرة لاقتني بحب اوي الافلام القديمه
وبميل اوي اتفرج عليها
امبارح كان في فيلم جميل شغال لشادية وصلاح ذو الفقار

اختصارا للقصه للي ميعرفوش

شاديه كانت بتحب صلاح ذو الفقار وهو بيحبها
ووالدها رفضه ووقف في طريق ارتباطهم
وسافر هو وقتها وارتبط بواحده تانية وبقي عنده بنت وولد


في الوقت اللي باباها توفي فيه ومتجوزتش وفضلت علي ذكراه
وتدور الاحداث لحد ما بالصدفه يتقابلوا
ويقرروا يتجوزوا في السر حفاظا علي بيته وأسرته
وشويه أحداث كدة تبين قد ايه كانت متحمله انها تبان قدام الكل انسانه مش كويسة وخطافه رجاله وتوافق تبقي في عين الناس انسانه مش تمام
لمجرد ان بيته وواولاده ميتأثروش


الفكرة بقا اني مقتنعتش باللي حاول يصدره لينا الكاتب والمخرج
ان مراته وحشه ومش لطيفه ولا تطاق
وكنت شايفاها انسانه جاد بتعوض غياب جوزها ف البيت بكونها متحكمه شويه وانها من البدايه اتظلمت لما اتجوزت واحد محبهاش
بس اخترها طمع في منصب باباها اللي كان مدير الشركه وقتها

وبسببه اتحسنت حاله صلاح ذو الفقار
وكمان لما سمي اسم بنته علي اسم حببته وبدون أي رعاية لمشاعرها

ولما خانها واتجوز عليها وساب لها مسؤلية البيت والاولاد
اللي برضو ظهروا ان تربيتهم سليمه


نجي بقا لشاديه اللي كانت بتلعب دور مني
اللي رفضت تتجوز وفضلت ع وعدها واشتغلت واستقرت لوحدها
اشمعنا هو مستناش مثلا
ومفكرش ف الارتباط زي ما عملت هي !

وليه المفروض نتعاطف معاه ومع قصته ونديله مبرر للخيانه
رغم انه كدة خان الاتنين
يعني خان شادية لما سبها ومبصش وراه تاني واتجوز
وخان مراته اللي معملتش اللي تستاهل عليه كدة



النهاية :
لو فرضنا العكس كان المجتمع هيحب الفيلم كدة ويتعاطف
مع البطلة ويحب الدور رغم كم الخيانه وحب النفس ؟


الفيلم من علامات السينما المصرية زمان
والابطال كلهم لا خلاف عليهم


بس تحليل القصه للاسف موصلنيش زي ما الكاتب حب يوصل

بالعكس انا طول الفيلم كنت شايفه ان البطل خاين لكل الأطراف وبيحب نفسه وفقط


قوليلي رأيكم

[big bốss]

اغلب الافلام بيكون المخرج عايز يوصل فكره معينه و بيذلل كل الاحداث
فى الفيلم لها يمكن دلوقتى اغلب افكار الافلام واقعيه شويه اما زمان كان خيال
عامتا كرايي فى قصة الفيلم الزوج هو المخطىء و ليس الضحيه

[دمعه حائره]

المجتمع دايما بيشوف الزوجه التانيه خطافه رجاله
والزوج غالبا بيطلع مراته مقصره وانه مظلوم وغيره عشان يلاقي مبرر
بالنسبه للفيلم انا مش عارفاه بس يمكن ايام زمان
كان التعدد متاح اكتر من دلوقت والزوجه متعترضش
دلوقت الفيمنست قايمين بالواجب وبيغيروا القوانين كمان
يعني الراجل اللي هيفكر يجوز تاني هينكد علي نفسه
لكن الخيانه انا بشوفها متساويه بين الراجل او الست حتي العقوبه
في الدين واحده بس بالنسبه للست بتكون افظع ومش مقبوله لاي سبب
ومحدش بيغفر زي مابيطلبو منها تغفر للرجل ويقولو نزوه
افلام زمان كانت عقول الناس مش زي دلوقت والطيبه اكتر من دلوقت
وسهل تطرحي فكره وتعدي ويقتنعوا مش زي الايام دي
بحييكي علي فكره النقاش وهتخليني اتفرج علي الفيلم
تسلمي حبيبتي

[طبيب الهوى]

ابنتي الحبيبة سارة
قبل ما ارد على أسئلتك
انتي اتفرجتي على الفيلم كويس
واضح من نقدك إنك مركزتيش في بداية الفيلم
لأن أحداث الفيلم نابعة من بدايته
الفيلم ده بالذات اللي جعلني أحلم بأن
أحب واتزوج بنت أسمها منى
ودعوت الله في كل سجدة
أن يجمعني بها والحمد تحقق حلمي ودعاني
الله يرحم ام عصام ويغفر لها ويسكنها فسيح جناته امين
أما عن زوجته الأولى أم أبنائه
فهي بالفعل مظلومة
تحياتي وودي وورودي
ابو عصام

[احساسى صحيح]

مش بالضرورة الفيلم يعبر عن واقع
رغم ان افلام كتير بتكون مقتبسة من الحقيقة
ولكن المخرج له هدف من السيناريو بالطريقة دى
انا كمان شكلى هتفرج ع الفيلم علشان افهم
منورة اختنا سارة ومبسوطين بعودتك
ودوم يا رب التواجد الراقى

[مهيب الركن .]

انا بصراحه مشوفتش الفيلم ده وصعب اقول فيه رأيي
انما من كام يوم سمعت فيلم على اليوتيوب اول مره اشوفه فى حياتى
فيلم اسمه السقا مات
الفيلم ده منتهى الجمال فعلا ويستحق انك تقولى رأيك فيه

[فداااااااااااء]

دا فيلم احماااااد ومنااااااا هههه
من الافلام الجميلة
اتذكر الفيلم ان صلاح اتقدم لشادية لكن والدها رفض ولما اتفقوا يتزوجوا علشان هيسافر لشغله ملحقتهوش
هو عاش الحياة بواقعية مش بخيانة
هو شاف انه من المستحيل يتزوج حبيبته لتعنت ورفض والدها لذا قرر انه يتزوج من اى امرأة حتى لو كانت بشخصية غير مناسبة له ارى انه فعل ذلك للهروب من الم حبه الماضي لكن اكتشف انه مقدرش يتأقلم مع شخصية زوجته وهنا حصل النفور
احيانا الظروف تجبر الشخص على انه ياخد قرارات خاطئة ظالمة له ولغيره لكن من اجل الهروب من ألم يلاحقه
فور التقاء احمد بمنى كان قلبه هو المتحكم لانه كان متعطش لحبه الحقيقي ولانه عارف انه ظلم زوجته بالزواج منها دون حب قرروا انهم يتزوجوا بالسر نوع من التضحية فى نظر الكاتب وهذا ما ادركوه ابناءه فى اخر الفيلم ..البعض عندما يفتقد ما يسعده لفترة طويلة عند الالتقاء به يسعي بكل قوته بالتمسك به خاصة وان مر من العمر الكثير ومن الصعب ان تتجدد الفرص
لا اراه خائن بقدر ما ااراه مسكين لانه لم يستطع ان يسعد نفسه وينسي حبه ولم يستطع الا يظلم زوجته

[Lamees]

صح احنا لازم يكون لينا رؤية
تانية ونقد لما نشاهده
مش لازم نمشي ورا اللي المخرج عايزه
احنا لينا رأى تاني
وانا معاكي في تحليلك للفيلم
تسلمي يا قمر
دام العطاء

[فــــــــــرح]

الافلام خصوصا ايام الابيض والاسود بتتميز بالرُقي في الطرح
بسبب العصر الملكي اللي كانوا عليه
وحتى فكره الزوجة الثانيه الكاتب ملمعهاش
لكن في الفتره الزمنيه دي كانت الاوضاع
وطريقة المعاملة ما بين الازواج والحب بينتصر دائما
فحضرنك شفتي القصة بمنظور زماننا دا
لو تخيلنها البطل المطرب ( ناسيه اسمه ) والبطلة زينه
زي اللي حصل في مسلسل. ( لاعلى سعر )
خطفت زوج صحبتها بكل وقاحة وعادي !!!
مقارنة بشادية اللي خدت حق من وجهه نظري مشروع لها
حب عمرها اللي طال انتظارها ليه وضاع عمرها وفرصتها
انها تكون أم … اقل حاجه الظروف تصالحها بزواجها من حب عمرها
وفي السر مقلتش طلق مراتك. ومعرفش اي


اتمنى فكرتي وصلت

[ساحر الأحزان]

الفيلم ده انا سمعته اكتر من مره

احمد بيحب مني ومتفقين علي الزواج واتقدم لها احمد

ووالدها رفض فقررو انهم يتزوجو ولا يفترقوا عن بعض

وانتظرها احمد علي محطه القطر ولكنا تاخرت

احمد سافر وبعدين والدها توفي

وهي ما تزوجت بعد احمدحتي تقابلا

وعاد الحب مع تلك العوده وتجدد بداخلهم وتزوجها احمد

وسمي ابنته مني علي اسمها

هو الفيلم بيحكي قصه رومانسيه ظريفه بين احمد ومني

عوده جميله ساره

نورتي المنتدي