الحلقه السابعه من برنامج الحكايه ومعانا المبدع (العاشق الذى لم يتب )

[واد حبيب]

السلام عليكم ورحمه الله وبركاته
اهلا بكل اعضاء المنتدي
حلقه جديده من حلقات الحكايه ومعانا حلقه جديده لكن متميزه مع انشط عضو في المنتدي
معانا واحد من المبدعين اللي ساهمو كتير في نجاح المكان ده
معانا في الحلقه المبدع الكبير

العاشق الذى لم يتب

هلا بيك في البرنامج

عوزين نتعرف عليك في سطور قليله
وهلا فيك وبيك ومليون مرحبا
ونتعرف وماله احنا فى الخدمة وسطورقليلة ليه
ماتخليها كتيرة ياراجل هو احنا ورانا ايه.
الاسم والمحافظه والمؤهل وحاجات تانيه أتكلم برحتك
الاسم . رفعت احمد حسين
المؤهل : كلية اصول الدين . الازهر الشريف
وحاجات تانية واتكلم براحتى هههههه
ان شاءالله اتكلم واغنى كمان وتطلع ايه الحاجات التانية دى قصدك الخضار واللحمة .

مين الأشخاص اللي تقدر تثق فيهم في حياتك
كنت باثق فى ماما وبابا ماتوا الله يرحمهم وبطلت اثق فى حد تانى .
واكتر شيئ يزعجنى الناس الكدابة بتوع الخداع والنفاق
ربنا يبعدهم عننا قول آمين .

وما الشى الذى يشعرك بالسعاده؟
لما اشوف حد سعيد وفرحان اسعد اوى .

ليه دايما غامض في حياتك ؟
ياراجل جبت منين الحكاية دى
غامض مين ياعم انا ابسط مما تتخيل
والدليل اسمى امامك ثلاثى وهو نفس اسمى على الفيس
يعنى ماعنديش حاجة اخبيها ولاغامض فيها .

قراراتك بتخدها من نفسك ولا بتشارك حد فيها؟
واشارك حد ليه حد قلك انا ماعنديش فلوس .

أي القرار اللي اخده في حياتك وندمت عليه؟
قرارات كتيرة يلا ربنايعوض علينا .


رفعت بيتغير مع تغير الحياه ولا بتكون زي ماانت؟
سبحان الذى يغير ولايتغير وكل يوم هو فى شأن
اكيد كل فترة من حياتك لها تغيرات تطرأ عليها
ولكن هناك ثوابت لابد ان تكون فيك راسخة .

ما هيه اصعب المواقف اللي مريت بيها في حياتك؟
فيها مواقف كتيرة ولكن كان موقف لاينسى وخاصة
لما بتكون فيه بتتخير تموت ازاى
بمعنى اللى قرر يقتلك معاه 3 انواع من اسلحة الموت
آه والله قالى أختار الطريقة اللى تعجبك تموت ضربا بالهراوة يعنى عصاية بالصعيدى نبوت ولا تموت بالخنجر ولاتموت بالمسدس
الحكاية دى كتبتها هنا من كم سنة وردت عليا الاخت ايلانا الله يمسيها بالخير وهى زعلانة أوى علشان أحداث الموقف
كانت بالسعودية الحبيبة تقريبا كتبتها بالتفصيل بقسم اليوميات.


الحياه اسرار ما السر اللي موجود في حياتك؟
ياراجل عيب عليك تقول سر ولماهو سر افشيه أنا ليه .

أي طموحك في المستقبل القريب؟
ان شاءالله طموحات كتيرة ربنا يحققها لنا بحوله وقوته .

أي الدوله اللي نفسك تعيش فيها بعد مصر؟
احب البلاد إلى قلبى مكة المكرمة والمدينة المنورة
اللهم أجعلنى اعيش بها وفيها أموت .

الغربه بتمثل أي في حياتك؟
الغربة شيئ صعب وربنايرجع كل متغرب إلى أهله ووطنه سالم
تقريبا كتبت هنا مش فاكر بقسم اليوميات ولاقلم الاعضاء
بعنوان الغريب فيه تحدثت عن معنى الغربة .

أي علاقتك بافراد عائلتك صداقه ولا سطحيه؟
كل اسرتى وكل اهلى وكل أصحابى علاقتى بهم فوق الكمال والحمدلله رب العالمين.

اسرارك ممكن تكون مع حد ولا بتخليها في قلبك؟
خلتها مع حد قبل كده طلع حرامى وسراقها
قلت اشيلها
فى قلبى طلع برضو مش امين وفضحنى
ومن يومها بشيلها فى محفظتى .

مين أقرب الناس لقلب في الحياه؟
صراحة ماسألتش الحياة عن الحكاية دى لمااعرف هقولك .

اي الحلم اللي حلمت بيه وعوزه يتحقق؟
بحلم بيك أنا بحلم بيك وبحلم أشوفك واعزمك على العشا
باذن الله قريب عشمان فى ربنا.

ما هى الصفه التى لا تستطيع تغيرها فى نفسك؟
أننى لم اغير اسمى ولاصفتى أبدا .

ماذا تفتقد فى حياتك؟
أفقد واحد زيك يكون أبن حلال وأمين وصادق .

لو قولتلك خد قرار دلوقتي هيغير حياتك أي هيكون القرار؟
هو قرار واحد مافيش غيره أتزوج أربعة مرة وحدة مع بعض .

المال بنسبالك هوه السعاده ولا السعاده أي بنسبالك؟

السعادة ياصديقى هى رضا رب العالمين عليك
يومها هتكون اسعد واحد بالدنيا والآخرة
لكن المال لاغنى عنه .

تفضل الجواز عن حب ولا تقليدي؟
احنا فى زمن كل شيئ اتلخبط على بعضه
بس اتزوج وماتفرقش معايا تقليدى ولاصعيدى ولابحراوى .

واي مميزات شريكه حياتك؟
والله ماعنديش مانع تكون طويلة ولاقصيرة
ولاشعرها اصفر وعيونها خضرة اللى يجيبه ربنا كله كويس.

قلب رفعت يستطيع ان يحب اتنين؟
آه يااخويا يستطيع انا كشفت عليه لقيته واسع اوى
ويشيل من الحبايب كتير الحمدلله .

هل فكرت في الزواج مره تانيه؟
آه فكرت مرة اولى وتانية وتلاتة ورابعة باذن الله .

امته دخلت منتدي بنات مصر؟
يوم 15 أبريل سنة 2012مكتوب فى بياناتى .

عرفت المنتدي ازاي وايه اللي شدك تسجل فيه؟
العصفورة قالتلى واللى شدنى ليه ليقته مليان ناس
بتتعارك مع بعض وناس قاعدة فاضية وناس
ساكنة فى صفحات مكشوفة وناس بتكتب اشعار
قلت هو ده المطلوب وكان اول منتدى اسجل فيه
وحبيته وعشقته واسكنت فيه وهو احلى سكن لى والله .

اي اكتر الاقسام المحببه لقلبك في المنتدي؟
بحكم انى احب اكتب شخابيط ادبية ونثرية وشعرية
ومقالات وقصص فاحب الاقسام دى كلها ومعاها
قسم الخزعبلات احب اكتب دعابات وفوكهات وكتابات ساخرة.

مين اكتر الاعضاء بتشوف موضعهم دايما في المنتدي؟
والله دلوقتى ربنا يخلى شاعر الحب الغلبان ماشاءالله
عليه فيه البركة ربنايزيده وبعدين ربنا بعتلنا
ساحر الاحزان طويل العمر الله يعز مقداره وفيه ناس
يعنى .

اي الفرق بين المنتدي ده واي منتدي تاني؟
كل منتدى له نظامه ومايميزه عن الآخر.

هتكون متوجد بصفه مستمره ولا هتغب؟
ربنا يديلك طلة العمر ياابو اياد وساعتها
هنكون متواجدين.

أي القسم اللي ممكن تمسك الاشراف عليه ويكون نشيط بسببك؟
لما تحب حاجة اكيد هتعمل المستحيل علشانها
وانا احب الاقسام الحصرية الادبية.

أي المشكله اللي بسببها تم حظرك وابعادك عن المنتدي؟
الحمدلله عمرى ماعملت اى مشكلة لا للمنتدى ولااعضاء المنتدى
كل الحكاية ياصحبى عضوة انا حظرتها يوم ماكنت بالادارة وهى شطورة ولهلهوبة ومعاها عضو اخبث شيطان فى الارض شطار اوى فى تسجيل عضويات
مزرة ومتعددة وسبحان الله كل واحد فيهم
يسجل باليوم الواحد عشرين عضوية بنات وشباب
المهم هى سجلت عضوية بعد ماحظرتها فرحت بعتلها ومرحب فيها لقيتها اشتكت لاخونا الفيلسوف وكان ساعتهامدير جديد فحب يجاملها وراح حضرته حظرنى.

هل شايف نفسك مظلوم في المنتدي ومش واخد حقك؟
مظلوم مين ياعم قول ياباسط تلاقيها هاصت
والحقوق عند ربنا سبحانه وتعالى.

رفعت من انشط الأعضاء في المنتدي ممكن نشوف رفعت تاني انشط؟
كله باذن الله عندى أمل ارجع نشيط تانى.

المنتدي بيمثلك اي هوه مجرد تسالي ولا حاجه تانيه؟
هو بيمثل حاجات كتيرة والله عمرى ماخشيت منتدى
علشان اتسلى عندى قطة حلوة وكويسة ولاعمرها
زعلتنى بتسلى معاها.

مين اقرب الاعضاء لقلبك هنا اختار باسماء؟
وليه بس حكاية الاسماء
انا لى هنا حبايب كتار اللى رحل بلا عودة واللى لسة متواجد ولو كتبتلك الاسماء كلها مش هنخلص بقا من برنامحك
اخويا والغالى عندى اوى امجد افندى كعب الغزال
وشاعر الحب الفقير واحساسى صحيح
وانت ونور بيج باص
وروح للبنوتات الحلوات واحلاهم عندى ثلاثة
منة بنت جدى حسان اه علشان تعرف اسمى الرباعى بالمرة
المهم والشاعرة الرومنسية سيدة العاشقات ايلانا ونغم
الشام ولما ولميس وفجر وقمر البحر وتوحد وهمس الروح وهمس الدموع الله يرحمها وريانة العود وعنود
وسمك ولبن وتمر هندى وبس كده

مين اللي نفسك يرجع المنتدي تاني ويفضل علطول؟
ناس كتيرة عددهم كبير ربنايرجعهم سالمين .

أي القرار اللي تاخده لو مسكت اداري المنتدي؟
اسلم على كل عضو واهيده احلى هدية.

مين العضو اللي تقدر تقول عليه سبب في نجاح المنتدي؟
اكيد كتير قبل تسجيلى ومازالوا مخلصين ومتواجدين فى المنتدى
ربنا يعينهم ويقدرهم على خدمته.

رفعت دلوقتي لسه شايل من حد هنا ولا القلب صافي خلاص؟
كل اللى هنا والله اعزهم واحبهم جدا سواء اخوة او اخوات
واللى شايل منه وربنا ينتقم منه لااعتبره على قيد الحياة سواء خش هنا او لم يدخل.

علاقتك أي بساحر الاحزان؟
ساحر الاحزان ومعرفش ازاى قدر يسحر الاحزان
من أنبل الشخصيات اللى اتعاملت معاها ونعم الخلق الحسن وطيب القلب والتواضع
وتلك صفات أن وجدت وجب عليك أن تعشقها.

قول لينا المنتدي ناقص أي علشان يرجع زي الأول
هههه والله ناقص حاجات كتير أهمها عدم تواجد الادارة
والبركة دلوقتى فى اخوياامجد عامل اللازم.

انت كاتب متميز نشوف موضيعك تاني
باذن الله انا نفسى والله بس فيه حاجة منعانى.

عوزين منك نصيحه لاعضاء المنتدي؟
اجمل ماتوصى به كل الناس أن تحابوا
وانزعوا من قلبكم الحقد والحسد والغيرة.

اسئل سؤال لنفسك وجوب عليه

آه أسأل نفسى وأقول يارفعت وكما تقول لوحة الاحصائيات أنك أعلى الاعضاء جميعهم مشاركة
لا من سجل قبلك ولا من بعد كنت انت وحدك اعلاهم مشاركة ونشاط وتواجد فما الذى جعلك تغيب هكذا؟
أرد على روحى وأقول عاوزنى ارجع زى زمان قول للزمان ارجع يازمان بس كده.


وجه كلمه لواد حبيب
الله يخرب بيت حد يشبه واد حبيب
ده كلام ياراجل كل ده برنامج
ولاحتى برنامج الامم المتحدة واليونيسيف
ابو اياد صديقة جدا واعزه جدا والله وياما نصحنى من حوالى عشر سنين وعملت بنصايحه
فيه الخير ونشيط وبيحاول ينشط المنتدى ربنا يوفقه


سعيد جدااا بيك ياغالي
حلقه متميزه منك والله
تقبل تحياتي لك

[ساحر الأحزان]

لقاء جميل وممتع مع جوكر المنتدي

اشكر له كلامه بحقي

ورفعت من اعضاء المنتدي الذين لهم بصمه ولا ينسون داخل المنتدي

قدم الكثير للمنتدي

ووحشنا قلمه المميز

وجميل نهفاته الثريه

وبقول له عاوزين نشوف جوكر المنتدي من جديد

احسنت حبيب بجميل الاستضافه الثريه مع شخصيه جميله احبها واقدرها

لكم محبتي واحترامي

[فــــــــــرح]

حوار جميل بجد عرفني على ناس كتير
وجدد العهد مع شخصيات كانت زمان
اتمنالك كل التوفيق استاذ رفعت وعندي فضول اعرف قصة
خيارات الموت وموجهته واي اخترت ..!!! اجارك الله من كل مكروه



شكرا استاذ محمد عالاستضافات الطيبة وربط صلات الاحترام
والألفة بين الجميع

[العاشق الذى لم يتب]

اهلا ومرحبا ابو اياد
المذيع والمحاور الجميل
والبرنامج الجميل
اشكرك صديقى والضيافة الرائعة
واشكر صديقى الغالى امجد وكلامه الجميل
واشكر الاخت فرح

وكل من يخش هنا بعدين
والسلام عليكم
واتفضلوا اشربو القهوة معايا

[دمعه حائره]

ايه الضحك ده الاجابات دي هزار ولا جد؟
طبعا استاذ رفعت محدش يقدر ينكر نشاطه وقلمه المميز
وماشاء الله الإحصائيات عدانا كلنا ربنا يزيده
بصرف النظر عن الجزء بتاع الحظر
والكلام عن الاسباب لاني مش عارفاه
استضافه جميله واسعدنا رجوعك تاني
واتمني تستمر في نشاطك
ومواضيعك الجميله
منورين استاذ رفعت وابو اياد

[العاشق الذى لم يتب]

اقتباس المشاركة الأصلية كتبت بواسطة دمعه حائره ايه الضحك ده الاجابات دي هزار ولا جد؟ طبعا استاذ رفعت محدش يقدر ينكر نشاطه وقلمه المميز وماشاء الله الإحصائيات عدانا كلنا ربنا يزيده بصرف النظر عن الجزء بتاع الحظر والكلام عن الاسباب لاني مش عارفاه استضافه جميله واسعدنا رجوعك تاني واتمني تستمر في نشاطك ومواضيعك الجميله منورين استاذ رفعت وابو اياد

اهلا استاذة منة
منورانى
واشكر لجميل الثناء
اما الضحك والاجابات فهى حقيقة ومش هزار
يمكن بطريقة ساخرة شوية
وحكاية الحظر زى ماحضرتك شوفتى وقريتى

[إيلاانا]

ههههه والله مو فاكره إنه في يوم كتبت وزعلت
���� بس لو زعلت ذا طبيعي
بس طلع عندك مواهب وقلبك يشيل كذا وحده ���� وعندك استعداد تزوج ٤ �� وفي يوم واحد كمان ����
طلعت مو بسيط هههههه
الله يسعدك حوار بجد جميل واستمتعت بخفة دمك طلع دمك خفيف شكلك تشرب ماء كثير ����
بس مخولا عقلي مو عارفه جدك من هزارك دوختنا
الله يسعدك ويحفظك يا رب
تسلم أخي أبو اياد على المجهود الجميل منك
لكم خالص التقدير والاحترام

[العاشق الذى لم يتب]

اقتباس المشاركة الأصلية كتبت بواسطة إيلاانا ههههه والله مو فاكره إنه في يوم كتبت وزعلت ���� بس لو زعلت ذا طبيعي بس طلع عندك مواهب وقلبك يشيل كذا وحده ���� وعندك استعداد تزوج ٤ �� وفي يوم واحد كمان ���� طلعت مو بسيط هههههه الله يسعدك حوار بجد جميل واستمتعت بخفة دمك طلع دمك خفيف شكلك تشرب ماء كثير ���� بس مخولا عقلي مو عارفه جدك من هزارك دوختنا الله يسعدك ويحفظك يا رب تسلم أخي أبو اياد على المجهود الجميل منك لكم خالص التقدير والاحترام

منورة الدنيا استادة ايلانا
حياك ونورتينى
ومشكورة مليون
وكلامك الطيب
ربى يسعد قلبك
وصدقينى عندى مشكلة كبيرة قصة انو كلامى كله يشبه مزح
والحكاية دى كم سببتلى مشاكل ومتاعب

حاولت اتخلص منها ماقدرت
حتى وانا فوق المنبر واخطب الجمعة تغلبنى هذى المصيبة
اماحكاية زعلك زادتنى انبساطا وانبهارا ورب الكعبة
ولااخفيك سرا يومها تمنيت لو ماكنت حكيت القصة
وانا اللى زعلت بل حزنت على زعلك
بس القصة والحوار كان صحيح مية بالمية
والله يرحم ذاك الرجال ويغفرله
مشكورة

[أمير عسكر]

أجمل حوار مع شخصية ظريفة جدا ما شاء الله
والأستاذ رفعت قلمه جميل وظريف وقلبه جميل
تسلم اخي رفعت وربنا يسعد قلبك
والشكر لك اخي الطيب واد حبيب

[العاشق الذى لم يتب]

اقتباس المشاركة الأصلية كتبت بواسطة أمير عسكر أجمل حوار مع شخصية ظريفة جدا ما شاء الله والأستاذ رفعت قلمه جميل وظريف وقلبه جميل تسلم اخي رفعت وربنا يسعد قلبك والشكر لك اخي الطيب واد حبيب

سموالامير
اشكرك جدا
وعظيم ثناؤك
وانت كل الظرف والجمال
تحياتى لشخصك الراقى