ذهبت لأمير المؤمنين أشكو شدة عشققى فأهدانى أربعين

[العاشق الذى لم يتب]

السلام عليكم
ووحشتونى كتير
ونخش فى الموضوع ع طول علشان طويل شوية
والحكاية فى يوم اشتد علىّ الشوق لمحبوبتى
وحسيت فجأة بعيد عنكم نار اشتعلت جواى
فكرت مباشرة ومافيش غير أمير البلاد اشكيله
اتوكلت على الله ورحتله واستأذنت الحاجب فأذن لى ودخلت


السلام عليكم ورحمة الله أمير المؤمنين


وعليكم السلام ماحاجتك أيها العاشق


أطال الله عمر أمير المؤمنين وعذرا لا تتعجب لحاجتى
مالقتش غير سموك ينقذنى ويحوش عنى اللى أنا فيه
ويطفى النار اللى جواى


أمم .. أظن مشكلتك كبيرة جدا وأين هى تلك النار التى بداخلك


ياامير المؤمنين أوريك ازاى النار اللى جوايا
ولا سموك مش مصدقنى دى حاجات بعيد عنك ماتتوراش


اذن اخبرنى على وجه السرعة أنى أحسست بدرجة حرارتى تزداد




اعذرنى ياامير والله غصب عنى النار اللى جوايا شديدة
وحرارتها لازم توصل لاى احد يقترب منى




ياحاجب أسرع وأحضر مياة النيل كله كى اشربها لتطفئ
النار التى اشتعلت بداخلى وتكاد تقتلنى


هيا ياعاشق اخبرنى ما الأمرواختصر ربما أموت قبل سماع حكايتك




أطال الله عمرك ياامير حلفتك بالله بلاش تمون الحين
وعشمان نارى تنطفى على يدك




قصتى ياامير انى بحبها اوى وبعشقها اوى

ولما عشقها يزيد عندى اقعد بالشهرين والتلاتة معرفش انام ولااصحى




ياعاشق لقد أحرقتنى نارك وايه حكاية ماتعرفش
تنام ولاتصحى





ياامير اطال الله عمرك شرحها يطول اوى يمكن يحتاج لعمر
احفادك علشان اقدر اشرح فسيبك من الشرح
واعمل معروف واتكرم وهاتلى معشوقتى وزوجاهى

ويبقى كده عملت خير كتير اصلا انا ياامير
مش معايا فلوس ومهر وابوها طلب منى

مثل جبل احد ذهب وقال هو ده مهر بنتى




ياقائد الشرطة هلم واسرع وأحضر لى والد معشوقة العاشق
وأيضا أحضر معه تلك المفعوصة مقصوفة الرقبة
من هو أبيها ياعاشق ومااسم معشوقتك




ابيها ياأمير هو والد معشوقتى أما أسمها فأعذرنى
علشان أنا صعيدى وعيب اوى أقولك على اسمها




وبس كده علشان مااطولش عليكم
وبحول الله نكمل بقية الحكاية فى الحلقة الجاية
يلا اشوفكم بخير باذن الله
رفعت احمد
2022/10/17

[ندوشه 2011]

سلم لي عالامير وقوله كل سنه وانت طيب

[ساحر الأحزان]

مش بقلك انت بحر كبير يا حج

من الكلام الحلو

والموهبه الجميله

بتاخدنا معاك في بحرك

وبعد كده تسبنا

منتظرين التكمله ايها العاشق الذي لم يتب

تحياتي وتقديري لك

وبانتظار جديدك

[العاشق الذى لم يتب]

اقتباس المشاركة الأصلية كتبت بواسطة ندوشه 2011 سلم لي عالامير وقوله كل سنه وانت طيب

آه أسلملك يااختى ومااسلمش ليه
عارفك مقموصة وشايلة من الاميراوى
ومش هقوله كل سنة
وليه ماقلش ليك انت
كل سنة وانت طيبة وانت نوشة وندوشة ومدووشة
امال ايه
وازيك بقا

[العاشق الذى لم يتب]

اقتباس المشاركة الأصلية كتبت بواسطة ساحر الأحزان مش بقلك انت بحر كبير يا حج من الكلام الحلو والموهبه الجميله بتاخدنا معاك في بحرك وبعد كده تسبنا منتظرين التكمله ايها العاشق الذي لم يتب تحياتي وتقديري لك وبانتظار جديدك

مقدرش اسيبك والفلوس مالية جيبك
واسيبك ازاى
وانت بتعزمنى ع الشاى
وكل يوم تقولى جاى
وتصدق وتيجي
وتجيب معاك حاجات كتيرة عال العال


اشكرك استاذنا ومديرنا الكبير
تحياتى

[أمير عسكر]

ايها العاشق لك الحق فنار العشق تكوي وتذهب النعاس
منتظر الجزء التالي يا غالي
لك الود وتحية تليق بك وباقة ورد بعطر الحب

[العاشق الذى لم يتب]

اقتباس المشاركة الأصلية كتبت بواسطة أمير عسكر ايها العاشق لك الحق فنار العشق تكوي وتذهب النعاس منتظر الجزء التالي يا غالي لك الود وتحية تليق بك وباقة ورد بعطر الحب

وكل باقات الورد لك
سموالامير
اشكرك
تحياتى

[ويبقى الأثر]

أربعين ايه ؟
جميله قصتك ابن عمى
يارب تفضل روحك جميله كده دايما
مبهجه حروفك مبهجه ردودك
ربنا يسعدك دنيا واخرة
يدوم قلمك الجميل

[العاشق الذى لم يتب]

اقتباس المشاركة الأصلية كتبت بواسطة ☆قيثارة الصمت☆ أربعين ايه ؟ جميله قصتك ابن عمى يارب تفضل روحك جميله كده دايما مبهجه حروفك مبهجه ردودك ربنا يسعدك دنيا واخرة يدوم قلمك الجميل

منورانى بنت عمى
وتسلمى وتعيشى
باذن الله هقولك اربعين ايه
فى باقى الخزعبلاية