وصفة اليوم ( مسابقة الخزعبلات جنان ب جنان)

[Aya 7ekaya]

كان ياما كان فى قديم الزمان امبارح بعد المغرب الساعه 2 العصر
كنت بفكر اعمل اكل ايه لقيت ملوخيه طبختها طلعت طاجن بامية ماحصلش
بالمناسبة جبت الوصفه من على النت بمكونات كلها من البيت ودى كانت احسن حاجه بصراحه
و مش هبخل عليكم بوصفتى السهلة اللى مخدتش 24 ساعه طبخ
اول حاجه بامية اورجانيك من دول الهمالايا و طماطم مربعة مستوردة من كندا و رز مصرى من أصول سودانية
أو سمسمية أو حمصية يعنى اى حاجة تلاقوها علشان مانصعبش على نفسنا الوصفه يا جماعه

هنجيب زيت زيتون كلاماتا من اللى كان فى فيلم اللى بالى بالك و نحمر فيه بصله متوسطة متقطعه على شكل دوائر ومستطيلات
وونزل عليه بصلصه الطماطم بتاعتنا و نضيف شوية مايه بس لازم تكون مايه من جبال الألب علشان نضمن أن وصفتنا تنجح
و نضيف البامية الجميلة بتاعتنا و بكده هيكون طبق الكشرى بتاعنا جاهز بالهنا و الشفا وانتظرونا فى وصفات قادمة

[واد حبيب]

ايوه انا عملتها يوم التلات بعد صلاله الجمعه
وعملت فراخ بلحمه مع الكسكسو
تسلمي علي موضوعك الجميل

[~♥ Queen sozan♥~]

يا سبحان الله

تسلم الايادي تسلم يا جيش بلادي

ده انتي عيزه حد يفك الشفرات الوصفه
من قبل الدخليه نفسه ههههه

يدوم التميز يا ايه

[زنبقة تناجى ربها]

لازم تكونون جوعانين عشان تآكلوها ...

اسعدك الله ..

[دمعه حائره]

رز مصري ايه التبذير ده ياايوش
كنتي ابعتي حد يجببلك رز هندي بسرعه هههه
دماغ المطابخ وخزعبلاتها دي انا بحبها

[أزهار]

بصراحة وصفة تجنن وخاصة انها ما تأخذ وقت يا دوب 24 ساعة
وحلاوتها مكوناتها متوفرة في كل بيت بس مشكلة المويا
لكن ما في اي اشكال نتصل على هايدي ترسل لنا جك مويا
تحفة الوصفة خرافية تسلم ايدك:d

[☆ شهـــاب ☆]

انـا بس لو أفهـم انتي عايـزة اية كنت أســاعدك والله :d

ومش عـارف ادي الوصفـة دي لـ اللي فـ البيت عندي واقولهــم اية

خزعبـلاية تـدوخ وشكل طعمهـا تحفـة تسلم ايديكـي ، ،

[كريم عاصم]

حاسس ان توهت فى الطبخة هى ملوخية والا بامية

والا ياخنى عجب

ادينى أشاره كده يا آيه بس وحياتك بلاش ندوق الطبخة

حزعبلاية جميله تسلم أيدك وبالتوفيق
كريم

[*فجر الاسلام*]

طبخه رائعه اجي اكل معاكي

[ساحر الأحزان]

طبخه مشكله من الاخر

عملتي فيها منتخب مطبوخ

احسنتي الوصفه ورده

يسلمو