ساحر الأحزان مع أعضاء بنات مصر في رمضان مع د عبدالله

[ساحر الأحزان]

السلام عليكم ورحمه الله وبركاته

اخوتي أعضاء بنات مصر ونعود من جديد ببرنامج رمضاني نتعرف من خلاله علي يوميات الأعضاء
في رمضان
معي ومعكم صاحب قلم مميز وتواجد أفقتقدناه ونتمني عودته
بيننا من جديد
مع صاحب الكلمات الشجيه والجميله وصاحب بصمه خاصه في الأقسام الأدبيه

د عبدالله
أهلا وسهلا بيك معنا د عبدالله
أهلا بيك يا أمجد. شكرا على كلامك الجميل
ونبتدي الحوار
احكي لينا ما هي طقوسك مع قرب الشهر الكريم ؟
الحقيقة أنا مقصر جدا ومش بستعد كويس للشهر الكريم.
كيف تقضي يومك في شهر رمضان؟
ما بين الشغل وقراءة القران وصلاة التراويح.يمكن الحاجة الحلوة هنا اني بأم العمال في الصلاة.
هل أنت من محبي التزاور في رمضان من خلال الزيارات العائليه للأهل ؟
أكيد دي حاجة حلوة بس متكونش مبالغ فيها. بالنسبة لي تقريبا بقالي ٨ سنين محضرتش رمضان في مصر. فأنا بقضيه لوحدي
كيف كانت طفولتك في شهر رمضان ومتي بدأت تتعود علي الصيام ؟
أحلى أيام . كنت بحب رمضان جدا وأنا طفل. فاكر واحنا ف ابتدائي مكنش عندنا مسجد ف المدرسة فكنا في رمضان ف الفسحة نطلع جري على أقرب مسجد نصلي الظهر ونرجع. الحقيقة على ما اد انها حاجة حلوة الا انها بتدل على اعتقاد خاطئ مترسخ عند الناس ان نهتم بالصلاة في رمضان وغير رمضان نتساهل. اعتقد بدأت الصوم وانا ٨ سنين مش فاكر بالظبط.
أغرب وأطرف موقف حصل معاك وأنت صغير ووكمان وانت كبير في رمضان ؟
فاكر مرة وانا صغير كنت قاعد قدام التليفزيون مستني يعلنو هلال رمضان بكرة او لا
ولما أعلنوا انه بكرة دخلت الاوضة وفضلت أرقص
لو حصل وقابلك موقف خصام قبل رمضان بتعمل ايه ؟
انا من الناس اللي مبتخاصمش حد مهما حصل. ممكن اخد موقف وازعل شوية لكن برجع أصفى واتكلم
بتحتم المصحف كام مره في رمضان ؟
للاسف انا مقصر برضو. كنت قبل كده ممكن اختم اكتر من مرة لكن مؤخرا لا
كتير من الناس بيكون خلقها ضيق وبتتعصب في رمضان والسبب عندهم الصيام ؟ما تعقيبك علي ذلك؟
الصيام مش سبب لضيق الخلق. دي حجة الناس بتعملها
يعني الواحد لا بيكون جعان ولا عطشان. ايه المشكلة؟
وحتى لو اتعصب المفروض يمسك نفسه خصوصا في رمضان

في شهر رمضان المساجد بتملي في الفروض وخصوصا وقت صلاه العشاء والقيام والفجر
وبعد الشهر يختفي ذلك ما تعليقك علي ذلك ؟
ده خطأ ف العقيدة. رب رمضان هو رب كل الشهور
المفروض نجتهد في رمضان في النوافل لكن الفروض ثابتة في كل الشهور والمحافظة على صلاة الجماعة فرض في كل وقت.

في شهر رمضان تكثر المسلسلات الرمضانيه التي تكون عامل كبير في ضياع وقت العباده في الشهر
الكريم ما تعقيبك علي تلك الظاهر وكيف نساعد علي تجاوزها ؟
دي مصيبة ابتلينا بيها. والحقيقة ان اللي ينساق وراها ويضيع الفروض والنوافل يبقى خاسر...
أما عن ازاي نتجاوزها فلو كل واحد مهتمش بالمسلسلات والبرامج التافهة دي مش هنلاقيها بتتعمل كتير كده . فكل واحد يبعد عن التفاهات. وانا بستغرب من اهتمام الناس المبالغ فيه بمسلسلات وبرامج تافهة ملهاش اي لزمة.
نخش علي الجزء الترفيهي
هل أنت طباخ ماهر ولا بتستعين بصديق في تحضير الوجبات ؟
يا باشا نادية السيد بتغير مني ههه. اعتقد اني بطبخ كويس الى حد ما
ما هي الوجبات المفضله عندك في شهر رمضان ؟
معنديش وجبات مفضلة. انا باكل اقل أكل في رمضان
هل تؤيد جو العزومات الرمضاني في الوقت الحالي ؟
في أضيق الحدود. لان الناس بتكلف نفسها كتير في العزومات
أطرف وأغرب موقف حصل ليك داخل المطبخ ؟
مش فاكر بصراحة
ما هي أحب الوجبات عندك ؟
بحب الفاصوليا والبسلة. ومش فاكر ايه تاني. والله ما بدقق
وبكده نكون خلصنا الاستضافه الرمضانيه
مع د عبدالله
الي تعرفنا عليه عن قرب وسعدت بحواري معه

وأتتظروني مع ضيف أخر
بأمان الله