رمضان جانا اهلا رمضان ..ياترى بتستعدوا لرمضان ازى؟

[اسكندريلا]

بسم الله الرحمن الرحيم

ازيكم يا اعضاء منتدانا الحلوين

كل عام وانتم بخير





بمناسبة شهر رمضان الكريم

اعاده الله عليكم بالخير واليمن والبركات



طبعا كل الشعوب العربيه والاسلامية بتستعد الان لاستقبال الشهر الكريم

كل واحد بيستعد له بطريقة مختلفة من الصغير لكبير

نبتدى بالصغار

اول حاجة بيفكروا فيها الفوانيس



والفوانيس الايام دى على كل شكل ولون







وبنتظروا حلقات الكرتون الجديدة على احر من الجمر

والسنه دى رجع لهم يا بختهم بوجى وطمطم



ونيجى للاولاد الاكبر سنا تلقيهم مهتمين بجمع النقود من الجيران

لعمل زينه رمضان اللى بتضفى روح البهجة على شوارعنا






والبنات بتستعد هى والشباب لاداء صلاة التراويح







والتفكير ازى يقدروا يلحقوا اماكن عند الشيخ المفضل ليهم

والامهات تبتدى تخزن بالبيت تموين شهر رمضان

وتقوم بالتبضع وشراء البلح والمشمشية وقمر الدين والقراصية

وجوز الهند والزبيب والمكسرات






وياعينى عليهم المطبخ والعزومات بتكون حمل جامد جدا عليهم بجانب الصيام



وطبعا لاننسى الاباء والاجداد وهم يحتضنون المصحف لليل نهار



واكيد الصيام وقراءت وختم القراءن وصلاة التراويح ده عامل مشترك

بين كل المسلمين من الصغير للكبير

ولانسى ان شهر شعبان شهر ترفع فيه الاعمال

ومن اهم الاعمال

الاهتمام بالفقراء

واستعدادنا لنجعل شهر رمضان لهم شهر رحمة منا عليهم بعد الله سبحانه وتعالى

فنجد الكثير يقوم باعمال الخير

ومنها تجهيز شنطة رمضان






ومن الاعمال التى يجب الاهتمام بها مرعاه الايتام

ويارب يجعلنا قريبين من رسولنا الكريم عليه الصلاة والسلام مثل قرب السبابه بالوسطى
قولوا امين

وكثير من الشباب يستعد للسهرات الرمضانيه

وخصوصا بالحسين والمرسى ابو العباس

والسيد البدوى



والخيمات الرمضانيه



وبيستعد اصحاب المهمن التى تتعلق بالشهر الكريم مثل بائع الكنافة والقطايف بتحضير ادواته








وبائع الخروب والمشروبات المثلجة







وبائع المخللل

ات








وطبعا اللى مافيش غنا عنه فى رمضان او طول العام

قدرة الفول ونضرب لها تعظيم سلام








وفى النهاية

احب اعرف كل واحد فيكم بيجهز ازى لشهر رمضان وايه خططه فيه


وكل عام وكل امتنا الاسلاميه بخير

وكل اعضانا منورنا كده دايما

اختكم نوسى

[smsma666]

موضوع جميل ونوسى ومنظم جدا

وانا بقى هستعد برمضان
اول حاجه بحاول انهى القرآن اللى بقراه دلوقتى علشان ابدا فى رمضان من جديد وبتمنى ان اقدر انهيه اكتر من مره

وناويه برضه اروح الحق مكان فى الجامع علشان التراويح لانه فعلا بيكون مليان على الاخر

بحاول اخلص اى حاجه ورايا بحيث ان اكون مستعده لرمضان ومافيش حاجه تشغلنى

بالنسبه لموضوع الزينه ده صراحه مش بفكر فيه

اما بوجى وطمطم وحلقات كرمبو بجد منتظرها بفارغ الصبر وعايز اشوفهم عيله بقى تقولى ايه ههههههه

والفانوس والله نفسى اجيب بتاع كرومبو بس اخاف حد يضحك عليا هههههههه

موضوع جميييييييييييييييييل نوسى وبالتوفيق فى حياتك

[اسكندريلا]

اقتباس
المشاركة الأصلية كتبت بواسطة smsma666





موضوع جميل ونوسى ومنظم جدا

وانا بقى هستعد برمضان
اول حاجه بحاول انهى القرآن اللى بقراه دلوقتى علشان ابدا فى رمضان من جديد وبتمنى ان اقدر انهيه اكتر من مره

وناويه برضه اروح الحق مكان فى الجامع علشان التراويح لانه فعلا بيكون مليان على الاخر

بحاول اخلص اى حاجه ورايا بحيث ان اكون مستعده لرمضان ومافيش حاجه تشغلنى

بالنسبه لموضوع الزينه ده صراحه مش بفكر فيه

اما بوجى وطمطم وحلقات كرمبو بجد منتظرها بفارغ الصبر وعايز اشوفهم عيله بقى تقولى ايه ههههههه

والفانوس والله نفسى اجيب بتاع كرومبو بس اخاف حد يضحك عليا هههههههه

موضوع جميييييييييييييييييل نوسى وبالتوفيق فى حياتك

جزاك الله خير يا سمسمة

وانشاء الله تلحقى مكان بالصلاة

وانشاء الله الصلاة تكون زحمة عن كل سنه واعداد المصليين تزيد زتزيد

وياستى اشترى الفنوس واللى يضحك ضحك افرحى بيه شويه وشليه

ربنا يحفظك ويبارك فيك يا رب

وكل سنة وانتى باتم صحة واسعد حال

[حنـــــون]

والله الى بيجهز كل ده ماما مش بشغل نفسى بالكلام ده خالص

بس بئه الحاجه الوحيده الى بشارك فيها هى الزينه ونفضل نجهز البيت كلوا عشان يبقى فى استقبال

احلى شهر فى السنه واحلى ايام بجد كل ساعه بيبقى فيها استمتاع مالوش وصف

انا بئه دلوقتى بخلص ختمه المصحف عشان نبدا من الاول فى رمضان على فكره مش بحب اخرج

خالص من البيت فى رمضان بحب استمتع بكل لحظه فيه وطبعا هتفرج على بوجى وطمطم دى بئه احلى

حاجه السنه دى وطبعا فى حاجات كتير بنعملها بس كفايه كده عشان مانطولش عليكوا

كل سنه وانتم طيبين ورمضان خير على كل الناس ويارب يتقبل منا ويجعلنا من عتقائه

شكرااااااااااااا يانوسى على موضوعك الجميل الصور حلوه اوى تسلمى على مجهودك

تحيااااااااااااااتى اختك حنون

[nooody]

انا عندى ماما هى المتخصصه فى شراء كل حاجه عشان شهر رمضان

اما انا ممكن اساعدها فى الطبخ ودة كفايه اوى

انا بصراحه نفسى اشترى فانوس السنه دى بحب الفوانيس اووووى هههههه

ومن اول يوم الحمد لله بحاول اقرأ اكبر جزء فى القرأن عشان اقدر اختمه مرتين او اكتر

برضه بحاول على قد ما اقدر اواظب على صلاة التراويح لو مش فى المسجد

صليها فى البيت وربنا يعينا يارب كلنا

انا بقى اللى بدبس فى السحور كله نايم وانا اللى بحضرة بقى

موضوع حلو اوى يا نوسى

[yasmine refat]

والله يانوسي حسرتني

عمري ماحضرت رمضان في مصر

إن شاء الله يكون رمضان جميل على الجميع

وشكراااااااا على الموضوع الجميل

أختك

[البرنس رامى]

بسم الله الرحمن الرحيم

السلام عليكم ورحمة الله وبركاته

نوسى موضوعك بجد يستحق التميز

موضوع لفيت فى كل لقطه وفى كل قهوه وفى كل شارع فيه

وحسيت انى انا الى عامل الزينه وبشترى كنافه وحسيت انى بجد شخص جوه الموضوع

انتى وولازلتى مبدعه فى كل ماتقدمى كل موضوعاتك تجذبنى بجد

حتى الأخباريه بتكون متقنه وانتى بالفعل بتقدمى الموضوع بطريقه

تخلى اللى بيقراه مستمتع بيه

تسلمى يا نوسى وتسلم ايدك على طرحك الشيق للموضوع

وانتى بجد تستحقى التميز فى هذا الموضوع

لكى ارق تحياتى وكل عام وانتى بخير وعافيه ورمضان كريم

وندعو الله ان يعيده علينا وعلى المسلمين اعوام عديده

[سندريلا]

بجد الجد موضوع جامد قوي قوي يا عسل

وانتي اصلا بجد مبدعة ف طريقة القائه هع ه ع

بس شطورة انك عملتي توبيك زي دة

اولا انا بقي اصلا مش حاسة ان رمضان جاي اساسا

يعني زي ما تقولوا مفيش حماس زي كل سنة يعني

بس بجد بحاول اخلي في حماس يعني

ان شاء الله ف رمضان هكمل حفظ قران وناوية اختم ان شاء الله ف رمضان كذا مرة زي السنة اللي فاتت ختمته 3 مرات

ربنا يعينا بس

وبالنسبة للفوانيس انا مدمنة فوانيس

وبجد والله جبت فانوس عسول قوي

وبوجي وطمطم بقي مش هقوم من قدامهم هع هع

وبجد الجد توبيك تحفة قوي تسلميلنا يا قمر

[ARAGON]

طبعا أوجه كلمة شكر على الموضوع الجميل والأكثرمن رائع

كل سنة وانتم طيبين في البداية .......

تجهيز الحاجات دي طبعا محتاجة نروح المجمعات في ****************** وانتم عارفين اني مش في مصر وفيه ناس كتير ما تعرفش إني بعرف أطبخ بس والله متعة جميلة وانت واقف في المطبخ.........ههههههههههه وتشوف ويطلع عينك في تجهيز الأكل ...........
وطبعا كل ده من الكسل اللي في حياة الشباب........

نقول كل سنة وانتم طيبين وكفاية كده........


هههههههههههه

ربنا يسترها في رمضان إن شاء الله

[لوليتا المصريه]

يارب رمضان يدخل علينا واحنا قلبنا صافى ليه وحده

ورمضان دة بقى كله بيبقى على ماما وانا ولله الحمد لو عايزة حاجة بساعدها فيها

وبساعد فى شغل البيت يعنى الاكل على ماما والبيت عليا

وربنا يساعدنى ويكرمنى واختم القراءن ان شاء الله اكتر من مرة

ربنا يعينا على كسب اكبر قدر من الثواب فى الشهر العظيم دة

اللهم امين

موضوع تحفه يا نوسى بجد

تسلمى

اختك