ياللا نعيش على السنة( ارجو التثبيت)

[راجيه الفردوس]

السلام عليكم و رحمة الله و بركاته

أنا عندي اقتراح:

فيه كتيب إسمه "1000 سنة في اليوم و الليلة"

الكتيب ده فيه سنن كتير جداً عن الرسول صلى الله عليه و سلم، فإيه رأيكوا نختار كل أسبوع سنة و نطبقها، و ممكن نبتدي من أول اليوم لحد آخره يعني بداية من أذكار الاستيقاظ من النوم و لحد أذكار النوم، عشان نخلي يومنا كله مليان بسنن النبي صلى الله عليه و سلم

الموضوع إن شاء الله هيبقى كل أسبوع على أساس إن الناس تتعود على كل سنة لمدة أسبوع كامل.

إيه رأيكوا؟؟؟

أنا إن شاء الله كل أسبوع هأقول سنة أو مجموعة من السنن السهلة بإذن الله، المتعلقة بحاجة معينة في يومنا، مثلاً سنن دخول البيت، كدة يعني.

و إن شاء الله نحاول نواظب على السنة دي طول الأسبوع، و يوم الأحد القادم، نقول سنة جديدة، و نتبدي نواظب عليها إلى جانب السنة بتاعة الأسبوع اللي قبل كدة.

طيب أنا ليه عملت الموضوع ده كل أسبوع مش كل يوم؟؟؟ سؤال جميل!!
عشان كلنا ناخد فرصة إننا نطبق السنة دي كل يوم طول الأسبوع لحد لما نتعود عليها و نبقى بنطبقها بدون تفكير، و بالتالي لما ناخد سنة جديدة يبقى سهل نطبق السنتين مع بعض، و كل لما ناخد سنة جديدة نطبقها إلى جانب اللي قبلها، و فى النهاية إن شاء الله نلاقي إن إحنا اتعودنا نطبق كل سنن الرسول صلى الله عليه و سلم.

ميزة تانية للموضوع ده: إن السنن تشمل جميع الأنشطة اللي بنقوم بيها في يومنا العادي، و بالتالي نبقى طول يومنا بنطبق سنن حبيبنا صلى الله عليه و سلم.

خلاص؟؟ أنا إن شاء الله هابعت أول سنة بعد ما اسمع رايكم، و يا ريت كلنا نستحضر دايماً نية: "تركت فيكم ما إن تمسكتم به لن تضلوا بعدي أبداً، كتاب الله و سنتي".

ولازم نفتكر ان الرسول قدم مليون حاجه تثبت انو بيحبنا لكن احن قدمنا ايه يثبتلوا ان احنا بنحبو

اللهم وفقنا لما تحب و ترضى، و اجعل أعمالنا خالصة لوجهك الكريم

جزاكم الله خيراً

و السلام عليكم و رحمة الله و بركاته

[طالبة الثانوى]

باك الله فيكى اختى فى الله وجزاكى كل خير والله عندك فى اللى قولتيه ان الرسول قدم لينا حاجات كتير تثبت انه بيحبنا خلينا احنا نقدم حاجه تثبتله اننا بنحبه (صلى الله عليه وسلم ) وياريت كل الناس تعمل بالكلام ده يا رب أمين وكل سنه وانتى طيبه عيد مبارك علينا وعليكى وعلى الناس كلها

[رفح]

جزيتي خيرا اختي

منتظرين السنن الي هتقترحيها


جزيتي خيرا

تقبلي مروري

[مايوى]

منتظرين السنة التى سوف تعرضيها علينا

جزاكى الله كل خير

[راجيه الفردوس]

نبدأ من النهاردة بإذن الله، و هنمشي بترتيب حياتنا في أي يوم، يعني من:

سنن الاستيقاظ من النوم
-----------------------------

1. مسح أثر النوم عن الوجه باليد

"استيقظ الرسول صلى الله عليه و سلم فجلس يمسح النوم عن وجهه بيده" رواه مسلم

2. الدعاء و هو : "الحمد لله الذي أحيانا بعد ما أماتنا و إليه النشور" رواه البخاري

3. السواك

"كان صلى الله عليه و سلم إذا استيقظ من الليل يشوص فاه بالسواك" متفق عليه

4. الاستنثار ثلاث مرات (يعني زي الوضوء، إدخال الماء في الأنف ثم إخراجه)

قال صلى الله عليه و سلم: "إذا استيقظ أحدكم من منامه فليستنثر ثلاثاُ فإن الشيطان يبيت على خيشومه" متفق عليه (خيشومه: أنفه)

5. غسل اليدين ثلاث مرات

قال صلى الله عليه و سلم: "إذا استيقظ أحدكم من نومه فلا يغمس يده في الإناء حتى يغسلها ثلاثاُ" متفق عليه

ياللا يا جماعة، عايزين نطبق السنن دي كل يوم طول الأسبوع ده إن شاء الله، و ما تنسوش النية

اللهم تقبل يا رب العالمين، و اجعل أعمالنا خالصة لوجهك الكريم

جزاكم الله خيراً

و السلام عليكم و رحمة الله و بركاته

[راجيه الفردوس]

ايه ياجماعه مافيش تفاعل ليه

[mīĐŏ ǺĻ ƒâηâη]

جزاك الله الف خير


مشكوووووور والله يعطيك الف عافيه