رسائل ايميلات بتكسب حسنات!!!

[SiLver Spectra]

صباحكم و مساءكم فل و ياسمين

بالعامية كدا

الموضوع ببساطه هتكلم فيه عن رسائل بتجيني أوف لاين أو أون لاين على الميل مش فارقة المهم انها بتجيني و بتيجي لأغلبكم

بيكون محتواها كالتالي :

اقتباس اقتباس ~ اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد وبارك على محمد وعلى آل محمد كما باركت على إبراهيم وعلى آل إبراهيم انك حميد مجيد أرسل هذه الرسالة لـ 10 أشخاص خلال ساعة تكون كسبت 10 ملايين حسنة

سؤال بيشغل تفكيري

هل الحسنات زي العملات

يعني نكتب كلام و نبعته لكل الي موجودين في الميل عندي بضغطة زر ارسال جماعي

يبقى أنا كدا لميت أجر عالم مثلا بيفيد البشرية!!


طيب شوفوا الصورة التالية




هل ممكن تتحايل على ربك عشان تكسب حسنات زي ما بتتحايل على البشر في الإنتر نت مثلا عشان تكسب دولارات

سواء بعمل اعلانات أو صفحات وهمية بها اعلانات نصية لكسب المال!!


أو زي مثلا إنك تشتغل الرابيدشير في تجميع النقاط و تحويلها لحسابات

الي المفروض انهم عاملين نظام نقاط معين لتشجيع الناس للرفع على الموقع

في ناس بتتحايل عليه لتجميع النقاط بشكل مخالف للهدف السامي إلي على اساسه وضع الموقع نظام النقاط



هل هو نفس الحال بالنسبة للحسنات!!

سياسة التحصيل الحاصل


المفروض الأعمال بالنيات

لما أحب اذكر الله هذكره لواحدي من غير ما حد يجبرني

و هنا هو الأجر الصحيح

الذكر بنية الذكر



أحيانا بتكون الرسالة بالشكل دا

اقتباس اقتباس ~ في واحدة حلمت بإن الي هينشر الرسالة دي لعشر اشخاص هيسمع خبر حلو و لو ما نشرهاش هيجيله خبر سيء اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد وبارك على محمد وعلى آل محمد كما باركت على إبراهيم وعلى آل إبراهيم انك حميد مجيد

مين الأخت الي حلمت!!

ما تفهمش هي واحده و خلاص

و طبعا الكل بينقل الرسالة و بيبعتوها لبعض بدون أي تفسير أو اي منطق

ابعت يا عم و خلاص



شوفوا الي جايه دي بقى جامده

اقتباس اقتباس ~ يارب جهازك يتحرق و شاشتك تتكسر و الكمبيوتر يدخله فايرس يحرقلك الهارد بتاعك للأبد لو ما نشرتش الرسالة دي لعشر اشخاص اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد وبارك على محمد وعلى آل محمد كما باركت على إبراهيم وعلى آل إبراهيم انك حميد مجيد

ما تفهمش دا في أي منطق أو أي دين يخليك تدعي على غيرك!!

يعني رخامة لأقصى الحدود

معقوله هي دي عقلياتنا!!


و في كمان بيكون كدا

اقتباس اقتباس ~ أقسم بالله العظيم أن أنشر هذه الرسالة لكل الموجودين في الميل عندي اللهم صلي على محمد وعلى آل محمد كما صليت على إبراهيم وعلى آل إبراهيم إنك حميد مجيد وبارك على محمد وعلى آل محمد كما باركت على إبراهيم وعلى آل إبراهيم انك حميد مجيد

يعني أنا لما اقرأ القسم يبقى كدا اقسمت على نفسي!!

دا هو كدا المفروض بيقسم على نفسه

أنا بقرأ قسم كاتب الرسالة مش قسمي

منطق غريب

زي لو أنا جيت و كتبت (أنا حمار)

لما انت تقرأها يبقى إنت كدا حمار!!

و لا الشخص الي كاتبها حمار؟

^_^


طيب

ما علينا....

نشد خط و نخش على حاجه تانية

-----------------------------------------
----------------------------------------

في رسائل بتبقى أخبار و تحذيرات

اقتباس اقتباس ~ اكتشف مجمع البحوث الأمريكي أن الكورن فليكس بيسبب سرطان قاطعوا الكورن فليكس و إنشر الرسالة دي لأكثر عدد من الناس

لأ بقى يقولك مجمع البحوث..

يا جامد إنت

فين بقى مصدر الخبر دا و لا مين قال كدا ما تفهمش!!

و برضو الناس بتتناقل الرسايل بدون أي منطق و لا تفكير


رسالة جاتلي من يومين تقريبا و ضحكت عليها

اقتباس اقتباس ~ أمريكا طبعت نسخ محرفة من القرآن و بينشر الآن في ****************** تحت اسم الفرقان

و في رسالة أخرى بنفس المضمون

اقتباس اقتباس ~ أمريكا حرفت القرآن و بينشر في الامارات تحت اسم مثلث التوحيد

و الله لو طفل مش هيقبل الكلام دا و لا هيصدق

طبعا دي اشاعة قديمة جدا

بقالها أكثر من 6 سنين

و بتجيني من اصدقاء و من أغلب الناس للأسف

لما تسأله ليه بتنشر أخبار زي كدا

يقولك و الله خبر جالي و نشرته ..أنا ماليش دعوة

تقوله طيب انت بتصدق الكلام دا

يقولك لأ بس الواحد ياخد حذره!!

منطق و فلسفة غريب جدا

أطلع اشاعات على البشر

و اقول مثلا فلان الفلاني عنده ديل زرافة

و أنشر الخبر دا للناس على الميل و أطلب منهم نشر الخبر لكل الناس

و الناس طبعا تصدق و تنشرها لغيرها

و يا سلام لو حطيت قسم و حلفان عشان يبقى مجبر و يخاف و ينشر غصب عنه!!

طيب انت دلوقتي يا ناقل الإشاعة

مش حرام عليك!!

انت مسؤول زيك زي الي مطلع الإشاعة

سواء صدقتها أو لأ

مجرد نشرك للخبر بدون مصدر يعني انت مسؤول عنه



دا غير الإشاعة المشهورة بتاعت 013 باين

يقولك لو جالك اتصال برقم 013 ما تردش عليه لأنه بيجيب سرطان

طبعا مافيش عندنا 013

في 010 و 011 و 012


و أخيرا طبعا بمناسبة مصل أو تطعيم إنفلونزا الخنازير

الكل دلوقتي بينشر أخبار

اقتباس اقتباس ~ أوعى تاخدوا المصل دا بيعمل سرطان و هشاشة عظام و معرفش ايه و لو أخدته هترجع معدتك!!

و كأن مثلا الي اخترعوا العقار دا كشك على ناصية شارع

مش عارفين انها شركات أدوية و بتبقى عامله اختبارات و دراسات قبل نشر و بيع العقار

فلنفرض إن له اضرار بنسبة معينه و الله أعلم

لأن فعلا في دراسات بتبحث عن اضراره

لكن مش بالشكل الطفولي الي إحنا قاعدين بننشره دا!!

ما اي دواء في العالم له اضرار و دا شيء مسالم بيه

المضاد الحيوي الي بناخده له أضرار

لكن بقى تلائي الناس عامله ضجه و سرطان و بيموت

و كأننا عايشين في غابة

مش عارفين إن في حاجه اسمها منظمة الصحة العالمية

و مقاييس دولية و رقابة

منين جبنا الإثبات!!

يعني حاليا بيتم تطعيم أغلب الطلاب في سويسرا

و عبال ما العقار يدخل بلادنا العربية هيكون في 6 مليون واحد صيني أخده

و كام مليون واحد في استراليا و كام مليون واحد في أوروبا



بتفكرني باشاعة حزام الأمان أول ما فرضوه في مصر

قالك بيعمل عجز جنسي!!

و الناس صدقت




المهم

أنا كل غرضي من قارئ الموضوع

إنه قبل ما ينشر اي حاجه يتحقق من مصداقيتها و إلا ما ينشرش

كل الرسايل و الكلام الي بيتبعت في الايميلات بتكون اشاعات بنسبة 99%

و أخبار ليس لها اي مصداقية

بالتوفيق و آسف على الاطالة...

[حنـــــون]

موضوع جامد جداااااااا ياطارق

فعلا انا بتجيلى الرسايل دى كتير جداااااااا

وطبعا معظمها مش ببص فيها حتى

انا كل الى ممكن ابعته هو دعاء دينى

بس مش اكتر لكن فعلا المستفز لما تحلفك

ويقولك لازم تعبت والكلام ده فعلا التحايل على الله

وصل لحد كده انى اقول حاجات غريبه واقنع الناس بيها انها بتجيب حسنات

يبقى الناس بئه تبطل تعمل خير وتفضل تبعت فى رسايل زى دى

المشكله ان الناس بتصدقك الكلام ده وبتاخف وبتبعته

بشكرك جداااااااااا ياطارق على الموضوع الجميل ده

تحياااااااااتى اختك حنون

[noona]

فعلا يا طارق انت اتكلمت عن ظاهرة منتشرة بقوة على شبكة الانترنت

مع زيادة وتوسع التواصل مع الغير...

بقى النت اسهل وسيلة توصل بيها اشاعة

كل شخص يعرفله خمسين ستين واحد وكل واحد منهم يعرف نفس العدد

فى ساعة واحدة تلاقى الاشاعة وصلت لعدد كبير جدااا

المهم بقى استغلالنا للوسيلة دى ... نقل اشاعات خاطئة ونسبة قليلة جدا من اللى بينقلوا بيفكروا الاول اذا كان الكلام صحيح ولا لاء

انا شخصيا فى اول استخدامى للانترنت كنت بنشر الرسايل اللى بتجينى دى ...

تخيلت فعلا ان ممكن اخد ذنب لو منشرتهاش ... طبعا وقتها مكنتش فكرت فى الموضوع او دورت على صحة الاشاعة دى او لاء

بعد كده حسيت اد ايه ان اسلوب النشر ده غير صحيح ... وخصوصا حكاية القسم دى

يقولك فى اخر الرسالة انت اقسمت انك تنشرها ... لو منشرتهاش حيحصلك كذا وكذا

زمان كانوا بيوزعوا ورق كده مكتوب عليه قصة مش عارفة مين من مكة حلم بالرسول صلى الله عليه وسلم فى المنام ... وقصة طويلة وفى اخر الرسالة بيقولك لازم تطبعا منها خمسين نسخة وتوزعها

وان فى واحد طبعها ووزعها بعد كام يوم كسب مش عارفة فلوس قد ايه كده ...

وواحد تانى اهملها ومنشرهاش ... مفيش يومين خسر كل اللى يملكه

طبعا كلام غير منطقى بالمرة ... انى اربط بين نشر رسالة وبين الاحداث اللى ممكن تحصل بعد كده ....

قصدى ان مش شرط لما انشرها يحصل كده او العكس

تخيلت وقتها ان اللى بينشر رسائل زى دى اشخاص كل همهم انهم ينشروا البلبلة و القلق بين صفوف المسلمين ...

والله اعلم بردو بغرض ناشرها ....

طبعا بشوية تفكير عقلانى فهمت ان ذكر الله مش بالاجبار والقسم والاسلوب اللى بيتنشر بيه ....

يعنى ممكن مثلا واحد عايز يبعت رسالة فيها تذكير ليك بانك تستغفر مثلا او تذكر الله ورسوله ... فى حد ذاتها كويسة وفيها ثواب لصاحبها .... لكن انى اقوله انك لازم تنشرها ...او اقسمت او كده ده اللى غير منطقى بالمرة

ونفس الشئ بخصوص الرسائل الخاصة ببعض شركات الاغذية مثلا او زى ما ذكرت خط 013

كلها اشاعات لكن لو جينا على المنتجات الغذائية نقول ممكن يكونوا المنافسين هما اللى بيعملوا كده عشان يأثروا على سمعة الشركة وانتاجها ..

لكن فى رسائل تانية الهدف من نشرها مجهول للاسف ...

زى ما قلت احنا محتاجين نميز ونفكر فى اى حاجة بتيجى قبل ما ننشر ...

""

موضوع واقعى ورائع يا طارق فعلا

تسلم الايادى على الطرح المميز ...

خالصـ تقديرى ،،،

""

[rony]

بجد موضوع جامد يا طارق لا ن الموضوع دة انتشر جدددد
والفكرة ان الناس بتكسل تفكر يعنى دة كلام صح ولا غلط
المهم انها بتبعت وخلاص
بسي انا ليا تعليق على نقطة انفلونزا الخنازير واثأرها الجانبية
لان دة مش مجرد اشاعة ولا كلام لان كل وسائل الاعلان بتتكلم عن الموضوع دة
وانا عارفة ان فى دول كتير بدات تاخد المصل
بس الفكرة فى الشركة الى تم التعاقد معاها
لانة يقال انها مخدتش الموافقة على انتاج المصل
وكمان وزارة الصحة منفتش الكلام دة
وبعدين لما تكون الاثار الجانبية صداع او دوخة او غير كدة
بس لما تقولى سرطان وغيرة ومحدش ينفى يبقلى لازم نخاف...
ولا اية يا دكتور

[~ zahorah~]

هههههههههه

اولا يا طارق جيت ع الجرح ع طوول

بجد حاجة منرفزة بدرجة مش طبيعية


لا بجد خلينا نتكلم بطريقة عملية

ساعات لما بتوصلي المسجات دي

بقعد و بجد اسال نفسي

اللي عمل الاشاعة دي او اللي صدقها او اللي مصدقهاش بس نشرها

عندهم كم سنة ؟؟؟ !!!!

سوال محير للغاية

ما دا عقل طفولي جدا

و الله اخويا اللي ما دخلش مدرسة لسى ،، بيألف اشاعات اجمد من كدا ^_^



//

//

بس يا طارق كل دا ممكن يهون بجد

يعني لما واحد يجي يقولك هتاخد مليون حسنة او معرفش كم حسنة


يعني ممكن ممكن نصغر عقلنا و نحاول نصدق

ان الحسنات بقت عبر الايميل



بس تجي تقنعني ،، بان ربنا هيضرني و هاخد سيئات

و هيحصل ليا حادث معرفش ايه

لو ما رسلتش الايميل ليه ؟؟؟!!!


طب ناخد الموضوع حته حته

اوكي هم مقتنعين بانه واجب عليا اني انشر المعلومة المفيدة اللي جايبينها ليا

او باحرى (( الاشاعة الكاذبة ))

و بما اني مش هنشر حاجة تفيد البشرية ،، هاخد سيئات

لاني ما نفعتش البشرية في حاجة خالص

فعشان كدا انا هكسب سيئة


طب نفكر شوية كدا ،، لو انا في حصة كدا من الحصص

نقول في حصة الكيمياء مثلا

عرفت معلومة من الاستاذة ،، معلومة كدا إثرائية

و حسيت انها مش هتفيدني و لا هتفيد البنات اللي معايا

و عادي كمات حياتي

و جا وقت الاختبار و جت المعلومة دي الإثرائية في الامتحان


معناها ان ربنا هيكتب ليا سيئات !!!!


طب ازاي !!!


ممكن حيد من اللي بيبعت المسجات دي يجي يقنعي

اني هاخد سيئات بعد امتحان الكيمياء

و لا ممكن بعد ما اخرج من القاعدة عربية تخبطني

لسوء عملي مثلا ههههه



دي حاجة التانية



مش ملاحظ ان كل حاجة بتجيب سرطان .. دي عقدتي

اوووف

اوكي في معلومة موكدة عند الكل ،، جسم الانسام في خلايا سرطانية

يعني ممكن يجيه سرطان بسبب او بدون سبب

و بعدين هم تركوا السجاير و عوادم السيارت و التلوث البيئي

و يجوا

ع الكورنفلكس ،، اكلتي المفضلة ^_^


دا حتى من رقائق الذرة ،،


حاجة منرفزة اووووووي يا طارق ،، اثرت غضبي :@




و لا و في مسج منرفز اكتر كمان ،، لو ما رسلتش المسج دي

الى 10 اشخاص ،، هيصيبك نحس لمدة عشر سنين !!!

و لو رسلتها لـ 10 ،، هبقى محظوظة لمدة 10 سنين !!


يا سبحاااان الله

يعني الكدب عيني عينك

لو قالو هنكتبلك سيئات و حسنات ارحم و الله

ع الاقل حاجة غيبية مش بنعرفها

اما اني هتنحس او هبقى محظوظة حاجة فضيعة


ع اساس ان في العشر سنين دي كلها مش ممكن

حد قريب مني يموت

او

اني اجيب درجة زفت

او

اتخطب و تتفك خطوبتي

او او او



يا عم طارق انا من فترو طويلة بقيت اكبر دماغي

من كتر ما دماغي تجننت من الحكاية دي


بس انت رجعت و جننت دماغي من تاني


بس انت عارف ،، دي مش مشكلة مسج ع فكرة

دي مشكلة فكر المجتمع اللي بقى صغير جدا

بقى تقريبا اصغر من عقل طفل

:s

للاسف يعني مجتمعنا بقى يصدق اي حاجة و كل حاجة


طب ما اللي يصدق السخافة دي ،، ما يمكن

بكرا يصدق اشاعة ع صديقوا المقرب ،، بس طبعا اشاعة من نوع تاني


يعني المجتمع بايز بايز

كدا او كدا



و المشكلة انا في وحدة كدا قريبة مني اووي

الا وهي اختي ^_^

و دي الفاجعة الكبيرة ،، بترسل الايميلات دي


بسالها ليه ؟؟!!!


انتي مصدقة ؟؟!!


بتقولي لا بس كدا ،، بخاف

:@


لا بجد هتشل




ع العموم دي وجهة نظري الشخصية

و اهوو جبت مثال قريب مني جدا

عشان محدش يقولي ،، اني مش بحترم وجه نظر الناس ^_^


ع كل الاحوال


الموضوع مش بسيط ،، مش ايميل بس

الموضوع موضوع فكر مجتمع عربي




ثانكس يا طارق ع التوبيك الجميل ،، و اللي بيحرق الدم ^_^

ظاهرة مهمة و منتشرة جدا و سخيفة كمان

و عجبتني ذيل زرافة جدا ههههههههههههههه

مرسي اوووي

بانتظار المزيد من ابداعاتك الرائعة


أختك

[just (o]

السلام عليكم ورحمة الله وبركاته


والله معاك حق الموضوع انتشر جدا اصبح فعلا ينرفز

والمشكلة اصلا ان نص اللي بينشر ويبعت الرسايل دي مش بيكون مصدقها ولا مقتنع بيها ده بيبعت تحصيل حاصل

الله سبحانه وتعالى وحده اللي بيرزق وبيده ملكوت كل شئ وهو وحده القادر على الضر والنفع

( واعلم ان الامة لو اجتمعت على ان ينفعوك بشئ ما نفعوك الا بشئ قد كتبه الله لك لو اجتمعت على ان يضروك بشيئ ما ضروك الا بشيئ قد كتبه الله عليك )

صدق صلى الله عليه وسلم

يعني مش الرسالة ولا صاحبها اللي هينفعني ولا يضرني ربنا سبحانه وتعالى هو وحده القادر وهو علام الغيوب واي شيئ في الحياة احنا مامورين بعمله او منهيين عنه ( يعني ممكن ناخد منه حسنات او ناخد عليه سيئات ) مذكور في القران الكريم والاحاديث الشريفة

مش في حلم فلان ولا علان

اما بالنسبة للاشاعات الغريبة دي فده طبع البشر لازم اي شيئ جديد تطلع عليه الف اشاعة كده

ربنا يهدينا جميعا


وشكرا جزيلا على الموضوع الواقعي فعلا

[الحان الورد]

موضوع جاامــد بجد ياطارق
وبيتكلم عن ظاهرة انتشرت اووي فعلا
انا بتجيلــي الرسايل ده على ايميلي
وبقــرأها من باب الفضول
بس اللي بينرفزني زي ماقلت اني
اجبر اني اعمل حاجة،،،
زي اللي يقسم انك تبعتها لحــد او يقسم
انك تقـول الدعاء او الذكر اللي فيها!
مش غلط ان احنا نفكر بعض بالذكـر
بس ممكن تكون بطريقة تانية غير انك تجبر حد على حاجة
وتقسم عليــه ده في آية في القران بتقول
{لا اكــراه في الدين}
يعني الرسل لما كانوا بيبعثوا للناس ماكانوش بيجبروا حد
او >يتحايلــوا <عليــهم عشان يؤمنوا،،
ممكــن مثلا عن طريق التوبيك بتاعك تقدر تفكر الناس
وكلنــا بننســى بس ساعتها هتكون بطريقة احسن بكتيير،،
وللاسف الناس هي اللي بتساعد على انتشار الحاجات ده
يعنـي اول ماابتدأ الموضوع ده
نشــرتهـ الناس على طوول من دون ماتفكـر هو صح ولا غلط
واللي فيه متاكدين منه ولا لا،،،
::::
بجــد موضوع رااائع
تسلم الايــادي ياطــارق
بالتوفيق دايما
>::>

[lolla]

ياه يا طارق انت طيب اوى

الرسايل دى بتتبعت عشان تتقفل

زمان كنت بقرأ بس لما عرفت الى فيها

بقيت اقفل على طول من غير ما اقرأ

وعارف كمان غير كل الامثلة الى ذكرتها

فى ادعية يعنى يقولك قول الدعاء الفلانى

وقول كل الى نفسك وهو هيتحقق

مكتنش حد غلب !!

ولا يقولك دعاء بيخاف منه الشيطان

حاجات غرييييييييبة

والى يغيظك ان فى ناس بتصدق

والله من يومين لقيت واحدة صحبتى مصدقة

وبتقول دعاء كدا

وكل دا بسبب ان احنا بنصدق اى حد يقولك قال الله وقال الرسول

طيب فين دماغك انت

ديننا الحمد لله كل شىء فيه منطقى جداااااا

حتى فى علم الحديث اول حاجة تعرفك ان الحديث دا موضوع

انه يكون غير منطقى

زى مثلا حديث كدا بيقولك الباذنجان لما اكل له

يعنى انت ونيتك شوف انت عايز ايه وكله بتنجان وهو يتحقق

الظاهر كان واحد بيبيع بتنجان وعايز الناس تشترى راح الف حديث

وشكراااااا يا سلفر على الموضوع

بجد اكثر من رائع

وربنا ما يحرمنا من ابداعك

[nooody]

يقول الله تعالى : ( يا أيها الذين آمنوا إن جاءكم فاسق بنبأ فتبينوا ...)


مش مجتمعاتنا بس هى اللى بتعانى من المشكله دى

الاشاعات موجودة فى اى مجتمع مع اختلاف طريقه

التعامل معها

فى ناس هتتعامل معاها بطريقه عقلانيه

التفكير ولو للحظه فى مضمون الرسايل دى

هيفرق كتير فى رد الفعل تجاة الرسايل

دى

موضوع جميل

تقديرى

[Just G!rl]

بصراحه الموضوع جامد والتعليقات أجمد

مش أي حاجه بتتقال بتصدق

عادي الكل بيجيله الرسايل دي

أنا بقفلها وكأن شيئاً لم يكن

أنا معتقدش أساساً إن في حد بيصدق الكلام ده

وعنده عقل يقدر يميز بيه ممكن يبعتها من باب الفضول

يعني يختبر الي قدامه بيصدق ولا

شكراً يا طارق على التوبيك الجميل

متحرمناش من ابداعاتك ...