وعاء بلا قاع

[nooody]

كانت من أوائل الجمهوريه منذ بدايه المراحل الابتدائيه

وصولا الى المرحله الثانويه .


والدتها استاذة جامعيه ولديها الكثير من الاعباء , ولكن ذلك لم يكن


يشغلها مطلقا عن متابعه مستوى ابنتها فى المراحل الدراسيه المخلتفه



وفى يوم ما جاءت الابنه شاكيه لوالدتها عجزها عن فهم جزئيه معينه

فى احدى المواد


نظرت لها الام وابتسمت وقالت لها :

اتتذكرين المعلومه كذا التى مرت عليكى فى الفصل الدراسى الاول

التى كانت تقول كذا وكذا

حاولت الام احداث نوع من الربط بين المعلومه القديمه التى لها علاقه

بالعلومه التى استعصى على الابنه فهمها


واليكم ماذا كان رد فعل الابنه


نظرت الى امها فى تعجب قائله :

( هى المعلومه دى مش خدتها وامتحنت فيها وخلصت خلاص )


صعقت الام من رد الابنه عليها

وقالت فى دهشه :

كيف كنتى من الاوائل كل هذة السنوات !!!!

ام تم اختيارك بالخطأ !!


حقا وعاء بلا قاع


تعودنا على ان نملىء عقولنا بالمعلومات , وتحقيق هدفنا يتوقف عند

نقطه واحدة الا وهى النجاح


اتعلم لكى انجح

لا اتعلم لكى اتعلم

هناك فرق .....


المعرفه ليس لها حدود ..... طوال مدة بقائى على قيد الحياة فانى اتعلم

ولكن نحن من وضع تلك الحدود

ربما اصبحت تلك سمه اساسيه فى نظام التعليم

مخرجات التعليم لدنيا تعتمد على الكم وليس الكيف

فهذا ليس اتهاما..... وبامكانك ان تتاكد


تامل ملايين الخريجين سنويا مستهلكين بالدرجه الاولى

وذلك لعدم وجود تنسيق بين متطلبات سوق العمل ونظام التعليم

وبعد كل هذا نسعى للتطوير!!!!

اى تطوير فى ظل العمل بنظريه الحشو !!

اى تطوير فى وعاء بلا قاع بل ايضا بلا جدران !!

[SiLver Spectra]

اقتباس تامل ملايين الخريجين سنويا مستهلكين بالدرجه الاولى وذلك لعدم وجود تنسيق بين متطلبات سوق العمل ونظام التعليم وبعد كل هذا نسعى للتطوير!!!! اى تطوير فى ظل العمل بنظريه الحشو !! اى تطوير فى وعاء بلا قاع بل ايضا بلا جدران !!

عشان احنا مجتمع نمطي

مش بيشوف أدامه غير كليتين تلاته

و وظيفتين تلاته

و بنبني مراكز اجتماعية من دماغنا (دكتور يعني شاطر)

(نجار يعني خايب)


فأكيد كل الآباء هيحالوا بقدر الامكان يصبوا عيالهم في الكام قالب (كام كلية)

و النتيجة انتشار كثيف للبطالة


بمناسبة انك في كلية اعلام

لسه كان في دكتورة من اعلام جامعة القاهرة كانت بتقول إن الكلية لواحدها بتخرج 900 طالب تقريبا

و الحكومة بتوظف 200 واحد في السنة

دا غير الجامعات الأخرى و الخاصة

شوفي عندك كام طالب و نسبة الي بيشتغلوا كام


هتلاقي في تفاوت كبير في النسبة

هو الي بيخلق فجوة عدم تكافؤ فرص العمل



بصفة عامة احنا نمطيين

واحد فتح سايبر و كسب كل الناس تفتح سايبر

واحد فتح محل موبيلات و كسب كل الي يفكر في مشروع يفتحه يقوم فاتح محل موبيلات

و هكذا...


على فكرة الناس الي بيضرب معاهم الحظ هما الناس الي بيعملوا حاجه ما اتعملتش قبل كدا

ممكن يبقى من أغنى الأغنياء بسبب إنه مش شبه غيره


لكن الي بيقلد دا آخره ممكن يعيش على أده

يادوبك قرشين يستر بيهم نفسه



موضوع قيم يا هند و تقدري تفتحي منه عدة مجالات نقاشية


بالتوفيق...

[حنـــــون]

يجد ياهند موضوع رائع اصبتى الحقيقه فعلا

الكل بيتعلم عشان ينجح مش عشان يتعلم ويكون

عنده فكر وعقل يقدر يوزن بيهم امور الحياه

بنفضل نملا عقول الطلبه بالمعلومات طول السنه

وفى الامتحان بنفرغها وبعد كده نبدا من تانى نملاها

ولا فى افاده ولا فى اى حاجه كلها سنين وبتعدى وفى النهايه

شهاده جامعيه ومش عارفين كمان نشتغل بيها

يبقى اى تطوير واى تقدم هيحصل

بشكرك جدااااااااااااا على موضوعك الرائع

تحيااااااااااتى اختك حنون

[بنوتة مصرية امورة]

مشكوووووووووووووووورة على الموضوع الجامد دة فعلا دى الحقيقة

[مشتاقه للجنه]

وللاسف هذا ما يحدث دائما

تمتلئ العقول لنفرغها على ورقة الاجابه

وبمجرد خروجنا من باب اللجنه نسينا ...

بس لمجرد ان يحمل لقب ليسانس كدا

و بكالوريوس كدا ........وبتفوق

والحق احجز مكانى على اقرب رصيف

لا فائده عاده الا ورقه تعلق اولقب يمنح

مهندس .. استاذ .. دكتور ...

شكراا هند بجد موضوع هام

خالص تحياتى

[egy girl]

علي فكره الكلام ده بيحصل مع معظم الناس مش واحد ولا اثنين بس ومالهاش حل الا ان كل واحد يثقف نفسه بنفسه وبس وشكرا علي الموضوع الرائع دا

[(طائر الشرق)]

السلام عليكم

تحيه عطره تحمل كل معانى الاحترام والتقدير

لشخصك ولكلماتك الرائعه الجميله

تقبلى مرورى

وتقبلى تحياتى

[هيا*HYA*]

موضوع فى منتهى الروعه والواقعيه
فعلا دة اللى بيحصل والناس اغلبها اصبح وعاء بلا قاع ودة لسببين:
اولهم.. ان الناس مبتفكرش وبقينا نعتمد على غيرنا
زى ما قال طارق نمطيين .. والابتكار والابداع مات
ومبقاش فى جديد.. بسبب الكسل وغلق العقول
يبقى ازاى هيتعلموا حبا فى العلم نفسه
لا العلم اصبح وسيله للوصول لاهداف اخرى .. يعنى يتخرج ويشتغل فى وظيفه كويسه وياخد اعلى مرتب
ووووو حجات كتيير اوى
والسبب التانى.. التعليم اللى بنتلقاه اصبح حشو كتب والسلام
يعنى قليل اوى لما تلاقى مواضيع وافكار ودروس هادفه
كله بهدف ملئ كتابوتكبير حجمه
علشان نعقد الطلاب
لكن لو كان بيحتوى على معلومات جيدة وخالى من التعقيدات وطريقه اللف لتوصيل المعلومه
كان الطلاب هيحبوا كل المواد الدراسيه وهيأكلوا الكتب دى ويهروها مذاكرة
ودة اكيد بنلاحظه فى بعض المواد
يعنى من افضل المواد الهادفه والمفيدة .. النحو والرياضيات والعلوم بأنواعها
غير ذلك نقول يا رحمن يا رحيم على المناهج
وربنا يسترها معانا

[ARAGON]

هلا يا نوووودي،،

انتي بتخلعي من الحلقة عشان تنزلي مواضيع،،

هههههههههههه،،،

شوفي يا نووودي،،

للأسف الفكر المتوارث حالياً في مجتمعاتنا ،، هي ايه،،


ذاكر تنجح ،، غش تجيب مجموع،، المقولة دي مشهورة جداً،،
بس ملهاش دعوة بالموضوع،،،
انا غرضي ايه،،
انا طالما ها نجح ها نجح،، يبقى ليه اوجع دماغي،،،
دا مبدأ،، ماشي عند ناس كتير ،،،
فيه مبدأ تاني اللي انتي بتتكلمي عنه،،
هو إن الناس بتذاكر عشان تنجح،، بس،، هي دي المشكلة،،

فين المعلومات اللي انت اخدتها مثلاً،، مفيش طبعاً،،، انا كان هدفي احفظ الـ 30 صفحة عشان اخلص على الامتحان، طيب ليه انت مافهمتش الموضوع وفهمت الصفحات دي بتتكلم عن ايه،،
يابني دي حاجات كتير ممكن تقابلك عن الموضوع ده،،،
للأسف مفيش حد بيحاول يذاكر عشان يفهم،، كله بيحفظ وبس،،
ليه كله عرف الغرض،، اطلع الأول كل سنة،، ومش مشكلة في الآخر اطلع ايه،، (لا أعقل)
هي دي المشكلة انا قابلت ناس كتير من نفس العينة،، مية في المية في المجموع،،

بس للأسف تحت الصفر لما تناقشيهم،، تسأليهم على حاجة تلاقي المعلومات صفر،،

تستغربي ،، طيب هو ايه اللي جراله،،،
خلاص الوسيلة في مصر ،، روح الدرس،، ظبط المدرس،، تأخذ درجات،،
والناس تعمل ايه،، مفيش حد فاهم حاجة في الموضوع،،
كله مبسوط بالدرجة اللي الفالح جابها وخلاص،،
للأسف مفيش متابعة،،،
بس المشكلة الموضوع ده لو جينا نشوف تطبيقه يبقى في الرياضة أكثر من اي حاجة تانية،،
المعادلات والقوانين متواصلة ومتجددة باستمرار،،،
للأسف مفيش حد بيحب يطور من نفسه،،

[Sєяєєη●•ʚɞ]

موضوع جميل اوى يا هند
للاسف التعليم معتمد على الكم والحفظ وتعليم نمطى واحد+ واحد = اتنين
والطلبة نفسهم اعتمدوا ان تخزين المعلومات لفترة مؤقته وبس وان المعلومة بتنتهى مع نهاية الامتحان ودة طريقة غلط لانها طريقة اليه مش بتزود المعرفة ولا بتنمى التفكير وزى ماقولتى ياهند ان التعليم عملية مستمرة وبيكون مدى الحياة والتعليم المثمر هو اللى بينمى التفكير وبيغير اتجاهاتنا وبينمى افكارنا...بشكرك على الموضوع ياقمرايه