مستنقع SiLver Spectra

[SiLver Spectra]

عاجل جدا : سقوط صاروخ من الجيش الحر على مسرح عرب ايدول في بيروت و مقتل جميع المتسابقين
و mbc تعلن فوز أحمد جمال (الناجي الوحيد) و الذي صرح بأنه كان في الحمام عندما سقط الصاروخ

[SiLver Spectra]

ينهار اسود عالالماني يا جدع ..عشان تقول balance is lost تنطق الكلام دا كلو..داالواحد عايزله كورس في نطق الكلمة دي بس
لا خلاص أنا غيرت راي و مش مسافر ألمانيا
الألماني مشكلته في الاسماء عندهم مكلكعه كلكعت السنين ..هو اه تحس ليها هيبة كدا في كلكعتها ..بس مش كدا يا اخي الالماني حرام عليك ..
شوف بقى الياباني تلاقي الاسماء عبيطة (ماو) (سوشي) (آش) (كاميكازي) ..تحس عيل نغة عنده سنتين اللي عملهم اللغة ههههههه

المهم
دي اغنية ألماني لرامشتاين



عاجبني صوته الذكوري الشرير ..كان نفسي صوتي يبقى كدا

[SiLver Spectra]

راغب شكله مسخره بالشنب و لا عسكري الامن المركزي ههههههههههه
و دا يدل على ان اي حد ممكن يبقى حلو بس لو حط في دماغه ..أو شافله حد متخصص جمال عشان يسنفره

[SiLver Spectra]

دمعة و ساحر و حوده بيشوفوا اللي كنت بشوفه ايام الرئاسة
جه الوقت اللي نبدل فيه الادوار و ابقى محبوب الاعضاء ههههههههه
يا جدع دا الواحد مزاجه اشطه و الله

دي لساحر و منه

[SiLver Spectra]

اشتريت كارت 25 جنيه من الجهاز الفوري دا اللي بيطلعلك ورقة برقم الكارت
و روحت البقال و المطعم بعدها و كان عندي احساس اني هرميها
رجعت البيت مش لاقيتها ..قلبت الكيسين باللي فيهم ..ورقة الكارت اختفت
رميتها باين و انا ماشي
اضايقت اوي بصراحة
ماله الكارت اللي كان بيتخدش يعني !

[SiLver Spectra]

من اسبوعين تقريبا ..كنت راجع من المنصورة لدمياط
لاقيت راجل ملتحي بلحية كبيرة و لابس زي باكستاني و شكله باكستاني وش بالجلبية بتاعتهم دي القصيرة اللي بتبقى عامله زي المريله ..و الطاقية الملونة اللي بيحطوها فوق راسهم
المهم ..الراجل دا قعد جنبي ..و لاقيته كان بيكلم حد في الموبايل كلام مصري مكسر
قولت خلينا نسأله .. : انت باكستاني ؟
قالي أنا امريكي ..في لحظات لاقيتني بقول هي امريكا قلبت على باكستان
قولتله ايوه اصلك منين ..قالي باكستاني بس عايش في امريكا من 20 سنة
قالي you speak english ?
قولتله شوية
طب انت جاي هنا تعمل ايه ؟
قالي : شغل شغل ..بجيب بضاعة و ابيع في امريكا
طبعا مش محتاجه تسأله بضاعة ايه من دمياط أكيد اثاث


لاقيتني سرحت كدا و بفكر ..الراجل دا كان يعرف يعدي نقطة التفتيش اللي بين المنصورة و دمياط ايام مبارك ؟


المهم ..
طيب انت كنت بتعمل ايه في المنصورة
قالي متزوج هناك ..
عرفتها منين دي ؟ (حشري اوي )
صديق في امريكا


و بعدين لاقيته بيقولي مجاهدي اسلام !
قولتله : نعم
قالي أنا مجاهدي اسلام
مااستوعبش ..دي منظمة و لا ايه
قالي : انا اسمي اسمي
قولتله : اسمك مجاهدي اسلام ..آه
طب و دخلت بيه امريكا ازاي دا هههههههه
مش رد او مش فهم مش عارف ..بس بيني و بين نفسي تخيلته داخل المطار هناك ..اكيد بيقلعوه السروال ههههههه

قولتله ايه رايك في الجو ..برد صح
قالي لا هوت هوت
قولتله هنا هوت اكتر و لا باكستان ؟
قالي لأ هنا صحرا
قولتله يا راجل دي صحرا دي ..عندك خضره على مرمى بصرك اهي
بص تاني كدا ..قالي لأ صحرا صحرا

و بعدين قالي ترين يروح بورسعيد
قولتله ايه ؟
قالي ترين ترين
قولتله ايه ترين دا
قالي ترين و شاور على السكه الحديد بايده
قولتله اه ترين قطر ..لا مش اللاين دا اناثار وان فروم سويس

و بعدين فجأة لاقيته راح لازق موبايله في وداني
لاقيت راجل بيكلمني و بيقولي : بص يا اسطى ..هتنزله عند مفارق المينا
قولتله : اي مفارق بالظبط المينا ليها اكثر من مدخل
قالي عند البنزينه يا اسطى
قولتله اللي قبل كفر البطيخ
قالي ايوه اللي قبل كفر البطيخ ..ماشي يا اسطى
ماشي يا حاج (مفكرني السواق مش مهم ..لو كانت بنت كانت هتعمله مهرجان و تقوله انا مش السواق ههههههههههههه)

و بس ..فضل طول الطريق يكلمني عن صلاة الفجر و لازم تصليها بس بلهجه مكسره و فيها انجليزي
و انا مش فاهم نص كلامه و بهزر راسي لسببين .اولهم ان الشباك مفتوح و عامل دوشة و ثانيهم هو انه لا بيتكلم انجليزي و لا مصري ..حاجه بينهم كدا ..بس فهمت كتير برضو لانه مش محتاج فكاكه يعني
و عند البنزينه قولت للسواق يقف و سلم عليه و نزل

و دي كانت التجربة الباكستانية

[SiLver Spectra]

من مكارم الثورة السورية هو ان في مطاعم سورية كتير فتحت في مصر
و أخيرا لاقيت زعتر بعد ما افتقدته لمدة 7 سنين
هو اه الحلوم بتاعهم مش حلوم ..و لا الكنافة النابلوسية نابولسية
بس اهو ادينا طلعنا بزعتر

[SiLver Spectra]

من وحي الدراما المصرية المبتذلة
تيجي الزوجة و تقول للزوج عندي خبر حلو ..
فيقولها ايه هو
الزوجة تدلع و تعد تبتسم و تقلب في وشها و تقوله : أنا...أنا..
الزوج يعمل انه عبدو العبيط ( مع احترامنا لعبدو احضان الحبايب هههه) و يعد يقولها خير يا بت
الزوجة تكمل الدور : أنا ..أنا يعني ...
و طبعا المشاهد بيبقى عارف الحوار الاهبل دا ..و العجيب انه بيستمر في المشاهدة
و بعد ما المخرج يدي للممثلة الاشارة عشان تنهي المشهد
تقوم ناطقة : أنا حامل
الزوج بقى يطير من الفرحة و يتنطط مش عارف ليه..
و في دراما اخرى ..الزوج بيتصدم و يقولها لازم تنزلي اللي في بطنك

مافيش ابتكار خالص يا سيناريست

[SiLver Spectra]

سلوى : شكري أنا كنت عايزه اقولك حاجه
شكري : قولي يا حبيبتي ..
سلوى و هي بتقلب وشها و مكسوفة: كنت عايز أقولك ان أنا ..
شكري : ان انتي ايه يا حبيبتي ؟
سلوى : ان أنا يعني ..
شكري : قولي يا حبيبتي قلقتيني كدا
سلوى : ...أنا...
شكري : انتي حامل ؟
سلوى :لآ....ان أنا اشتريت دبدوب كبير النهارده و هنيمه جنبنا

ابداع مني اهو يا سيناريست

[SiLver Spectra]

"كل جبار ظالم جته داهية"
"كل جميلة ظريفه جتها مصيبة"
مين فاكر العبارتين دول في الرياضيات ؟
كل ..اللي هو الربع الاول في احداثيات السين و الصاد..الجا و الجتا و الظا موجب
جبار في الربع التاني من الاحداثيات..هنا الجا بس اللي موجب
ظالم في الربع التالت..هنا الظا اللي كانت موجب
جته في الربع الرابع ..هنا الجتا اللي كانت موجب

و الله ذاكرتي طلعت تمام اهو