مستنقع SiLver Spectra

[SiLver Spectra]

مبروك كسبت 3 دقايق مجانا.. ابعت رساله ب 4 جنيه عشان تاخدهم
"فودافون لما بتحب تعمل عروض"

[SiLver Spectra]

كنت زمان بشتكي من ان المصريين بعاد عن السياسة و شاغلين دماغهم بكورة و أغاني وفضائيات دينية و كلهم معزولين عن الواقع السياسي , سواء كان بسبب القمع او بسبب الخوف

بعد الثورة ,,
باقيت دلوقتي بشتكي ان ماعتش في غير سياسة كلو بقى بيتكلم فيها !
و دا خطورته في ان المخرج ماعتش مخرج و بقى شخص وظيفته كل يوم يطلع على فضائية و يعد يشتم في الحاكم و يخون فيه و في نواياه
و الكاتب و السيناريست و الممثل و المطرب و الشيخ و كل الي نفسك فيه

امال مين هيبدع في البلد دي ؟ و مين هيشتغل !
آه السياسة شيء مهم و انا شخصيا طول عمري بحبها ,,بس مش لدرجة انها تقضي على الابداع و تبقى هي كل شغلتك في حياتك ! اشتغل يا اخي!

الوضع الي وصلناله من تشرذم و تخوين و تشكيك خلاني أكره كل الأحزاب و كل الساسة ,,كلهم بيدوروا ازاي يشوهوا في الطرف التاني , و كلهم بيجروا على الكرسي و عايزين البلد تبقى بمعايير و مواصفات في دماغهم , كلهم من اصغر حزب لاكبر جماعة
و كلهم تصريحاتهم طفولية و مش واقعية , و مافيش حد فيهم عنده رؤية حقيقية , مجرد كلام و وعود في الهوا مالهاش اي مصداقية لانها مش بتلمس الواقع
مجرد ناس بتدور على انه عايز يعد عالكرسي و لما يعد يبدا يمارس الرئاسة و يمشي الي كان ماشي و يبقى الوضع كما هو عليه , في حين مصر محتاجة عقلية فاذه تحكمها تقدر تعمل طفرة , و بالعقليات الي بشوفها في النخبة السياسية , فمافيش عقلية فاذة

دا غير الشباب المندفع الي بيحب يهيص في احداث الشغب
و تلاقي واد بيرمي في طوب و لا بيولع في عربيات شرطة و اول ما يتصاب يقولك الحق الشهيد

و بالتالي كان قراري في عدم النزول و لا المشاركة , لأن بالوضع دا البلد بتدهور أكثر فأكثر,,و الي عايز يقول باع القضية يقول
بس الي أنا بمؤمن بيه : مش دي الطريقة الي ممكن تبني بيها مصر , و مش دي الطريقة الي تعمل تطور لمصر ,مش دي الطريقة الي تقوي مكانة مصر الدولية و الاقليمية , دي الطريقة الي توقف حال البلد و تضعفه , و دي الطريقة الي تخلي البلد أكثر فقرا , و هيحصل قريب مع ارتفاع الاسعار المرتقب ,,طب دا سببه ايه ؟
ماحدش عايز يشتغل ,

الإخوان المفروض ماكانوش خاضوا الانتخابات المرادي و يكتفوا بدعم مرشح من الي في الساحة و كان وقتها هيفوز , خاصة لو عليه اجماع من اطياف مختلفة , دا الي مصر كانت محتاجاه في الفترة الحرجة دي
لكن الوضع الي احنا فيه دا لا بيصب لصالح مصر و لا بيصب لصالح الجماعة بل انه في كل يوم هيعدي هيزيد الكره اكثر ليهم

و كفايه مراهقة سياسية

[SiLver Spectra]

محتاجين حد ينشط صفحة الفيس بوك الخاصة بالمنتدى
و الشروط انه يقدر يحط فيها اهم فعاليات المنتدى + انه يشارك بصور او فيديوهات او كوميكس يخلي الصفحة جاذبة
و الأهم انه يكون من الناس الي بتقضي وقت على الفيس بوك بشكل يومي

الي عنده استعداد لكدا يبعتلنا في رسالة او تقييم

[SiLver Spectra]

الوضع الحالي هو نتيجة مش سبب
نتيجة للتهميش و عدم الاستماع

انا لساني دلدل و انا بحاول اقول للمؤيدين للاعلان الدستوري ان العجلة مش هدور بالدستور اللي هو عبارة عن حبر على ورق!
يا جدعان انتوا مش كل مصر و في ناس تانيه !
يقولك لأ احنا كل مصر
يا جدعان العجلة هدور بالتوافق الوطني و حالة الرضى العام الي المفروض تكون مقبولة زي ما كانت وقت ما فاز مرسي و في بداية فترة حكمه , بلاش ندخل نفق مبارك المسدود بتاع مجلس الشعب المزور
مافيش فايده

للاسف عدم الحكمة دخلتنا في نفق مسدود !
و اصبحت المحنة أكثر تعقيدا و صعب تلاقيلها حل بعد تفسخ المجتمع !

حد ممكن يقنعني دلوقتي ان الوضع الحالي وسط المظاهرات الي بتنادي باسقاط الدستور , هو افضل و اكثر استقرارا من ان التاسيسية كان يعاد تشكيلها و تبدا في جلساتها بمشاركة و توافق الكل او نسبة كبيرة من المجتمع ؟
مين كان هيكون احسن و اكثر استقرارا ؟
حتى لو هتعد 5 سنين تكتب في الدستور , فهي حاله احسن مليون مره من التشرذم و التفسخ الي احنا فيه !

ماعتش حد بيحترم القضاء ,,و البركة في اكبر راس في البلد الي علمت الناس انها تاخد حقها باديها سواء بالحصار او بالمنع او بالاشتباك !

انا ضد العنف بكل اشكاله,
و بالتالي كان قراري عدم النزول برغم ان الاحتجاجات و الاحتكاكات الي حصلت كانت على بعد ألف متر بالظبط من بيتي (حيث مقر الاخوان الرئيسي في دمياط)
مش حبيت اشارك في اعمال قطع الطرق و الاشتباكات
مش حبيت اشارك في اسقاط الاقتصاد أكثر من كدا برغم كل تحفظاتي و اعتراضاتي

لكن في النهاية ,,
الساسة تقع في رقابهم مسؤولية الدماء
و على راسهم الرئيس

لك الله يا مصر

[SiLver Spectra]

اقتباس اية يامعلم عايزين تكتبلنا شوية من دول فى القسم ولا نسيت ولا اية

و الله يا أمجد خلاص
أنا قولت بما فيه الكفايه , و كان كل همي اننا ما نوصلش لمرحلة التفسخ الي احنا فيها دلوقتي
و حذرت منها,,
أنا مش مبسوط و لا بهيص في الأحداث , بل اني من أكثر الناس الي بتزعل لما افتح مواقع اجنبية و الاقي مصر اول خبر و صور كلها حرايق !

كل كلامي كان عن التوافق الوطني و ان الكل يشارك عشان مانوصلش لمرحلة الصدام
زي الصدام الي كان بيحصل من الاسلاميين لما كان النظام السابق بيهمشهم

لكن ,,
للاسف الي حذرت منه حصل ,,

[SiLver Spectra]

تجاهل جبهة الانقاذ للعنف الذي يحدث و قطع الطرق و الميترو و حرق الاقسام و الاكتفاء بالادانة الضعيفة ضد العنف بكلمة عابرة
بينما يغازلون أهالي محافظات القناة لكسب الشعبية

يقابله أيضا تجاهل السلطة لما كان يحدث للمحكمة الدستورية من حصار استمر لأكثر من شهر

يجعلني ايقن أن الساسة في هذه البلاد ,,
يتراقصون على دمار مصر !
و لا هم لهم الا للمكاسب

سحقا لكم جميعا ,,

[SiLver Spectra]

حد لسه له شوق لنوكيا !؟

فعلا زمن مابيرحمش
لو ماعرفتش تسوقه هيسوقك
معرفتش تواكبه مش هيكون ليك مكان
و أعد عيط عالماضي ليوم القيامة

نوكيا كانت الشركة الأكثر مبيعا في الشرق الأوسط بالتحديد

طب حد فاكر دا ؟



تسمع عن حد لسه بيشتريه ؟


" آه يا دنيا يا بنت اللذيكه "

[SiLver Spectra]

آخر التحديثات

1) شريط الأخبار
((ابقى مع الحدث ))
يعتمد على جلب الأخبار العاجلة بشكل آلي باستخدام خاصية ال rss
و مش لاقيت أفضل من اليوم السابع من حيث المهنية في عرض الآراء المختلفة
اليوم السابع هو موقع الأخبار الأول من حيث الزوار على مستوى العالم العربي
و الميزه انه بينزل أخبار عاجلة كثيرة في اليوم و بالتالي التحديث بيكون مستمر
على عكس الجزيرة أو أي موقع تاني تحديثه ضعيف و بيجيب أخبار رئيسية و مش بتتحدث غير مره في اليوم و كمان بيختص بالدول العربية ككل

2) آخر ابداعات الأعضاء
تعمدت برضو هنا اني استخدم تقنية آلية لجلب المواضيع اللي بيتم كتابتها من الأعضاء بنفسهم , بعيدا عن التدخل البشري و اليدوي اللي غالبا هيكون فيه تقصير و صعب انك تقدر تحصي كل المواضيع اللي بتنزل بشكل شامل يوميا

الفكرة عامة جاءت بعد أن اصبحت البنرات كلها عبارة عن مسابقات و تكريمات , بالتالي الشخص اللي بيحب يقرأ مواضيع سواء حوارية او ابداعية مش هتثيره البنرات اللي اغلبها فعاليات
فجت الفكرة في اننا نظهر المواضيع المكتوبة بحيث اننا نثري النقاش في المنتدى + اننا نوفر على اصحابها عناء تصميم البنرات

و عشان هي خاصية آلية فتم الاعتماد على الاقسام اللي بنكون ضامنين بنسبة كبيرة ان الموضوع فيها بقلم العضو , لكن مش بنسبة 100% و هقولكم ليه لما هذكرلكم اسماء الاقسام دي

أسماء الأقسام اللي مواضيعها بتدخل في جدول آخر ابداعات الأعضاء
* بقلم أعضاء بنات مصر
* خزعبلات الأعضاء
* اليوميات
* فضفضة الأعضاء
* هوايات الأعضاء
* الأعضاء المميزين
* الابداعات الأدبية
* الابداعات العامية
* صفحات مكشوفة
* قسم المسابقات العام

طبعا في اقسام احيانا العضو بيكتب فيها زي النقاش و مصر بينا أحلى
لكن فيها نسبة نقل كبيرة و بالتالي كان من الصعب وضعها
بالذات كمان لو حطيت قسم زي العام ,,هتلاقيه احتل الجدول كلو و بنسبة كبيرة هيكون في منقول
و بالتالي استبعدت الاقسام دي بالرغم من ان المواضيع النقاشية كتير منها بيكون مثير للجدل و جاذب

أما القسم اللي موجود و مش فيه مراقبة على المواضيع فيه فهو (الفضفضة)
(يعني مش زي الاقسام التانية المواضيع بتكون تحت الرقابة)
و دا لأن أغلب اللي بينزل فيه بينزل مشكلة خاصة بيه و دي تعتبر مجهود من العضو باستثناء حالات العضو بينزل فيها مشكلة منقولة
و عامة هيتم التراسل مع المشرف هناك عشان القسم اسمه (فضفضة) يعني لازم المشكلة من العضو نفسه

و مستقبلا قد نضيف اقسام اضافية بشرط ضمان ان جميع المواضيع أو اغلبها بتكون من مجهود العضو

و شكرا للمتابعة,,

[SiLver Spectra]

المنتدى كسب sad eyes
ما شاء الله متزن جدا في آراءه
و اثبت نفسه في فترة قصيرة
و دي يمكن من الحاجات اللي خلتني اكتب البوست دا
في ناس معروفة و مش محتاج اننا نتكلم عنها
لكن دايما النجم الصاعد فجأة كدا هو اللي بيلفت النظر (زي ليدي جاجا )
فهو ظاهره تستحق الدراسة ( نائب اداري منتخب بعد 4 شهور تسجيل !)

[SiLver Spectra]

خاصية اللايك قلبت موازين القسم و حولته من قسم صدى الصوت حيث انك كنت سابقا تشعر و انك بتكتب و ماحدش بيقرأ اللي بتكتبه
الى قسم الصوت القوي ,,حيث انك تكتب و لا احد يرد عليك بل انك تجني المتابعين من الاعجاب ! ,,,