مستنقع SiLver Spectra

[SiLver Spectra]

حزروا فزروا
قابلت مين النهارده ؟

اليوم كان طويل ,,
البداية كانت سفري من (دمياط للمنصورة) و قاعدت 3 ساعات و بعدها هفت في دماغي اغير الروتين الممل و اسافر فجأة القاهرة
كلمت ضياء و قولتله بقولك ايه انا جاي ,,قالي تعالى و احنا هنخاف و لما توصل رن
طريق السفر كان ساعتين و نص تقريبا بسبب الازدحام قبل و في شبرا الخيمة بالتحديد,, إلى موقف عبود
و من هناك ضياء لقتني بعربيته و كان مشغل ترانسات و معلي الصوت (طلع بيصيع من ورانا )
إلى مدينة نصر شربنا كابتشينو و اتفرجنا عالشراب :d
ثم إلى مصر الجديدة حيث قصر الاتحادية ,,اتفرجنا عالأمن المركزي و هما بيتبولوا على سور الاتحادية (السور دا شاف كتير ياعيني ههههه)
و أخيرا اتعشينا
و على فكرة ,,عملنا حلقة راديو تانيه بس بيني و بينه ههههههههههههههههههه
مشيت 12 بالليل و كت في البيت في المنصورة 2 و نص

بس بأمانة الراجل كان جدع و كريم
يعني اي حد عايز ينزل و يتفسح في القاهرة بعربية يكلمه و هبقى احلطكم رقمه (مرشد سياحي 100% ) ,,بالمناسبة دي ,,مره كان واحد سعودي نازل مصر زمان و بعتلي رساله و قالي مطلوب شخص يرافقني في القاهرة (مرشد يعني) و كان شرطه انه يكون أمور
أنا طبعا مشكلتي مش في الامور لان شكلي شبه الواد اللي في ملفي الشخصي ههههههههههههه
مشكلتي اني مش بفهم في شوارع القاهرة
و طبعا واضح من طلبه (مرشد امور) ايه الغرض

معرفش ايه السر الجاذبية في القاهرة ,,مجرد ما بتقربلها و بتلاقي الاعلانات التجارية الضخمه في الشوارع كترت و منها برامج التلفزيون و الافلام فتحس بهيبة خصوصا مع الكباري اللي فوق بعض
أما مدينه نصر و مصر الجديدة فتحس الدنيا هناك مبهجه ماتفهمش ليه

واحد هيقولك : يعني انت اول مره تنزل هناك
لأ يا سيدي ,,بس خلينا نقول اللي في قلبنا
و بعدين الرحلة بتكون جميلة بالصديق الأجمل ,,

[SiLver Spectra]

اختراع الالعاب ظهر بشعبية كبيرة مع أواخر السبعينات و أوائل الثمانينات
حتى ان اسمها (فيديوجيمز) مش (سيدي جيمز او الكترونيك جيمز) و الاسم دا بيعبر عن ان فترة ازدهار الألعاب كان متعلق ايضا بظهور الفيديو , حيث كانت العبارة الشهيرة (هشتري تلفزيون و فيديو )
فكانت (فيديو) يعني شيء مسجل و جيمز يعني العاب
و كانت اختراع مبهر ,,لان الطبيعي هو ان الانسان في بيته مافيش حاجه تسليه ,,اخره يتفرج على التلفزيون بمحطات معدوده بارسال ضعيف او يسمع راديو ,,حتى ان ظهور الفيديو اللي خلى الانسان يتحكم امتى يتفرج على الحاجه كان بمثابة اختراع ترفيهي عظيم
انك تروح تشتري افلام فيديو و تتفرج عليها ,,كانت حاجه اغرب من الخيال و خلقت من البيت مركز للترفيه
ثم كانت ألعاب الفيديو جيمز ,,انك تمسك دراع و تتحكم في مربعات على الشاشة و تحاول تتحدى الفوز
و كانت البداية التجارية للجيمز مع الجهاز اللي اشتهر في الوقت دا اسمه atari أو أتاري (دا غير الاتاري اللي بنقوله في مصر ,,مصطلح اتاري اللي موجود في مصر بيطلق على سوبر نانتيندو اللي كان فيه ماريو)
لكن الأتاري الاصلي ماكنش فيه جرافيكس اصلا
و الدراع فيه مشهورة (عامله زي الطياره )
و دي صورته



الألعاب كانت عبارة عن مربعات سواء بتحاكي طياره او سيارة أو اي حاجه ,,و الخلفية كانت بلون واحد مافيش فيها رسومات يا ازرق يا اسود
و دا نتيجة الامكانيات المحدوده للأتاري الي كانت 8 بيت بس
على خلاف سوبر ناينتيندو (بتاع سوبر ماريو) كان 16 بيت
فكانت النقلة النوعية في تحسين الجرافيك و امكانيات اللعبة و الصوت

دي مقدمة حبيت اطرحها عليكم لسلسلة مشاركات في صفحاتي المكشوفة هتتعلق بتاريخي مع الجيمز
من خلالها هقولكم ابرز و اهم الالعاب اللي اثرت في حياتي
الالعاب ليها تاثير قوي في تنمية الخيال و في اعطاءك لمعلومات قيمة واقعية سواء عن المدن او عن السيارات و الاسلحة و الطيارات و خلافه ,,و دا طبعا بيرجع لتقدم مستوى الالعاب و للدقة اللي بتتبعها الشركات في صناعتها و بالتالي اتحولت من مجرد مربعات بتحركها عشان تتسلى الى عالم ثقافي قد ينمي ادراكك بأضعاف ما قد يؤثر عليك قراءة كتاب او مطالعة فيلم سينمائي ,,ببساطة لأنك بتعيش جوا اللعبة و بتتفاعل معاها أكثر!!

[SiLver Spectra]

السيجا و مع إمكانياتها ال16 بيت ,,زي السوبر ناينتيندو لكن مع امكاينات اقوى في اللعب و الجرافيك و الموسيقى
أخويا اشتراه سنة 1994
الالعاب كانت شرائط و لازم تشتريها أصلية , لأن اللعبة بتبقى عامله زي كارت الشاشة ( شريحه خضرا )
و النتيجة هو ان سعر اللعبة كان غالي
بيوصل ل 250 جنيه للعبة الواحدة ( باعتبار ان الجنيه =6.66 دولار)

مش حابب أطول مع السيجا لأن ألعابها كانت متواضعة و بيقتصر على تقضية وقت للتسلية مش أكثر

بس أنا هعرض لعبة كانت عملالي خرم في دماغي



اللعبة انتاج 1991
و كنا اشتريناها سنة 1994 باعتبار انها لعبة جديده (زمان بقى ماكنش في عصر السرعة زي دلوقتي ,,اللعبة دلوقتي بعد شهرين تبقى قديمه )

و دا كان الحزء التالت


دي اشتريتها سنة 1996
و هي انتاج 1994
و كانت اللعبة جوا كلها كلام ياباني ,,مع ان بتنزله نسخة انجليزي بس اهو الواحد و هو صغير مش بتفرق معاه المهم يلعب و الراجل عايز يبيع و خلاص

اللعبة دي لحاد دلوقتي فاكر كل مراحلها بكل شخصياتها بوحوشها باغانيها بكل حاجه
و بتستمتع لما اتفرج عليها على اليوتيوب عشان بفتكر ايام زمان

و مافيش منها اي فايده غير التسلية بس
دي عينة واحده من العاب السيجا اللي كانت عندي ,,في غيرها كتير بس هكتفي بكدا عشان نخش في الالعاب الاحترافية شوية مع ظهور جيل العاب الثري دي او ثلاثية الأبعاد و ظهور عصر الاسطوانات المضغوطة مع الجهاز اللي عمل طفرة في العاب الفيديو جيمز
playstation
انتاج 1995
و مع ظهور القرصنة ,,بقى بالامكان انك تشتري مئات الألعاب المنسوخة (الغير أصلية) بسعر بخس !




يتبع ,,,,

[SiLver Spectra]

ندخل في البلايستيشن
و خلونا نبدأ مع أكثر الألعاب اللي فيها دماغ
تعد في كل مرحله تعصر في دماغك

هذكر لعبتين
اللعبة الأولى كانت sheep raider



اللعبة دي مظهرها بيبين انها عبيطه
بس في الحقيقة اللعبة دي دماغ دماغ دماغ
كنا خلينا واحد صاحبنا يشتريها و لما جه يجربها كنا حاسيين انها عياليه فكنا بنضحك عليه و هو عمال يلوم فينا
بس بعد كدا عرفنا انها لعبة دماغ جدا
كنا بنلعبها سنة 2002

مهمتك في كل مرحلة هو انك تسرق خروف
و تشيله و توديه لدائرة هو بيحددهالك
طبعا العملية مش بالسهولة دي
بيكون في كلب واقف حراسه على الخرفان
و بيديك معطيات و ادوات بتختلف عن كل مرحلة ,و تعد تعصر في دماغك عشان تعرف تسرق الخروف و توصله للدائرة المطلوبة باستخدام المعطيات و الجغرافيا بتاعت المرحلة

كان الواحد بيعد ساعات في المرحلة و ممكن ايام عشان يحلها




دا و هو شايل الخروف



طبعا الخروف تقيل و بتبقى بطيئ و انت شايله ,,و الكلب اللي بيحرس لو شافك هيجيبك من افاك لانه سريع جدا ههههههههههه
و هنا الصعوبة ,,هتسرق الخروف ازاي من غير ما يشوفك الكلب ؟
و لما تسرقه هتوديه للدايرة ازاي مع الجغرافيا المعقدة ؟

بس بجد كانت ممتعة جدا اللعبة دي مع انها ماكانتش مشهورة
و خليت المنطقة كلها تشتريها

---------------------------
اللعبة التانية اللي كانت دماغ برضو
oddworld




اللعبة دي كانت طويلة جدا و دماغ اوي
قاعدت شهور بلعب فيها
و كنت بلعبها في 2001 - 2002

بتلعب في عالم افتراضي فيه كائنات عبيد و انت منهم , و وظيفتك انك تحرر العبيد دول من الكائنات التانيه اللي بتستعبدهم
الميزه فيها هو امكانياتها
بتقدر تخلي الكائن اللي بتلعب بيه يتكلم و بتقدر تسيطر على الكائنات التانيه و تتحكم بيها و حاجات كدا بقى كتير مش هقدر اوصفها بس هي لعبة طويلة جدا و كل ما تلعب اكثر كل ما تبقى معقدة اكثر
بس كانت دماغها عالية اوي
و اكتر لعبة بتحتاج تفكير و تركيز لعبتها

دا فيديو للعبة في الاول (يعني و هي لسه سهلة)

[SiLver Spectra]

أقوى لعبة رعب على الاطلاق
هي سلسلة ألعاب silent hill
سايلنت هيل هي مدينة مهجورة مسحورة
الجزء الأول بتلعب براجل بنته بضيع منه في المدينة و بيدور عليها فيها
الجزء الثاني بيدور على مراته
و التالت بتلعب ببنته

اللعبة بيكون فيها الغاز كتير و غموض و جوها مرعب فعلا
أنا شخصيا مش بسهولة بترعب ,,بس اللعبة دي لما بلعها بحس بقشعريره خاصة لو لواحدي ((كانت متعة عندي اني العبها و أنا لواحدي في الشقة,,غاوي بقى قشعريره ))

المدينة كلها ضباب الصبح و بالليل بتكون كلها مظلمة و بتستخدم كشاف عشان تشوف
خلافا على ان فيها مخلوقات عجيبه (زومبي)
و بتدخل اماكن زي مدرسة و بتعد تفتح في ابوابها اللي بيكون فيها الغاز و مستشفى و خلافه

اللعبة دي عبال ما بتخلصها بتحس انك محتاج تروح لدكتور نفساني ههههههه

اللعبة ليها جوها الخاص , و موسيقى مميزة مع مؤثراتها الصوتية
اتعملت فيلم بعد كدا

الجزء الاول
لعبها اخويا في 1999

الجزء الثاني انتاج 2001
اشتريتها في 2003
و لعبتها في 2006

الجزء الثالث مش لعبته



فيديو لتريلر اللعبة











==============
الجزء الرابع منها كان خارج السلسلة و نظامها مختلف شوية باسم (الغرفة)
القصة هو ان راجل بيصحى من النوم في بيته و بيلاقي الباب متربس و مقفول بشكل غريب و لما بيخبط عالباب ماحدش بيسمعه
و بتبدأ تنقب في البيت و تدخل لحفر سحرية و حاجات كدا

الجزء الرابع انتاج 2004
لعبتها في 2004 و 2005



و دا تريلر الجزء الرابع











اللي بيميز الألعاب الرعب هو انك بتعيش فيها على عكس الفيلم بتتفرج و خلاص
في اللعبة انت اللي بتواجه اي حاجه تصادفك و انت اللي بتحل الالغاز + بتعيش القصة و المشاهد

[SiLver Spectra]

نعود مرة أخرى بعد انقطاع ,,
لازم أكمل سلسلة الألعاب لغايه ما تنتهي الصفحة الثامنة من مستنقعي
و على فكرة أنا بختصر لأني ملاحظ مافيش متابعة أوي

نخش بقى على الألعاب اللي كانت بتسليني جدا و يمكن هي أكتر الألعاب اللي كنت بقضي فيها وقتي

و هي ألعاب اللعب الحر
أو ممكن تسميها بالعامية حرامي سيارات

أول لعبة ظهر فيها لعب حر ((بمعنى انك تركب السيارة و تمشي بيها في الشوارع اللي تعجبك بعيدا عن الطريق الواحد زي ألعاب السباق)) كانت لعبة (درايفر)









كانت ممتعة جدا ,و بتقدر تخمس بالعربية و تأثير الاصطدام كان يعتبر طفرة في ان العربية تتكسر
و أحسن حاجه ان الشرطة لما تخبطك جامد كانت العربية بطير
بالذات لعبة جواها كان اسمها (النجاه) ,,بتبدا مع عربيات شرطة كتير بتلاحقك (و بتكون مسعورة) و بتشوف هتقدر تستحمل اد ايه قبل ما تخسر و عربيتك تتحرق
كنت بلعب في سان فرانسيسكو ,,مدينة مبنية على هضبة فكنت بفرمل بالعربية بعد المطلع و اتفرج على عربيات الشرطة و هي بطير من فوقي من سرعتها ,,فكانت الشرطة سريعه جدا و الكمبيوتر يلاحظ اني مفرمل بعد المطلع فتيجي تلف و قبل ما تطير من على المطلع تتعوج في الجو و تنزل على سقفها ,,كانت متعة عندي اني اقلب عربيات الشرطة على سقفها ,,بتبقى عامله زي الصرصار و تعد ترفس و مش عارفه تتحرك ههههههههه

مميزات اللعبة
التعرف على مدن عالمية زي سان فرانسيسكو و ميامي

عيبها هو انك مش بتعرف تخرج من السيارة
و كمان السيارات اللي في الشارع نوعين بس لكل مدينة
و كل نوع له لونين بس

===============

و بعدين كانت اللعبة GTA
اللعبة دي اللي تقريبا الكل عارفها ,,أول ما ظهرت على البلايستيشن كان اللعب من فوق



الميزه فيها هو انك بتخلي الراجل يخرج من السيارة و يسرق أي عربية تانيه
دا غير ان فيها اسلحة و عصابات و شغل عالي
لكن طبعا عشان كانت من فوق فماكنش ليها شهرة عالية

و كانت أمنية حياتنا هو اننا نلاقي لعبة زي (درايفر) و فيها امكانيات GTA

===================

ظهر (درايفر 2)




شبيه بالجزء الأول مع تعديلات اضافية
و أهم ميزة فيها هو امكانية خروجك من السيارة و سرقة سيارة أخرى (تحقق جزء من الحلم) و لكن العيب هو في ان مافيش أي امكانيات و انت بتلعب بالراجل , و كمان ما تقدرش تخرج برا العربية لما الشرطة تلاحقك
الميزة كمان عن الجزء الأول هو في التنوع الكبير للسيارات ,,بقى في أوتوبيسات و شاحنات و أنواع كثيرة من السيارات
و كمان هندسة الشوارع كانت أفضل و بقى الشارع بيلف بشكل تدريجي مش زي الجزء الأول كان الشارع بيلف فجأة بدون دوران ( زي لعبة البلالين كدا اللي عملتها )

بس كنت مستمتع جدا باللعبة دي خاصة في مدينة (هافانا) عاصمة كوبا
و كان فيها كمان شيكاغو و لاس فيجاس و ريو البرازيلية

نخش بقى على الPS2

و اللي كان فيها نقلة نوعية جديده مع امكانيات الجهاز العالية

===============





اللعبة دي كانت واخده تقدير عالي جدا
فعلا كان تجسيم السيارات فيها عالي + تجسيم المدينة
لما تقرأ عن اللعبة هتلاقي مكتوب فيها انهم اخدوا اكثر من 20 ألف صورة لمدينة لندن عشان يصمموها في اللعبة و تكون شبه الواقع
اللعبة دي فعلا حسستني اني سافرت لندن

المميز في اللعبة
التجسيم العالي للسيارات و لمدينة لندن و معالمها
اماكنية سرقة اي سيارة و استخدام اسلحة مختلفة
القصة

القصة كانت ان ابنك بيتخطف من عصابة و بتبدا العصابة بعدها تطلب منك انك تنفذ مهمات لحسابها و بتدخل في مشاكل بين العصابات و الشرطة





====================

و مع GETAWAY
ظهرت لعبة GTA على PS2
بامكانياتها الخرافية




أظن مافيش حد مش يعرفها

تجسيمها كان اقل من اللعبة السابقة و لكن المميزات فيها بيخليها لعبة ممتعة جدا و تقدر تقضي فيها وقت كبير و مش تشبع منها
الحلم اللي كلمتكم عنه اتحقق اخيرا مع اللعبة دي
المميز فيها جدا هو المرونة
الراجل اللي بتلعب بيه مرن جدا في الحركة سواء في المشي او الجري او القفز من السيارة و هي ماشيه او في استعمال الاسلحة أو في التفاعل مع البيئة و خلافه من الامور
غير انك بتقدر تدخل اماكن زي ديسكو و تلاقي ناس بترقص او مجمع تجاري
اللعبة كانت جامده فعلا بكل المقاييس

تصميم المدينة كان شبه (ميامي) الامريكية


=================

اللعبة اللي بعد كدا
درايفر الجزء الثالث





برغم ان تجسيمها كان كويس الا ان اللي كان متوقع منها كان افضل من الشكل اللي ظهرت بيه اللعبة
و مش قدرت تنافس لعبة GTA في الامكانيات و المرونة

اللعب كان في 3 مدن
ميامي (مش عارف بتتكرر كتير ليه )
و نيس الفرنسية
و اخيرا اسطنبول التركية
و المميز فيها كانت الدقة في تصميم المدن
أنا شخصيا لما بشوف صور حقيقية لاسطنبول بلاقي كتير منها نفس المعالم اللي كان في اللعبة بنفس الشكل و بنفس الجغرافيا





==================

GTA san andreas




اللعبة دي كانت وهم بمعنى الكلمة
و قدرت تفوز بالتحدي بينها و بين درايفر3

فيها كل الامكانيات اللي ممكن تتخيلها
تركب طيارة تطلع فوق السحاب تنزل ببراشوت تركب قطر تغطس تحت المايه
تحلق شعرك تشتري هدوم تروح الجيم و تعمل عضلات تلعب بلياردو تروح بار كل اللي نفسك فيه موجود
عايز حتى تلعب اتاري جوا اللعبة موجود

لو قاعدت اتكلم عن المميزات مش هقدر احصيها
حتى تقدر تركب لاي عربية تسرقها كماليات

و الميزة كمان انك بتلعب على مساحة ارض كبيرة جدا
3 مدن في ولايتين و هما سان فرانسيسكو و لوس انجلوس و لاس فيجاس
و بينهم قرى كثير و جبال و مزارع و صحرا

و مصممين المدن و التضاريس بنفس المعالم الحقيقية ليهم
زي جسر (جولدن جيت) و سد هوفر و هوليود و غيرها من الابراج و المعالم

دي كانت خريطة اللعبة




=====================

دا فيديو عجبني لتطور لعبة درايفر
شوفه و حس بالتطور التدريجي

[SiLver Spectra]

اللعبة الأكثر متعة و اثارة و البعض بيصنفعا بالمرعبة
و هي عندي احسن لعبة على الاطلاق من حيث اللعب و الألعاز و القصة

و تقريبا هي اللي اثرت عليه و ادتني الخيال اللي بعمل بيه مسابقات الغموض

اللعبة هي
Resident Evil
بالعربي (الشر المقيم)
و لها اسم ثاني
Biohazard
و بالعربي ( الخطر البايلوجي)

و صدر منها سلسلسة أجزاء ,,,و قبل استعراضها هتكلم بنبذة سريعة عن القصة

القصة بتتعلق بشركة اسمها (Umbrella ) (المظلمة) و هي شركة أدوية ضخمة و لها نفوذ كبير من الارباح اللي بتحققها و اللي خلتها تكون مؤسسة كبيرة جدا شبيه بالدولة المستقلة
لها مختبرات و أماكن بحث سرية و مقرات تحت الأرض بأنظمة متطورة و معقدة و عالم لواحدها


و كانت أمريكا بتديها امتيازات

إلى أن اكتشفت الشركة عقار المسمى ب (فايرس T)

الفايرس بينتقل لأي كائن حي عن طريق الدم
و في حالة اصابته لأي كائن بتقتله و بتحوله لكائن (زومبي) اي آكل للبشر و دا هيؤدي إلى انتقال العدوى لشخص أو كائن آخر و هكذا

و كان العقار سر من اسرار الشركة اللي حاولت تحافظ عليه

و اكتشفوا بعدها ايضا (فايرس G) و هو فايرس أكثر خطورة من ال T بسبب المضاعفات الجسدية و النمو السريع لخلايا الجسم و التي تحوله لوحش

و في يوم ,,تعرض العالم (مكتشف فايرس G ) لعملية سطو لسرقة اكتشافه من قبل مسلحين
و عندما رفض العالم تسليم الفايرس و المقاومة قاموا باطلاق الرصاص عليه و سرقوا حقيبة بها عقاقير G
و قبل موت العالم قام بحقن نفسه بجرعة كبيرة من (فايرس G ) و هو ما أدى لمضاعفة آثار الفايرس فتضاعف حجمه بشكل مريب و تحول إلى زومبي كبير و قتل بعض ممن حاولوا سرقته قبل هروبهم ,,و اثناء ذلك تحطمت بعض العقاقير على الأرض
و بعدها قامت بعض الجرذان بلحس العقار على الارض مما جعلها ناقله لعدى الفايرس
و بعد فترة بدات المدينة بكاملها المسماه ( راكون سيتي) تعاني من انتشار الفايرس فيها بشكل سريع جدا
تحول الانسان بسبب الفايرس قد يستغرق ساعات فقط , و عند تحوله يبدا يفقد عقله و يبدأ في مهاجمة انسان آخر بعضه عند عنقه مما يؤدي إلى وفات الشخص الآخر و استيقاظ جسده فقط دون عقله أو قد يصاب الشخص بالعدوى بدرجة بسيطة تستغرق بعض الوقت حتى يفقد عقله إن لم يعالج نفسه بعقار مضاد و بعدها يتحول لزومبي

تحاول شرطة المدينة التصدي للزومبي و تبدا بضربهم بالنار إلا أن انتشار العدوى يتسبب في فشل محاولة التصدي و موت أغلب رجال الشرطة و تحول المدينة إلى مدينة مهجورة بالكامل

تقرر بعدها السلطات نسف المدينة بصاروخ نووي لقتل جميع من فيها و لكن قبلها تترك بعض الوقت كمهلة لمن لم يصابوا بالفايرس ليهربوا من المدينة

===============

القصة السابقة تشمل أول 3 اجزاء من اللعبة
و الأحداث فيها بتحصل في نفس اليوم الواحد

أول جزء مش لعبته

تاني جزء و اللي يعتبر أفضلهم و هو الجزء اللي كان عامل حاله و خرم أدمغة محبي الجيمز






انتاج 1998

اللعبة مش بتكون بنفس طريقة سرد القصة اللي طرحتها عليكم لأن الأحداث بتفهمها و انت بتلعب من المشاهد و الاحداث اللي بتواجها و بتقابلك بعد كدا

و هديكم مقدمة الجزء الثاني و تشوفوا ازاي اللعبة بتبدأ




صور من اللعبة




اللعب بتكون في الشوراع و في مركز الشرطة و مستشفى و حديقة و مصنع اظن
و بتكون مليئة بالألغاز الممتعة و الاثارة و الرعب

مشهد عملية السطو على العالم مخترع الفايرس و بداية انتشار الفايرس



=============
الجزء الثالث




انتاج 1999
بتلعب بشخصية تانية لكن مع نفس الأحداث اللي حصلت


مقدمة اللعبة

هنا بيظهر أحداث مواجهة الشرطة مع انتشار العدوى



طبعا باقيت أحداث و قصة اللعبة بتشوفها اثناء اللعب و من الشخصيات اللي بتقابلها

المميز في الجزء الثالث هو الآلي المسمى ب (نيمسيس)
الظاهر على الغلاف
دا بيطلعلك كل شوية و انت بتلعب بشكل يخضك
اخترعته شركة ( أمبريلا) لمحاولة استعادة الاسرار اللي تمت سرقتها من قبل اللصوص
و هو عبارة عن آله و فيها أنسجة حية و مش بيموت
كل ما بيظهرلك بتحاول تهرب منه
لغايه ما في آخر اللعبة بيتفرم

==================


الجزء اللي بعد كدا X
على ال PS2
انتاج 2000
أحداثه بعد ال3 اجزاء

و القصة فيها لها علاقة باكتشاف اسرار شركة (أمبريلا) أو المظلة المسؤولة عن العقار
و اللي ليها فروع في مناطق كثير من العالم و بالأخص امريكا
و بينتشر الفايرس في مدن أخرى
و بتعرف شخصيات لها علاقة بالشركة و اللي بيحاولوا يطاردوا شخصيات انت بتلعب بيها و اللي نجحت من الهروب من مدينة راكون سيتي و بيتم بعدها ارسالهم لمراكز شركة أمبريلا للتجسس عليها














المقدمة






================

في جزء RESIDENT EVIL 0
لكنه نزل حصري على جهاز الناينتيندو GAME CUBE و بالتالي ما قدرتش ألعبه

=====================

و بعد كدا ظهرت سلسلة ألعاب بدون قصة و بدون ألغاز اشتهرت بمميزات الأون لاين أو اللعب الجماعي
و المسماه بآوت بريك

====================
و أخيرا ظهر الجزء ال4 من اللعبة
انتاج 2004
و لكن مع الأسف القصة تحولت لأمريكا الجنوبية بشكل غير مفهوم
مش متذكر الاحداث بالرغم من اني نهيت اللعبة بالكامل
اللعبة كان فيها مشاهد كتير قوية
لكن اسلوب اللعب اتغير و الطريقة اللي تميزت فيها اللعبة في الاجزاء السابقة (الكاميرا ثابته) اتغيرت و باقيت اللعبة اقرب للشوتير
او ألعاب التصويب





و ظهر الجزء الخامس كمان على الPS3
و لعبت شوية منه على الكمبيوتر
و كان شبيه بالجزء الرابع





التغير في اللعب له علاقة بالمخرج و المنتج التنفيذي اللي اتغير و هو المدعو ( شينجي ميكامي) ياباني الجنسية طبعا
هو اللي كان مصمم الأجزاء الأولى من اللعبة لحاد الجزء X

بعد ما مشي ,,اتغيرت اللعبة و تحولت للعبة تانيه خالص في طريقة اللعب
و أي حد لعبها هيفهم كلامي

و مؤخرا جاري التحضير للجزء السادس و برضو على نفس شاكلة الجزء الرابع و الخامس

=====================

اللعبة في اجزاءها الأولى ممتعة جدا ,,حتى اللي مالوش في الجيمز بيحبهم
و فيها ألغاز شبيه بالألغاز اللي بعملهالكم كدا
يعني باب مقفول و عايز تفتحه أو خزنة او جهازو غيرها و بتبدا تتعامل مع خرائط و غرف و اماكن كتير ,و بتعد ايام او شهور عشان تخلصها لاول مره لأنها بتكون طويلة و بتقايلك مشاهد و شخصيات

اللعبة اتعمل منها سلسلة افلام بداية من سنة 2002 و إلى الآن
استوحوا القصة بتاعت أول 3 أجزاء و انتجوا منها فيلمين
ثم بعد ذلك شطحوا في الافلام و خلوا الفايرس ينتشر في العالم كلو
و ظهر جزء ثالث و رابع و مؤخرا في خامس

المميز في اللعبة هو الاتقان و القصة و الموسيقى
الناس دي بتتعب فعلا في ابداعها

[SiLver Spectra]

Metal Gear Solid
اللعبة اللي صاحبها دائما بياخد جائزة أفضل مخرج ألعاب ( هيديو كوجيما)
لعبها مسلي و الأحلى مشاهدها الكثير و الطويلة و قصتها المعقدة

هي من ألعاب الجاسوسية
و بتكون مهمتك هي الكشف عن أسرار اسلحة سرية بيتم اختراعها من قبل شركات سرية أو مخابرات دول و أهم الاسلحة هو (آلي) ضخم له قدرات نووية

اللعبة فيها شوية فنتازيا و شخصيات خارقة
و يصعب شرح القصة لأنها طويلة جدا و مش بسيطة , و بتكتشف في لحظة ان عدوك هو صديقك ,,و اللعب فيها متنوع
و دا كان بيخلي كل جزء يطلع ياخد جائزة افضل لعبة في مهرجان الألعاب E3

الجزء الأول



انتاج 1998




==============

الجزء الثاني

انتاج 2001

















===============
الجزء الثالث




انتاج 2004












============

فيديوهات

مقدمة الجزء الثاني مع أغنية اللعبة المميزة







جزء من مشاهد اللعبة العديدة

[SiLver Spectra]

ألعاب الجاسوسية

Hitman
من أروع ألعاب الجاسوسية



في كل مرحلة بيكون مطلوب منك تنفذ مجموعة مهمات
و مافيش طريقة معينه لازم تعملها عشان تنفذ المهمات دي ,,يعني تقدر تنفذها بالطريقة اللي تعجبك
غالبا بيطلب منك تقتل شخصيات محددة و الشخصيات دي بتكون محاطه بحرس خاص
لو روحت تهجم عليها بشكل مباشر الحرس هيقتلك بسهولة طبعا
و بالتالي بتلجا لطريقة الاستدراج
بمعنى انك بتحاول تقتل احد الحراس او مثلا الراجل بتاع الدليفري و تلبس لبسه و تخبي جثته و تعمل نفسك داخل توصل الوجبة او اي طريقة كانت
و مهم كمان انك تنفذ المهمة و تخرج بدون ما تتكشف ,,و لو اتكشفوك عادي انت حر بس اشرب بقى من الضرب اللي هتاخده و اللي هيكون صعب انك تنجو منه

المميز في اللعبة فعلا هو ان مش ليها طريق واحد لازم تعمله عشان تخلص مهمتك
بيسيبك تفكر بالطريقة اللي تعجبك
و المميز كمان هو انك بتنفذ المهمات في اماكن مختلفة زي مطعم حفلة بيوت قصور البيت الابيض و مهرجانات و خلافه

مقطع فيديو للعبة








اللعبة صدر منها عدة سلاسل لعبت منها اتنين و كان افضلهم الاخيرة اللي لعبتها blood money
لعبتها في اخر 2006
من أواخر الألعاب اللي ختمتها

اتعمل منها فيلم مؤخرا
================

اللعبة التانية في الجاسوسية هي
splinter cell



التجسيم و الامكانيات فيها حلوة
و لكن اجتياز المهمات بيتطلب انك تمشي في طريق واحد لو خرجت عنه بتخسر
على عكس لعبة hitman بتفكر انت مع نفسك و بتعصر في دماغك و تقدر تحلها بكذا طريقة

[SiLver Spectra]

و قبل ما أدخل في آخر حاجه حابب أتكلم عنها
في لعبة مش لاقيلها تصنيف و لكنها كانت عجبتني في 2002



اسلوب اللعب شبيه بresident evil ( نفس المخرج) لكن مع اختلافات بتميز اللعبة

بتخش في اله زمنية و بتدخل لعصر الديناصورات و بتلاقي في مجتمعات متطورة متعايشه معاها

======================

اما بالنسبة للألعاب المسلية
فكانت سلسلة ألعاب crash

الجزء الثالث
1998



مغامرات على شكل مراحل


===============
الجزء الرابع
انتاج 1999



دي كانت فاجرة
سباق بس بتستخدم اسلحة لضرب خصومك و تأخيرهم و خصومك بيحاولوا يضربوك سواء بصواريخ او بزرع قنابل في الطريق او بخلافه من الاسلحة اللي بتقابلك و انت بتلعب

اللعبة ممتعة جدا خاصة لما يكون في تنافس و بتلعب ضد واحد صاحبك ,,كانت متعة عندي احطله قنبلة عند حته صعبة ,,ياخد الملف يقوم رازع فيها

==================

و أخيرا كان crash bash
انتاج 2000



كان فيها مجموعة من الالعاب الجماعية
و احسنهم عندي كانت لعبة الجليد



تحاول تزق خصومك و اللي يفضل على التلجه من غير ما يقع يفوز
بتبقى حلوة لما تلعبها ضد واحد صاحبك برضو



========================
و بكدا و مع المشاركة الأخيرة في الصفحة نكتفي بهذا القدر من عرض تاريخي مع الجيمز بشكل مختصر

طبعا دا مش كل التاريخ ,,بس مش حبيت أطيل أكثر من كدا عشان الملل
لو حبيت أحصي الالعاب اللي كانت عندي على ps تقريبا يعدوا ال200
و زيهم على الp

فأنا ذكرت أهم اللي علم في دماغي و اللي كان مميز فعلا
لكن في كتير كان حلو برضو و شغال

و بعد كدا انقطعت رحلتي مع الجيمز مع قدوم سنة 2007
و ظهور ال ps3


و شكرا للمتابعة ,,