انتي كبرتي إذن إنتي عنستي !!

[فلسطينية وافتخر]

انتي كبرتي إذن إنتي عنستي !!

--------------------------------------------------------------------------------

السلام عليكم . .
كيف الحال يا جماعة الخير . .

نفوت بالموضوع طوالي لأنو لا يحتمل مقدمات وبهرجات !
يلي بدي افهمو انو من وين استحدثت كلمة ( عنوسه ) ؟؟
يعني الكل ما شاء الله صاير يحكيها لهالكلمة وما بعرفوا انها بجد بتجرح البنت
طبعا ً هالموضوع ما بعنيلي من قريب ولا من بعيد .. لكن كل ما اسمع هالكلمة بيضربن فيوزات عقلي وببطل اعرف اركز !!
يعني ليش هي البنت بإيدها انها تبلغ من العمر عتيا ً وما تتزوج ؟
يعني القرار مش بإيدها أبدا ً أبدا ً مش زي الشب هو يلي بعد ما يكون حالو بحكي يما دوريلي على عروووس ..
واللي بزعجني اكتر انو في شباب بحكوها لهالكلمة !
وما بعرفوا انو سبب تأخر الفتيات بالزواج هو هما !
ايوه هما بلحمهم وشحمهم ..
لأنو لو في شباب مناح بالبلد وقد حالهم ما كان اضطرن البنات
يستنن دورهن بالشب المنيح
الله وكيلكو الشباب المناح بنعدو على اصابع الايدين بس عشر مرات يعني عشرة × عشرة يساوي 100 اضربو الميه في 7 وهي المهن الاكثر رونقا ً ( السبع صنايع ) ( الطب + الهندسة + التعليم + المحاسبة + ادارة + والسلك الدبلوماسي + السلك التجاري )
بطلعو 700 شب مناح والباقي إما صايع ضايع واما نص صايع والنص التاني غير مستعمل خخخ
مش بكفي البنت بتكون ماخده شهادة محترمة وتتنازل لتتزوج من شب أقل منها بالمستوى التعليمي !!
وكل هاد كرمال ما يطاردها شبح العنوسة اللي الله لا يهديلهم بال يلي اخترعوه
مش بكفي البنت بتواجه ضغوطات كبيره بالحياه ..
وبالآخر بس تتخطى عمر ال25 بتصير بنظر البعض ليست صالحة للزواج !!
ولهون وخلاص انتهى مفعولها .. وزي كأنو صار عليها كخه !
تفكير اجرب بصراحة من قبل البعض . . .

طبعا ً الكل فاتت الامور عندو يمين بشمال بس أنا رح احدد النقاط واحصرها كرمال تكون الرؤية واضحة .. وتقدروا تتفاعلوا مع هالقضية ..
هل بتشوفوا انو كلمة ( عانس ) لطيفة .. عندك الجرأه تحكيها ولا لع ..
بإعتقادك شو سبب تأخر الزواج للفتيات << ركزوا على الفتيات وليس الشباب أنا مليش إلا بالفتيات لأنو الشب حتى لو بلغ من العمر أرذله رح يتزوج بنت العشرين وينبسط
وبالأخير ما بدي أي تجريح بالحكي وخلونا نكون حلوين مع بعض كرمال ما نزعل من بعض وننزل هبد وتعجين !!
وما بدي ردود ساخره لأنو الموضوع مش هزلي .. وقضية بعتقد الكل بشوفها يعني مش اشي مخبى ..
ويلا الله يرضى عليكم ويحنن عليكم ... ويجبر بخاطركم ..
ولا مانع من سماع رأي الشباب المنفتح والمرضي و الحنون

يلا اترككم في رعاية الله ... وكل واحد يدلو بدلوه وان شاء الله رح يرجع بدلو احلى من الاولاني وفوقيه دلو لبن كمان
ومع السلامو عليكو