ان كنت بتحبها اسمح لى اصدمك

[احمد صلاح محمود]

ان كنت بتحبها اسمح لى اصدمك
جميل ان تعشق رائع ان تحب هائل ان تشعر بقلبك وهو يدق لأول مرة بطريقة مختلفة ان تشعر بأنك تريد ان تفعل ألف شئ مرة واحدة ان تدعى قدرتك على صنع المستحيل وتحقيق المعجزات بنفس السهولة التى تحتسى بها قهوة الصباح هكذا هو الحب لحظات من الرقى والابداع والقدرة الفائقة على تقبل الحياة بكل ما فيها من معوقات وكل ما فى احشائها من ألم
لكنك حين تحب تنسى كل هذا لا تراه حتى لو كان امامك لأنك فى هذه اللحظة لا ترى فى المدى كله الا هى الا عينيها الا ابتسامتها الا تلك اللحظة التى كنت مذبوحاً فيها من الخجل وانت تنطق اهم اربعة حروف ( ب ح ب ك ) بحبك
ها انت نطقتها واحسست بلذتها وجمالها
ها انت تتوج البنت التى احببت اميرة على قلبك
وملكة على ايام عمرك
وسلطانة لمشاعرك
ها انت تريد ان تقول لكل العالم انا احب وهذه البنت الجميلة جدا حبيبتى
ها انت تريد ان تعلى صوتك اكثر واكثر لتسمعها لنجمات السماء البعيدة وللسحابات الصغيرة المسافرة الى كل بلاد الله
ها انت تطلب من ماء النيل ان يحفظ تلك اللحظة التاريخية فى ذاكرته ولا ينساها ابدا وان يحكيها لكل العشاق الذين سيطرقون ابواب ضفافه فى المستقبل
ها انت تطلب من كتاب العشق ان يفتح صفحاته كى توقعان فيها بالأسماء الكاملة وليس فقط بالأحرف الاولى وهل تكفينا الأحرف الاولى ؟
هل تستطيع ان تعبر عن ما فى قلبينا من حب ؟
يا الله
اشكرك لأنك خلقت الحب
اشكرك لأنك ادخلتنا مدنه
اشكرك لأنك منحتنا هذه الفرحة
اشكرك لأنك خلقتنا لبعض
*************************
مش ده اللى حسيت بيه لما حبيت اول مرة وفكرت نفسك فريد زمانك وسلطان عصرك وبرنس وقتك ومفيش حد فى الكون زيك ولا فى انسان مشى على كوبرى قصر النيل مشى ماسك ايدين حبيبته قبلك وطول النهار مقضيها مع الامورة حب وهيام ومشاعر طيب ممكن اصدمك تانى على اساس انى صدمتك قبل كده من ثوانى من سطرين بس لما اخدت حضرتك دون انذار من الفصحى الجميلة للعامية الشقية
ممكن اقولك طيب وبعدين عرفنا انك بتحبها وهى بتحبك
طيب وبعد كده ما هو مش معقول ولا مقبول تفضل كده
لازم تاخد خطوة ايجابية بمعنى التعبير عن الحب جميل ورائع ومطلوب هو صحيح غير مكلف وغير متعب تخيل واحد طول النهار قاعد يقول بحبك وما ليش غيرك وعايش عشانك بذمتك ممكن يتعب من ايه بالكتير ممكن ريقه ينشف من كتر الكلام
لكن فكر يشتغل فكر يجيب قرش فكر يثبت ذاته فكر يكتشف رجولته الحقيقية على اساس ان الرجولة مش انك تعمل سبع وانت ماشى معاها فى الشارع وتقول خناقة يارب طيب خلى واحد امه داعيه عليه يعا كسك وشوفى انا ها اعمل ايه
لا يا معلم اسمح لى مش دى الرجولة
الرجولة
الرجولة اللى على حق يعنى صاحى حضرتك معاى
انك تجعل هذا الحب يعيش انك تجتهد وتبذل اقصى ما لديك عشان تفضل هى طول العمر معاك
اتذكر زميلين لى فى الجامعة
الاول كان طالب فى صيدلة وكان يخلص محاضرات ويطلع جرى يشتغل فى صيدلية وردية 6 ساعات عشان يتعلم وبرضه يكسب قرش عشان كان بيحب بجد
والتانى كان فى تجارة وكان شاطر جدا اشتغل عشرين شغلانه ايه المانع مادام شغل محترم وبيكسب خبرات مختلفة فى مجالات كتير
وطبعا الزميلين دول لم يعرفا طوال سنوات الدراسة معنى لكلمة اجازة كانوا مخططين لحياتهم صح عشان كده نجح كل واحد فيهم فى انه يفوز بحبيبته فى الاخر ودى هى الرجولة
الرجولة المعجونة بالعرق والتعب ويعيشان الان فى سعادة وفرحة مع من احبوا لأنهم احبوا بصدق ودفعوا تمن وضريبة هذا الحب
واعرف برضه عشرات من الخائبين ممن اضاعوا اوقاتهم فى دائرة الوهم والكلام دون ان يبذلوا اى محاولة لترجمة كلمة الحب الى اى فعل حقيقى كى تعيش وتبقى
من الاخر
من الاخر خالص
عشان شكلى طولت وفى ناس بدأت تبص فى الساعة
لو بتحب اجتهد واشتغل حتى تنال حلمك
لكن لو حضرتك ناوى تعيش فى عالم الخيال والكلام يبقى ده مش حب يبقى بتكدب على روحك وعليها وبتجرح وبتظلم البنت اللى صدقت جنابك وهى لن تنسى لك جرحك طول العمر وعلى قدر ما اعطتك من حب ورفعتك عالياً على قدر ما ستسقطك من ذاكرة ايامها لأنك لا تستحق
اختار طريقك
اختار وكفايه كلام
اختار الأن
اجتهد انزل من سماوات خيالك الى ارض الواقع
حبيبتك هنا انسانة من لحم ودم وبراءة وامل
وليست عروس البحر تسكن معها فقط فى مدن الاحلام
واعتقد انها لا تستحق ابدا بعد كل هذا الحب ان تجرحها
اعتقد انها تستحق ان تفرح
تفرح بجد
تفرح بالفعل مش بالكلام
لكن لو كنت ناوى تقضيها كلام ومفيش فايدة ومش ناوى تسيب طريق الاحلام
ف ياريت تسيب بنات الناس فى حالها
واحلم لوحدك 000 مع نفسك 0000 فى اى حته تانية 0000بعيد
ده لو عندك دم
بقلم
احمد صلاح محمود

[عطر الشوق]

موضوع جميل ربنا يبارك فيك اخى

[هيا*HYA*]

موضوع رائع جدااا
جزاك الله كل خير على النصيحة الغاليه
وربنا يهدى جميع شباب المسلمين
ربنا يزيدك
اختك,,

[احمد صلاح محمود]

شكرا لكم جميعا ولكم الف تحية

[احلى مصريه منوره السعوديه]

موضوعك جدا جميل ويستاهل القراءه والله ومعاك حق

تسلملنا يداك اخي الحبيب

اختك

[Silver stone]

Tslam ya a5y w gazak allah kol 5er 3la el mawdo0o0o3 el aksar mn ra2e3
w yhdy shabab el moslmeen agma3ien ya rab

[همس ايمان]

عندك حق والله يا احمد فى كل كلامك بس مين اللى يعمل بيه


كل واحد عجبه حياته كدة


يالا ربنا يهدينا كلنا

جزاك الله خير ا على النصيحة

[احلى وهم]

موضوع اكتر من رائع
واتمنى ان كل الشباب يفكرو بالطريقة ده
جزاك الله كل خير

[دموع ف نهر الحب]

دام نبض قلمك

[ملڪّـہۧ بـگَََـلـِمتـﮯ «]

موضـوع رائــــــع
تسلمـ ايدكـ ،،