|
تحيا مصر السلام عليكم ورحمة الله وبركاته شعر سياسى ارجو ينال اعجابكوا الأولة مصر يا بيرم وحالها حاااااااااااال ومهزومة والتانية حصرة يا حصرة عالأبطااااااال ومكتومة والتالتة اه والى عاوز اقوله ماينقااااال ومفهومة يادفعه راحت كام دفعه يا خوفى ع الدفعه الجيَّه يادمعه نازله م الشمعه ورا دمعه بالنار مكويَّه النار خيانه فى عز الضهر آه م الخيانه وم الخاينين لو ينغرز خنجر فى الضَّهر الصدر يبقى صدر ياسين وبهيه تبكى ولا تخبَرّ مين القتيل والقاتل مين وعرضحال واكتبى محضر وكله ضد المجهولين كلام يا دفعه مش معقول ادينى عقلك واسمعني قاتل و يصبح ليه مجهول الشَّـارى كتفنى وباعني يا دفعه يا ابو زيد يا ابو مدفع متغاظ منشـن على سـينا ياهلالى فى الغيط فى المصنع فى الجبهه ليه قالوا جرينا ؟! يا دفعه غيرك بيحارب بالبنط الاحمر و الاعلان وبيقلب المغلوب غالب والكدب تقراه م العنوان وديَّة الفانتوم خبطه موجَّهه من أرض لجوْ والحرب جد ماهش لعبه ديتها فرقه تقول " هاوْ هاوْ " واساتذه ياما فى فن الحرب خلو الجمل فات م الابره واحنا يا دفعه فى آخر كرب بكره خياطه ورا البكره خليك كدا على خط النار مصلوب يا كبدى فى الصحره وادى الشـعار ينطح فى شعار سكاكين بتدبح فى البقره حارب بشرط ماتهجمشى ولو هجمت ماتضربشي ولما تضرب ما تصيبشى هوَّش يا دفعه وكل محشي ويضربونا نروح نحتج ونقول " يا هيئه " ضربونا وكل يوم للهيئه نحج ملعون ابوهم لأبونا تعال شوف شارع سليمان دكاكين تبحلق للدكاكين وفيها خير اشكال والوان ونص بلدك شحاتين والجرسونيره فوق جرسونيره والفرش مفروش باللحمه والسيره فايحه فى الجيره والشرطه واقفه فى الخدمه متاريس " نضال " عند جروبى والامريكين .. ووراها شباب يا خالق الخلق يا ربى نسوان وليها ازاى إشناب ؟! واقفين يا دفعه ورا ضهرك وكل خنفس ولا خنجر صياد وجاى جايب قدرك " يهودى " يعنى ومتنكر وزير سيادته واقطاعى بقى اشتراكى فى غمضة عين ياكل دراعك ودراعى ويسرق الكحل من العين والرأسمالى " مدير " مصنع والاسم مصنع متأمم ومين هايقرا ومين يسمع والغيظ يا حسره متلجَّم وحضرته شايل دبابير بالتوره تنهش فى اكتافنا والحرب عنده زعيق وجعير ياهلترى مين هايخافنا ومجلس الشعب الميمون وفلاحينه افنديه الاسطى فيه لابس ببيون وشعاره " تحيا الملوخيه " يا دفعه راحت كام دفعه يا خوفى ع الدفعه الجيَّه يا دمعه نازله م الشمعه ورا دمعه بالنار مكويه !! نجيب سرور دى اول اصطباحة ليا معاكوا يا رب مكونش تقلت عليكوا يا سيادنا |
يحيا يامصر مصر ام الدنيا ونفسي ارجعلها اليوم قبل بكرا تقبل تحياتي وفي انتظار الجديد من ابداعك الحبيب |
ان شاء الله ترجع مصر سالم غانم شكرا لمرورك |
| الساعة الآن 08:06 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب