منتديات بنات مصر - تجهيز المطبخ

احنا هنا بنتكلم في تجهيز المطبخ بس مش النيش
يعني الحاجات دي خاصه بالمطبخ وشكله وتجهيزاته
ودي منفصله عن النيش

بس متنسوش التقييييييييييييييييييييييييم
لحسن اعيط

اولا

احب اوضح الاساس اللي هختار وهأسس فيه مطبخي كله ان شاء الله
وهو :

انه يكون عملي - يريحني - مركنش اي حاجه واكركب الدنيا ع الفاضي - اجيب اللي هستخدمه وبسسسسس عشان الكركبه - يكون شيك طبعا

وبناء عليه ( علي راي عم الكتاتني ف البرطمان هع هع هع )

هيبقي المطبخ نفسه باذن الله الوميتال ( ولو بتحبي شكل الخشب يبقي خشمونيوم عادي )

ليه بقي؟

لانه
اولا : عملي جدا لانك تقدري تغسليه كلللللللله بالميه والصابون عادي جدا - مبيربيش حشرات خالص - بيتحمل درجات الحراره العاليه (يتحمل الحريق لا قدر الله طبعا )
ثانيا : يريحني جدا لاني هقدر انقله بسهوله من مكان للتاني لو عايزه اكنس تحتيه ولا حاجه وكمان هيريحني ف الغسيل لانه هينضف بسهوله
ثالثا : شيك طبعااااا لان الوانه كتييييييييير جدا واشكاله كلها جميله وانا عن نفسي هعمله احمر باذن الله
زي كده
http://files2.fatakat.com/2012/5/13376490555621.gif

---------------------------------

شكل السيراميك

طبعا حاجه تليق علي اللون والستايل العام
لو كانت المساحه ضيقه هنختار لون فاتح
ولو كانت واسعه براحتك بقي
بس انا بفضل الالوان الفاتحه لانها بتدي احساس بالبراح والحريه حتي لو المساحه واسعه عندك ومش محتاجه
زي كده
http://files2.fatakat.com/2012/5/13376490876979.gif

------------------------------------

طقم العشا او اطباق الاكل

بصي يا ستي لو بتفضلي يبقي كله نقشه او ستايل واحد فهيبقي معاكي طقم العشا ممتاز وقطعه كافيه ليكي وهيبقي شيك جدا و ممكن تجيبي معاه طقم بايركس (وانا بفضل الفاميه لانه شيك جدا ) دا لو عايزه عدد كبير من القطع

لكن لو بتحبي توفقي وتختاري كذا لون مع بعض ممكن تجيبي فرداني الوان ماشيه مع بعضها
زي كده
http://files2.fatakat.com/2012/5/13376491359518.gif
http://files2.fatakat.com/2012/5/13376491557970.gif

--------------------------------
طقم الحلل والذي منه

المفروض انك تجيبيه يتماشي مع ستايل المطبخ العام ولونه
وبما اني هختار الاحمر باذن الله فافضل اللون الغالب علي حللي وادواتي وممكن ادخل معاه اي لون تاني يتماشي معاه برضو
عشان ميبقاش عندك مهرجان الوان ف المطبخ
اما انواع الحلل
فانا بفضل السيراميك التركي(بدل التيفال ولو مش متوفر يبقي التيفال التركي سافلون ) والستانليس التركي (كروكماز)برضو وبسسسسسس
ليه بقي؟
لانها
اهم حااااااااااجه صحيه جدااااا - سهله التنظيف مفيش دعك وكلام فارغ - شكلها جميل ومناسب للمطبخ العصري
الادوات التانيه
اللبانه والكنك والمصافي والصواني: ستانليس افضل حاجه وممكن الصواني تجيبي بعضها الومينيوم عشان ميلزقش وكده لكن التيفال مش بيبقي حلو ف الصواني من تجارب الناس وتجاربي الشخصيه
زي كده
http://files2.fatakat.com/2012/5/13376491054517.gif

---------------------------
طقم المعالق والتوزيع والذي منه

طبعا بتكلم ع المطبخ مش النيش عشان كده هيبقي الفرداني او ممكن طقم لو تحبي بس مش هيبقي عملي الفرداني عملي اكتر ف المعالق التوزيع طبعا الطقم
زي كده
http://files2.fatakat.com/2012/5/13376491191762.gif

----------------------------
السكاكين

طقم سكاكين : من اللي هو بحامل عشان يوفر مكان ويكون جاهز وشكله شيك ف نفس الوقت
زي كده
http://files2.fatakat.com/2012/5/13376491876113.gif

----------------
طقم التوابل

دا بقي الكارثه بالنسبالي
لاني بشوف مهازل فيه
اللي تجيبهولي نمنم واللي تجيبهولي فصوص وترتر و و و
المفروض دا اكتر حاجه تكون عمليه ف قطع المطبخ لانها بتستخدم كتير ومليها بيشلللللل بجد عشان ف الاخر متركنيهوش للزينه وتجيببي برطمانات
فالحجم يكون متوسط مش هنقول كبير وتكون عمليه ف تركيبها وشكلها شيك ومتناسق مع الشكل العام طبعا
زي كده
http://files2.fatakat.com/2012/5/13376491799394.gif

----------------------
طقم الشاي

دا انا مش شيفاله لزمه الا للنيش طبعا وبفضل المجات الفرداني بتببقي اكتر عمليه ومريحه ف الاستخدام اكيد
ومع ذلك ادي طقم
زي كده
http://files2.fatakat.com/2012/5/13376492359234.gif

-------------------
طقم القهوه

عادي اي حاجه تمشي علي زوقك بس نراعي الستايل العام
دا علي حسب طبعك انتي وجوزك لو كييفت قهوه ف فنجان هاتيلك طقم بسيط مش زي بتاع النيش
زي كده
http://files2.fatakat.com/2012/5/13376492484426.gif

----------------------
طقم الكوبايات

انا بفضل يكون كذا طقم عشان لو حد جه متتضطريش تطلعي من النيش ادام حد
يعني ف حدود 3 اطقم كده وممكن طقم كاسات بس يكون سيمبل برضو مش زي بتوع النيش
http://files2.fatakat.com/2012/5/13376492619549.gif

-----------------------
الاجهزه

البوتاجاز : كريازي الكل بيشكر فيه جدا واشكاله جميله
http://files2.fatakat.com/2012/5/13376940334053.jpg
------------------
التلاجه : وايت ويل جامده جدااااا وكابينتها واسعه وتحسي ان شغلها علي نضيف من جوا ومتينه
http://files2.fatakat.com/2012/5/13376940591102.gif
--------------
الكيتشن ماشين او ما يعادلها ( الفرداني يعني ) : انا بفضل الفرداني طبعا عشان يبقي كل حاجه ليها موتور مستقل بذاته لو عطل يبقي القطعه دي بس اللي عطلت والباقي تمام
http://files2.fatakat.com/2012/5/13376492754061.gif
-----------------
الشفاط : توشيبا طبعا علي حسب مقاسات مطبخك
http://files2.fatakat.com/2012/5/13376940857278.jpg
---------------------
الفرن الكهربي او الميكروويف: انا بفضل الفرن لانه عملي اكتر وصحي اكتر مش بيطلع اشعه ضاره زي المايكروويف ووايت ويل جميل جدا وماركه نضيفه فعلا
http://files2.fatakat.com/2012/5/13376941094632.jpg
---------------
الكاتل : اي نوع نضيف ويكون ستالنيس ستيل من جوا ويفضل حجمه يكون وسط لا كبير ولا صغير (لتر ونص بالكتير)
http://files2.fatakat.com/2012/5/13376951937418.jpg
------------------
التوستر :ملوش اي ربع لزمه ف المطبخ المصري العادي ولو عايزه تحمصي توست وزنقه معاكي اوي عندك الفرن الكهربائي زي الفل
--------------
غساله الاطباق : ملهاش اي تلاتين لزمهومش بتنضف زي ما انتي عايزه وطبعا الحلل مش بتتحط فيها
بصراحه مش عمليه خالص عندي

--------------------
ساعه المطبخ

عشان تدي شياكه للمطبخ وكمان تعرفي الوقت بس لازم تبقي عمليه سهله التنضيف ومعبره برضو
زي كده
http://files2.fatakat.com/2012/5/13376941458218.jpg

------------------------
جردل القمامه

دي الكارثه القوميه الكبري ومنبع الاوبئه ف المطبخ
فلازم تختاريه
يكون محكم جدا - سهل الفتح والغلق (ويستحسن جدا من اللي بيتفتح بالرجل عشان ايدك متلمسهوش خالص) - كبير - ميكونش لون فاتح عشان يبقي عملي - وشيك طبعا
زي كده
http://files2.fatakat.com/2012/5/13376947417389.jpg

وبكده اكون انهيت مشاركتي ويارب تكون مفيده وممتعه