|
جائزة نوبل للبؤساء؟!!! جائزة نوبل للبؤساء؟!!! إلتف أفراد الأسرة لمتابعة حديث وزير البترول وتصريحاته فى أحد برامج المساء والسهرة..وبعد التحية والذى منه بدأ يتحدث عن ثروات مصر البترولية والتى تنقب عنها شركات أجنبية تبيعها بعد إستخراجها وتكريرها للشعب المصرى الطيب بالأسعار العالمية ...قالت الزوجة فى دهشة: يعنى الأرض أرضنا والبترول بتاعنا ويبيعوه لنا بالغالى كمان!! رد عليها زوجها: لإن المعدات والخبرة عندهم فإحنا مضطرين نسلمهم خيراتنا بكامل إرادتنا ... سكتت الزوجة فى قهر وعادت تتابع حديث الوزير عن إشاعة إرتفاع أسعار الوقود وبالتالى إرتفاع أسعار المواصلات و تكاليف النقل وطبعا الأكل والشرب ...ضربت الزوجة بكفها على صدرها قائلة لزوجها: المفروض مصروف البيت يزيد ...رد زوجها : ياستى دى إشاعات مفيش حاجة من دى خالص إهدى إنت بس وكل شئ حيتدبر الناس مش ساكتين ...عادت الأسرة من جديد لمتابعة حديث الوزير والكلام هذه المرة عن إشاعة إلغاء الدعم ...صرخت الزوجة: يعنى إيه الحاجة كده حتولع إتصرف وشوف لك شغلانة بعد الظهر...رد عليها : ما أنا بأشتغل الصبح والظهر وبالليل.. أعمل إيه تانى ؟ ياستى دى كلها إشاعات ومفيش حاجة من دى حتحصل أطمنى إنت بس وأهو الناس مش مقصرين ....عادت من جديد تستمع إلى حديث الوزير الذى كان بين الحين والاخر ينبه المذيع أن موعد نومه قد فات ...حركت شفتيها قائلة: (كل البلاوى دى وبيجى له نوم يابخته) وجاء إقتراح الوزير بإغلاق المحلات فى التاسعة مساء لترشيد الإنفاق كالصاعقة على زوجها هذه المرة الذى قام من مكانة قائلا : طيب ووردية بالليل فى المحل حتتلغى؟ يادى المصيبة أهو الزن بتاعك جاب نتيجة وضاعت شغلانة بعد الظهر وحنام من المغرب... ردت الزوجة فى سخرية: ياسيدى دى مجرد إقتراحات شفتهم نفذوا حاجة..الناس أهم صاحيين لغاية دلوقت ومش نايمين رغم إن ميعاد نومهم فات ...وما إن هدأوا قليلا حتى شاهدوا تقريرا عن طوابير أنابيب البوتاجاز والمساكين من الشعب يحملونها فوق أعناقهم .. صرخت فى وجهه : أنا اللى غيرت الأنبوبة المرة اللى فاتت والدور عليك...رد عليها : يعنى أسيب شغلى وأروح أغيرها لك ...قالت له فى غيظ : خلاص مش حأطبخ وإبقوا كلوا من الشارع ...رد فى غيظ : من أين يا حبيبتى؟ إستحملى لغاية لما يخلصوا إختراع الكوبونات الذكية أو يبطلوا يصدروا الغاز لإسرائيل وأهى المشكلة خلاص قربت تتحل كلها أنبوبتين تلاتة بالكتير تشيليهم على قلبك وبعد كده الأنابيب حتدهول السوق ...هنا تدخل الوزير متعللا بتصدير الغاز بأقل من السعر العالمى إلى الإتفاقيات الدولية التى يحاول جاهدا إيجاد حل لها ولحين إيجاد هذا الحل إقترح إعطاء جائزة نوبل لهؤلاء البؤساء من حاملى الهم وأنابيب البوتاجاز على أعناقهم كتصبيرة ودافع للتحمل على ما الكوبونات تجهز؟!!! |
هههههههههههههههه والله أن من شر البليه ما يضحك لا تعليق لكن نجومي وتقيمي تحت أمرك هههههههههههه خالص تحياتي لك القيصـــر |
والله فعلا نستحق جائزه نوبل للبؤساء ولسه كمان ايه اللي جاي بالنسبه لقرار ال9 مساء دا بتاع اغلاق المحال التجاريه ترشيدا للكهرباء مظنش هيتنفذ علي ارض الواقع ابدا محدش هيقبل اي كان يعني بعد كل البلاوي دي كمان يقطعو ارزاق الناس ويجبروهم ميشتغلوش حسبي الله ونعم الوكيل |
ههههههههه والله انا منيش عرفه اخرتها ايه وبعدين ياقيصر قولى اعمل ايه مش بدل منزل التحرير واموت هناك والله احنا اكتر من البؤساء |
ههههههههههههه بجد كتير هيحصلوه عليها عاشقه الاحلام المبدعه اثبتى حقا انكى كاتبه من الطراز الاول فى مجال السياسه الساخره التى يفرضها علينا تلك الظروف التى تمر بها البلد سلمت يمينك وتقبلى تحياتى وتقيمى |
كلماتك دوما رائعة يا عاشقة.. حتي نقدك للوضع السياسي و الحياتي للناس.. كان باسلوب ساخر جميل راقي جذل مميز... اقول ايه و انتي مش مخلية موضع للابداع... الا و اثتبي نفسك فيه ووضعتي قدمك بقوة علي ارضه ؟ كلك مواهب اختي الكريمة المبدعة الراقية الحس... اتمنالك كل خير يارب... و ان شاء الله نري منك كل جديد و جميل و رائع زي ما اتعودنا منك.... لكي تقديري و تقييمي و نجومي و اعجابي.. و دول اقل شئ عليكي... تسلمي و دمتي بحفظ الله |
بؤساء !!~ والله اللي الشعب المصري عايش فيه تجاوز مرحلة بؤساء ع الأقل البؤساء فيه اللي بيقول انهم بؤساء ويسمعهم إنما المصريين بيقولوا لهم ونعمل لكم ايه !! تسلمي ياقمراية كتير راقي طرحك .. دمتِ بحفظ الرحمن .. 5 ستارز .. |
كل تقديرى واحترامى لتوجدكم |
هو ده حال غالبيه الشعب دالوقتى ربنا يستر علينـا من الايام الجايه تسلمين عاشقه قصه رااااائعه والبؤساء بقو كتير منتظره جديدك بشغف |
هو ده حال غالبيه الشعب دالوقتى ربنا يستر علينـا من الايام الجايه تسلمين عاشقه قصه رااااائعه والبؤساء بقو كتير منتظره جديدك بشغف تسلمى ياقمريه على مرورك |
| الساعة الآن 06:02 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب