|
أوعى تقول مسيحي قول نصراني ! مساء الخير على الجميع الموضوع واضح من عنوانه ..نصراني و مسيحي يفرق معاك المسمى ؟ طيب لو يفرق معاك قولي يفرق في ايه ؟ الاجابة عندهم هتكون : أصلهم مش بيتبعوا المسيحية الصحيحة و انحرفوا عنها .و هيبدأ يذكرلك اسباب لكدا بس الغريب هنا ..هو اشمعنا اليهودي مش له مسمى آخر ! بمعنى ان اليهودي بيقول على نفسه انا يهودي . ليه مش بنسميه مسمى مختلف و لا هما دينهم مش اتحرف ؟ بدأت ابحث عن الفتاوي المتشددة زي ابن عثيمين و ابن باز و من ثم المواقع الوسطية في الاجابة عن حكم اطلاق كلمة مسيحي بدل نصراني و في نفس الوقت بحثت عن اصل المسمى فظهرلي على الويكيبيديا على الصفحة دي و اتضح من خلالها و زي ماكنت متوقع انه مسمى شائع في الجزيرة العربية قبل الاسلام و بيرتبط بدرجة كبيرة بالعرف السائد و اللهجة و من هنا جاء وصف المسيحي في القرآن بالنصراني . لأن كلمة مسيحي كانت غير دارجه و غير مستعملة مع أهل الجزيرة العربية يبقى لو هنجاوب على السؤال : هيفرق معاك المسمى ؟ معاك انت كمسلم لأ.. لكن يفرق مع صاحبه لما انت يكون ليك مسمى و اسم مختاره لنفسك او موافق عليه . مش حلو اني آجي و اسميك و أندهلك باسم آخر و هديكم أمثلة .. انت اسمك خالد ..هل يبقى من الذوق اني أنده عليك ب (مخلل) ؟ ممكن تقبلها هزار و ممكن لأ دا اسم شخصي ..فمابالك لما يكون اسم مقدس بيعبر عن ديانة ! و تخيل دلوقتي ان ناس مش راضيه تسميك مسلم ..عايزه تسميك (محمدي) أو ( بتوع الكعبة) أو ( ساجدين) أو (متعددي النساء) ..الخ الاسم بحد ذاته فيه استفزاز حتى لو كان في معناه مش بيضرك في حاجه فانت ايه رايك لما شعوب مش تحب تطلق عليك المسمى بتاعك تحت حجة انك مش بتمثل معناه الحقيقي ؟ طيب دلوقتي البهائية ..مش بنطلق عليها نفس المسمى (بهائية) ؟ هو المسمى عبارة عن ايه غير انك بتحول النكرة الى معرفة لتحديد المشار اليه ! يعني لو ديانة جديده اسمها (كوكو) ..هتقول اتباع الديانة الكوكية ..صح ؟ ماليش بقى كوكو دي معناها ايه او عقيدتهم ايه انت مجرد بتوصف الناس دي ..و احتراما له بتنده عليه بنفس المسمى عشان هو كمان يحترمك اللي عايز اوصله في النهاية ..ان المسمى مش هيفرق في حاجه ..هو مجرد عرف و احتراما للغير فانت بتندهله بالمسمى اللي هو مختاره لنفسه . مش انك تحقق في عقيدته و تفصص فيها خاصة لما يكونوا كمان شركاءك في الوطن ! اذا كانوا زمان اسمهم نصارى و كانوا بيطلقوا على نفسهم اللفظ دا في الجزيرة العربية فهما دلوقتي في مصر مسميين نفسهم مسيحيين احتراما له بتسميه بالمسمى بتاعه ..لو عايزك تسميه اقباط أو اي حاجه فهو حر في اسمه ..لكن مش انت اللي حر تسميه لأن اكيد مش هترضى حد يسميك بمسمى غير اسمك (مسلم) و ياريت قبل ما تقتبس الايات اقرأ الموضوع تاني و افهم معناه |
والله يامعلم التسميه مش هدخلنا الجنه او هتودينا النار يعنى مش عشان هقول نصرانى يبقى كدا انا صح وبتبع الاسلام ولو قولت مسيحى يبقى حرام وهدخل النار مش عارف ليه الصراع الفترة دى كبر جدا بس الحمد لله فى المنتدى مفيش الكلام دا الفترة الحاليه وربنا يسهل والتوبيك دا مايتقلبش عشان مش وقته خاااااااالص ^_^ |
هو الموضوع داا رغم بساطته الا إنه ممكن يأثر بالسلب ع الشخص المسيحي يعني لما يلاقى واحد مسلم بينده بمسمي تااني غير مسيحي ممكن يتصور إنه بيستهزق بدينه ومش فارق معااه ومن هنــا بتشتغل الفتنه من لا شئ فا علشان كده كل فئه تحترم الفئات الاخري حتى لو كاانت مش ماشيه ع نفس دينها .. ودينا الاسلام قال لكم دينكم وليا دين وكل وااحد ماشي حسب الدين اللى بيتبعه والاسلام مقالش نستهزق بالديانات الاخري ! واللى مش ترضاه لنفسك كمان مترضاهوش لغيركـ شكرا ع موضوعكـ ي طارق ,, |
والله سواء كده او كده فمعلموم من المقصود بها سواء كانوا مسيحيين او نصارى ولكن القرآن سماهم النصارى والآيات عديدة ولم يطلق عليهم المسيحيين فلا أرى أن فيها شيء وياريت كنت رجعت لكتاب ربنا بتاعنا مش حد تاني المهم هي المسميات بتخلتف ولكن يستند إلى قول القرآن والله تعالى أعلم |
اقتباس:
كانوا بيطلقوا على نفسهم نصارى في الجزيرة العربية في مصر الاسم الشائع هو الاقباط ..و الاسم الرسمي هو مسيحيين القرآن لو بحثت هتلاقي الفاظ كتير جدا مش موجوده فيه لان ماكنش لها استخدام او كانت غير معروفة ..و القرآن نازل بلهجة الناس اللي نازل عليهم لكن هو دلوقتي مسمي نفسه مسيحي ..و اسلامي اوصاني باحترام الاخر مش باني احفظ و مش ابقى فاهم ديني و اصمم اني مش اندهله باسمه لو انت ترضى بكدا فواجب عليك ترضى بان اي مجتمع يسمي المسلمين باي اسم هما يحبوه و اولهم المسيحيين في مصر ..يشوفوا الاسم اللي يعجبهم و يسموا بيه المسلمين كفايه تشدد و طائفية و عمر الطائفية ما هتزول الا لما نطهر فكرنا و نمسك الجوهر مش القشور |
صح كلامك يادكتور انا مش بحبذ فكره التفصيص والتدقيق فى معتقدات الغير طالما انت مسلم ومقتنع بدينك وموحد بالله ورسوله يبقى يهمك في ايه اذا كان فلآن مسيحي او قبطي او نصرانى حتى لو كل المسميات بنفس المعني كذلك نفس الكلام على المسيحي . مادام مقتنع بديانته يبقى مالوش دعوه بديانه غيره رسولنا الكريم قال لكم دينكم وليّ دين احنا نشوف الاسلامنا ونعمل باللى اوصانا بيه اوصانا نعيش ف سلام ونبذ الخلاف مادام السبب هو الديانات لآن الديانات اياً كانت ملك لله مش ملك لـ بشر مفيش فرق ابدا بين مسلم ومسيحي وغلط اننا نستهزء بالمسيحين ونطلق عليهم اى مسميات غير المسمى اللى اطلقوه على نفسهم واللى مقتنعين بيه وبيحبوه .. المشكله الحقيقيه هى فى بعض المتشددين اذا كانو من المسلمين او المسيحين الفئه المتشدده دى هى اللى بتحب تحلل وتحرم على مزاجها مكن يطلعو فتوى تعمل فتنه وتزرع كره وفى الاخر الفتنه تكبر وتنتشر ويكون ضحيتها شعب كااامل لكن انا متأكده ان الغالبيه فاهمين وواعين ومش بيسمعو للفئه القليله اللى كل همها ( اذا احتفلنا بشم النسيم هندخل الجنه ولاالنار ) !! ........ |
دة بيندرج تحتى مسميات الأسماء لأصحاب الديانات الأخرى وأنك تنادية بصفة دبنة أن كان سوء مسلم ولا مسيحى ولا يهودى يمكن يهودى ملوش كلمة الأيهودى ودة بيطلق كتشبية برضة لما تندة بية شخص معندوش رحمة وقاسى القلب بتقلة هو أنت يهودى يا أخى ولا أية ؟ انما الصفة المتداولة حاليا عند النداء على الأخوة الاقباط هى المسيحية دى الأن الشائعة أنما أيام الرسول الكريم كان بيندة عليهم بأهل الكتاب أو بالنصارى أو الاقباط , تعددت المسميات تحت بند واحد لأسم الديانة ,, أنما لما تحب تندة علية أندة علية بالشىء الى يحبة ويقدر يقبلة منك ,من دون زعل أوضيق,, موضوع جميل يا طارق تحياتى |
المسمى مش هيغير حاجه وان كانوا فى القرأن الكريم يسمون بالنصارى على ما اعتقد تم تسميتهم بالنصارى لانهم نصروا عيسى عليه السلام والله اعلم او فعلا زى ما قولت ان فى شبه الجزيره العربيه اطلقوا عليهم نصارى عشان العرف السائد المهم ان كل ده مش هيفرق المهم فى الكلام مع صاحب الديانه المسيحيه ميكنش الهدف استفزازه لان ده اللى بيجيب المشاكل وبيشعل الفنته |
تفرق لما يكون معاك مسحييين عايشين معاك .. اصلا المشكلة فينا ان احنا لو عايشين منعزلين عن الدنيا هنقول انهم نصرانيين و كده .. بس اصلا بيتضايقوا من اللفظ دا لما بيسمعوه ! انا صاحبتي في الصف مرة اتضايقت من اللفظ دا لما مدرسة عندنا قالته واتريقت كمان .. ليه مش قادرين نفهم ان حوالينا بشر زينا زيهم .. بعيدا عن الشعائر بتقولنا ايه لكن ما اقولش ان طلاما القران الكريم قال كده طب ما فيه الفاظ كتير بنقولها خارج الاطار دا هل دا معناه خروج عن الملة ! لازم نتقبل افكارهم عشان يوصلوا لافكارنا .. ولازم نتقبلهم زي ما همة .. لانهم ليهم دين وان كنا على خلاف في المعتقد الا ان الاحترام الانساني اساس ,. ولو فكروا على عكسنا ان احنا كننا الاقلية وهم الاغلبية مثلا زي الدول الغربية كده وسمعنا استهزاء او كلمة غريبة ع المسلمين باسم تاني .. مش كننا هنقبلها شكرا ع الموضوع ي طارق ارق تحياتي |
مسيحي ,, نصرآني ,, قبطي .. فـ آلنهآية كلهم بيتبعوآ عيسى عليه آلسلآم ,, دآ في حآلة إنك بتبص للموضوع بشكل عآم و أصلآً يعني من وجهة نظري فآلمسمى آلصحيح ليهم مسيحيين نسبة إلى عيسى بمآ إنّه كآن ملقب بآلمسيح ,,~ و آلأقبآط أيآم آلرسول عليه آلصلآة و آلسلآم كآنت مخصصه لمسيحي مصر ,, و آلنصآرى لبتوع آلخليج بآلظبط زي مآ إنت قلت .. من غير مآ نبص للفتي و آلتزمت آللي بيحصل كتير فـ آلفترة آلأخيرة و سآبقآً مفيش أي حآجة غريبة فـ آلموضوع ,, و بعدين همآ مآلهم بـ إذآ كآنوآ بيتبعوآ مآ تبقى من آلإنجيل آلصحيح أو متبعين للمحرّف فدآ شيء بينهم و بين ربنآ و هو آلوحيد آلعآلم فيه ,, و ديننآ دين يسر و ليس دين عسر ,, مش كل مآ أقآبل وآحد مسيحي هسأله إنت بتتبع أيه بآلظبط ؟؟!! و أيه آللي إنت بتؤمن بيه و آللي إنت مش بتؤمن بيه !! بلآش و آلنبي كلآكيع آبن بآز و ابن عثيمين دول عشآن أنآ اتخنقت من فتآويهم ,, أستغفر الله العظيم يعني ربنآ يهدي آلجميع شكرآً يآ دوك على آلتوبيك ودي ووردي |
| الساعة الآن 10:50 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب