|
الحلقه الاولى من ( خلف الستار ) مع ( morshooo ) بسم الله الرحمن الرحيم اهلا بيكم جميعا والحلقه الاولى من ( خلف الستار ) البرنامج مش هنعمله عشان عضو يهاجم اخر الاسئله كلها هتكون شخصيه بالعضو الى هيتم استضافته وهيكون ليه حريه الاختيارسواء بأعلان اسمه فى نهايه التوبيك او بعدم الاعلان . والضيف هيكون مسئؤل عن كل كلامه لانه هيتحدث عن نفسه ودلوقتى تعالو نشوف الضيفه الاولى قالت ايه عن نفسها : http://forums.banatmisr.com/imgcache/2/18933alsh3er.jpg س / فى البدايه اهﻼ بيكى ؟ اهلا بيك انت امورشو منور ي حج :) س / طبعا هتكلمى بحريتك ﻻن محدش هيعرف انتى مين ؟ بس حاسه انك هتخرجى كل الى جواكى ؟ بما ان محدش هيعرف فهاخد حريتي بئا ع الاخر لا تقلق س / فى البدايه انتى راضيه عن نفسك ؟ بصراحه مش اوي. يعني حاسه اني ممكن اكون احسن من كدا بكتير في كل حاجه بعملها طريقتي في لبسي في تعاملي في كلامي مع الناس . س / ايه الى مش عاجبك فى طريقه لبسك ؟ نفسي ابطل البس بناطيل بس مش بعرف البس غيرهم تعود بئا س / شايفا ان علقتك بالله فيها تقصير منك ؟ اه لاني مهما اعمل اكيد هكون مقصره س / ايه علقتك باهلك وشايفا انك فعﻼ بنت يعتمد عليها ؟ علاقتي الحمدلله فل احنا عيله مترابطه جدا وبما اني الكبيره فبيعتمدوا عليا كتير. بس انا بحس اني مش قد المسؤوليه خالص س / بتحبى مين اكتر الوالد واﻻ الوالدة ؟ ليه ؟ الوالد لانه حنين جدا ومتفاهم كدا ماما تزعق وتشخط على طول يعني لما بيكون في قلبي حاجه عايزة اقلها او مشكله بقول لبابا س / شايفا ان تربيه مامتك ليكم مش سليمه ؟ اه سليمه من ناحيه الدين والخلق بس ما عودتناش نعتمد على نفسنا يعني انا وحده داخله على 20 سنه مش بعرف اعمل اي حاجه. هتجوز ازاي بئا ؟ س / مرحله المراهقه كلنا بنتصرف تصرفات غريبه فيه ايه التصرف الى اتصرفتيه وندمتى عليه ؟ اكيد ندمتى على حاجا ؟ مره كنت عايزة اخرج مع صحابي بس ما رضيوش في البيت فقلتلهم رايحه اذاكر عند صحبتي وخرجت معاهم لحظي الجميل بابا خرج يقابل صحبه وشافني ما تكلمش خالص لغايه ما روحت وكلت علقه جميله واتحرمت من الخروج 3 اسابيع س / انتى ممكن تبقى متمردة على البيت ؟ وايه الحاله الى ممكن تتمردى عشانها ؟ هههه. بتمرد لما المصروف يقل . او يبئا في زياره لناس مش حابه ازورهم س / شايفه علاقه والدك ووالدتك باهلهم عﻼقه نموزجيه واﻻ فيها خلافات ومش حابه عﻼقتك باخواتك واهلك تكون زيهم ؟ هما علاقتهم كويسه بالذات خالاتي اما اعمامي مش بيعرفونا الي للمصلحه. طبعا بابا مش بيبين انه مضايق بس انا كبيره وافهم انا واخواتي متعلقين جدا ببعض زي ماما وخلاتي كدا س / امتى حسيتى انك غريبه فى تصرفاتك واتمنى ان حد يختفى من حياتك ؟ الفتره الي فاتت دي يعني نقول 6 شهور الي فاتو كانو صعبين اوي عرفت ناس كتير اوي كان فيهم ناس ما ينفعش اعرفهم بس للاسف عرفتهم واتعلقت بيهم س / حبيتى وفشلتى اكنر من مرة ؟ شايفا العيب كان فى مين ؟ انا بيتهيالي انا اكتر وحده اتقلها الكلمه دي . كله بيبئا لعب عيال يعني انا صغيره والي كان بيقلها قدي او اكبر مني بسنه مثلا لكن بما اني دلوقتي فتاه جامعيه ] حلوة جامعيه دي [ تقدر تقول كبرت وعقلت س / لسه بتحبى واﻻ خلاص الموضوع راح من دماغك ؟ انا بحب ولقيت الي يكملني واكمله بس مشكلتنا اني انا متردده افاتح بابا. خايفه يترفض لانه لسا في اخر سنه بكالريوس. بس بيشتغل وكله تمام :) س / لسه بتفكرى فى حبيبك واﻻ ﻻ ؟ ليه ؟ انا قلت فوق ان دخلت ناس كتير في حياتي كان منهم واحد معرفش حبيته ولا لا بس اتعلقت بيه جدا . كل الي عمله سابني وانا محتجاه بس دي احسن حاجه عملها عشان لقيت بعده الانسان الي فعلا بيحبني . على فكره بشوفه كل يوم بس مش فارق معايا س / مش شايفا انك متسرعه فى اﻻرتباط يعنى بتقفلى علاقه وبتفتحى غيرها خلال شهور ؟ العلاقه الي اتقفلت كان مجرد تعود مش اكتر والدليل اني عادي دلوقتي . لكني لقيت الانسان الي فعلا عايزني وكان دايما جنبي بس انا مش واخده بالي ليه اسيبه بعدين خد الي يحبك وما تخدتش الي تحبه س / شايفه انك بيضحك عليكى بسهوله من الشباب خاصه فى حكايه الحب واﻻرتباط ؟ كل بنت بيبئا نفسها فارس احلامها ياخدها ع الحصان ويطير بيها وانا بنت زي اي بنت لما قالي انه بيحبني انبسطت وقلت لقيت الي حقق معاه احلامي لكنه راح لحاله. والحمدلله ربنا عوضني احسن منه انسان فعلا بيحبني ومستعد يعمل اي حاجه عشان على طول اكون مبسوطه س / مين اكتر حد غيرتى منها فى حياتك عموما او قولتى يارتنى عايشه عيشتها ؟ لا الحمدلله انا مش من النوعيه دي خالص س / تحبى تقولى ايه لنفسك ؟ اقول لنفسي اعقلي وكبري دماغك وخدي بالك من نفسك وحبيها عشان هي تستاهل تتحب وماتديش ثقتك كامله لحد خليكي حذره دائما وبكدا بتخلص الحلقه الاولى انتظرونى وضيف جديد فى ( خلف الستار ) http://forums.banatmisr.com/imgcache/2/18933alsh3er.jpg |
حللوه الحلقه جدااااااا وفكرة البرنامج عاجباني جدااااا لكن انا بقولك حبيبتي خلي بالك من نفسك ومن قلبك بالتحديد .. ومش كل كلمه تتقال تسدقيها حتى لو كان عندك ثقه ف الي قالها .. حكّمي عقلك ف تصرفاتك اكتر شويا وهيا ان شاء الله مرحله وهتعدي وربنا يوفقك مع الي بجد يحبك ويخاف عليكِ .. موفقه دائماً |
حلقة جميييلة اوووي وفكرة البرنامج هاااااايلة الضيفة منورة مش هقدر اقولها غير ربنا يوفقها في حياتها وواضح انها انسانة طيبة ونفسها تتغير للاحسن ربنا معاها يااااااارب تسلم مورشو بانتظار الحلقات الجديدة |
جميلة الفكرة والأسئلة .. بالنسبة للضيفة : انتِ في سن لسه عواطفك مش مستقرة فمش تدخليها في ارتباطات عابرة بدون ماتحسبي كويس بتعملي إيه ومش تقرري انك في علاقة حب بئا وهتكملي وكدا إلا ماتفكري كويس مش كل تعامل ولاَّ حد كويس يبئا لازم تدخلي حب .. ربنا يوفقك في حياتك .. شكراً أ.مرشدي و الضيفة .. دوام التوفيق .. |
اولا : انا عارفة العضوة دي ومتأكدة منها تقريبا بنسبة 99% وبقولها ربنا يوفقك وتنجحي في حياتك سواء كانت العامة او العاطفية منور مورشو وحلوة الفكرة اسيح بئا واقول هي مين ولا بلاش ^_^ |
جميله فكره البرنامج والحوار صريح واهم حاجه ماتتسرعيش فى اتاخذ اى قرار عشان ماتندميش بعد كده وربنا يوفقك |
جميلة الحلقة والضيفة منورة وربنا يوفقك في حياتك وياخدك اللي يستاهلك تسلم عالحلقة،، |
انا كمان زى سما عرفتها لانها قريبة منى جدا ربنا يسعدها ويوفقها وتلاقى الانسان اللى يستحقها شكرا مورشو على الحوار كل التقدير والاحترام |
فكره جميله جدااااا وربنا يوفقك فى حياتك ويكون اللى معاكى يستاهلك فعلا |
فكرة جميلة مرشو ولى كلمة للضيفة أرجو منها قبولها بصفة أخوية ,, أولا بخصوص لبس البناطيل وأنك مش عارف تغيريها على شان أتعودتى عليها فعلى شان التعود دة صعب تغيرية طول ما أنتى عندك أقتناع أنها أنسب حاجة ليكى لو كانت بناطيل جينز ممكن تغيريها لبناطيل قماش فضفاضة وبعد فترة غيرى عبايات وأهم حاجة يكون عندك أقتناع وبعد العبايات حتتعودى بسى متزهقيش بسرعة , تانى حاجة مع أنك وصلتى لسن العشرين ولسة متعرفيش حاجة فى المطبخ فسورى بقى أنا بلوم عليكى مش على والدتك هو أنتى ألحيتى عليها أنك تتعلمى وهى رفضت حتى لو رفضت لازم تعرفيها أنك حيجى عليكى يوم وتبقى مسئولة عن أسرة ولا حتقضيها كنتاكى ولا هى حتسيب بيتها وتيجى تساعدك طبعا فى كل أسرة ما يكفيها ووالدتك مش حتكون معاكى على طول فى بيتك الجديد, وبخصوص قلبك طبعا الأخوة قالوا بما يكفى بسى أعتبرى تجربتك الأخيرة أخر تجربة أن وفقتى خير وبركة وأن لا قدر الله يبقى اقفلى على قلبك الفترة الحالية ورجعى تجاربك وأتعلمى منها لقاء جميلة مرشو وضيفة ربنا يوفقها تحياتى |
| الساعة الآن 12:13 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب