|
الحلقة الخامسة من ( لمن يجرؤ فقط ) مع ( SiLver Spectra ) بسم الله الرحمن الرحيم اهلا بيكم وحلقة جديدة من برنامجكم ( لمن يجرؤ فقط ) فى البداية احب اشكر الاعضاء الى بيهتمو بالتواجد دائما وبشكرهم على الرسائل الى بيبعتوها بخصوص التوبيك ضيف حلقة النهاردة ( أدارى متميز ) احد اعمدة المنتدى الفترة الاخيرة نزل بيان بخصوص الادارة البعض وافق علية والبعض الاخر هاجم هذا البيان هنعرف كل حاجا من ضيفى المتميز / SiLver Spectra http://forums.banatmisr.com/image.ph...ine=1376867366 فى البداية تعالو نشوف الـ ( 8 ) نقاط الـ اختار منهم ضيفى حياتى / اعترافات اعضاء المنتدى / سياسة المنتدى وجع دماغ / سؤال من مجهول كلام فى السياسة / صورة وتعليق تعالو نشوف الحوار : الاختيار الاول ( اعترافات ) اولا : بصراحة كدا بتضايق لما الاعضاء تحل مسابقاتك والا الموضوع بالنسبالك بيكون بشكل تانى وبتقول اية لما الاعضاء تبعتلك اجابات غلط ؟ هضايق من ايه :04: ماهي معمولة عشان تتحل بالعكس بيفضل في قلق من وجود خطأ . لغاية ما حد يحلها و يخلصها و حد تاني كمان يحلها برتاح خلاص ان المسابقة محلولة برغم من اني بعمل مراجعات كثيرة جدا و بيتم تصحيح عشرات الاخطاء قبل طرح المسابقة او اللعبة.. بس برضو لازم حد غيرك يراجع عشان نظرته هتختلف و هياخد باله من حاجه انت مش اخدت بالك منها .. و دا بسيبه للاعضاء وقت الحل و لذلك اي برنامج قبل ما ينزل نسخة كاملة بيتعمل حاجه اسمها (نسخة تجريبية) من خلالها بيعرضوها للمستخدمين عشان يكتشفوا الاخطاء الناتجه من استخداماتهم ثانيا : محصلش قبل كدا فى المنتدى واستغليت ( أداراتك للمنتدى ) يعنى رجعت عضو من حظر بمزاجك او حظرت حد من المنتدى بمزاجك والا شايف ان قراراتك كلها سليمة ؟ انت شايف اني بتعامل بشكل شخصي مع حد ؟ يعني الكلام دا لما مثلا ابقى قاعد بصطاد في بنات و احظر في دي و اظبط دي ..أو ابقى ماشي بستحلف لعضو ... هل انت شايف او سمعت عن موقف حصل فيه حاجه زي كدا ؟ أنا في حالي يا ابني ..و لا فاضي للحوارات دي :04: لكن قد يحدث العكس ..يعني تلاقي واحد قاعد بيتربصلك و فين ما تروح يمسك في هدومك ..اهو دا اللي بقوم مديله لطشه على وشه ههههه الاختيار الثانى ( سياسة المنتدى ) اولا : شايف ان قراراتك بتكون بالتشاور مع باقى طاقم الادارة يعنى بيان الادارة الاخير بخصوص ( الاخوان ) كان قرار فردى والا بالتشاور مع باقى الطاقم برغم من ( حودة ) ضد الجيش والداخلية . تم التشاور مع ساحر و هيثم بص ..عشان في ناس علقت كتير على موضوع الحظر دا ..انت شوفت حاجه حصلت ؟ أنا لو عايز اعمل ممكن اعمل من دلوقتي .. بس أنا ماكنش هدفي هو حظر اعضاء و لا آراء البلد كانت في حالة انهيار ..و البعض كان بيحاول و بيساعد على الانهيار دا ..و دا كان يوم الاربع (يوم الفض) و يوم الجمعة و بقى المشهد مرتبك عند ناس كتير ..لمجرد ان صور تتعرض عليه ..و أنا ما انكرش ان في حالات تعدي حصلت سواء من الداخلية او من انصار مرسي بس أنا مش هحكم بناء على صور هنا و صور هناك أنا هحكم كاجراء قانوني و هحكم بالقصة من بدايتها..ايه سبب التشرذم دا ؟ و مين اللي خلاه يبقى كدا ؟ أنا سبق و كنت قولت لاستاذ خالد (مسك الشهادة) ايام الاعلان الدستوري ..قولتله تعنت مرسي دا هيخلي وجودكم في مصر خطر! و بعدها حذفت المشاركة دي و اعتذرتله بس لو تبص دلوقتي هتلاقي دا هو اللي حصل ! في ناس بتنسى كل اللي فات او ماكنش فارق معاها في وقت كانت مصر بتبني و بتأسس نفسها ..الاخوان بيقلبوها دولة ثيوقراطية و لا فاشية دينية ..أو دولة ارشاد...مش فارق معاه و مش حاسس بخطورة الموقف مستقبلا..و احنا لسانا دلدل و احنا بناقش مشاكل و امور كتيره جدا ..و بمجرد ما تم عزل مرسي تلاقيه على طول راح كاتبلك : يسقط يسقط حكم العسكر ! يا اخي انت قاعد سنة ساكت و لا بتتكلم عن كل التجاوزات اللي كانت بتحصل ..كمل سكاتك بقى عشان بسببك كنا رايحين في دوامة مايعلم بيها الا ربنا..على اعتاب دولة قرون وسطى !! المهم عشان مش نفتح جدال كبير ..بس العملية مش بالبساطة اللي ناس بتتخيلها و بتفكر ان الموضوع هو انك مش عايز الاخوان و كارهم و خلاص ..مع اني قولتها خمسين مره اني كنت من الناس اللي انتخبوا مرسي في الاعادة !! نرجع لسؤالنا بسرعة مين السبب في التشرذم ؟ الاجابة : ارجع ليوم 11 فبراير ..يوم تنحي مبارك..وقتها كان كل المصريين ايد واحده و ماكنش في اي حاجه بتفرقنا و كل املي وقتها في دولة مدنية بتحترم الحريات و نبقى زي اي بلد اخر متقدم . ايه اللي حصل بعدها ؟ حصل تعديلات دستورية ..انا شخصيا فكرت كتير اوافق عليها و لا ارفضها ..و مش اخدت قرار الا قبل التصويت بيوم تقريبا بعد ما شوفت مناظرات كثيرة جدا..و كان قراري : مش عايزين نرقع الدستور و عايزين نبني بلدنا على نضيف ..و زي ما انت شايف ترقيع الدستور تسبب في حل مجلس الشعب و مشينا في مسار متخبط كانت نهايته هو اننا رجعنا تاني لنقطة الصفر .. لو من الاول كنت عملت دستور ثم برلمان ثم رئاسة (الطريق بتاع رفض التعديلات) كان زمان كل دا ماحصلش و كان زمان الدستور اتكتب بتوافق قبل ما كل حزب يغتر بنسبته المهم بقى يا سيدي ..الفترة مابين تنحي مبارك و استفتاء التعديلات الدستورية و هي تقريبا كانت شهر و 10 ايام خلالها الواحد فجأة لقى نظرة تعالي غير مسبوقة ..و تلاقي شيوخ بيصيحوا على المنابر ..صوت بنعم عشان الاسلام ..ليبرالية يعني ايه يا برادعي؟ يعني امي ما تلبسش حجاب !! دا زي انك تقول حرية يعني تقلع بلبوص في الشارع او اسلام يعني ارهاب !!! قمت العته و التخلف انه يسطحلك المفهوم دي كانت بداية الشرذمة ان فصيل قاعد يتاجر و يزايد على دين غيره و بيذكي الفتنة و التطرف لمصالح شخصية و لاقينا بعدها بشهور اسلاميين بالأعلام السوده نازلين مظاهرات في التحرير و اسلامية اسلامية ..و كلام معادي للتيارات التانية و من هنا ظهر التطرف و من ثم التطرف المقابل لازم القارئ يعرف الامور دي كويس ..مش يحكم حكم سطحي و كل اللي يدور عليه ان واحد اتقتل في اعتصام مسلح و المصيبه انهم بينكروا ان الاعتصام ماكنش فيه مسلحين حتى لو انت اعمى بس الكاميرات مش عامية !! لو سألتني عن الحرية ؟ هقولك الحرية في العناية المركزة دلوقتي الاخوان اخدوها و نزلوا فيها طعن و بعدين الجيش شدها منهم و اداها طعنتين تلاته كمان و ربنا يستر و مش يفرمها تحت الدبابة :04: ثانيا : الادارة منعت الكلام فى السياسة فى المواضيع وسبتو الكلام فى السياسة فـ الصفحات اية اهمية القرار ؟ وشايف انه جاب نتيجة والا لا ؟ أنا ممكن اقفل المنتدى و نخش نلم المشاركات السياسية كلها و نحذفها بس الفكرة انك لو عايز الناس تهدا يبقى لازم تديلها متنفس تعبر فيها عن اللي جواها و لو لفترة دي حاجه الحاجه التانيه ..الدم له حرمته و قدسيته يعني انا مش بضايق من ان حد يقول رابعه او يرفع شعار ليها في النهاية لازم يكون في جانب انساني يحترم فالدم مهما كان لازم يحترم و ماينفعش نقول يستاهلوا او مايستهالوش حتى انا كلامي ..بوضح فيه بشكل فلسفي مش اكتر ..مين لصالحه الدم يكتر طب هو فيه ضرب نار و ناس لا ليها و لا عليها قاعده فيه طبيعي هتموت ! دور على الدول حتى اللي بتحترم حقوق الانسان و شوف عملياتهم العسكرية كان بيموت فيها ابرياء ازاي الموضوع مش تعمد من القادة . بس انت تعمل ايه في ناس بتستخبى وسط دروع بشرية ! زي اللي بيحصل في سينا ..بتلاقي مسلحين بيضربوا و بيستخبوا في القرى و المدن ..الجيش هيعمل ايه ؟ يقصف البيوت !!؟ و لذلك انا لومي دائما على الطرف اللي بيتسلح وسط الناس .. اكتر من لومي على النظام لان المسلح دا مش بيفدني غير انه بيزود الفوضى في المجتمع هل مثلا زعلت على الناس اللي ماتت ادام مقر الجماعة في المقطم ؟ كانوا الاخوان بيضربوا عليهم نار ..ماقادرش الوم الجماعة هنا و ان كانت حيازتها للسلاح غير قانونية . ليه ؟ لان هنا في حالة تعدي و دا بينطبق على الهجوم على الاقسام و المظاهرات المسلحة البلاك بلوك ماليش اي تعاطف ليهم و لا كنت بايد اي حالات تعدي كانوا بيعملوها و أعيد و أكرر تاني ..في تجاوزات حصلت ؟ آه فيه تجاوزات حصلت ..طيب ازاي كان ممكن تمنع التجاوزات دي في ظل تعنت الاخوان اللي كان بقالهم شهر و نص في اعتصامهم ؟ اول ما هلاقي الاجابة دي هعارض طريقة الفض اللي تمت الاختيار الثالث ( كلام فى السياسة ) اولا : اية رئيك فى سلمية جماعه ( الاخوان ) وشايف انها فعلا جماعه مظلومة وتستحق الوقوف الاوربى - الامريكى بجانبها . الجماعة بتحترف لعب دور المظلوم ..دي ليها تاريخ اكتر من 80 سنة ! و اللي عاش عمره كلو بيشتغل تحت الارض عمره مايعرف يشتغل في النور حتى لما يوصل للحكم ! و دا كان اساس مشكلتي معاهم نشر الطائفية و الفاشية و سرية التنظيم و خطط التمكين .. دي هي مشكلتنا معاهم الغرب بقى مش هيفهم الحته دي .. كل اللي ادامه ان رئيس كان بيحكم و كان في خلافات و اخطاء له و هو بيحكم ..و الشعب غضب ثم الجيش عزله ثم لقى فض بالقوة مش هيعد بقى يفسر و يحسبها .. خاصة ان في تجاوزات فعلا حصلت بس تفتكر انت ممكن تعمل حزب نازي في اي بلد اوروبي ؟ طب جرب و شوف هيعملوا فيك ايه لان الحزب النازي فاشي ..قائم على العنصرية العرقية و اوروبا كلها اتحرقت بسببها في الحرب العالمية التانية الدول دي كلها لما بتحارب جماعات مسلحة بتخسف بيهم الارض و اقرأ عن الجيش الجمهوري الايرلاندي و الحرب الاهلية في الشمال اللي اندلعت بينه و بين الجيش النظامي البريطاني أو شوف طائرات امريكا اللي كل يوم و التاني بتقصف بيت في باكستان و بيموت فيه ابرياء كتير هل الناس دي بتاعت حقوق الانسان متعمده تموت ابرياء ؟ اظن حسب المبادئ بتاعتهم لأ بس هو بيحارب جماعات بتتخفى جوا القرى و المدنيين طيب هل دا خطأ ؟ اه خطأ بس مش هقدر انفعل عليه الا لما تبقى باكستان دولة محترمه شعبها مسالم و مش بيفجر و لا بيدعوا للتطرف وقتها امريكا لو عملت حاجه نرد و نقول عملتي كدا ليه في دول احتلت بالكامل زي المانيا و اليابان و تعتبر من اقوى الدول الاقتصادية حاليا شعبها مش قاعد يفجر في المحتل ..بل حط طاقته كلها في بناء الاقتصاد فبقى له مكانته الجديدة الدولية ثانيا : لما تيجى تسئل اى مواطن مصرى سواء مؤيد او معارض يقولك ( مرسى ) لا يستحق ان يكون رئيس . شايف منين الثقه فى عدم وجودة كرئيس ومنين الناس بدافع عنه وبتموت عشانة ؟ واية هى الشرعية من زجهة نظرك الشرعية التى يتحدثون دائما عنها ؟ مش محتاجه تفكير كتير هو ايه قيمة مرسي غير انه مدعوم من الاخوان المسلمين ؟ تفتكر الراجل دا لو كان مستقل كان حد اختاره ؟ لا كاريزما و لا خطاب و لا مظهر و لا عقلية و لا اي حاجه لو سمعت خطابه 5 دقايق تمل منه و هو عمال يقولك سواق التوكتوك و الاوتوبيس و التاكسي و يعددلك وسائل المواصلات كلها ..و ممكن في النص يقولك اه و نسيت كمان سواقين المترو :04: مرسي يفتقر لاقل مقومات رجل الدولة و لو بتسأل ايه هي المقومات دي اتفرج على الرؤساء و الدبلوماسيين بتوع الدول التانية و دا اللي انا سميته قبل كدا (فساد الاختيار) زي هنا في المنتدى لما عضو يبقى بيكتب شعر تعبان و يفوز في التصويت كل مره عشان له جماعته اللي بتصولته بشكل اعمى دي مصيبة و كارثة !! الاختيار الرابع ( وجع دماغ ) اولا : كذا مرة بتقول انك مش ناوى تكمل كـ ( أدارى فى المنتدى ) اية السبب ؟ وامتى لو اخد القرار دا هتنفذة ؟ أنا قاعدت فترة كبيرة مش بشارك و تقريبا مش بدخل .. لاقيت حالة ركود غير طبيعية في المنتدى بيصعب عليه فحاولت اشارك فيه شوية بعد نص رمضان كدا .. سواء للتشجيع او للاثراء وجودي لحاد اللحظة للدعم يعني انا لا بميز و لا بعين مشرفين قدرت ارد على شكوى برد قدرت اعمل مسابقة بعملها دا كل نشاطي .. موضوع اني اخلع البزة الحمره هيجي بس خليها مفاجئة بعد 5 سنين كدا :18: ثانيا : لية دائما الادارين الى بيكونو مع طارق بيمشو وبيمشو بسبب خلاف منهم ( ضياء و المراقب قلم بلا حبر و حنون ) ؟ هما دول بس ..في كتير جدا ممكن افتحلك القائمة همس الورح : انشغال و اعتزال للنت تكنيكال : اكل العيش مر :04: ميشو : اختفاء برضو مفاجئ ..رجعت فترة و بعدين برضو اختفت حنون : وافقت على اننا نغير ونجدد من الاداريين ضياء : قدم استقالته بسبب سوء تفاهم منه ايام الانتخابات الرئاسية الجولة الاولى .و اتصالحنا عادي و بكلمه كتير .. بس هو ماعندوش نية يرجع المنتدى قلم بلا حبر : اديته فرصة يرجع بس هو اهدرها الاختيار الخامس ( صورة وتعليق ) الصور هتكون لاعضاء المنتدى المنشاوى http://forums.banatmisr.com/image.ph...ine=1376449533 المنشاوي دا من الناس اللي دمها خفيف لفتني من زمان خياله الواسع في سرد القصة بطريقة مضحكة و مافيش بيني و بينه حاجه و الله كان مجرد خلاف بينه و بين عضو و اشتد و خرج عن شعوره و حصل اللي حصل لكن بصفة عامة انا عمري ماشوفت منه اي سلوك سيء ..بل بالعكس كان من اكثر الناس المحترمة احساسى صحيح http://forums.banatmisr.com/image.ph...ine=1376874666 عضو نشيط في الخواطر مش بتابع نشاطه لأني مش من رواد الخواطر و الشعر عموما و ايه كمان .. و بيكرهني :18: Mr. M ! r o http://forums.banatmisr.com/image.ph...ine=1377034608 ميرو دا بيتخانق مع دبان وشه :24: أنا أشك انه مكسر 10 كيبورد قبل كدا :18: هو طيب على فكرة ..بس لما يحصل موقف معين و ينفعل عليه بينسى نفسه في عصبيته شويتين تلاته .. ثانيا : كنت مع قرار عودتهم مرة تانية ورفع الحظر عنهم ؟ و ما يرجعوش ليه المسامح كريم :04: الفكرة مش في انك مش ترجع تاني الفكرة انك مش تكرر نفس الاخطاء و كلنا في النهاية بنغلط خلي انت بس نيتك حلوة لغيرك و الدنيا هتبقى زي الفل بكدا بتخلص خامس حلقات البرنامج . انتظرونا الحلقات القادمة تحياتى . |
تفتكر الراجل دا لو كان مستقل كان حد اختاره ؟ لا كاريزما و لا خطاب و لا مظهر و لا عقلية و لا اي حاجه عندك حق يا طارق مرسي لو مستقل مكنش هيلاحق واحد مصرى ينطق اسمه :18: هى جماعة الاخوان الى واقفه جنبه و سانداه باعتباره ممثلها دا مبارك الى بنى فى مصر 30 سنه (مترو انفاق و مبانى و جيش ...الخ ) محدش عمل الى اتعمل دلوقتى انا معاك فى وجهة نظرك السياسيه بس الحمد الله الامور هديت ياريت تفكوا القيود شويه بئا خلي المنتدى يستنشق الحريه و حالة الغياب الادارى و نشاطه من اسباب الركود الى شيفنها سؤال بئا ناوين كادارين هتعمل ايه الخطه الى جايه علشان خمود المنتدى العام ؟ حلقه جميله مورشو |
بجد حلقة جياية في الجون بجد جآآمدة من الاخر وصراحة في إجابات لطارق خليتني اموت ع نفسي من الضحك:24: تسلم يامورشوا بجد ع الحلقة واحسنت في اختيار ضيفك |
حلقة بجد جميلة جداااا تسلموا فى انتظار الجديد :) |
حلقة رائعة واجابات اروع تسلم مورشو للإستضافة ،، |
مغسي على مروركم :04: بالنسبة ليك يا نور الموضوع مش تقييد حريات الموضوع اننا مش عايزين نعصب و نفتعل على بعض و يبقى المنتدى مكان للراحة انا اعرف جروبات كتير جدا عالفيس منعت السياسة بعد ما ناس كتير شدت مع بعض و الموضوع للاسف بيقلب بشكل شخصي فكدا اشطه ياعم لما الدنيا تبقى تهدا كمان و كمان نبقى نفتح السياسة |
حلقه جميله ورائعه تسلم |
احساسى صحيح عضو نشيط في الخواطر مش بتابع نشاطه لأني مش من رواد الخواطر و الشعر عموما و ايه كمان .. و بيكرهني :18: ابدا عمرى ما كرهتك ولا كرهت اى حد اختلفت معاة يوم انا لو كرهت اكرة الفعل الغلط ولا اكرة الشخص نفسة لأن المواقف والتجارب علمتنى ان اى انسان اختلف معاة يوم الدنيا بتلف وتتغير وممكن نكون اقرب الناس لبعض ,, وفعلا حصل معاية الموقف دة كتير ,, اكييد انا مش كارهك لانى لست منافس لك على منصب هنا .. واكييد انا ليا ملاحظات كتير على ادائك الادارى خاصا فى الشكاوى والتعينات وكذلك بعض المواقف ,, وكنت فاكر انى لما انتقدك او ابرز اى خطأ ,, هيقابل بقبول على اعتبار اننا هنا فى منتدى وكلنا اخوات بدليل انى اعطيتك مقبول فى الاستبيان انتا وحنون ولم اعطيك سىء او سىء جدا فاذا كنت فعلا باكرهك اية يمنعنى انى اقيمك اسوء تقيم ؟ ولكنى لم اغفل خبرتك فى الدعم وتحمل مشقة المتابعة والمجهود والسهر انتا وحنون انا فقط كانت رؤيتى واضحة للاستبيان انة كان خطأ بدليل ان الجميع بعدها اجمع انة كان خطأ واعتقد انة لن يتكرر مرة اخرى انك تعطى ( شهادة لشخص انة راسب ) وكمان رؤيتى لأداء الادارى بوجة عام انة شخص بيتقبل النقد بدليل وصولة لتلك المكانة طالما النقد لم يكن فية تطاول او اهانة وانا عمرى فى حياتى ما نافقت انسان بدليل انى انتقدتك انتا بالذات ولم اخشى الحظر وانتا اكبر راس هنا :18: ع العموم هى فرصة للمصالحة بينى وبينك ولو انى فعلا حقيقى مفيش اى شىء سىء نحوك سوى انتقادى لادائك الادارى فقط وبالاخر احنا اخوات مهما اختلفنا ايدولوجيا وفى النهاية ارجع واقول انى لن اتوقف عن انتقاد اى فعل ادارى اراة من وجهة نظرى خطأ كما يفعل مثلا مورشو ,, ولكن بكل ادب واحترام وكما تعودت دايما . شكرا لك لحوارك ولو انى اختلف بردوا معاك فى رؤياك السياسية ولكن رأيك يحترم فى كل الاحوال شكرا لك ولمورشو على الحلقة الدسمة دى وعذرا للاطالة . |
اقول الحلقة جميلة تمام ليا تعليق صغير انا مش سياسية لكن كل اللى بدور علية هى الادامية والحلال والحرام بص هى طريقه الفض بعيده كل البعد عن مبادىء الدين وحرام شرعا لقول الرسول علية الصلاة والسلام " من خرج على أمتي بسيفه يضرب برها وفاجرها ولا يتحاشى من مؤمنها ولا يفي لذي عهد عهده فليس مني ولست منه " غير أن حكم المحمى فى المسلمين لا يجوز قتله وسط المسلمين الا اذا كان كافر نخاف على المسلمين منه وده فى حاله الحرب واحنا مش فى حرب وغير أن دم المسلم على المسلم حرام ما عدا فى حالة القتل المتعمد وغير ان القتل العمد يحاسب عليه بالقتل م نفس الشخص مش من جموع من البشر حتى لو تم اعلامهم بالخروج الآمن كان ممكن الفض بحلول تانيه ادام الاعتصام غير قانونى كان ممكن يمنع دخول الاكل او المياة مع انى ضد اى شىء يعرض الانسان للخطر بس ده هيبئا ارحم من القتل الجماعى ولو هنقول البلد بتقع بسبب الاعتصام ولازم الفض ولازم اللجوء للحلول السياسية والعسكرية مينفعش ابعد عن المبادىء اللى الدين شرعها على المسلمين واقول سياسة وعسكرية لانى بكده بخرج من حيز الدين والرحمه بالمسلمين ولو هنقول امريكا والحروب وباكستان واوروبا والجيش الايرلندى والبريطانى دول بتوع حقوق انسان فقط وتعدوا حقوق الانسان وده خطء لكن مش مسلمين وعارفين ان قتل الابرياء حرام وغير جائز فى الدين الاسلامى اهو بعيده عن حقوق الانسان وحرية الرأى |
طيب يا اسيل و الحل كان ايه ؟ نرجع مرسي تاني يحكم ؟ ماهو حكم تعنت قاطع الطريق في قطعه ؟ بمعنى ان المفروض له عقوبة شرعية و هي قطع ايديه و رجله ..طيب و لو اصلا مش رضي يجي معاك عشان تنفذ الحكم دا و فضل قاطع الطريق ايه الطريقة اللي تتعامل بيها معاه ؟ |
| الساعة الآن 02:09 PM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Content Relevant URLs by vBSEO 3.6.0 RC 1
منتديات بنات مصر . منتدى كل العرب