منتديات بنات مصر - كلام في السينما

بعد مشاهدة عدد كبير من افلام العام الماضي 2012
حبيت أعمل تقييم شخصي للأفلام
التقييم هعمله لأعلى 30 فيلم من حيث الإرادات في 2012

اللون الأخضر = فيلم كويس
اللون الأصفر = فيلم وسط
اللون الأحمر = فيلم سيء
بدون لون يعني مش شوفته و مش عايز أشوفه :04:

http://banatmisr.com/up3/uploads/1379110110611.jpg

===============
أفضل أفلام 2012 (برأي الشخصي)

المركز الأول

http://banatmisr.com/up3/uploads/1379110110693.jpg

قصة مشوقة و تسلسل أحداث سلس و اخراج قوي
الفيلم خيالي شوية لكن مش فانتازي
و القصة باختصار هو ان دولة بتتكون من مقاطعات منهم 12 مقاطعة تمردت على النظام من 70 سنة
بعد سحق التمرد ..تم تطبيق نظام و عرف وطني في ال12 مقاطعة و هي حاجه اسمها (لعبة الجوع)
عن طريق اللعبة بيتم اختيار شاب و شابة من كل مقاطعة بشكل عشوائي (بالقرعة) . و من ثم بينقلوا الى العاصمة و بيكون مطلوب من ال 24 شخص المختارين انهم يقتلوا بعض و يفوز واحد بس ..
تسلسل الأحداث هو أكثر ما يميز الفيلم

=====================

المركز الثاني

http://banatmisr.com/up3/uploads/1379110110714.jpg

فيلم ظريف فكرته مجنونة شوية و هو عندي أفضل فيلم انيميشن في 2012
القصة هو ان شخص شرير في لعبة اتاري (نينتيندو) بيتغاظ و بيبقى نفسه ياخد ماديليا ذهبية زي بطل اللعبة و بيبقى عايز يبقى محبوب مش شرير ..و من هنا بتحصل مغامرات و أحداث كثير و بيدخل جوا العاب تانيه و الدنيا بتبوظ

===============

المركز الثالث

http://banatmisr.com/up3/uploads/137911096631.jpg

أفضل فيلم من الناحية الاخراجية
تتفرج كدا و تسرح مع نفسك ..
الفيلم شبه صامت ..
القصة هو ان شاب هندي من عيلة بتربي حيوانات في حديقة قرروا انهم ينتقلوا إلى كندا بحيواناتهم
و السفينة بتغرق و الولد بيلاقي نفسه وسط البحر في مركب مع النمر
و تقريبا الفيلم كلو وسط البحر في مركب مع نمر :04:
و النمر طول الفيلم مفترس جدا ..عذب الواد كل شوية ينط من المركب :18:
فيلم مغامرات حلو جدا و نهايته كويسه

=====================
المركز الرابع

http://banatmisr.com/up3/uploads/1379110110876.jpg

قولنا نحطلكم فيلم رومانسي :09:
القصة ان بنت الحلال دي بتعمل حادث و بتنسى الواد حبيبها دا اللي كان متجوزها قريب ..
البت بتفتكر الواد اللي حبته قبل الواد دا
و الواد التاني بيرسم بقى و بيبقى عايز يرجعلها
و الغلبان اللي حاضنها في البوستر دا هو اللي بيروح في الرجلين :18:

===================

المركز الخامس

http://banatmisr.com/up3/uploads/1379110110927.jpg

فيلم سياسي
بيتكلم عن حادثة اختطاف الأمريكان في سفارة امريكا في ايران بعد الثورة الايرانية و الاطاحة بالشاة سنة 1979
حصل اختطاف لجزء منهم ..و في جزء اخر قدر انه يهرب من باب السفارة الخلفي و الاختباء في بيت السفير الكندي

و بتدور القصة حولين قدرة الاستخبارات الامريكية في التنكر و السفر الى ايران بدعوى انهم رايحين يصوروا فيلم سينمائي و هما في الاصل رايحين ينقذوا الامريكان اللي مستخبيين في بيت سفير كندا

========================

أما الأفلام السيئة بوجهة نظري ..منها افلام محققه اعلى ارادات ..تتفرج عليها ماتلاقيش اي فكرة بس اكشن و تدمير ..و النوعية دي من الافلام مش بستلطفها و بركز في دقايق الفيلم (امتى هيخلص) اكتر من تركيزي في الفيلم نفسه !! ..زي باتمان سبايدر مان و التاني بتاع Avengers و ابطال بيجمعهم و قصة اتهرست في خمسين الف فيلم قبل كدا
أو twilight اللي معرفش البنات بتموت في ليه !
قصة فيمباير كمان اتهرست في مليون فيلم و مسلسل

-----------
معلومات اضافية
الافلام الامريكية الرسمية حققت 11 مليار دولار ارادات داخل امريكا بس في 2012
و غالبا بتحقق نفس المبلغ دا او أكتر خارج أمريكا
يعني صناعة السينما بتجيب مش اقل من 25 مليار في السنة (ارادات دور عرض فقط)
غير بقى بيع الافلام و المسلسلات للقنوات حول العالم و الديفيديهات ..
غير الافلام الغير رسمية

عارفين بقى قناة السويس بتجيب كام ؟ اللي كل ما واحد يجي يفتيلك يقولك البلد دي مسروقة دا كفاية إن عندنا قناة السويس !
المفروض تنبهر بقى و تقول اه يا ولاد الحرمية دا احنا المفروض نعيش ملوك !!

قناة السويس بتجيب في السنة 5 مليار دولار اقل او اكتر شوية
يعني ارادات فيلم avatar (صاحب اعلى ارادات في تاريخ السينما) لواحدها بس تعمل نص ارادات قناة السويس

بس كفايه كدا
بديكم خبراتي السينمائية أهو ..أي خدعة :04:

لو الموضوع عجبكم نبقى نعملكم غيره بتعمق اكثر
بفكر اشتغل ناقد سينمائي زي عم طارق الشناوي