ارتجالة بين :
الشاعر | على المرسى بيلا | ‫#‏كفرالشيخ‬
الشاعر | محمود أبو زيد بلطيم | #كفرالشيخ
تحت رعاية :نادي أدب كفر الشيخ


محمود
ليه لما ديما نبتسم ..
نتحسد ..
والحزن دا عنوان لقلبك
لو عشق ...

على
مش عشق طعم المسكنة
وحده اللى فرض ودين
القُرب من قلب اللى بتحبه
استحاله يضيق
هى المسافة الواصلة بين فعلين
دايما بتكتب ع الوجع
وتئن

محمود
محسوبة دقات السعاده بالثواني
حتي اللي حبه قلبي فاني
بعزف شجن يطلع اهات
متمسكنه جوا بثبات
ترفض تعيش لحظة
سعاده ليها النهاية فالكتاب

على
والكتاب يا عمرى مدفون
ويّا كهف الإنتظار
واحتمال الصبر يخلص قبل
وقت الإحتضار
سيب كفوف الحلم تزرع
نيتة العشق الجميل
وابتدى تخلع مواجعك
وانتشى رغم الظروف

محمود
صوتي بين جبال العشق
محروم من الصدي
ليه بتطلب مني امحي
حاجه فيا معلمه
يوم ما اقول في الحب غنوه
كلمه حلوة كويسه
تنكسر كل المشاعر
والدموع تعلن قرار الملحمه

على
لسه برضه الدمعه
شبطانه ف فرح
وممدد الشوق فوق عيون الحالمين
يا جمالك المرهون
بجنة الإشتياق
اعشق بروحك وارتفع
تلقى البراح متشاف

محمود
واللعبة راح تبتدي
والفرح مش مضمون
الوحده عندي احن
من قلب عاش مكسور
خايف اكون فالجرح
مكتوب عليا الدور

على
والدور هييجى هييجى قوم واجهز
قدّم ورق املى استمارة حضور
شوق البداية منحه م المولى
هز الوداد واوصِل شواشى النور
فكّر ثوانى ف بكرة بالإحساس
الناس كتير
والشوق لناس ولناس

محمود
مشتاق لحضن يضمني
اجري عليه واترمي
تنزل دموعي تترسم
علي خدي ورده
حابب اعيش دنيتي
وحبيب يشارك رحلتي
همحي خلاص دمعتي
من النهارده ..

على
اكشف ستار الود من بابه
وارسم بكفك ضحكتين ع القلب
مش عيب يطب العقل ف الأشواق
القلب قائد جدع
هيسد عين الشمس
كمّل يا صحبى
ودمعتى ويّاك

محمود
انا فوق كتافي مل
من حملي للاوهام
نفسي اسعدك ياقلب
ترتاح عينيك وتنام
تنهي ستارة باب
بديته بالاحزان