[الفرعون العاشق الزملكاوى]

بسم الله الرحمن الرحيم --------------------------------------------------------------------------------



السلام عليكم ورحمة الله وبركاته,,

بصراحة حبيت اتكلم معاكم شوية عن الطيبة وعلاقتها باهبل كما يزعم البعض,,,


بجد يا جماعة الشخص الطيب ده مظلوم معانا أوى دايما تلاقيه موصوف بالعبط والهبل والسذاجة او انه مش ابن الزمن ده على اساس انه مولود سنه 1899 وجه بآلة الزمن عندنا مثلا

بقى الشخص اللى بيعامل غيره كويس بحسن نية وصفاء وايثار يبقى اهبل والانسان الخبيث اللئيم اللى بيضحك على مخاليق ربنا يبقى هو ده الفلتة اللى محصلش وده اللى نعجب بيه ؟؟ سبحان الله بجد على ده زمن مقلوب

مش عارف ليه كلنا او معظمنا بنستغرب الانسان الطيب اوى واحيانا كمان بنتريق عليه عشان خدم حد او جه على نفسه عشان يساعد غيره ونقول لاااااااااا ده أهبل

مع ان الطيبه والهبل ملهمش علاقة لغويا ولا سلوكيا ولا باى نوع تانى من انواع العلاقات

من كتر مانا مستغرب من ارتباط المعنى ده فى ذهن الناس جيت على نفسى اوى واتحركت من مكانى وقمت كمان جبت المعجم الوسيط -اللى عمرى ما فتحته ولا فكرت افتحه شان اشوف فيه كلمه واقفه معايا-عشان اشوف ايه علاقه الطيبة بالهبل لقيت الآتى:

(هـ .ب.ل) : فلان......أى فقد عقله وتمييزه

(ط.ي.ب): كل ما خلا من الأذى والخبث

اهو يا جماعة ملهمش علاقة خااااااااااالص المعنى الاول يعنى الانسان بيكون عقليا غير متزن عنده خلل عنده هسهس يعنى بيكلم نفسه وهو مااااااشى

التانيه يعنى شخص كريم محترم لا بيتخابث ولا بيتلائم على حد وعمره ما كلم نفسه وهو ماشى فى الشاعر ولا بيغنى انا عندى شعره ساعة ترووح وساعة تيجى.......

بقى بذمتكم دى فيها ايه تزعل الناس منه او تخليهم يسخروا منه ويتهموه بفقدان العقل وانهم هم اللى جايبين الديب من قفاه

ده حتى البنى آدم الطيب دلوقتى من كتر اللى بتقاله بقى بيحب ينفى عن نفسه التمهة ولو حد مدح فيه فيه طيبته تلاقيه بيقول انا طيب اه لكن مش عبيط

طيب وهو حد جاب سيرة عبط لا سمح الله ...........

خلاص بقت الاخلاقيات الجميلة وصمة عار بنحاول نداريها ؟؟

ليه منمدحش الطيب لطيبته وحبه للخير وحبه مساعدتنا ولا احنا لازم ناخد على دماغنا ونتعامل مع ناس ميعرفوش يعنى ايه خير ولا يعنى ايه مساعدة او ايثار ونرجع نقول اييييييييه دنيا فين ايام الناس الطيبين والزمن الجميل ؟؟



انا من راي ان اي انسان قلبه طيب لازم يفتخر بنفسه وميداريش الميزة دي عنه لانه بجد الصفة دي نادرة في الزمن ده ويمكن عشان كده الناس بيفتكروها عبط




اتمنى اشوف ارائكم في الموضوع