اغنيه بتحرك مشاعر كل مصرى بيحب بلده
وبيعشق ترابها
وبيحب ناسها
لكن هى فين البلد ؟؟ تاهت
تاهت بسبب اللى بيدور على تقسيم اراضيها
تاهت بسبب اللى بيبع مصانعها
تاهت بسبب اللى بيهرب اثارها
تاهت بسبب اللى بيزور الانتخابات
تاهت بسبب اللى بيبدد اموال التأمينات الاجتماعيه
تاهب بسبب نهب أموال العلاج على نفقه الدوله
كل الناس مشغوله وتاهيه وكله بيقسم عزبه مصر
مش عارفه اقول ايه ولا ايه
بلدنا غاليه اوى علينا احنا بس الناس التعبانه الشقيانه
اللى فى أى لحظه هيقفوا يحموا بلدهم
لكن اللى نهب... نهب واللى سرق... سرق
بقى مفيش حد بيفكر فى مصلحه البلد دى
كلا يبكى على ليلاه
انا خايفه على مصر اللى بحبها ومقدرش ابعد عنها
انتمائى للبلد دى غريب اوى
لكن لما سمعت ان دول منابع النيل غيرت اتفاقيتها وعهودها لدول المصب
اللى هما احنا مصر
وده لصالح مشروعات صهيونيه هتقام على منابع النيل من مياة نهر النيل
عارفين كل ده ليه لاننا رفضنا اننا نتعاون فى تنميه دول حوض النيل
وبالتالى مين اللى هيدفع بكل سخاء غير اسرئيل
طبعا دى كلها خطط كبيرة اوى من اسرئيل وامريكا والصين عشان يقدروا يسيطروا على بلدنا
اكتر ما هما مسيطرين ويتحكموا حتى فى اقل حق لينا هو المايه اللى بنشربها
لاننا بصراحه اهتمانا باللى اكبر من كده وهو اننا نربى الفساد ورعايه الفاسدين
لاننا عندنا بنود صرف اهم من اننا نحافظ على بلدنا من المخططات
ناس بيجلها الاكل من فرنسا مخصوص
هيهتموا ليه بقى بالنيل ما تنقص المايه ويغور النيل
ويموتوا الناس من العطش والجوع وغصب عنهم يستحملوا
مش هى دى بلدهم؟
ممكن اكون عندى نظرة تشأوميه
لكن هو ده اللى هيحصل
مش هنلاقى حتى المايه نشربها
ونلجأ لاسرئيل ويدخلوا بلدنا
وهيبقوا مماليك لان بكل بساطه البلد اتسرقت واتنهبت وضاعت
حتى نهر النيل ضاع
فين حب الناس دى لمصر ؟
فين انتمائهم لبلدهم؟
فين الضمير ..فين الحب ..فين وفين وفين
دوروا على بلدكم تاهت لبسه تيشيرت مخطط بالعرض احمر وابيض
ولابسه نضارة سوده
ربنا يتولنا برحمه