[بنت العبد]

السلام عليكم ورحمة الله وبركاته
صباح\مساء النجاح والعزه لاغلى شباب وبنات فالدنيا
عمرك اتحطيط فموقف وظروف صعبه ولقيت نفسك بتتصرف وبتعمل حاجات
عمرك متخيلت انك تقدر تعملها فالظروف العاديه ؟ موقف يخليك تشيل
خوفك من قلبك وتحطه تحت رجليك علشان انت مضطر لكدا؟ ولكن يا
جماعه وعن تجربه المواقف هى اللى بتعملنا هى اللى بتخلينا نكتشف اننا
عندنا قوى وشجاعه مكناش نعرف عنها حاجه...مش هطول عليكم
كنت فى امتحانات ااخر العام وانا ساكنه فى دار مغتربات علشان كليتى
فى محافظه بعيده عن محافظتى اللى بعيش فيها والامتحانات كانت يوم ويوم
وطبعا مستحيل اروح واجى علشان بعد المسافه لكن لازم افضل فالسكن حتى
نهاية الامتحانات علشان اوفر الوقت والحق اراجع قبل الامتحان المهم..لحد نصف
امتحاناتى وكل شئ تمام وفيه بنات ساكنين معايا فدار المغتربات دى وبيمتحنوا هم كمان
وفيوم راجعه مالامتحان عالسكن ولقيت المبنى فاضى مفيش نفس فيه المهم ضربت
على واحده من الادره وسالتها قاليتلى يابنتى كله خلص امتحانات وروح لاهله وانتى
اللى لسه وكان فاضل 6 ايام على امتحاناتى متخلص وقالتلى خليكى لوحدك او اتصرفى
طب اعمل ايه؟لازم اقعد علشان امتحاناتى مينفعش اسافر انا بمتحن يوم ويوم . المهم
قررت انى اقعد فعماره 5 ادوار لوحدى .والمصيبه يا جماعه انى لقيتهم فصلين الكهرباء
عن المبنى كله عشان الفتوره وسيبين بس نور غرفتى والله حتى الحمام فصلين النور عنه
المهم انا كل اللى فدماغى مستقبلى وامتحاناتى تخلص على خير وزى مانا بتمنى المهم
قعدت.. خمس ادوار عليا لوحدى ولازم استحمل لمدة 6 ايام عالحال ده لحد مخلص واروح بلدى
العماره ضلمه كانها مكعب فحم بالليل وانا لوحدى وانا بذاكر بالليل لو القلم او كتاب وقع منى اخاف من
صدى الصوت لو كحيت او عطست اخاف من صوتى لو الهوا خيط الشباك روحى تروح منى
المصيبه ان غرقتى فالخامس والغرفه اللى مقابله لغرفتى بيقولوا انها عايزه تترمم ومقفوله
بقالها خمس سنين وكان البنات يقعدوا يحلفوا انهم بيسمعوا فيها جر الكراسى وخبط فيها
واصوات بس انا كنت بزعق فيهم واقلهم ده كلام فارغ بطلى تفاهه انتى وهى بس لما المبنى
فضى عليا الشيطان بقى يوسوسلى ويفكرنى بكلامهم علشان اترعب مع انى مش مقتنعه بالهبل
ده والله يا جماع زى مبقولكم كدا ..ولما كان الفجر يدن وانا بذاكر طبعا لازم اقوم اتوضا علشان اصلى
الحمام مفهوش نور افضل احسس لحد مدخل ملقيش مياه فالخامس لان الميه مبتوصلوش افضل احسس لحد الرابع وها كذا
لحد التانى الاقى فيه مياه تخيلوا ادخل 3 حمامات فالضلمه عشان الاقى ماء اتوضا واحنا عرفين ان الحمام مكان خبيث
ولازم يكون منور والله كان لما الليل يدخل قلبى كان يقف مالخوف واقول
لنفسي رحلة الرعب ابتدت بس اعمل ايه مستقبلى مفيش حل غير كدا بالليل كنت اخد الكتب واطلع
البلكونه واقفل على نفسي من بره علشان اقنع نفسي انى مع الناس اللى تحت فالشارع دول
انا مش لوحدى انا مع العالم اللى بره ده مش العالم المخيف الضلمه اللى ورايا والله متعرفوش
ربنا الهمنى الصبر فالرعب ده لحد مخلصت االامتحانات وروحت لاهلى
المهم ياا جماعه انى بعد مروحت بلدى ووصلت بيتى اسال نفسي معقوله انا عملت كدا؟
معقوله قلبى جامد للدرجه دى ؟مع انى فالطبيعى بخاف مش ممكن حتى اطلع على سطح البيت
او انزل الجنينه بالليل من غير بابا او اخويا ياااااااااه 6 ايام من الرعب والتحدى مع النفس ومذاكره بجد.
ياترى يا جماعه المضطر يركب الصعب ؟
وممكن صعوبة الموقف تخلينا نعمل اللى ميتعملش؟
طب لو حد حصله موقف ياريت يحكلنا .
دمتم كما تحبوا